ivanliresearch

101文：「貨幣戰爭」—寫於美匯20年高。英鎊37年低，歐元20年低，日圓24年低，韓圜13年低。但其實匯率係我「最不關心」嘅嘢。長期趨勢vs挫上挫落，Cyclical vs Secular，zero sum game vs 創造價值。匯率受乜影響？「供求」咯。但咩供求？當然唔係「旅行」，甚至唔係「貿易」。九成幾以上嘅外匯交易，都唔係「實體需求」，而係「金融需求」。「實體需求」同「金融需求」有乜分別？講埋「carry trade」，仲有「借低息港紙存高息美金」嘅風險（唔止脫勾）。外匯市場嘅交易，差不多一半係FX Swap，即係乜？你望下外匯市場一日交易銀碼幾多。夠你去幾多次日本？睇下外匯市場一年交易額幾大？全球GDP又幾多？全球一年貿易額又幾多？順手睇埋，股市交易額，同匯市相比，爭幾遠？可以計下有幾多外匯交易係 yen，印晒出嚟夠你由日本去到火星。講到尾，「金融需求」，由乜決定？咪嗰幾味嘢，快手同你溫書。總論：經濟，息口，貨幣供應，通脹。但互相影響。留意三樣嘢：堆因素互相作用。匯率係「相對」嘅。仲有投資一定炒預期。下回預告：實例。順便畀幾個張你，就明點解美金狂印錢都強。 (Patreon)

Published:

2022-09-07 21:57:12

Edited:

2022-09-08 00:55:30

Imported:

2022-09

Content

101文：「貨幣戢爭」—寫於美匯20年高

英鎊37年低，歐元20年低，日圓24年低，韓圜13年低

但其實匯率係我「最不關心」嘅嘢

長期趨勢vs挫上挫落，Cyclical vs Secular，zero sum game vs 創造價值

匯率受乜影響？「供求」咯

但咩供求？當然唔係「旅行」，甚至唔係「貿易」

九成幾以上嘅外匯交易，都唔係「實體需求」，而係「金融需求」

「實體需求」同「金融需求」有乜分別？

講埋「carry trade」，仲有「借低息港紙存高息美金」嘅風險（唔止脫勾）

外匯市場嘅交易，差不多一半係FX Swap，即係乜？

你望下外匯市場一日交易銀碼幾多。夠你去幾多次日本？

睇下外匯市場一年交易額幾大？全球GDP又幾多？全球一年貿易額又幾多？

順手睇埋，股市交易額，同匯市相比，爭幾遠？

可以計下有幾多外匯交易係 yen，印晒出嚟夠你由日本去到火星

講到尾，「金融需求」，由乜決定？咪嗰幾味嘢，快手同你溫書

總論：經濟，息口，貨幣供應，通脹。但互相影響

留意三樣嘢：堆因素互相作用。匯率係「相對」嘅。仲有投資一定炒預期

下回預告：實例。順便畀幾個張你，就明點解美金狂印錢都強

「貨幣戢爭」—寫於美匯20年高

英鎊37年低，歐元20年低，日圓24年低，韓圜13年低

1. 呢篇就真係「貨幣戰爭」。似乎好多讀者想講匯率之類，就順應民意。雖然呢啲文要用嘅時間好耐，分分鐘每隻都寫幾篇幾千字。但我索性整個101入門版，等你有啲基本概念。總好過一路拖極都唔得閒寫。

2. 另外要提新讀者，「匯率」差不多係我「最不關心」嘅嘢。息口，通脹，經濟我都仲比較關心，但「匯率」我係不太關心，亦冇得點關心嘅。講明先，呢篇文（同埋如果有續集）主要目的係等你知道個世界點運作，同埋第時識分邊啲分析係高質啲，邊啲係垃圾。

