［咪以為去咗英國就逃得出李嘉誠魔掌！］長江基建1038：英國通脹加電費受惠股？（有Excel） (Patreon)

長江基建1038：英國通脹加電費受惠股？（有Excel）

上市26年，年年加派息，香港有冇第隻？

不過有啲人連長和1長實1113都未識分，順便教埋你

長江基建架構：教埋你點搵股東同附屬公司聯營公司

51%附屬公司點入數？36%聯營公司又點入數？

長建條數，表面簡單，魔鬼在細節。點解34億收入但44億純利？

「營業額」200億，「收入」34億，有乜唔同？

妹仔大過主人婆：聯營合營33億利潤，自己先14億

仲有，公司交好少稅

明明話公司收英鎊，英鎊跌對公司不利，點解公司有幾億「匯兌溢利」？

呢度會答晒啲問題先

點解公司搞咁多「合營聯營」？

就唔好以為有「匯兌溢利」，就即係英鎊跌對公司有利

睇睇公司嘅生意同利潤，到底嚟自邊度

但「電能」入面又有唔同地方喎，仲有「港燈」呢？

公司表面負債好低，但收埋在其他地方啦

最新發展？全世界通脹，加電費。冇錯係受管制行業，「即係受管制地加」

英國供水已賣咗啲，電網就反價唔賣住，點解？

長江基建1038：英國通脹加電費受惠股？（有Excel）

1 頸痛，停咗兩日寫唔到文，而家寫返。Facebook嗰啲？幾日前寫定的

2 講返呢個「防守股系列」，之前貼咗電盈8香港電訊6823，太古19，仲有中移動941（冇電盈咁詳細）。除咗成堆都係我有嘅嘢，又係早排出咗幾好嘅中期業績，又全部今年有得升之外，亦都幾適合你去學睇公司或睇財務報表，有用的。

3 實情99%你都唔使睇完呢啲嘢先買股票（好多時我買完先整），但個用途在邊？就係你可以做少啲錯嘅決定，唔好因為其他人講乜你又信，聽到啲「壞消息」又驚。因為至少你知道公司嘅數係點。

4 仲有一篇地鐵66，好快會寫埋，之後又可以講返多啲美股，同市況嘅嘢。今日呢篇就世紀鉅著了。唔好又投訴做乜幾日冇文，重質不重量嘛。況且好快仲有篇港鐵，之後會有返多啲短文

上市26年，年年加派息，香港有冇第隻？

5 好啦，今次呢篇講呢隻長江基建1038（長建），都成日提，但個Excel我一路都未整，而家整埋（所以用咗啲時間）。

6 以往多數都係強調間公司由上市到而家（26年！），每年都加派息，相當難得。中途經歷過亞洲金融風暴，沙士（其實唔關事），金融海嘯，歐債危機（關事），仲有肺炎疫情。派兩三年高息，好容易，但可以維持26年，極之難。呢個往績好驕人（但亦都令到公司從來都冇點「平」過）。

7 首先好廢，但要話你知，公司就真係做「基建」嘅。例如乜？供電，供水，仲有污水處理等等，業務遍及世界各地。以上種種有啲讀者都聽過，但呢篇文會詳細畀你睇。順手仲可以學埋金融會計嘢。

不過有啲人連長和1長實1113都未識分，順便教埋你

8 呢間公司看似簡單，實情相當複雜。首先，好多人長和1同長實1113都未分到，

9 長實1113，就真係主要地產相關嘅嘢，賣樓，商場寫字樓收租，酒店。仲有英國酒吧，以前有飛機租賃（早排賣咗），仲有幾隻REIT，仲有啲基建相關嘢，年報有寫

10 長和1，就主要係啲非地產嘅嘢，好多嘢，你可以慢慢睇年報。或者話，你知道李嘉誠而上面1113冇講嘅嘢，應該就在呢度。和黃醫藥13，和記電訊215（3台，仲有其他地方嘅電訊），屈臣氏（包埋百佳，豐澤），港口，長江生命科技775，新城電台，TOM仔，加拿大Husky能源，Hutchgo，mReferral，AMTD尚乘理財。

