電訊盈科8 香港電訊 6823（有Excel） (Patreon)

電盈8渣住51.9%香港電訊6823

但香港電訊嘅收入係100%計晒入電盈嘅

電盈320億市值，但渣住嘅香港電訊股票都值433億。剩返嘅係負數？

即係電盈好抵買？定其他業務垃圾負資產？有乜其他業務？

咁個仔有乜業務？「其實得一瓣」（有Excel）

老母踢Now台畀個仔，只係收20億

到電盈：有乜業務係個仔冇，老母先有？（有Excel）

Viu台半年幾億收入咋

電盈EBITDA 56億，但減完啲ITDA，就倒輸錢了！

T就人人要，但點解電盈咁大舊IDA？

Viu同OTT（黃Viu）都EBITDA正數—但唔係等於賺錢！

Viu 台EBITDA仲低過舊年下半年

最新業績：阿仔賺錢，老母蝕錢。咁你話老母啲其他業務賺定蝕？

OK，之前齊齊吹奏黃Viu好多賓印泰睇，大過Netflix．但邊個發功？

阿仔賺錢老母蝕錢，啲蝕錢嘢在老母度，阿仔又低啲負債。

即係買阿仔？又未必

有必要就講美股，冇乜必要就下篇講港鐵

1. 講下之前新聞多多嘅電盈8，同埋香港電訊6823。留意演唱會意外後，股價近乎冇影響，我都有啲奇怪。

電盈8渣住51.9%香港電訊6823

2. 首先好多人都分唔清兩間公司，都正常，因為都係幾煩。第一樣嘢，你要知道，電盈係阿媽，香港電訊係子公司。電盈渣住香港電訊51.94%股權，所以係「附屬公司」。

但香港電訊嘅收入係100%計晒入電盈嘅

3. 唔熟會計嘅讀者一定要留意，因為你地可能以為，即係電盈盤數會分香港電訊51.94%嘅收入同盈利—錯，係全部入晒去的！即係香港電訊100億收入，電盈盤數就入晒100億。超過50%嘅「附屬公司」，都係咁玩法，因為你可以完全控制下面間公司嘛。咁你話，啲數咪誇大咗？Yes and No，正如上面講，你控制晒間子公司，啲收入計晒你度都有道理。而最後計完盈利，係會在個「少數股權」度勾返走「唔屬於老母」嘅嗰啲嘢，先係個真正純利（之前有人問咩係「少數股權」minority interest，呢度答咗你）

電盈320億市值，但渣住嘅香港電訊股票都值433億。剩返嘅係負數？

4. 另外，留意香港電訊市值大過電盈好多！香港電訊835億，電盈就320億。另一個方法睇，電盈只計「持有」嘅香港電訊股票，己經係835*51.94%＝433億—咁咪即係，其他業務係送嘅？即係電盈好抵買？定係，其他業務係負價值（但，一間公司即使蝕錢甚至負帳面值，都只能零市值，不能負市值）

5. 答案係：並不能咁去計。冇咗阿媽，你堆嘢仲係咪值咁嘅錢？或者電盈沽晒出街，你仲係咪咁嘅錢？不過，你可以參考下歷史，睇下電盈呢個「折讓」同歷史平均相比。雖然好多基金日日都做，照計你冇可能忽然執到絶世荀嘢。留意唔少公司都有呢啲holding company discount嘅問題，以前Facebook 寫過，呢度不再重覆。

即係電盈好抵買？定其他業務垃圾負資產？有乜其他業務？

6. 但好簡單一個例：A公司拎住B公司同C公司各自40%嘅股權，如果3間都上市，當B同C都係100億市值，咁A公司多數就唔夠80億市值。原因好簡單：套餐貴過散叫嘅，仲有人叫套餐？

咁個仔有乜業務？「其實得一瓣」

7. 睇到呢度，應該明白，香港電訊係個仔，佢所有業務都會在老母見到。所以先講香港電訊。然後再睇下，有乜業務係老母電盈有，而仔（香港電訊）冇。提示：唔多。

8. 留意我個Excel（attachment有），兩間公司一齊，但有兩個tab。留意埋我啲圖最頂唔同色，紅色係香港電訊，紫色係電盈

9. 睇香港電訊先，睇個收入分佈，好明顯見到，「係間電訊公司」。本地數據就係網上行，本地電話當然慢慢式微但舖頭寫字樓都仲要用，國際就係漫遊，仲有平時啲長途電話conference call．流動嘅咪手提電話上台費。。你見以上呢堆嘢，已經佔咗總收入90%以上，甚至超過100%。點解超過100%？因為有啲「抵銷」嘅負數。即係乜？公司內部自己幫襯自己嘅嘢。

老母踢Now台畀個仔，只係收20億

10. 除此以外仲有乜？就係收費電視，即係NOW台。留意係2020年8月先由老母踢畀仔，作價都只係20億港紙，唔多錢。睇數都睇到，Now台一年廿幾億收入，唔算好少，但同上面堆嘢兩三百億收入爭好多.