但其實匯率係我「最不關心」嘅嘢

3. 睇「匯率」有冇「用」？視乎你咩叫「有用」。對於你理解個世界，肯定有用。但你話拎嚟買股票甚至炒外匯，就係另一回事了。

長期趨勢vs挫上挫落，Cyclical vs Secular，zero sum game vs 創造價值

4. 至於點解「匯率」係last thing I worry，以前寫過，唔想短期又重覆。未睇過嘅，畀啲重點你，記住佢先，遲下先解。點解唔多關心？首先，極之難估，唔好花時間。二來，真係zero sum game，你睇今年好似郁得好勁，但講到美匯點強—不過去返20年前嘅水平。但你望下，美股20年升咗幾多？太古城貴咗幾多？亦帶到最後一個問題：我隻嘢升得幾倍嘅，理得你咩匯率。而一般有時匯率幫到你，有時係對你不利，拉勻應該打個和（但，你要渣得夠長）

匯率受乜影響？「供求」咯

5. 好啦，首先講一個最簡單但又最深嘅問題「匯率受乜影響」？

6. 好廢嘅答案，有人答「供求」—當然係，但個供求受乜影響先得架！我在Facebook 嘅文有寫到，當然唔係咩「多人去日本唱yen就會升」，呢啲垃圾諗法好典型示範咗盲點—只講故事，唔講實數。事實上，甚至你話同「貿易」，關係都不大。

但咩供求？當然唔係「旅行」，甚至唔係「貿易」

7. 唔信？請睇。每日外匯市場（全世界，所有貨幣）交易，7萬億美金（7 Trillion）．唔好忘記，第二大經濟體嘅人民幣仲要冇份（好少交易），仲而歐羅區堆國家相互之間嘅嘢都冇咗。但，都仲係7萬億。

九成幾以上嘅外匯交易，都唔係「實體需求」，而係「金融需求」

8. 我在Facebook寫，wag the dog，「投機/套戥交易」佔絶大多數。唔知係乜都唔係好緊要，簡單嚟講，你平時理解嘅「去旅行」「買外國貨」「企業入口材料」「做外國人生意」（例如我收你地Patreon），呢啲係「實則需求」。

「實體需求」同「金融需求」有乜分別？

9. 其他各種，就係「金融需求」。上FXCM做槓杆外匯呀（執咗未？），做渡邊太太投資呀（但我一路話外匯唔係「投資」，因為唔會產生任何嘢），「套利」呀，全部都係。何謂套利？包括有啲人問嘅carry trade，借平息去買嘢，可以買高息貨幣，甚至買股票（但當然會有「匯率風險」，冇穩陣嘅嘢）。好長時間呢個字同「日圓套息交易」係同意義。實不相瞞我早幾個月都係借…..yen買股票，遲下解）。

順手講「carry trade」，仲有「借低息港紙存高息美金」嘅風險（唔止脫勾）

10. 但根本我平時講嗰啲7.85，港紙息平美金息貴，啲人借港紙然後轉做美金，呢啲全部都係廣義嘅carry trade（留意一樣有風險，甚至唔使港紙脫勾，唔使轉用人民幣。例如忽然間拉濶個7.75-7.85（以前試過啦），或者忽然間郁個band，7.65-7.75，或者7.95-8.05，你做呢啲套利交易都會輸大錢。

外匯市場嘅交易，差不多一半係FX Swap，即係乜？

11. 點解話wag the dog，妹仔大過主人婆？最簡單，你睇維基嘅講法，每日7萬億，有2萬億係spot（你當係「即市現貨」）。

12. 剩返係乜？1萬億係遠期合約（類似期貨），3萬幾億係外匯掉期（FX swap）．仲有啲係期權，或者currency swap．唔知係乜？好正常，你可以唔使知，想知睇維基，睇完唔明都冇問題　—　你只需要知道一樣嘢：呢段講嘅呢啲東西，全部係「金融嘢」！係咪「炒」，睇你點定義，有啲人叫做「對沖」，whatever．總之，呢啲唔係嚟自「實則需求」。

