Excel兩大個：王維基1137，中銀香港2388。王維基1137—半年純利史上最高！廣告收入增長好快，亦會大幅加價。有危有機：對手香晒，中小企又想搞網購又唔識。 不過估值又點計？ 中銀香港2388—說好嘅經濟差銀行爆煲？純利按年小升，半年就大升。 照計今年可以加派息。浄利息收入近年新低，但應該見底啦？ 服務收入夠硬淨：「要轉去富途嘅都轉晒啦」 。 股災債災，但交易收入90億—之前30億都未見過。撥備大升，唔算誇張。但重災區係……東南亞！成本冇乜升—「打銀行工就死得」。 明明話人人移民走資，估下啲存款跌咗幾多？留意個撥備，第二季係低過第一季嘅。比亞迪1211：畢菲特成個幾月先沽600萬股咋喎，玩乜？完全冇一日特別大成交，完全冇一日大跌。 點解畢菲特唔搵投行一lot過？要場內沽拖低股價？ (Patreon)

王維基1137—半年純利史上最高！

廣告收入增長好快，亦會大幅加價

有危有機：對手香晒，中小企又想搞網購又唔識

不過估值又點計？

中銀香港2388—說好嘅經濟差銀行爆煲？純利按年小升，半年就大升，

照計今年可以加派息

浄利息收入近年新低，但應該見底啦？

服務收入夠硬淨：「要轉去富途嘅都轉晒啦」

股災債災，但交易收入90億—之前30億都未見過

撥備大升，唔算誇張。但重災區係……東南亞！

成本冇乜升—「打銀行工就死得」

明明話人人移民走資，估下啲存款跌咗幾多？

留意個撥備，第二季係低過第一季嘅

比亞迪1211：畢菲特成個幾月先沽600萬股咋喎，玩乜？

完全冇一日特別大成交，完全冇一日大跌

點解畢菲特唔搵投行一lot過？要場內沽拖低股價？

1. 好，反正美股都唔多靚仔，今日又講返港股，首圥講兩隻我有嘅股票，都出咗業績，亦因為太耐冇update啲Excel，結果搞咗好耐。最後會講畢菲特減持嘅比亞迪。

王維基1137—半年純利史上最高！

2. 先講王維基隻HKTV（1137），寫嗰時未開市，但已經覺得業績相當好，結果開市升成20%。同你睇下有幾好，有個Excel慢慢玩，入面有埋每個月嘅GMV數字（留意下啲格式，同我平時自己整嘅唔同，係以前馬仔在公司幫我做的）

3. 純利就按年升三成，唔好忘記舊年下半年係蝕錢的。今次係史上最賺錢嘅半年（其實2020年上半年先開始有錢賺）。派息冇加到，但至少仲有派。留意舊年冇派末期息，因為下半年蝕錢。

4. 睇毛利，今次亦係史上最高嘅半年。毛利率亦差不多係最高（2020上半有保就業）。

廣告收入增長好快，亦會大幅加價

5. 另外可以留意下，公司嘅廣告收入增長得好快，會成為新動力，而公司講明啲廣告仲會大幅加價。好多人都忽視咗網購公司呢種收入。

有危有機：對手香晒，中小企又想搞網購又唔識

6. 幾時都係有危有機，市道唔好，有啲電商退出咗香港（主要大陸嗰啲），然後啲中小企又想拓展網購，但又唔會想自己搞物流搞基建搞平台，絶對係公司嘅機會。

7. 公司年頭對今年嘅GMV，目標係75-80億，後來全年業績（3月尾）就升到去80-85億，而家又叫做「調低」，估80億。咁都仲係第一次嘅上限，第二次嘅下限，但似乎保守咗啲。