11. 不過最煩嘅係，公司最新業績，冇再拆開本地電訊嘅細節，亦似乎係將Now嘅嘢踢埋入去「本地電訊」，得一個大數，雖然另外有話你知，Now台最近半年收入12億（藍色嗰格）

12. 其他業務係乜？The Club，好似Tap and Go之類都係，細數。

13. 因為反正全部入晒阿媽度，所以唔使討論太多。況且我只係買咗電盈，冇買仔，但好難答你仔好定阿媽好，我甚至覺得應該兩樣都買。因為你見佢可以左袋交右袋咁，亦都好多人估遲早做個大重組（同佢老豆一樣），唔知佢會開邊面。

到電盈：有乜業務係個仔冇，老母先有？（有Excel）

14. 好啦，到我地睇電盈。睇睇唔同業務收入。見唔見到係紫色tab？唔好撈亂

15. 首先，一大舊就係「香港電訊」嘅收入。例如今年上半年161.57億，咪同頭先講香港電訊個圖完全一樣數。都話100%食晒入去的。

16. 咁，除咗上面提咗香港電訊嘅嘢，仲有乜？即係有乜老母有而仔冇？

17. 金額上，都唔係好多。留意電盈半年收入先183億，162嚟自香港電訊。剩返嘅係乜？主要就係「企業方案」，幫公司做IT外判。

Viu台半年幾億收入咋

18. 仲有就係大家最關心嘅免費電視，VIU台，實情啲藝人管理收入好似都在呢度，唔肯定。但你見真係半年幾億港紙收入，同你想像中爭好遠。留意now台都半年十幾億收入—因為now台收月費（提多你一次，Now台嘅數，由2020年8月開始，在電盈盤數中，就入咗去「香港電訊」度）

19. 仲有就係OTT業務，OTT即係over the top，即係黃viu台。留意唔止香港，東南亞都唔少人睇，公司成日講，陣間再討論。

20. 你會見到，以前仲有盈大地產432，在Excel會見到。而家去咗邊？未消失地。又可以講會計，話說電盈舊年年尾減持咗1.1%（我都冇為意）。但影響就大了。因為減持咗呢1.1%，盈大地產就唔再係「附屬公司」，就唔會好似香港電訊咁啲數食晒入阿媽度。不過電盈仲拎住30%—咁會去咗邊？就會成為咗「聯營公司」associate，你會見到公司盤數計晒收入開支後，最尾扣稅前會有一項「聯營合營公司」，就在嗰度。留意就真係只入返盈大30%嘅利潤

電盈EBITDA 56億，但減完啲ITDA，就倒輸錢了！

21. 講完收入，講利錢。留意公司只係畀EBITDA，earnings before interest, tax, deprecation and amortization．對有啲公司嚟講，呢堆ITDA（利息，稅，折舊，攤稅）就好Q大的—電盈正係一間咁嘅公司。

22. 首先畀你睇下EBITDA同個盈利嘅分別有幾大．例如最新半年，上面個圖（重貼）都有，電盈EBITDA 56億，但D14億，A又24億，I又7億。都未扣T已經得返14億。EBIDTA 56億，變咗稅前利潤14億

23. 睇埋呢個圖。14億，減多5億稅，仲有勾返9億「少數股東權益」（有48%嘅香港電訊唔係電盈持有嘛！），減埋啲永續債嘅股息（類似優先股，呢度唔解了，留意國泰都有類似嘅嘢）。最後，係蝕錢嘅！

見到冇？EBITDA 56億，扣晒IDTA就變負數，爭好遠的。

T就人人要，但點解電盈咁大舊IDA？

24. T就人人要，但點解電盈咁大舊IDA？先講DA，你大約估到，啲機房設備之類，好重折舊的，呢個係一門重資產嘅生意，一年折舊30億。攤銷情況差不多，應該係之前做落啲收購，或者有啲「無形資產」，使用權咁，未深究。

25. 至於I亦真係要講，電盈係一間好重負債嘅公司！亦同佢地嘅生意有關。

26. 跳到呢度你見到，940億資產（留意多數係固定資產），但790億債，股東權益大約係85億（計埋少數股東永續債就155億）。見到個「槓杆」都幾重，非金融公司之中好少去到咁勁。當然只係呢個比例不能好快下結論

27. 但再睇，公司嘅銀行貸款（長短期計晒），470億，扣埋現水，淨貨款，都420億。上面咪話股東權益得85億（計埋少數股東永續債就155億），幾倍喎，相當誇張的。

