納指彈20%回返5%又「熊市反彈」？實情拗嚟真係浪費生命。真正關鍵嘅問題得一個（估下係乜？）。近排跌乜？驚通脹驚加息喎。但真係？市場仲係預加0.50喎。星期五Jackson Hole睇乜？大行估9月後放慢加息—但當然通脹回落都可以照加息的。不過數據唔呃人，見到10年債息升到3厘，美匯指數上到109。搞乜？明明通脹預期就跌咗，「不過預會維持更耐」。今個星期嘅PCE數字，又估下會點？「應該回落啦」，除非唔係。仲有第二季美國GDP數字？「上個月咪出咗咯，又出？美股業績：Nordstrom就當然插水，「咪話零售唔掂」美股業績：Macy’s逆市升4%。「明明又話零售唔掂！」美股業績：Zoom大插17%，「疫情後冇人用，定仲有人用？」。問錯問題。李嘉誠幾錢買，你又幾錢買？「車，埃汾夠高位買NetFlix買Shopify啦」 (Patreon)

納指彈20%回返5%又「熊市反彈」？實情拗嚟真係浪費生命

真正關鍵嘅問題得一個（估下係乜？）

近排跌乜？驚通脹驚加息喎。但真係？市場仲係預加0.50喎

星期五Jackson Hole睇乜？

大行估9月後放慢加息—但當然通脹回落都可以照加息的

不過數據唔呃人，見到10年債息升到3厘，美匯指數上到109。搞乜？

明明通脹預期就跌咗，「不過預會維持更耐」

今個星期嘅PCE數字，又估下會點？「應該回落啦」，除非唔係

仲有第二季美國GDP數字？「上個月咪出咗咯，又出？」

美股業績：Nordstrom就當然插水，「咪話零售唔掂」

美股業績：Macy’s逆市升4%。「明明又話零售唔掂！」

美股業績：Zoom大插17%，「疫情後冇人用，定仲有人用？」。問錯問題

李嘉誠幾錢買，你又幾錢買？

「車，埃汾夠高位買NetFlix買Shopify啦」

納指彈20%回返5%又「熊市反彈」？實情拗嚟真係浪費生命

真正關鍵嘅問題得一個（估下係乜？）

1. 講下近排嘅美股市況，你話好差又唔係，高位回咗大約5%咁。但又足以令好多人又唔敢買，覺得之前納指低位升20%，又只係「熊市反彈」。而我多次寫過，不停咁拗呢啲咩「牛市定熊市反彈」，根本就係浪費生命時間，亦唔會對你有任何益處。

2. 重要嘅問題只有一個：你副身家有冇多到？明報篇文有詳細寫，Attachment有，不在呢度重覆。

近排跌乜？驚通脹驚加息喎。但真係？市場仲係預加0.50喎

3. 首先睇下大路嘅講法，都係繼續講驚通脹，同埋驚加息。未必完全係同一樣嘢：留意我一路講，可能呢幾個月你會見到通脹回落，但繼續加息，我相信呢個情況出現嘅機會幾高。但亦唔係咩大不了，只係等你有個準備。冇人話加息股市唔可以升。你睇7月？

4. 另一樣嘢，就係驚星期五聯儲局主席鮑威爾，會在Jackson Hole（係一個地名）嘅講話表達強硬嘅加息立場。話晒係主席，加上呢個係一年一度嘅全球央行年會，自然受注目。

星期五Jackson Hole睇乜？

5. 但我比較相信，並唔會有咩好特別嘅訊息傳出嚟。事實上，好多嘢係股市跌咗先開始話「擔心」。明明上星期出7月嘅議息會議紀錄，啲友先執住嗰句「在某個時候減慢加息步伐可能是合適做法」，當係「好消息」。所以，真係又係narrative，跌咗搵理由

6. 而你睇CME Fed Watch，暫時都仲係估9月加0.5嘅機會大過0.75，雖然已經收窄不少。

大行估9月後放慢加息—但當然通脹回落都可以照加息的

7. 我相信正如高盛所講，Jackson Hole根本唔會有咩好大嘅意外，傳統上都唔會。好大機會都係重覆返佢呢排講嘅嘢。留意高盛就估9月只會加0.5。同時間，JP Morgan都係咁上下睇法，冇講明估9月加幾多，但相信9月係最後一次「大手」加息

8. 當然了，幾十間大行，間間有唔同睇法，甚至同一間有兩堆人唔同睇法又得，同一個人忽然間打倒昨日之我又得。唔多唔少亦係因為上面兩個睇法，同我想法差唔多，所以我先分享。你地平時都要小心呢種「confirmation bias」，唔好自己有咗結論先再去搵「證據」支持，你要搵一定畀你搵到證據的，有人話納指跌到1000點添。

9. 我當然有睇唔同嘅觀點—最後我唔同意，冇分享出嚟，另一回事，但至少我係有睇嘅，而唔係好多人咁，自己有睇法再去搵人支持。

不過數據唔呃人，見到10年債息升到3厘，美匯指數上到109。搞乜？

10. 好多narrative同預測都係廢話，因為任你演繹，總可以自圓其說。但價格同數據就唔呃人。

11. 近排又真係睇到嘅，就係美國10年債息上返3厘樓上。咁一路都講，呢個對股市當然唔太好，亦可能係近期股市回調嘅原因（不過留意債息同高位比都仲係回調咗不少）。但至於點解債息呢排升？就真係唔知了。正路出面嘅講法話係驚通脹驚加息（上面講咗），但我並唔太信服。

