美股連跌兩日，又唔「熊市反彈」了？加0.75%嘅預期升溫，又有人擔心Jackson Hole講話，但我認為全不重要。只有今晚PCE數字先重要。港股方面，話咁快又彈700點，又係咪「挾淡倉」？長期呢，股市多數係升嘅，而美股應該跑贏全世界。宏觀討論浪費時間，美股10年升咗N倍添，個個發達未？ Nvidia收入增長得返3%，之前係六七成，但股價照升。純利金額同毛利率都係N季最低。Salesforce 業績。 相信公司長期競爭力嘅，利潤總會返嚟。唔相信嘅？咁做乜咁貴追？友邦蝕錢喎！新業務價值按年大跌喎！做乜仲升？點解買債券都輸幾百億呀？「係咪學金管局咁買內房債呀？」信和今年升20%，而家股價仲高過疫情前，說好了的零售玩完。 (Patreon)

美股連跌兩日，又唔「熊市反彈」了？

加0.75%嘅預期升溫，又有人擔心Jackson Hole講話，但我認為全不重要

只有今晚PCE數字先重要

港股方面，話咁快又彈700點，又係咪「挾淡倉」？

長期呢，股市多數係升嘅，而美股應該跑贏全世界

宏觀討論浪費時間，美股10年升咗N倍添，個個發達未？

Nvidia收入增長得返3%，之前係六七成，但股價照升

純利金額同毛利率都係N季最低

Salesforce 業績

相信公司長期競爭力嘅，利潤總會返嚟。唔相信嘅？咁做乜咁貴追？

友邦蝕錢喎！新業務價值按年大跌喎！做乜仲升？

點解買債券都輸幾百億呀？「係咪學金管局咁買內房債呀？」

信和今年升20%，而家股價仲高過疫情前，說好了的零售玩完

美股連跌兩日，又唔「熊市反彈」了？

1. 好，見到美股低位彈返兩日。之前一輪幾好嘅反彈後，早排跌返4%，又有人會覺得「只係熊市反彈」，「又要再試底」。講過多次，呢啲嘢真係浪費時間，睇少啲為妙。總會有上上落落，再好嘅牛市都唔係一步到位—到日日都升回都唔回時，其實你先應該驚．但身處途中如痴如醉，好難唔跟音樂起舞，我都絶對明。所以都係老教訓，有錢就買，唔使成日睇。更好就練到找咁，睇，但唔會點影響到心情，更唔會亂咁影響決定。

2. 首先留意嘅係，原來星期四晚已經出咗美國第二季GDP，結果向上修訂，但不太重要。固然啲就業數據都幾好，你亦見呢一刻市場估9月加0.75嘅機會去到六成幾，同早排比升溫好多。但呢啲我都只會輕描淡寫。

加0.75%嘅預期升溫，又有人關心Jackson Hole講話，但我認為完全不重要

3. 因為，真係見真章，係睇今晚嘅兩樣嘢。首先係PCE數字，另外就係鮑威爾在Jackson Hole嘅講話。而其實真係重要嘅，只係PCE，出咗再話你知。至於鮑威爾講乜，相信都係模稜兩可嘅講法，講咗等於冇講，到時市升咪話放鴿，市跌咪話放鷹，任你事後點演繹。

只有今晚PCE數字先重要

4. 但大家要明白，聯儲局呢啲，都真係主要睇數字做嘢，並唔係一個人或十幾個人嘅意志真係決定晒所有嘢，有個譜的。所以你睇下出完PCE，個數字如何，先再睇返啲咩加息預期吧。

港股方面，話咁快又彈700點，又係咪「挾淡倉」？

5. 至於港股方面，更加估你唔到，無啦啦星期四打風又升700點，仲要好大成交。Again，成班拗係咪轉勢，係咪挾淡倉，亦係浪費時間。唯一重要嘅，就係你贏錢定輸錢，身家多咗定少咗，其他東西，越係「宏觀」嘅，越係浪費時間。因為股市短期中期根本唔係受呢啲嘢影響

6. 你要講「長期」嘅，有兩樣嘢我一向極有信心（留意我好少可咁講，多數我都同你講我唔知）。首先，一般股市長線係升嘅。第二，長期應該都係美股跑贏港股甚至全世界。原因以前解過，不外乎都係企業盈利，政府對資本主義友唔友善。但，你真係「長線」先好，而唔好忘記今年都有一段幾長嘅時間，係港股跑贏美股嘅。而我堆港股，亦唔少年初至今有得升，跑贏大市的。所以你爭拗咩「大市」係幾浪費時間，美股過去10年升咗N倍添，總唔見個個發達

長期呢，股市多數係升嘅，而美股應該跑贏全世界

7. 我其實全日冇睇港股，事後睇返，話升700點嘅「理由」，相當無聊。不外乎係話大陸出招穩經濟—每次經濟差都會架啦，但你根本判斷唔到邊個位先彈。正如之前都減過息，又唔見即彈700點。同樣地，亦有翻炒返啲中概股審計又可能有進展—呢個亦唔止講過一次，啲消息成日轉，你肯定係最遲聽到嘅一個，完全冇可能睇住呢啲消息去買。

