說到做到，100% invested．拎返保險錢，買返美股港股各一。 第一隻，Facebook Page講咗啦，香港電訊6823嘛。「買仔，即係唔睇好老母？」—少年你太年輕，why not both？ 8號仔9厘息喎，但，「邊有穩穩陣陣9厘息？」。咪咁Kai。 8號仔年年派20幾億股息，但冇一年有20億純利。玩乜？ 另一隻買嘅美股，係……？買嘅原因，就係畢菲特。點解我從來唔買ARKK之類，亦唔叫人買。 而畢菲特係坐艇嘅，咁先好。 短期內我都唔會買個股　—但唔好聽一半唔聽一半。你係唔應該沽股票去應付開支嘅。 (Patreon)

說到做到，100% invested．拎返保險錢，買返美股港股各一。

第一隻，Facebook Page講咗啦，香港電訊6823嘛

「買仔，即係唔睇好老母？」—少年你太年輕，why not both？

8號仔9厘息喎，但，「邊有穩穩陣陣9厘息？」。咪咁Kai

8號仔年年派20幾億股息，但冇一年有20億純利。玩乜？

另一隻買嘅美股，係……

買嘅原因，就係畢菲特

點解我從來唔買ARKK之類，亦唔叫人買

而畢菲特係坐艇嘅，咁先好

短期內我都唔會買個股　—但唔好聽一半唔聽一半

你係唔應該沽股票去應付開支嘅

說到做到，100% invested．拎返保險錢，買返美股港股各一。

1. 好，講咗幾日香港防守股，玩咗幾日Excel，希望大家有用，回歸返平嘅時模式。講返市況，主要講美股，港股就唔好講了，雖然我都仲不停有買。

2. 咁不如講返，呢排買咗乜個股。港股美股各一。反正銀碼唔大，就貼埋銀碼畀你，都係幾萬蚊。主要就係因為保險賠咗錢，找埋之前啲小負債，都仲有啲錢剩

3. 不過之後短時間（幾個月？半年？）就唔再買個股了。

第一隻，Facebook Page講咗啦，香港電訊6823嘛

4. 首先講買咗乜港股，Facebook Post都有講，但都唔使特別去睇。正係早幾日講過嘅香港電訊6823。點解買？都係嗰啲原因。首先息高，業務又夠防守性。

5. 但更重要嘅係：搏重組，或者分拆上市。而我唔知會點玩，但李澤楷啲作風，某啲位梗係做啲嘢。佢唔係一個安份做呢啲悶嘢嘅人。

「買仔，即係唔睇好老母？」—少年你太年輕，why not both？

6. 呢度亦都答埋你一個問題，一個我都幾怕讀者問嘅問題：「點解買呢隻唔買嗰隻？」—實情點答你？買咗嗰隻又問我做乜唔買呢隻。在呢個例子，就係會有人問：點解唔買8號仔？

7. 答案好簡單：因為，我一早買咗8號仔，月供緊，但唔太多。

8. 所以，唔好見人買個仔，就自作聰明以為「即係唔睇好阿媽」。唔好見人買港股，「就即係唔睇好美股」。你去睇啲咩「大戶」動向更係浪費時間，畀你見到人地「短倉」歐洲股，你又知人地另外冇幾十億長倉？唔好咁天真。

9. 你可以話，我買6823嘅原因，「就係因為我買咗8號仔」。點都似係會「做啲嘢」，但我唔知佢會開邊瓣，所以不如兩隻買晒。事實啲業務好多重叠。

8號仔9厘息喎，但，「邊有穩穩陣陣9厘息？」。咪咁Kai

10. 不過順手講埋，8號仔而家9厘息，6823就7厘息。而記住，呢個世界係冇「穩穩陣陣7厘息」嘅！

11. 冇錯，兩間公司過去5年都冇減過派息，但呢個位你就可以講「過去不等於將來」，5年，唔係咩好長嘅日子。「你去到地鐵咁22年先叫往績」

8號仔年年派20幾億股息，但冇一年有20億純利。玩乜？

12. 你睇返上次個Excel，或者睇aastock（公司資枓—損益表），會見到8號仔係「派突」息嘅，年年派20幾億股息，但根本純利冇一年有咁多錢（有年仲蝕錢）。咁都得？得。借錢派咪得。所以咪話見到公司負債高。6823嘅情況就好少少。

13. 呢個唔係你不能買嘅理由，但即係，千萬唔好諗住成副身家落去，「穩檼陣陣」收9厘息當生活開支—佢隨時可能減，可能停。個「高息」唔係完全假象，但你不能當係一定發生。可能停，可能減。

