說到做到：我依然都係每個月買股票，扣除開支後所有錢瞓晒落去。又review下我每月買嘅不同ETF。 乜都跌，係咪分散冇用？Yes and No。 係喎，買債都要輸20%，真係百年一遇。 輸少當贏，係咪阿Q精神？睇你點睇。 「2000萬你一炮過買會摸頂」，但你個個月買，總唔會每一注都摸頂。講下每個月定期投資嘅各種好處，有埋自己實例。 隻嘢跌咗15%，要升返18%先回家。而跌咗26%，要升返35%！針冇兩頭利，升市時你當然升幅賺唔盡—但你可以放心大大注咁買。出賣埋朋友實倉，都係跑贏大市的。節目預告：之後講「美國股息股」 (Patreon)

說到做到：我依然都係每個月買股票，扣除開支後所有錢瞓晒落去

又review下我每月買嘅不同ETF

乜都跌，係咪分散冇用？Yes and No

係喎，買債都要輸20%，真係百年一遇

輸少當贏，係咪阿Q精神？睇你點睇

「2000萬你一炮過買會摸頂」，但你個個月買，總唔會每一注都摸頂

講下每個月定期投資嘅各種好處，有埋自己實例

隻嘢跌咗15%，要升返18%先回家。而跌咗26%，要升返35%！

針冇兩頭利，升市時你當然升幅賺唔盡—但你可以放心大大注咁買

出賣埋朋友實倉，都係跑贏大市的

節目預告：之後講「美國股息股」

1. 寫呢篇文時星期二朝，星期一晚美股冇市，港股就繼續陰乾。的確又悶，又令人灰心，但記住堅持落去。同時間，可以同大家討論啲冇咁貼市嘅嘢

我依然都係每個月買股票，扣除開支後所有錢瞓晒落去

2. 首先，應該唔算咩好消息，但至少畀你見到，我都係繼續每個月買股票。實情一路都冇變，頂多之前做手術好似停咗兩個月（都係唔應該嘅，因為有時停咗就自然習慣成自然，大家唔好學）

3. 之前8月中拎返保險嘅錢，就買咗個股，買過6823同埋Ally Financials，雙雙潛水，「果然到我買個股時就係調整訊號」

4. 不過除咗呢啲以外，我都仲每個月一路有定期買啲ETF（我一般唔叫做月供，因為美股我係就咁每個月自己買的，冇set任何嘢，港股就真係月供）。

又review下我每月買嘅不同ETF

5. 港股嘅，有一大堆嘢，以前貼過，遲下再分享。美股嘅，就係呢堆嘢：VOO，QQQM，VB，EMXC，IWD，IDEV，6隻。舊文提過，不再詳細講，就係標指，納指，小型股，新興市場走中國，價值股，已發展國家（即係歐洲日本）。

6. 另外，留意嘅係，你見我「月供」呢幾隻嘢，仲要睇埋背後我仲有乜。因為我本身仲有一堆美股，big cap科技股多，FANGMAN有齊，所以分散一啲其他嘢。（同時間仲買QQQM，拉返去貼近多啲指數）。

7. 同樣地，因為我本身已經有一堆港股，所以我揀咩EMXC，IDEV之類冇中國嘅嘢。而唔係叫你全部買晒美股或歐洲

8. 懶cap圖，但睇下呢堆嘢嘅表現？年初至今嘅，你自己搵，照計輸十幾至廿幾%不等，QQQM當然差，納指差嘛，年初至今輸26%。IDEV咩？歐羅日元英鎊之類都輸一截啦，應該年初至今跌23%。呢兩隻都今年跌超過20%。IWD好啲，今年跌12%，價值股相對跑贏。

乜都跌，係咪分散冇用？Yes and No

9. 令人灰心嘅係，似乎「分散」都好似冇乜用。買乜都股。最大鑊係你見到買IDEV或EMXC，非中非美，「反而仲差過買恒指或標指」。

10. 的確係咁，今年嘅市況真係「百年一遇」，實不相瞞，你連買債都要輸20%！呢度貼圖，遲下細解。點解買債都輸20%？債息升，債價跌嘛。仲唔明？你以前買落鎖定咗1厘息嘅美債，即係1厘息借錢畀美國攻府，但而家出面借錢畀美國政府收3厘息喎—咁你張借據咪要有折讓先有人收。

係喎，買債都要輸20%，真係百年一遇

11. 咁係咪分散冇用？yes and no．今年的確百年一遇，你睇大嘅asset class，差不多買乜都跌，股樓債都跌。咁但，上面都見到，買IWD之類，可以輸少啲。或者之前講嗰啲「香港防守股」，中移動941呀，中銀香港2388呀都算OK。但呢啲未必算「asset class」

輸少當贏，係咪阿Q精神？睇你點睇

12. 但想講嘅係，每個月去買，你就做到「時間上分散」。平時我講嗰句，「2000萬你一炮過買會摸頂」，但你個個月買，總唔會每一注都摸頂。咁當然有辣有唔辣，之前雞犬皆升時，有人send嘢嚟挑戰我添，話梗係一炮買晒落去—單邊升市就實係咁，最好你當埋條底褲借到盡做槓杆添—但跌嗰時呢？

「2000萬你一炮過買會摸頂」，但你個個月買，總唔會每一注都摸頂

13. 每個月定期買，亦都符合大部份（但唔係全部）讀者嘅收入：唔少人都係個個月出糧嘅。亦都令你心理上易過啲，唔會積埋一大舊錢先摸頂。

14. （by the way，呢個「2000萬你一炮過買會摸頂」係買樓最大嘅「風險」，你「供樓」，係每個月畀錢啫，但一早鎖定咗個樓價，咁但一樣，升嗰時你咪覺得自己著數）

