ivanliresearch

［貨幣戰爭］實戰篇，講日本，韓國（今次唔整到個題咁長了，平時係有原因的） (Patreon)

Published:

2022-09-08 21:37:44

Edited:

2022-09-08 22:56:57

Imported:

2022-09

Content

貨幣戰爭—實戰篇（先講日本，韓國）

未必話到你知日圓跌到幾時，英鎊跌到咩位。但可以話你知要留意乜

《貨幣戰爭》是垃圾，但「美國收水人人當災」就大約係事實

點解「美國收水人人遭殃」？唔使陰謀論，係常識啫

「美元是我們的貨幣，你們的問題」—有冇留意係幾時講？咩背景？

順手快講「廣場協議」

點解美金係咁印都冇貶值？好簡單，「因為其他人印得仲多」

數字上係美國印得多過日本，但有冇諗過美國大幾多？仲有息口呢？

計及GDP，日本先印得最狼。況且疫情下加速得好快

之前「末日博士」（唔係香港嗰個）話日圓去到140央行投降添，結果呢？

Tora！Tora！Tora！—你可以估下，日本央行會唔會預警

你唔會以為「通脹有得加人工所以冇乜嘢」下話？

之後講韓國：韓圜係一隻好奇怪嘅貨幣，似台幣，甚至人民幣

兼快講1998年韓國金融風暴，「破產」「捐金救國」，有幾多係真？

想跟得貼，但又唔敢跟太貼：韓圜盯住日圓，正如人民幣盯美金。

之前Jackson Hole會議，韓國央行行長講明「日本人令我好頭痛」

但點解韓國唔敢跟足貶值？點解韓圜跌得少過日圓咁多？

JPY/KRW長期都係差不多水平，你可以估下點解

韓圜跌到13年低位，13年前咩事？你話呢？

最後留意：韓國2008年，根本冇「用盡」外匯儲備

「咁香港呢」？—但記住，外匯儲備，唔等於「銀行體系結餘」

節目預告：下回講英鎊，歐元，人民幣，港紙，加紙，甚至印尼盾

貨幣戰爭—實戰篇（先講日本，韓國）

1. 似乎唔少新讀者係想睇呢篇文。強烈建議你睇咗上篇文先，了解最基本嘅嘢。講明先，呢篇文未必話到你知「英鎊日圓之後升定跌」，或者「跌到幾多先買」—諗真啲，係不可能事先估到嘅。

未必話到你知日圓跌到幾時，英鎊跌到咩位。但可以話你知要留意乜

2. 不過，都大約可以畀到你判斷下。即係例如我會話到畀你知，你要睇啲乜。具體啲，例如股市（貨幣都係），我話唔到你知幾時反彈，甚至未必話到你知幾時停加息（但大約可以估）—但我可以話你知，到你見到差不多有啲減慢加息嘅味道，就應該見底—雖然我仲係話唔到畀你知，到底幾時會有呢啲味道，要到差不多出現時至知。細心諗多啲呢段嘢。

3. 再具體啲，可能我會話你知，拿，到你見到A，B，C呢啲事件出現，咁照計啲嘢就跌定架啦。但我話唔到畀你知A，B，C之類幾時出現。甚至話唔到畀你知，到時係跌到乜水平（股市易啲，匯市難啲，因為係「相對」，雖然都可以試下嘅）

《貨幣戰爭》是垃圾，但「美國收水人人當災」就大約係事實

4. 實情唔係好鍾意「貨幣戰爭」呢個題，有啲嘩眾取寵。但冇法，讀者鍾意。固然宋鴻兵本書相當垃圾（唔知乜水或唔知邊本書就你有福），但陰謀論，假新聞等等，永遠係滿足你嘅想像，就係一啲「你願意相信係真（可惜唔係真）」嘅嘢。

5. 話說回頭，「美國收水人人遭殃」呢個東西，倒係一般係啱。亦唔係咩陰謀論，根本好合理。記住上篇講嘅一個重點（都話有用架啦）：匯率係相對嘅東西，亦一般係zero sum game，你升我跌，你跌我就升。實務上因為美元嘅地位，就即係「美金vs全世界」，而當然美國唯一考慮嘅係自己利益（實情差不多所有貨幣都係，除咗歐元比較得意—問題唔係個個有實力。）。