宏觀討論浪費時間，美股10年升咗N倍添，個個發達未？

8. 所以，講到尾，就係夠殘，而股市反彈並唔使咩原因，跌亦唔使咩原因。但估值貴時咪往往好消息冇反應，壞消息大插。估值平嗰時就掉轉。當然港股估值低嘅問題，亦因為啲公司唔係好賺到錢。

Nvidia收入增長得返3%，之前係六七成，但股價照升

9. 講開呢樣嘢，又可以畀你睇下一個例子。我有買，唔少讀者都有買嘅Nvidia出咗業績。我仲update咗個Excel，呢個 Excel相當簡單，可以拎嚟睇

10. 首先見到嘅係，業績真係相當差（陣間詳細解）。但股價照升。之前講過，近來都唔少公司係業績差股價照升，似乎係好現象，反映估值夠平。

11. 不過Nvidia嘅情況，仲有一個原因：早兩星期已經出咗盈警，當時已經跌咗（但亦唔係大插—因為再之前已經跌咗好多）。但又留意返，公司個展望都差過市場預期，但股價都升，所以上一段講嘅嘢都仲成立。

12. 你唔使係咩專家，都會睇到業績好差下。純利得返6億，差不多2年冇試過咁少。毛利率去到得返43.5%，更加係N年冇見過。收入增長呢？得返3%—之前啲季度係六七成咁升。

純利金額同毛利率都係N季最低

13. 元兇？就係Gaming，收入按年跌三成幾。Professional Visualization嗰部份亦係按年跌。

14. 可見你不能就咁聽到咩「晶片荒」（宏觀narrative呀）就走去買，估值是好重要的。況且，度度都加大投資，自己設廠，分分鐘之後係產能過剩。

相信公司長期競爭力嘅，利潤總會返嚟。唔相信嘅？咁做乜咁貴追？

15. 咁點算？冇乜點算。我就相當平嗰時買嘅，冇驚過，你係睇好公司長遠競爭力嘅，生意遲早都返嚟—咁你話，你唔睇好公司長遠競爭力—咁你做乜咁貴仆去買？事實上，公司股價高位插咗一半—以啲高估值嘅科技股嚟講，跌幅並唔係特別誇張。

Salesforce 業績

16. 同時間，Salesforce亦都出咗業績，呢隻都有買，但只係快講。業績係得嘅，但調低咗展望，所以股價都係跌。

友邦蝕錢喎！新業務價值按年大跌喎！做乜仲升？

17. 另外，港股方面都有兩間出咗業績，值得留意下。有買嘅係友邦1299，直頭轉蝕，都幾驚。不過好大程度因為啲「投資損失」—亦唔可以話真係輸錢，主要就係拎住啲債券，而因為債息升，債格跌，到半年結時要mark to market，咪會「輸錢」—但只要啲債券最後還到錢，咁最後你都係收返本金嘅。即係再講白啲，你買美債都好，今年都係「輸錢」的—債息升咗嘛。但到期你都係會拎返晒本金，中途嘅息亦會照收到

18. 所以真係不用過份解讀。雖然同時間，啲股票都輸錢，股票就冇人可以保證最後實會返家。

點解買債券都輸幾百億呀？「係咪學金管局咁買內房債呀？」

19. 當然，同之前講發展商嘅情況有啲似，發展商嘅收入要等賣樓先入到帳，但對公司嘅價值唔使等賣咗樓先見到。同樣地，保險公司亦一般唔係睇盈利，係睇「新業務價值」—因為正常啲友嘅保單係一供幾十年。

20. 留意個新業務價值，大陸嘅按年跌24%，香港嘅按年升少少，當然拉勻都係跌13%嘅。

21. 不過記住啦，股票炒前景，公司有提到，6月成間公司嘅新業務價值已經回復正增長。去到7月，直頭見到中國嘅新業務價值都回復正增長。所以你咪見到股價升，就唔好只係睇「嘩蝕錢呀好大鑊呀」就去沽。又一個例子，可以說明一啲好基本嘅道理。

22. 當然另一樣嘢，就係炒通關，一日未通一日有得炒，而呢樣嘢肯定對公司幫助好大。

23. 亦都某桯度上因為呢個原因，雖然之前你見公司股價連跌7日，但其實跌幅唔大。年初至今，冇跌過咁滯。高位亦只係跌兩成多啲。

24. 有興趣自己睇業績，不過講真，絶大多數人，包括你個保險經紀，都唔會睇得明。保險公司係比較複雜嘅，有機會我詳細講下。

信和今年升20%，而家股價仲高過疫情前，說好了的零售玩完

25. 另一間，之前都有提過，但冇買，只能快講。就係信和83。發展商啲業績，當然唔係睇佢啲盈利。

26. 但你見公司今年股價升20%，絶對係逆市奇葩，亦再教曉你：唔好只係直線思維，覺得疫情呀封關呀人人食兩餸飯呀零售已死呀香港玩完呀—偏偏做商場做酒店嘅信和，就升20%，接近52周新高。而家股價，甚至仲高過疫情前！同厼運之前比，亦唔係爭好遠。

27. 原因嘛？都真係夠平，仲要係淨現金嘅，十分過份，做地產居然做到net cash，都幾少見。之前都有寫過呢樣嘢，但就冇買。而家嘅值搏率就唔算太高了。雖然都仲係好過好多公司。