11 仲有包括：我地今日要講嘅長江基建1038，電能6．港燈2638。都係長和1入面嘅嘢。死未

12 最後留意，而家長和同長實，就分開咗，大家大股東都係姓李嘅，但只係姐妹公司，互不從屬，冇互相持股，業務重叠都冇乜。

長江基建架構：教埋你點搵股東同附屬公司聯營公司

13 好啦，今日嘅主角係長江基建1038，搞清楚個架構：1號仔，渣住75.7%長江基建1038，然後長江基建又渣住電能6嘅36.0%股權，電能6又渣住港燈2638嘅33.4%股權。呢段你可以save起佢。想自己搵？快嘅上aastock，「公司資料」嗰度有。想清楚嘅，自己睇年報。

14 點搵？想搵間公司有乜股東嘅，搵一欄叫做「股東權益及淡倉」，但有時你見到加埋晒超過100，就因為入面堆嘢互相有關，不詳解。圖中你見到，長建1038嘅大股東，就係長和1，75.7%

15 想搵公司有乜子公司嘅，搵「主要附屬公司」「主要聯營公司」「主要合資企業」之類，但多數好Q多！所以最好你有少少概念先。圖中見到，電能6，係長建1038渣住36%嘅聯營公司

16 送佛送到西，年報在邊搵？公司網站，或者港交所都有。提埋你，「業績」同「年報」係唔同嘅東西，正路就年報多啲嘢，但遲少少先出，亦有公司一齊出。中期報告又會少嘢睇過年報。

17 呢堆嘢（1038，6，2638）嘅關係十分重要，因為同啲數點入有關。你鍾意可以溫返書，上次講電盈8同香港電訊6823有講（留意呢兩間嘢同長實長和已冇乜關係）

51%附屬公司點入數？36%聯營公司又點入數？

18 唔想溫書嘅，好快話你知，附屬公司嘅（一般渣住50%以上），無論渣幾多，阿媽盤數嘅「收入」，會入晒阿仔100%—然後最尾純利時減返一舊「非控股權益」（有時叫「少數股東權益」，minority interest，MI）出嚟。例如電盈8就入晒香港電訊6823所有收入（持股52%嘛），最後就勾返走。

19 好啦，電盈篇文都有講，仲有一味叫做「聯營」或「合營」公司（呢度唔解有乜分別，否則天光未寫完）。在電盈嘅情況，就係而家盈大地產，一般拎住30-49.9%嘅公司就會咁（有時再少都得，詳情不解）。點入法？例如電盈，咪分返盈大地產30%嘅利潤落自己盤數。留意係電盈自己計晒收入（包埋香港電訊）開支甚至折舊等等，最後在扣稅前先整埋呢個「聯營公司」利潤入去

20 好重要呀下，未消化到唔緊，陣間唔明返嚟呢段再睇。

長建條數，表面簡單，魔鬼在細節。點解34億收入但44億純利？

21 長江基建條數，表面上完全唔難。你望下，幾咁簡單（遲下你睇下地鐵嗰舊，人都癲），簡單過好多細公司。除咗下面個永續債深啲外（唔解），好似好簡單（「非控股權益」上面解咗）

22 但，點解解34億收入但44億純利？咁咪130%純利率？你嗰啲一知半解，用「揀股工具」，睇邊間net profit margin最高，就會中伏（唔係話呢間伏，但唔係咁計）