12. 同樣地，亦見到美匯指數走強，上到109。「理由」同上面講嘅亦差不多，但我嘅演繹，就好可能只係避險情緒高返嘅現象。

明明通脹預期就跌咗，「不過預會維持更耐」

13. 至於通脹方面，近排油價升返啲，亦可能係擔心通脹嘅理由。但油價同高位比仲係跌咗三成咁滯。而同時間，見到投資者嘅通脹預期，就真係回落咗—但留意，係對短期通脹嘅期望回落，但就認為會維持耐啲—亦符合我呢篇文最初講，通脹會回落，但唔會好快跌到低水平嘅講法。

14. 呢個就可以畀你睇埋過去一兩年，個通脹期望嘅變化

今個星期嘅PCE數字，又估下會點？「應該回落啦」，除非唔係

15. 於是乎，又要講，今個星期五晚嘅PCE數字又係幾關鍵了，聯儲局就主力睇呢個，而唔係CPI。Headline PCE，上次係6.8%，街嘅預期未見，但Trading Economics估6.2%。核心（扣除能源同食品）PCE，上次係4.8%，今次街估4.7%（留意Trading Economics估到4.3%）。即係預期係回落，又睇下係咪符預期。我估如果符預期，甚至低過預期嘅，上面一大堆講驚通脹驚加息嘅嘢，自然就冇晒。

仲有第二季美國GDP數字？「上個月咪出咗咯，又出？」

16. 順手講埋，星期五會出個美國第二季GDP數字—又出？唔係上個月出咗？冇錯，上次係初值，今次係修正，之後仲會有最終值。照計就non event，一般唔會好大幅咁修改。不過上次數字係收縮0.9%，而街估修正值係會冇縮咁多嘅。

美股業績：Nordstrom就當然插水，「咪話零售唔掂」

17. 最後可以講埋幾間美股業績，我都係冇嘅，但純粹點評下

18. 首先係Nordstrom百貨公司，美股星期二收市後早出，盤後股價大插。其實業績係得嘅，但大幅調低咗全年嘅展望。咁明顯你會覺得，零售市道唔得，經濟都應該唔得（相信都係）

美股業績：Macy’s逆市升4%。「明明又話零售唔掂！」

19. 但，同時間，差不多業務嘅Macy’s，星期二開市前出業績，一樣係調低展望，但股價仲要有得升！

20. 畀你估下，點解股價反應咁大分別？

21. 似乎就因為估值。你甚至唔使點去計數。Macy’s高位已經插咗一半，今年跌三成幾。Nordstrom呢？未計最新呢棍，年初至今企得好硬，只係跌3%

22. 留意之前Walmart都係咁，出業績時升大，因為早早出咗盈警

23. 又係一個好簡單嘅例子，你去拗一大輪，係咪衰退，零售業係咪唔得，多數都係浪費時間。你睇同樣嘅行業，同一日，一樣係唔得嘅業績，股價反應都完全唔同。就係因為預期，同埋估值。

24. 亦都可以留意，Macy’s雖然調低咗個收入預期，但因為大家早已冇期望，佢調低咗嘅數，都仲係高過市場預嘅！

25. 睇到股市係點運作未？唔好再不停咁拗不停咁講零售業得唔得。當然係唔得，但你應該問嘅問題係：反映咗幾多。好難答，但呢個先係有意義嘅問題

美股業績：Zoom大插17%，「疫情後冇人用，定仲有人用？」。問錯問題了

26. 最後係Zoom，都係星期二開市前出，睇股價反應都知業績唔得啦，亦係調低咗展望。

27. 升嗰時，大家如痴如醉啦，亦係疫情受惠股。咁但之後呢？有啲人會認為疫情後公司啲生意就玩完，但亦有人認為之後都會繼續用—真相係乜？真相就當然介乎兩者之間，至少我相信大家而家都仲有用。

28. 但你睇股價，高位係550蚊，52星期高位都360蚊，而家就80蚊，就真係輸死人。另一個角度睇，如果你5年前買（但應該冇人聽過呢間公司），而家仲贏緊錢。「即係，李嘉誠仲有大把錢贏，但你己經輸到趴」

李嘉誠幾錢買，你又幾錢買？

29. 亦係好簡單嘅故事，畀你睇到幾樣嘢。第一，唔係「好消息」時買，應該係「冇消息」或「壞消息」先買，升晒先去追，有乜後果？第二，唔好信名人效應，人地點石成金，但佢買嘅位低你99%，你輸死佢都仲大把錢贏，甚至係你幫佢接貨。第三，唔好只係睇narrative，「疫情受惠」嗰下嘢固然係（你睇Netflix？），但即使「後疫情」，你話公司冇人用？又唔係喎。但你話公司放緩？又一樣係啱喎。兩個講法都啱，講到尾只係估值。

30. 但當然，事前你唔會知道咩位先係「升晒」，估值幾多倍先叫貴亦好難準確掌握。但至少，唔好信名人效應，唔好「好消息」時先買，應該係做到嘅。

31. 最後不如計下數，公司你當44億收入，一年盈利可能12億上下。而家市值240億。5倍price to sales，20倍市盈率咁上下。唔算發癲地貴，但亦唔算好平。

32. 重點係：咁你諗下，550蚊嗰時，隻嘢貴到咩地步？

33. 而Zoom已經係一間生存到，仲要有錢賺嘅公司！

「車，埃汾夠高位買NetFlix買Shopify啦」

34. 冇買都好，請你認真咁諗下呢個例子。你不能完全避免，即係我買Netflix，Shopify都輸唔少—但我唔係全部錢買晒落去，亦唔係最高位買。