港股8月跑贏美股，年初至今都係跑贏美股，但點解你印象唔係咁？美股反彈幅度已經蒸發超過一半，會唔會穿底？「可能吧」。「既然可能會穿年內低位，咁我到時先買咯」—係呀可？估下有乜問題？Jackson Hole講話後，連跌幾日，但星期四美股反彈過。 上星期五，早段急升400點，之後倒跌500，發生咩事？值得研究下。美國失業率升，「加息預期跌」，真的嗎？我使唔使買過瑜珈褲先可以睇LuluLemon？連續兩季上調盈利預測喎，又話衰退？又話供應鏈受阻？ 之前跌四成又升四成又跌四成，坐唔坐得穩？新意網1686，派息100%，年年加。生意純利年年升。（有Excel）大師冇點你：畢菲特又沽比亞迪，5日沽咗1%！ (Patreon)

港股8月跑贏美股，年初至今都係跑贏美股，但點解你印象唔係咁？

美股反彈幅度已經蒸發超過一半，會唔會穿底？「可能吧」

「既然可能會穿年內低位，咁我到時先買咯」—係呀可？估下有乜問題？

Jackson Hole講話後，連跌幾日，但星期四美股反彈過

上星期五，早段急升400點，之後倒跌500，發生咩事？值得研究下

美國失業率升，「加息預期跌」，真的嗎？

我使唔使買過瑜珈褲先可以睇LuluLemon？

連續兩季上調盈利預測喎，又話衰退？又話供應鏈受阻？

之前跌四成又升四成又跌四成，坐唔坐得穩？

新意網1686，派息100%，年年加。生意純利年年升。（有Excel）

大師冇點你：畢菲特又沽比亞迪，5日沽咗1%！

1. 幾日冇出文，主要原因係……整親手，打唔到字，而家已大約好返。

港股8月跑贏美股，年初至今都係跑贏美股，但點解你印象唔係咁？

2. 首先講下美股嘅市況，當然係差。8月三大指數跌咗4-5%。留意港股只係跌1%，而年初至今，而家係港股跑贏美股，但你硬係「覺得」好似港股仲差，可能因為陰啲陰啲跌，但冇乜點大反彈。

美股反彈幅度已經蒸發超過一半，會唔會穿底？「可能吧」

3. 至於上星期，美股三大指數跌3-4%，已經連跌3個星期，7月嗰浸反彈已經蒸發超過一半。會唔會再穿今年嘅低位？答案當然係：唔知。但亦不重要。冇話穿咗個低位就會繼續跌，同以前講「熊市」一樣。

「既然可能會穿年內低位，咁我到時先買咯」—係呀可？估下有乜問題？

4. 當然有啲自作聰明嘅，會覺得：既然可能會再跌穿今年低位，「咁等跌咗先買」—聽落去好醒，實情完全係廢話—因為，你話道指跌返落20000點，都係「有機會」的。用以上邏輯，咁既然「有機會」道指跌返去20000點，「咁到時先買」。你諗下有乜問題？

5. 問題就係：如果你永遠等唔到呢？即係有啲人想等太古城變返200蚊尺先買，實係「有可能」架喎，但你一路等，會錯失咗幾多嘢？

6. 當然仲有更大問題：到道指下個月見20000點，以上想法嘅人一樣係唔敢買，一樣係覺得。「咁等穿10000點」先。所以，到頭嚟係廢話。

7. 點應對？都係嗰幾味，唔再重覆。或者聽日先重覆。

Jackson Hole講話後，連跌幾日，但星期四美股反彈過

8. 但可以講多少少美股近來嘅情況。一切好似「轉勢」，只係上上個星期五嘅事，PCE數字見到通脹回落，但聯儲局主席鮑威爾Jackson Hole講話好似好強硬，於是大家就會覺得「通脹落都仲會加息」（但，總比通脹唔回落好），甚至係「衰退都仲會加息」（也有可能）。呢個就係而家大道嘅睇法。

上星期五，早段急升400點，之後倒跌500，發生咩事？值得研究下

9. 咁但，故事還故事，去到某個位就會反映晒，或者反映大半。美股上上星期五急跌後，上星期連跌幾日，星期四其實有個小反彈。至於星期五呢，其實一度升過近400點，然後倒跌近500點。值得留意下發生乜事

10. 留意嘅係，美股早段升，係因為個非農就業數據。「市場」嘅演繹係，個就業數字唔靚，職位增幅減慢，失業率反彈到3.7%，今年第一次反彈，而市場預期3.5%，「所以」大幅加息嘅機會降溫。