「營業額」200億，「收入」34億，有乜唔同？

23 但，你細心嘅，應該留意到啲異樣。首先，你見有個額外嘅「營業額」，在個表之外，唔知係乜。平時你多數以為「營業額」即係「收入」，但呢度又好似唔係。

妹仔大過主人婆：聯營合營33億利潤，自己先14億

24 另外，妹仔大過主人婆，你見公司堆聯營合營嘅收入，好大，好之前好多公司好唔同。留意，電能6嘅純利就在呢度入面包咗。

仲有，公司交好少稅

25 最後，你仲會見到公司交好少稅。

明明話公司收英鎊，英鎊跌對公司不利，點解公司有幾億「匯兌溢利」？

26 同埋，做乜有個「匯兌溢利」？呢舊，即係匯率帶嚟嘅收益。明明話公司在咩英國歐洲澳洲有業務（係丫），而呢堆貨幣對美金對港紙勁跌（係丫），點解反而有個「匯兌溢利」？

呢度會答晒啲問題先

27 首先，嗰個咩基建投資之銷售及利息收入，就係平時你理解嘅「收入」，top line．咁公司直接營運嘅嘢，或者渣超過50%嘅附屬公司，啲數就在呢度。

28 至於公司分「聯營合營」（包括電能）嘅利潤，就會在下面見到。於是好易答到你：點解妹仔大過主人婆？因為好多聯營公司！仲要好大舊！

29 於是乎亦答到你，點解稅率好似咁低。因為，「聯營合營」公司分過嚟嘅，直接係純利—咁「聯營合營」堆嘢交咗一次稅啦嘛！多數唔會再交多次。亦即係話，嗰33億大部份都唔會再交稅。咁你計下，剩返嘅數字，13.8億交稅。唔會係46.9億去交稅！

30 至於個「營業額」同「收入」嘅分別係咩回事？好簡單，呢度有計返出嚟，上面講咗，收入係附屬公司嘅嘢，亦包埋長建自己借錢畀啲「合營聯營」收嘅息。呢堆嘢，加埋「合營聯營」嘅收入（留意唔係利潤），就係公司嘅「營業額」。留意因為「合營聯營」堆嘢唔係附屬，唔會食落去「收入」，唔係電盈8食香港電訊6823咁

點解公司搞咁多「合營聯營」？

31 會唔會有人問，點解公司要搞咁多「合營聯營」？唔自己渣晒？原因有好多，但可能以前你都聽過李嘉誠啲公司鍾意咁。首先可以以小控大（以前長和系嘅玩法），另外亦可以「隱藏」啲負債。不過呢啲所謂「財技」，去到你同我都知，就唔係咩秘密（40年前就係）。仲有嘅考慮，亦可能係政治。基建項目敏感，外國人未必放心畀姓李嘅佔大份，但如果佢只係三四成，齋分錢，就OK

就唔好以為有「匯兌溢利」，就即係英鎊跌對公司有利

32 至於「匯兌溢利」，同咩「合營聯營」就冇直接關係。應該咁講，公司在英國啲業務，收英鎊，咁英鎊跌咗，收入換返做港紙就少咗啦—咪就係收入嗰行少咗咯！即係原本係1億鎊13億港紙，之後變咗1億鎊10億港紙，收入少咗。呢度唔會再額外有多一舊數叫「匯率損失」。

33 咁你見到嘅「匯兌溢利」點嚟？好簡單，例如公司有英鎊嘅負債，咁因為英鎊跌咗，在Balance Sheet上，負債咪少咗！呢度賺嘅，就係「匯兌溢利」。

34 所以，唔好見到有「匯兌溢利」又以為「哦原來英鎊跌對公司好」—梗係唔係啦！你個收入縮咗一截的！

睇睇公司嘅生意同利潤，到底嚟自邊度

35 上面嗰堆明咗後，其他就好易明（再唔明可以再翻睇上面）

36 首先貼多次呢個表，係話你知「收入」同「營業額」嘅關係，留意啲數係對得返Profit and loss嘅數。

37 然後拆開個營業額，睇下邊度貢獻。見唔見電能係0？原因我都唔係好肯定，但應該係當財務投資，冇計落營業額，而唔係好似其他咁，「合營聯營」個項目。你話係咪計咗入香港同內地度？答案：絶對唔係