13. 埋單計下，即係，7萬億入面，至少5萬億係「金融需求」—實情絶對唔止，因為，根本連嗰2萬億spot，絶大多數都係「金融需求」！

14. 實則數字，有啲難估，但我話你知係超過90%，甚至95至99%。

你望下外匯市場一日交易銀碼幾多。夠你去幾多次日本？

15. 用另一個角度睇下：一日就7萬億美金嘅外匯交易（記住已經冇計中國，同埋歐元區入面）。一年，250個交易日，當1750萬億。

16. 而全世界嘅GDP，一年先係94萬億美金！外匯交易，係呢個數20倍！

17. 又或者，全球嘅貿易額，一年先30萬億唔夠，我都費事同你研究使唔使數晒兩邊。總之，同外匯交易比，微不足道。

睇下外匯市場一年交易額幾大？全球GDP又幾多？全球一年貿易額又幾多？

順手睇埋，股市交易額，同匯市相比，爭幾遠？

18. 最最最後，股市成交呢？全世界股市成交一日有幾多？有啲難搞。你可以Google，會搵唔同嘅數字。因為好多股市會交易埋債券或其他嘢。但，十分大約，如果你講股票嘅，可能一日1萬億（上面個圖係每一季）。照計呢個數應該差不多（另一睇法：美股一日成交4000-5000億，你當係全世界一半，條數都差不多，但知乎嘅資料未必準）。點計都好，匯市規模（一日7萬億成交）都大過股市好多。更唔使講同啲「貿易」或「旅行」比

可以計下有幾多外匯交易係 yen，印晒出嚟夠你由日本去到火星

19. 睇完呢啲，你仲信唔信，係因為「旅行」帶動外幣需求？搵人計下一日6萬億美金嘅yen可以砌到幾高，當然6萬億唔係全部係yen，有興趣自己睇。大約話你知，Dollar Yen佔咗所有外匯交易13%（排第二，僅次旒Euro Dollar，估唔到？其實好正路，日本仲係相當大嘅經濟體，而人民幣冇自由交易）。加埋鎊yen 澳紙yen Euro Yen呢堆再差不多10%，即係涉及yen嘅，25%左右咯

20. 講咗大半篇，話到畀你知，匯率係由「金融供求」決定。

講到尾，「金融需求」，由乜決定？咪嗰幾味嘢，快手同你溫書

21. 咁，即係乜？其實如果讀過下經濟金融嘅，可能都會聽過。不外乎嗰幾味。教科書講嘅大致都啱，但有啲人太過墨守成規死背教條反而有問題。

總論：經濟，息口，貨幣供應，通脹。但互相影響

22. 影響匯率嘅，不外乎係幾樣嘢：當地通脹，當地經濟，貨幣嘅息口，同埋貨幣供應，即係「印得多唔多錢」。而呢三樣嘢當然又可以互相相關，互相影響。例如通脹高往往加息，經濟差往往減息，印多錢多可能通脹，之類。

23. 正路教科書嘅教法，實情冇乜錯，不詳解，鍾意可以睇片或睇文。所有嘢不變嘅（呢句嘢好重要！！！）—通脹高啲，匯率受壓，因為隻嘢唔值錢。利息高嘅，匯率高，因為套息交易。經濟好嘅，匯率高，但冇咁明顯。印錢多嘅，匯率有機會受壓（但美國印好多年喎？遲下解）。

留意三樣嘢：堆因素互相作用。匯率係「相對」嘅。仲有投資一定炒預期

24. 不過記住三樣嘢：首先，重覆一次，以上呢堆嘢唔會係獨立，你唔會忽然間有個國家好高息，梗係有啲其他原因。

25. 第二，匯率係一個相對嘅概念。十分重要。人人加息，即係人人都冇加息。人人印，即係大家都冇印（我指匯率上咋下，但你會見到啲嘢貴咗，正係過去50年發生嘅嘢）。人人通脹，即係大家都冇通脹。

26. 第三，更要記住，差不多所有嘅投資工具，股票，債券，商品，外匯（呢度當係「工具」）都有一種特色：炒預期！記住！因為發生咗嘅嘢，理應該好快反映在價格上。所以係睇將來，或者應該話—大家估將來會發生咩事（例如一早講明下年加10厘息嘅，嗰樣嘢幾日就反映晒，就唔再係「將來」。但如果係大家係「估」，就會影響個價）