15. 留意我唔會叫「溝貨」，雖然實際上幾相似。但你見啲友「溝貨」，往往係不定期嘅，「跌咗又有錢咪買多啲」，另外，多數講「溝貨」，就最多兩三次？但我呢啲每月投資，一定係以年計，甚至十年廿年（堆港股我唔少玩咗十幾年了）。

講下每個月定期投資嘅各種好處，有埋自己實例

16. 睇實例，見到嘅係，頭先話嗰6隻嘢，咪話年初至今跌十幾至廿幾％？但我自己嘅持倉，就只係輸7-15%。點解？因為我唔係全部年頭買嘛。我冇完整紀錄，每隻都唔同，但應該係一年前開始買的。咁你見到個效果係，低位時我都一路有買。

17. 最好嘅，IWD，只係輸7%，最差嘅，QQQM IDEV，輸15%。喂，年初至今IDEV同QQQM跌23同26%喎！道理你當然知，但有實數你睇，更有說服力。

18. 咁你話，「都係輸少當贏啫」，有啲阿Q。都可能係，但今年真係買乜都輸，而100冇1個可以「造淡」搵到大錢。

隻嘢跌咗15%，要升返18%先回家。而跌咗26%，要升返35%！

19. 仲有，你諗下，例如QQQM，即係大約納指升返18%就返返水面。但如果年頭一注買嘅（都唔好計你摸頂），跌26%，你要升返35%先回家！。要追返18%，心理上就好過追35%好多好多。更唔好講有啲你輸咗七八成嘅，即係你隻嘢要升返幾倍，係令人好泄氣嘅。留意，隻嘢跌咗15%，要升返18%先回家。而跌咗26%，要升返35%！呢個係數學史上最大謎題，所以畢菲特會叫你：「唔好輸錢」（但其實避免唔到，所以係：唔好輸太大舊錢）

20. 最後不厭其煩解多次，針冇兩頭利，唔好想著數拎盡但冇風險，我知100個有99個都唔認，但最後都係100個有90個「心中」係咁。此一時彼一時，而家我當然畀你見到每個月買，就輸少好多，但好多人不願接受「輸少」，「我要次次贏呀」—咁我就真係無能為力。

針冇兩頭利，升市時你當然升幅賺唔盡—但你可以放心大大注咁買

21. 仲有，大單邊升市時，呢啲「每月」嘅做法，一定跑輸的。即係月供嘅嘢，輸嗰時輸少啲，贏嗰時又會羸少啲，冇法，一定有取捨。但有兩個好處—第一，你會瞓得好啲，唔會影響你自己精神健康或者工作。第二，因為個「風險」細咗，你就可以放心買大大舊—強調好多次，注碼好重要。大升市時，計%我當然跑輸啲可以咁啱低位買嘅人—但我係成副身家買落去喎，而家都係。如果我唔係每月投資，就冇咁易有咁膽量

出賣埋朋友，都係跑贏大市的

22. 比多個實例你，我朋友（真係我朋友嚟的），之前冇買美股，舊年先開始做啲月供，都係咁上下，只係佢冇IWD，同埋佢要VEA唔要IDEV（兩隻都係已發展國家，舊文解過）

23. 咁都係日子有工嘅，解下先，佢總共投入咗17萬港紙。你見輸緊2萬蚊。不過，你仲見有舊IBKR，就係IB（Interactive brokers）開戶送嘅，當然都係輸錢，但送畀佢嘅，冇成本。

24. 即係，佢堆月供嘢，大約輸緊10%左右。還好啦

25. 呢度順手賣埋廣告，你見我堆VOO同QQQM，就富途買嘅，再之前買開。但IWD EMXC VB同IDEV都係在Interactive brokers買—主要係佣平，仲有如果你買啲歐洲股日本股，就要用Interactive brokers了。

26. 咁朋友個例子，畀你見到，開戶係有得送Interactive brokers自己嘅股票—你鍾意可以收到即時沽咗佢。不過記住，唔係開戶就即時送，要你入錢的。入得多送多得咁，詳情我都唔係好肯定。而佢地都會有嘢回贈返畀我嘅

27. 仲有最後一樣嘢：遲下我會寫，但Interactive brokers嘅孖展息，係相當平嘅。例如美金，富途收4.8%（都唔係貴），但Interactive brokers只係3.2%，我測試過，遲啲寫文。係喎，我係叫人唔好孖展買股票的，但個情況係之前我未拎返保險嘅錢，但又要維持月供嘛。

28. 想開戶嘅，用我嘅referral link吧。（ibkr.com/referral/yinha820）

節目預告：之後講「美國股息股」

29. 應該遲下可能寫下「美國股息股」，之前略寫過，亦有人問過。希望今個月寫。但留意，未必係「高息股」。留意三樣嘢：派息紀錄好（年年加，例如長江基建1038），派息比率高（派晒，例如領展823之類嘅REIT，或者新意網1686），同埋股息率高（例如內銀，亦反映個價殘），係三樣唔同嘅東西。

30. 所以你見我點解好多時都要from first priniples，好悶咁由定義講起—因為真係會搞錯的！有時讀者問我「高息股買唔買得過」，你講「高息股」，係指乜先？最好有個冧把講明就易。

31. 正如以前有讀者同我講「價值股」，「原來佢當Tesla係價值股」。亦有人話「防守股」，「佢當LVMH係防守股，啲女士勒緊褲頭都唔會慳」（呢個本身未必錯，但一般「防守股」唔係咁意思啦）

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。