美國失業率升，「加息預期跌」，真的嗎？

11. 的確，你睇返CME，就好似真係見到個預期降咗溫，之前估7成機會加0.75%，而家略為降溫到大約6成唔夠—但都係過半機會，而我都相信會係咁發生。

12. 不過細心啲睇，都真係任你講。首先，個職位增幅係放慢，但仲係高過預期嘅。咁點解失業率會高過預期？就因為更多人重投勞動市場。呢種情況，未必應該話個勞動市場係「差」。但當然，當時美股升，就係咁講

13. 咁做乜無啦啦去到中段跌？好多原因，亦永遠冇人知。可能係中途研究咗個就業數據，原來「唔係咁差」（但至少見到CME睇到嘅加息預期真係跌）。另外，媒體嘅講法，中途單新聞係俄羅斯唔肯開返北溪一號供氣喎。係咪咁大影響，就唔知了。

14. 我就相信，暫時嘅劇本都仲係通脹會回落，但未來幾次聯儲局都仲會加息。但有可能會減慢。氣氛當然係差，但保持樂觀，我依然係有錢就買晒股票，但當然我唔會超出自己能力，唔會做槓杆。

我使唔使買過瑜珈褲先可以睇LuluLemon？

15. 順便睇埋隻Lululemon，相當有趣嘅公司，以前想買（股票，唔係褲），但邊有咁多錢。咁啱3個月前嘅業績又寫過，你可以睇返。

16. 上次寫，係公司調高盈利預測，股價仲有得升。今次情況？一樣！一樣係業績勝預期，上調盈利預測，一樣係逆市有得升！死未。

連續兩季上調盈利預測喎，又話衰退？又話供應鏈受阻？

17. 公司可以連續兩季上調盈利預測，認真唔小嘢。當然大家都知，再巴閉嘅股票，都係要睇估值，偏偏估值就極難睇。

18. 但留意下，上次出業績到而家，呢三個月，股價都仲有得升。仲要同期美股係跌嘅，一來一回都跑贏指數5-10%（視乎你邊個位度），似乎……應該估值算合理？

19. 上次指引，全年每股盈利預9.35-9.5，今次預9.75-9.9。一季上調4-5%，都幾勁。計下數，股價314，盈利9.9，32倍市盈率，點都唔平。但盈利真係升超過四成，吹唔脹。

之前跌四成又升四成又跌四成，坐唔坐得穩？

20. 我覺得嘛……都仲係太貴。但好值得留意。

21. 另外留意，之前股價啲波幅好勁的，舊文有寫。跌四成又升返四成，再跌四成。點捉？

新意網1686，派息100%，年年加。生意純利年年升。

22. 新意網1686，以前寫過，業務在Facebook Page寫過，不再重覆。簡單嚟講，Data Center，高端收租。母公司係新地，渣住73.6%。

23. 公司6月年結（最憎，因為啲嘢會好亂），業績份嘢呢度，新聞呢度。但我有同你整埋個Excel（Attachment 有）。

24. 實情，都好簡單見到，無論係收入定純利，按年定半年，都係穩步升，相當穩定嘅生意。再睇遠啲嘅，嚟緊一路有新嘢，最終樓面會由而家嘅150萬尺，去到2026年嘅300萬尺。就係咁。

25. 留意公司差不多係派100%息，應該係賣點，亦係特登嘅。反正多數都係派返畀新地。仲有公司唔興派中期息，咁所以，末期息就係全年息。所以見到純利升8%，派息又係升咁上下—因為一般都全部派晒。可以留意，公司應該係一路都加派息嘅。

26. 聽落幾好，業務夠防守性，派息紀錄又好—但股價今年就跌咗近30%—大幅跑輸大市。原因？亦係因為估值。舊年都有寫過，嗰時8.2，股息率兩厘多啲，嗰時都話絶對唔平。

27. 而家呢？似乎合理返好多了。股價5.2，剛剛嘅派息0.208，剛好4厘息，可以留意下。

畢菲特又沽比亞迪，5日沽咗1%！

28. 另一單，就要講畢菲特減持比亞迪。係喎，上星期先寫過，嗰時係20%減持落20.04%，減持到19.92%。咁舊文已經講，就要去到少過19%先再披露，話咁快又過埋，最新係19.02%，減持到去18.87%。

29. 計計數，即係畢菲特，在8月25日至到8月31日，五個交易日，就減持咗差不多1%，大約1200萬股。咁你睇返啲成交，都大約見到每日有近1000萬股，夠容納佢嘅沽盤。

30. 亦都大約見到，佢減持1%，大約係用咗一個星期—咁你計下，仲有成18%，都仲有排玩，而且照計如果股價太低，佢又唔會再沽住。當然係佢係想清晒都係一個問題。

31. 但，結論應該差不多，股價應該好一段時間都冇乜運行。你見ADR都低過香港一截。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。