不過估值又點計？

8. 不過股價呢，就跌咗好多，我都有買，當然輸緊一半。而家近50億市值，你當一年可能純利2.5億，20倍市盈率，不能話喪貴，但亦唔係極平。慢慢等。

9. 但我今朝在梁心欣嘅小炒王節目都有講，港股你想有得炒嘅，想幾個月升一個開嘅（但亦有可能跌七八成），可能就係呢啲股票。否則就可能都係買啲悶嘢。

中銀香港2388—說好嘅經濟差銀行爆煲？純利按年小升，半年就大升，

10. 中銀香港2388，係我渣得比較多嘅一隻港股。個Excel有按年，半年，甚至有每季（季度嘅數就唔完整），慢慢玩。

11. 首先要講，就唔完全係你想像嘅「經濟差拖累銀行」「金融中心玩完」之類—要拖累都應該係舊年嘅事。睇純利見到，按年升7%，但同舊年下半年比，直頭升咗30%。

12. 不過中期息冇加到，但亦唔出奇，前年亦係中期息冇變。留意全年純利已經連跌兩年，2019年時322億，2020年265億，舊年230億。（另一個角度睇：純利得返高位6成，而股價亦係高位6成，啱數的）。照計今年會好過舊年啩（半年做咗135億），所以相信今年末期息應該高過上年

照計今年可以加派息

13. 留意公司派息紀錄都幾好—呢度指嘅唔係好似長江基建1038或領展823咁從來冇減過，當然減過啦，舊年前年咪減咗！但公司一般都會派一半純利出嚟，應該上市20年都一路做到。

14. 想細睇嘅，銀行不外乎兩味或三味收入：拎短錢放長錢（息差），服務費（股票佣，賣保險賣基金，留意中銀自己亦有做埋保險，同你分人地啲產品又另一樣嘢），交易收入。

浄利息收入近年新低，但應該見底啦？

15. 見到淨利息收入跌到近年新低，低息環境息差收窄嘛。但照計應該見咗底？聯儲局今年3月開始加咗息，最近幾次力度仲猛，亦應該仲有得加。其他情況不變下，呢個對銀行係好事，公司亦都確認咗有信心息差已經見底。不過留意下而家債息倒掛，長息有升但短息升得仲快，銀行資金成本都高，呢個可能影響到息差表現。就好似唔同銀行嘅「資金成本」了（但中銀好多低息零售客，而且唔少中資或大陸佬）

服務收入夠硬淨：「要轉去富途嘅都轉晒啦」

16. 至於服務收入，麻麻地，但又冇想像中咁差。我都唔得閒同全盛時期比，亦冇深究入面有幾多係股票佣（年報有拆開），但N年前呢啲收入都好和味，而中銀香港嘅股票market share都幾係嘢。不過照計而家好多人轉咗用富途IB之類，亦可能要轉都轉晒，你見雖然今年上半年股市死晒，但個服務收入又唔係好差。

股災債災，但交易收入90億—之前30億都未見過

17. 另外，留意個交易收入相當好。呢個遲下詳細解，但因為某啲原因：其實市況波動，或者係大跌時，往往對銀行嘅交易收入係好嘅。你睇上半年，90億！之前都冇一次半年有30億。

18. 不過留意，仲有一堆咩公平值變化之類嘅嘢—嗰啲唔係「物業重估」（中銀都有，但唔多，幾億嘢，留意自用嘅寫字樓係唔使計呢啲），而係真係啲金融資產（股票債券之類）跌咗。咁當然呢啲又會拖累銀行，但整體，呢啲計埋「交易收入」，埋單都仲係正影響—就唔係你以為嘅「股市差銀行輸錢」

撥備大升，唔算誇張。但重災區係……東南亞！

19. 經濟唔好，對銀行嘅打擊，唔係嚟自股票輸錢。除咗係服務費收入跌外，更關鍵係因為壞帳！咁你見中銀嘅撥備都大升，半年17億，之前最差半年都係14億左右。不過經濟下行時就必定係咁，我「直覺」個數唔算升得好快。唔想「直覺」？你可以計同以往嘅周期比，但呢度唔咁詳細，可能有機會示範下。（同埋留意返，要計%，即係100蚊貸款令你撥備幾多，因為同上個周期比，你嘅貸款肯定多咗一截）

20. 留意個個壞帳率，由0.27%升到0.46%。重災區在邊？唔係香港，甚至唔係內房（都有啲貸款的），係在東南亞。估唔到呢。嗰度嘅壞帳率去到2.5%，因為防疫限制喎