另一隻買嘅美股，係……

14. 美股方面，更加簡單，買咗隻Ally Financial，前身係GMAC，就係GM通用汽車畀啲友上車會嘅

15. 我買嘅原因？得一個。畢菲特。照計你都唔使再點質疑畢菲特嘅眼光—未必真係隻隻中，但往績真係極好。仲記得早一兩年妖股當道，成班小朋友質疑佢冇料到回塘，「唔同年代啦，股票邊使睇估值」，個個吹捧Cathie Wood啲垃圾股．結果點？你睇ARKK同巴郡股價表現爭幾遠？

買嘅原因，就係畢菲特

16. 而最好笑嘅係：ARKK輸錢，根本對Cathie Wood冇大影響—佢收管理費之嘛！以前都寫過，當旺嗰幾個月，佢收嘅fee，已經夠食幾代無憂。你班友輸錢，關佢春事。

17. 畢菲特嘅情況絶對唔同，佢自己大部份身家都在巴郡，亦唔係收fee嘅模式。真正叫做同股東坐埋一條船。

點解我從來唔買ARKK之類，亦唔叫人買

18. 呢個係一個好簡單嘅例子，畀你睇到咩叫skin in the game，咩係OPM．而點解我從來都冇買ARKK一系嘅嘢，亦冇叫你買。

19. 但講返Ally，買嘅原因仲有幾個。首先係年初至今股價跌咗3成—咁先好，而唔係啲升晒嘅嘢。即係例如畢菲特1蚊買，隻嘢升到上10蚊，你先去買，咁跌返落5蚊佢仲執5倍，你就輸一半。又一次畀你見到，點解跌我先放心買，升晒反而唔太放心。

20. 你可以對比下，李嘉誠買Zoom，一蚊美金成本，你就幾百蚊去買，有乜後果？就係隻嘢跌到80蚊佢都仲執成百倍，你就輸大半，仲幫佢手接貨。

而畢菲特係坐艇嘅，咁先好

21. 你可以留意下，畢菲特最初係5月時公佈，即係今年第一季買。到最近見到第二季再增持—即係佢啲持貨成本一定高過我。唔會出現上一段講嘅例子。

22. 至於公司做乜之類，反而未必太重要，亦唔係咩好fancy嘅業務（啱晒佢作風）遲下先慢慢解。

23. 不過你亦可以留意，隻嘢啲估值都幾低下，below book，幾倍PE，亦好啱畢菲特嘅作風。一年24億純利，市值110億唔夠。

短期內我都唔會買個股　—但唔好聽一半唔聽一半

24. 應該講嘅係，短期我都未必會再買個股—但唔該唔好聽一半唔聽一半。我唔係唔睇好，係絶對睇好，幾時都睇好。我一路每個月，係每一個月，都將所有閒錢買晒股票。

25. 我只係而家少買個股咁解，主要買返多啲ETF。原因亦講過：因為之前我太多個股，一路想戥返平衡啲。但每個人嘅情況唔同，可能你本身乜股都冇買，可能你嫌悶，可能你想試自己眼光，咁我不停叫你買QQQ VOO你又覺得我呃錢搵你笨。

你係唔應該沽股票去應付開支嘅

26. 所以比較重要嘅始終係老規矩，stay invested，唔買都唔好亂沽，盡量避免在啲最亢奮嘅時間先飛晒入去。亦都唔好在咩「壞消息」嗰時沽走。「壞消息」你唔敢買係正常嘅，但唔好以為「壞消息」時唔應該買—壞消息先最應該買。

27. 仲有，不止講過一次，你一大舊錢去買然後摸頂，一個月跌你兩三成，極痛苦的。我分開買，都係會摸頂—但我唔會每一注錢都係摸晒頂嘛，心理上你會好過好多

28. 仲有，唔同讀者嘅財務狀況真係唔同。原則上我當然叫你每個月所有嘅閒錢都拎晒去買股票，無論任何市況。但又舉例講，如果你收入唔高嘅，就留意下你嘅開支。月入唔高本身唔係一個問題，一兩千都可以個個月買，絶大多數人都係低人工開始，我都係萬幾蚊人工已開始買股票。但至怕你例如年尾要去次旅行又冇錢結果要沽走啲股票嘅，咁可能搞一輪得個桔。

29. 但我亦從來唔係一個十分慳家嘅人，即使低收入時都唔係，我又唔會叫你緊縮晒啲開支，因為真係相當唔現實，而你做人都會冇晒樂趣。

30. 即係點？即係，如果你啲開支係大約可預見嘅，例如我當你每年都要一家四口去一鑊日本嘅，咁你就不如每個月預備定啲錢。嗰啲應該係你嘅「必要開支」

31. 我意思係：你係唔應該沽股票嚟應付你啲開支嘅。除非真係好突發嘅，咁上面去日本嘅例子就唔算啦。但即使我做手術做咗幾十萬，而保險又未賠，我都冇沽過股票，只係之後幾個月買少啲。咁對成個組合影響其實不太大嘅。

32. 之後會順便再講埋，咁嗰幾個月我啲錢邊度嚟。唔好忘記我一路有keep住買股票

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。