38 然後睇不同地方貢獻嘅「合營聯營」盈利（留意呢度未扣稅），呢度就見到電能貢獻了。再講一次，啲數對得返，綠色嗰堆妹仔嘅利潤（33億），係大過「自己」（13.8億，仲要未扣稅）嘅利潤

39 然後我地直接跳對去純利，再講一次，啲黃色嘅數對到的。

40 好啦，首先留意，電能貢獻，係10.3億。然後電能自己純利28.7億。28.7 X 36%，就係10.3億！係咁計的！正唔正？

但「電能」入面又有唔同地方喎，仲有「港燈」呢？

41 第二個問題係：咁長建最主要嘅盈利來源，係邊度？你會答係英國。答案係啱嘅，但你有冇諗過一個問題：「電能」到底生意在咩地方？話你知，電能入面仲都仲有英國！所以英國嘅貢獻，多過你呢度就咁睇嘅16.8億。

42 當然，我唔會得閒到將電能嘅嘢又入一次（可能第時會），咁只畀張圖你睇。電能嘅中期業績，你見到3樣嘢。首先，28.7億純利，上面寫咗。另外，電能自己最大盈利都係來自英國。

43 不過，仲有一樣嘢：見唔見仲有「港燈電力」？呢間就係2638。上面咪話咗你知，電能又渣住呢間港燈2638嘅33.4%！

44 即係話，電能盤數處理港燈，就好似長建盤數處理電能咁。類似係阿爺，老豆，同孫（而長和……就係太爺，「李嘉誠就係太太爺」，五代同堂）

45 聰明嘅你會問，「咁港燈入面仲有冇英國？有冇仲渣其他上司公司？」。幸好就冇，港燈就100%香港（同埋……南丫島）。

46 所以，長建，就真係一間英國公司嚟的。至於你話咩匯率風險，咁根本有辦你睇，對業務實有打擊，但唔係咩大件事。況且以前都寫過，匯率嘅嘢，都係zero sum game，唔通人地公司見匯率唔好就握埋啲生意？做大事唔係咁的。

公司表面負債好低，但收埋在其他地方啦

47 財政方面，Excel有，但呢度費事講太長。咁你表面睇，負債唔高的，但都話一大堆收晒在啲合營聯營公司度，睇唔出的。

最新發展？全世界通脹，加電費。冇錯係受管制行業，「即係受管制地加」

48 好啦，搞咗一大輪，即係點？以前一路講公司嘅派息，冇錯係年年加，但近幾年係只係加些少咁，原因好簡單，因為業績係有啲壓力嘅。當然會受疫情影響，亦都受匯率影響。但照計要回復到疫情前，唔係難事。唔少地方都加電費，英國都係，但當然係咪完全任你加就涉及好多政治嘢了。

49 公司上半年純利已經44億，咁正路地，今年全年點都會好過2021同2020（70億多啲）。

英國供水已賣咗啲，電網就反價唔賣住，點解？

50 另一方面，見到公司下半年會完成出售部份英國嘅供水業務，亦都暗示會加派息。公司有提到好多業敄都係受管制（公用事業嘛），但亦係跟通脹調整收費嘅。

51 亦都有講埋，多數買當地嘅嘢，就用嗰種貨幣發債，就平衡咗個「匯率風險」。留意，領展都有類似嘅做法。

52 至於另一單都有人講，就係賣英國嘅電網業務，但因為臨時反價而告吹咗。都係比較少見，但亦畀你見到公司嘅信心，明顯覺得高通脹有利。

53 最後留意一樣嘢：通脹升，政治亂，利息升，有啲公司莫財，股價大跌—呢啲先係長建呢類有實力公司收購嘅好機會。所以睇嘢唔好咁表面，對強者嚟講，逆境先係好事。公司講到明，啲大嘅項目，而家競爭反而較細。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。