ivanliresearch

星期五嘅PCE數字：通脹回落喎，好過預期喎，冇點你。Jackson Hole講法：又唔係完全錄音機嘅，但依然係任你演繹。「反對任何有關貨幣政策很快掉頭的觀點」—咩叫很快，點先叫轉向先？就同之前講差不多：通脹會回落，但息會照加。「跌咗好丫，9月又再買平啲」。美股跌幅唔誇張，但跌勢好全面，仲要由頭跌到尾。留意嘅係：之前對沖基金好多淡倉。而同時間之前市場係十分樂觀嘅，唔恐慌，VIX低，「咪出事」。賺到錢嘅「策略」，係咪就巴閉？有冇諗過，冇「策略」都賺到錢？VIX 高過30買，多數羸錢，都係有根據嘅。中概股審計嘅嘢，都冇乜好講。「不過年初至今港股又跑贏美股了」。 (Patreon)

Published:

2022-08-29 09:54:57

Edited:

2022-08-29 10:39:36

Imported:

2022-09

Content

星期五嘅PCE數字：通脹回落喎，好過預期喎，冇點你

Jackson Hole講法：又唔係完全錄音機嘅，但依然係任你演繹

「反對任何有關貨幣政策很快掉頭的觀點」—咩叫很快，點先叫轉向先？

就同之前講差不多：通脹會回落，但息會照加

「跌咗好丫，9月又再買平啲」

美股跌幅唔誇張，但跌勢好全面，仲要由頭跌到尾。點解？

留意嘅係：之前對沖基金好多淡倉

而同時間之前市場係十分樂觀嘅，唔恐慌，VIX低，「咪出事」

賺到錢嘅「策略」，係咪就巴閉？有冇諗過，冇「策略」都賺到錢？

VIX 高過30買，多數羸錢，都係有根據嘅

中概股審計嘅嘢，都冇乜好講。「不過年初至今港股又跑贏美股了」

1. Surprise！原本以為Jackson Hole講話冇乜新意（其實都係），市場唔會有乜反應，但結果美股跌成1000點。所以連帶個PCE數字都冇人睇。但依然講咗個PCE數字先

星期五嘅PCE數字：通脹回落喎，好過預期喎，冇點你

2. 結果星期五晚出嘅PCE數字，非常唔錯，低過預期。重溫返，Headline PCE，上次係6.8%，街嘅預期係6.4%，結果出嚟係6.3%，大幅回落，低過預期。如果計按月嘅，PCE回落0.1%，預期係冇起跌—點講都好，今次都係好嘅數字

3. 計核心PCE（扣除食品同能源）嘅，情況亦差不多，上次4.8%，今次街估4.7%，出嚟係4.6%。一樣係大幅回落，低過預期。計按月嘅，核心PCE升0.1%，預期係升0.3%。點都係好嘅數字

4. 事實係出完呢堆數字，美股反應都OK，就直到聯儲局主席鮑威爾在Jackson Hole講嘢，美股先大跌。就冇人理呢啲通脹回落了

Jackson Hole講法：又唔係完全錄音機嘅，但依然係任你演繹

5. 到底鮑威爾講咗乜？鍾意可以睇原文，一千字多啲，亦都好淺。唔想睇字，甚至有片，但佢都係照稿讀，9分鐘唔夠

6. 其實講咗乜？都係任君演繹。升咗咪話冇特別意外，no news is good news，而家大跌，咪會執住佢講話會有「痛苦」，演繹冇咁快會停加息咁。咁但，對於佢講未來某個位適合放慢（其實係廢話），就唔會有人留意了。

7. 不過，係咪完全冇新意呢？都唔係。至少見到，鮑威爾好直接咁講，話「反對任何有關貨幣政策會很快掉頭的觀點」，明顯係想打殘呢種市場期望。雖然咩叫很快，咩叫掉頭（減慢算唔算掉頭？），就任你講