21. 細心嘅，你去東南亞會見到中銀嘅分行—留意係中銀香港2388嘅，唔係中行3988的。繁體字招牌，柬埔寨都有（遲下貼相）。之前同老母買的，唔知益個女定塞豬頭骨畀佢，亦唔多唔少有啲政治戰略意味。東南亞中美相爭嘛，況且亦係同星展搶生意。係咪豬頭骨？咁至少個女股價一路都好過阿媽

22. 情況係咪失控？咁既然撥備埋，純利同舊年上下半年比都升，照計情況算幾好。正路地亦應該過左最壞情況。

成本冇乜升—「打銀行工就死得」

23. 最後留意，成本冇乜升—「打銀行工真係冇乜前途」

24. 今年股價，係有得升嘅，仲有啲息派。而家股息率4.2%，照計今年有得加。

明明話人人移民走資，估下啲存款跌咗幾多？

25. 再想研究多啲嘅，可以睇埋按季嘅數（！），首先留意啲存款一路有得升，絶對唔係啲友想像中嘅咩人人移民提走晒啲錢。當然中途有起跌，好多原因，有冇新股抽都好大影響。你見19年第三季有跌咗啲（正係社運時期），但幅度極細。然後20年第三季大升，但到第四季又大跌（但高過第二季），可能係因為……螞蟻招股？總之，官腔嗰句，「唔使太在意一季或一個月嘅情況」

留意個撥備，第二季係低過第一季嘅

26. 仲有留意，個撥備前盈利，第二季仲要低過第一季。但個撥備反而係細咗（所以怕且見咗底？）。而個撥備前盈利，雖然按季跌，但都係好過舊年第二三四季好多

比亞迪1211：畢菲特成個幾月先沽600萬股咋喎，玩乜？

27. 至於比亞迪，因為冇買，亦冇叫過你買，所以快講。前事係7月11日，在CCASS見到有好大手嘅股票轉咗入花旗，咁當然就係畢菲特。咁就估佢沽貨，之前都寫過。

28. 事隔一個月，卒之見到手影。你會見到新聞講，佢上個星期三由20.04%，減持到19.92%。

29. 但兩樣嘢：首先，邊個話係上星期三先開始沽？明顯之前都有。第二，上星期三後有冇繼續？相信都有。

30. 你要明白，係因為佢減持跨過整數百份點（20.04變19.92），所以先會見到。佢之前20.幾%沽落嚟20.04，唔會睇到。佢之後由19.94一路沽到19.01，亦唔會睇到，CCASS都應該睇唔到。因為其實唔多。

31. 識睇，當然係同中期業績時比。6月30佢就拎住2.25億股，亦係7月11時轉花旗嘅數。咁你見到，上星期三，都已經唔夠2.25億股啦，即係之前已有沽。

完全冇一日特別大成交，完全冇一日大跌

32. 另外，由7月11數到上星期三，佢亦「只係」沽咗630萬股—完全唔多。點衡量？你睇成交就知，比亞迪一般一日都有幾百萬股成交，咁佢撻開多日，所以你見股價冇一棍咁插落去，你亦唔會見到有邊日忽然間好大成交。

點解畢菲特唔搵投行一lot過？要場內沽拖低股價？

33. 好啦，解讀下，咁樣對股價反而未必太好。你最緊要留意嘅係：做乜佢要就咁在場內沽？唔去搵投行幫佢做？佢自己沽咪震散股價咯，冇乜著數，點解唔一棍搵投行安排人接？原因可能兩個，首先可能佢唔係打算沽太多—但我估唔係呢個理由，幾億港紙對佢嚟講太少了。所以可能第二個原因：「唔想益人」，慳皮，好有佢作風。

34. 但你話，扯，咁咪拖低股價，因小失大？股神精甩邊，點會唔知？所以你咪見佢只係慢慢沽，搞成個幾月先600萬股，就係唔會不問價狂沽（你有時見啲基金減持或畀人斬倉，就不問價，見到股價就大跌同埋大成交，比亞迪明顯唔係咁）

35. 咁即係點？即係，佢唔會不問價沽，又唔係不停沽，慢火煎。所以你可以想像，個股價應該唔會大跌—但一反彈佢又會沽。咁個股價，應該冇乜運行—未必大跌，但更難大升。

36. 呢度分分鐘就可以成為「逢高造淡」嘅教材，可能有啲人會一反彈就沽空，但我絶對唔會鼓勵你咁做

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。