點解「美國收水人人遭殃」？唔使陰謀論，係常識啫

6. 名句：Dollar is our currency，your problem，絶對是真的。明顯係太真心，Freudian slip．或者係不可一世，講埋畀你知，你又可以點？另外，好多人冇留意呢句嘢嘅時代背景—係1971年。長期讀者可能會知發生咩事—正係尼克遜廢除金本位制，從此進入「法幣」年代，美金任印（其他貨幣都某程度係）（有篇好長嘅Patreon舊文寫過），然後江湖從此多事，正如我Facebook 成日講嗰句：進入人類史上最「金融化」嘅大半世紀。亦都留意，美元成為絶對主導，因為二次大戰後全部人都重創，戰前嘅霸主英國德國日本等等全部元氣大傷，美國經濟冇乜受影響（本土冇打仗），成為絶對大佬。

「美元是我們的貨幣，你們的問題」—有冇留意係幾時講？咩背景？

順手快講「廣場協議」

7. 最後留意，1971年，大陸就窮到褲都未有得著，所以「美元霸權」云云，就明顯唔只係針對中國，「即係嗰期邊個紅就針對邊個」。呢個講法都有啲道理，例如好多人聽過：70-80年代，日本經濟幾乎威脅到美國，「廣場協議」迫日圓升值，令日本冇競爭力，出口玩完，經濟爆破，迷失四十年—係有啲過度簡化，但亦有一定程度係事實（但留意，日本當時某程度係美國「附庸國」）

8. 講得太虛，不如就由大家最關心嘅日圓開始講，因為最易示範。

9. 上篇文最尾，貼過三個圖。第一個圖不用多講，幾隻貨幣今年對美金都跌，美匯指數一支獨秀。留意可能數字爭咗幾日，唔好嚟同我拗。又，你想睇最新數字，上Google finance都OK

10. 第二個圖以前Facebook 貼過，不重覆。上篇文寫過，「印錢」（實務上可以睇央行嘅balance sheet）理論上應該會令到貶值，實情係…..一半半（你可以睇2008之前日本嘅玩法，都唔係好見大貶值）。

點解美金係咁印都冇貶值？好簡單，「因為其他人印得仲多」

11. 不過最重要記得，匯率係相對嘅！所以印錢亦係相對。你話美國印得多點解美金未變廢紙？好簡單，因為其他地方印得仲多！

12. 你睇數字，好似會見到美國印得最多。但，有冇諗過美國經濟體系大過日本同歐元區好多？仲有，在非本國嘅「用途」，爭得更加遠。仲有，Facebook都有寫，有冇諗過三地嘅息差？唔止講而家。你話美國低息，但日本極長期都係零息，歐元區都相當長時間。咁你話，點解美金匯率冇不停跌？係咪即時明好多？

數字上係美國印得多過日本，但有冇諗過美國大幾多？仲有息口呢？

13. 好啦，另一個圖，另一個角度睇，更明顯。呢個就係央行嘅Balance Sheet（你當即係「印咗幾多錢」），同GDP嘅比較。睇最低最深色條線，當然你會見到2008金融海嘯後嘅QE（量化寬鬆），同埋2020疫情後嘅「無限QE」。但，你睇相對於GDP，美國印嘅錢，低過其他地方。仲有，個「增速」亦低過其他地方。你睇日本同歐元區，一度同美國差不多，而家已放甩晒。

計及GDP，日本先印得最狼。況且疫情下加速得好快

14. 特別係日本，「以前」（例如你睇2000）好似好誇張，但近幾年更誇張，特別係疫情下。咁加上零利率，經濟又長期增長慢，

15. 所以到美金加息，日圓匯價受壓，好合理吧？今年跌咗20%，1998年之後最多。早排對美金穿過140，24年新低，話咁快145都見。對港紙就5.4算（「四捨五入即係5算」）。唔好忘記日本仲要有通脹（以前係冇的），本身應該對匯價更有壓力。幸好油價呢排係咁跌，唔好忘記日本要入口大量石油，日圓係咁跌都幾係嘢。

16. （當然，有個詸題係，日本點解之前咁多年都冇乜通脹。仲有一個世紀問題：點解美金印咗咁多，之前都冇通脹，但去到2020後先有。呢個遲下再寫。雖然都好難答，我都唔係好肯定，只係畀我嘅想法你參考下）

之前「末日博士」（唔係香港嗰個）話日圓去到140央行投降添，結果呢？

17. 留意日本一路維持呢個超寬鬆政策，有佢嘅原因。主要亦因為重債。之前好多人都賭佢地幾時會轉向，你可以密切留意。到時一轉，可以轉得好快。唔好諗住賭單邊，記住「炒預期」，以上講日本低息美國高息之類，市場已經知咗好耐。總唔會一路一路跌，去到一個位反轉，可以夾死你（亦會引嚟唔少市場波動，買家花生）