「反對任何有關貨幣政策會很快掉頭的觀點」—咩叫很快，點先叫轉向先？

8. 無論如何，我同意個講話係偏向進取加息嘅。所以你見CME期貨堆預期，即時轉晒，而家會預7成機會9月尾加息0.75厘了。雖然仲有啲通脹數字會出，但照計即使通脹再回落，呢個0.75預期都應該會繼續—對聯儲局亦可能係好事，你有咁嘅預期，佢就可以大手加。

就同之前講差不多：通脹會回落，但息會照加

9. 所以，正路地嘅劇本，就同我之前講嘅差不多：通脹回落，但唔會好快跌到2%水平（都幾難），而加息應該會繼續。但呢啲唔係你怕買股票嘅理由。

「跌咗好丫，9月又再買平啲」

10. 結果美國三大指數，星期五跌3—4%。之前四日大約係打個和，星期五大跌後，成個星期三大指數都係大約跌4%。兩個月以嚟最大嘅單周跌幅。

11. 但我並無特別擔心，我甚至會覺得，仲好，跌返啲，到9月頭有錢又可以平啲買入—諗真諗，呢種諗法有問題，9月我買嘅錢，同我原本成手股票相比之下，一定係細數。而同一道理，反而要告誡你，唔好因為啲股票「貴咗」就停止定時投資，你嗰個月即使摸項，損失同你成個組合比，都只係好細嘅數。

12. 講得白啲，你每月買嘅，最多幾千或者幾萬蚊？摸頂買貴，或好彩慳到10%好未？其實只係好細嘅數，重點係你不停咁泵水入去你嘅組合。到佢碌大時，10%就好多了

美股跌幅唔誇張，但跌勢好全面，仲要由頭跌到尾。點解？

13. 另外有個重點：想講嘅係，星期五嘅跌市，跌幅唔算極誇張，但相當全面！道指30隻股票，全部都跌！我啲美股，亦差不多全部都跌。冇一隻升，都真係幾少見。

14. 仲有可以留意，近乎係由頭跌到尾，由鮑威爾開始講嘢，不停跌，完全無反彈。見到個沽壓都幾勁

15. 咁除咗話佢言論強硬外，仲有咩重點？就要講期望。

留意嘅係：之前對沖基金好多淡倉

16. 可以留意下，原本市場係相當「老定」，甚至睇死鮑威爾只係做人肉錄音機，唔會有乜嘢惡出現（我都係咁諗）。結果就因為人人都咁諗，一有少少風吹草動，就人踩人了。

17. 以上呢啲講法有啲虛，但可以畀些少支持嘅證據你。

18. 首先見到嘅係，原來都真係好多亞洲交易員都嚴陣以待，假都唔放，可以想像交投幾活躍。但好多人交易，呢樣嘢本身係中性嘅。

19. 然後另外我地見到，原來之前好多對沖基金，已經沽空定，估會有一個「鷹派嘅驚嚇」—呢度順手講埋，呢張圖我之前已經睇到，但你唔好諗住話：見到咁多對沖基金造淡，就一定開跌啦—世界唔係咁簡單的，而家跌咗你當然可以咁講，但如果當日鮑威爾係釋出「鴿派」嘅信息，好可能呢啲沽空嘅又會被狂挾。所以你不能事前見到有人沽空就估跌，只係事後畀你參考下第時可以睇乜。

而同時間之前市場係十分樂觀嘅，唔恐慌，VIX低，「咪出事」

20. 但同時間，亦見到CNN嘅Fear and Greed Index，月中嗰時已經去到Greed嘅區域—呢啲並唔係十分好嘅訊號。又，呢個Index嘅好處係免費，你可以去佢地網站睇。但當然，並唔係話Greed時你就沽Fear時你就買就發達，冇咁簡單。雖然係有一定參考價值，但我記得有人實驗過，咁樣聽落好醒，亦都賺到錢—只係你都係跑輸就咁Buy and Hold