28. 爆，就當然唔會爆，業務好穩定。但你見公司一年真係利息都十幾億。

Viu同OTT（黃Viu）都EBITDA正數—但唔係等於賺錢！

29. 於是可以返返去睇，到底以EBITDA計，邊瓣業務最「賺錢」？

30. 可能你睇2020年，甚至再早啲（Excel有）清楚啲，因為仲未踢Now台畀個仔，仲係分開見到。

31. 但你估都估到，EBITDA都係嚟自電訊業務，貢獻超過100%（因為有啲其他嘢同內部抵銷，亦有啲其他嘢輸錢，所以超過100%）。另外，咪企業方案。Now台仲在老母嗰時，都係正數，而家都仲係。留意最新一期連OTT（黃Viu）都變到正數

Viu 台EBITDA仲低過舊年下半年

32. 至於Viu台？之前已經係正數，但有人留意到，反而個數少過舊年下半年。公司有解，係因為製作成本升。 絶對冇你想像中咁好賺。而我再三強調，Viu台只係positive EBITDA，坊間N咁多人話「賺錢」，完全錯。上面例子你咪睇到由EBITDA扣到純利可以扣走幾多嘢！

最新業績：阿仔賺錢，老母蝕錢。咁你話老母啲其他業務賺定蝕？

33. 搞一大輪，可以睇下最新業績，實情都冇乜好講（因為呢篇文主要係教你睇財報同了解公司）。

34. 先睇香港電訊，留意個仔早過阿媽一日出業績。按年盈利就持平，但同舊年下半年比就少好多。派息象徵式加咗少少。亦可以留意EBITDA就60億，純利20億

35. 你睇派息方面，TTM（上篇太古解過係乜）股息率，6.6%，還好。留意公司負債都重，不過冇阿媽咁重。其他業務真係冇乜特別好講！

36. 至於老母呢，就精彩啲。首先留意，係蝕錢嘅。留意個仔賺錢喎，亦即係話你知，阿媽而個仔冇嘅業務，幾明顯係輸錢嘅。所以你話Viu台點會唔係蝕錢？OTT都應該係。不過，就蝕得少過舊年同期咯，但舊年下半年係有錢賺的

OK，之前齊齊吹奏黃Viu好多賓印泰睇，大過Netflix．但邊個發功？

37. Viu同OTT（黃Viu）都係正數EBITDA（再講一次，不等於賺錢）。Viu嘅數字較舊年下半年倒退，上面解咗，話製作成本升。OTT就首次正數，多得東南亞用家。留意有一排出面係咁寫，佢地在東南亞排第二，勁過NetFlix—你應該諗下，係乜人背後推動。你話呢？而家公司一路都講想分拆呢舊嘢上市，好有李澤楷作風。

阿仔賺錢老母蝕錢，啲蝕錢嘢在老母度，阿仔又低啲負債。

即係買阿仔？又未必

38. 好啦，心水好清嘅讀者可能會諗：阿仔賺錢，阿媽蝕錢喎。啲輸錢嘅業務全部在阿媽度。仲有，槓杆都係阿媽度，個仔冇咁重。咁即係應該買個仔？

39. 答案係：未必。

40. 點解？首先，記住一定係睇預期。你話蝕錢嘅嘢，人人都知，乜都反映晒。如果佢堆嘢之後轉賺呢？特別係，似乎好多人都睇好Viu台，而呢舊嘢係在阿媽的

41. 仲有，如果真係分拆OTT，就只有老母受惠，個仔唔關事。

42. 都仲有一樣嘢：估值。真係又畀你睇到啲基本法則，重點唔係間公司得唔得，而係之後會點發展嘛。

43. 我寫到最後先話你知，電盈，而家TTM股息率，去到9厘。留意佢蝕錢都仲派息，短期OK，長期唔敢講。

44. 所以，可能最後都係兩隻都買晒好啲。重組之類，好大機會，但真係唔知會開邊面，會點玩法。不如我都買返啲香港電訊先。

有必要就講美股，冇乜必要就下篇講港鐵

45. 寫呢兩母子，都4000字，所以又要下篇先寫地鐵同長江基建（睇下會唔會再分兩篇）。

46. 不過放心，如果美股有咩特別值得寫嘅，我都會寫。但呢排都冇乜，穩定地上揚。之前係咁叫你買啦

47. 唯一比較值得講係Walmart，我Facebook都講咗啲。又一次示範嗰幾樣嘢：股價都係睇預期。仲有，見到冇？真係「壞消息」先要買，Walmart就係嗰下盈警大插後，一路緩步升返上嚟，都差不多20%．

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。