Tora！Tora！Tora！—你可以估下，日本央行會唔會預警

18. 換著其他央行，會早啲暗示，但，咁多炒家在賭，可能日本央行會忽然畀個大驚喜你，「偷襲珍珠港都冇預警」

你唔會以為「通脹有得加人工所以冇乜嘢」下話？

19. 最後，唔好以為咩「通脹有得加人工所以其實冇乜嘢」，我唔知邊個諗呢啲咁低能嘅嘢。冇錯，通脹一般都係會加人工，甚至係加人工導致通脹。但你睇差不多全世界，人工都係跑輸通脹嘅，因為「勞力」唔太值錢。日本雖然通脹只係咁低，但一樣，人工係近乎冇嘅，所以扣除通脹嘅實則工資（real wage）都係跌．連跌四個月了。（所以，你話唔投資點掂？）

之後講韓國：韓圜係一隻好奇怪嘅貨幣，似台幣，甚至人民幣

20. 另外，順手講埋韓國。以前Facebook 都寫過，韓圜係一隻比較奇怪嘅貨幣。雖然韓國經濟體己經好大，但韓圜好少交易，似台幣甚至人民幣（冇咁極端嘅）多過似日圓英鎊。亦因為咁韓國仲係「新興市場」。

兼快講1998年韓國金融風暴，「破產」「捐金救國」，有幾多係真？

21. 背後原因，唔多唔少同1998年亞洲金融風暴有關，唔少人或多或少聽過，甚麼國家破產（嚴格嚟講唔係），捐黃金救國之類。並唔全部係啱，不過枝節太多，呢篇唔講。但1998年求助IMF成為韓國嘅「國恥」倒係事實，後來啲電視同戲都成日拍。

22. 與此同時，亦都要知道韓國同日本嘅恩怨情仇。雖然都係美國盟友，又疑似有共同敵人，但長期都係不和。背後除咗打仗歷史，亦因為韓國近廿年「站起來」。

想跟得貼，但又唔敢跟太貼：韓圜盯住日圓，正如人民幣盯美金。

23. 點解講呢啲？因為真係有關！講得直接啲：韓圜就係睇住日圓嚟行—但真係有啲似人民幣睇住美金。想跟得貼，但又唔敢跟得太貼。

24. 先講想跟貼嗰部份，十分簡單，因為韓國同日本在好多出口貨品都有競爭，啲貨品種類，甚至cost structure，市場定位都好似。所以「匯率」係幾重要嘅因素。

之前Jackson Hole會議，韓國央行行長講明「日本人令我好頭痛」

25. 證據？花邊新聞一則．之前Jackson Hole，人人留意鮑威爾。但其實係全球央行會議。韓國央行行長，就半講笑咁點名提到日本央行行長，「呢位仁兄令我好頭痛」—講嘅就係日圓貶值。

但點解韓國唔敢跟足貶值？點解韓圜跌得少過日圓咁多？

26. 不過，因為種種原因（相信同1998年嘅陰影都有啲關係），韓圜並唔係太敢好似日本咁貶值。亦都留意，同中國唔同，至少兩個國家，都比較少「直接」干預匯率。只用簡接方法。

27. 咁就易解了，因為，韓國係加咗4次息嘅（亦因為通脹高過日本好多），日本從來冇。咁韓國有2.5厘息，日本零息，自然見到日圓跌得多過韓圜。

28. 具體地講，韓圜今年跌咗14%，日圓跌咗20%。（留意呢度有個小問題：你睇JPYUSD，就跌20%，USDJPY，就升25%．數學問題啫。亦即係股票跌咗20%，要升返25%先回家。數字細嗰時唔覺，去到20%就會見到呢個數學現象）

29. 而你睇Yen/圜嘅cross rate，見到日圓對韓圜，今年仲要跌7 %（Google Finance有）—但提提你，呢個cross rate 係好「人工」嘅—即係乜？即係，同 Euro Yen唔同，呢個cross rate 只係「迫」出嚟（咪Dollar Yen 除 Dollar Won）．實際上係好似極少trade嘅。係喎，兩個國家雖然咁近，但近乎冇Yen/圜嘅trade—原因亦同上面講，韓圜交易好多限制有關。