太古19，中移動941，長江基建1038，地鐵66，電盈8，香港電訊6823。有乜共通點？呢啲就係我戶口嘅「現錢」，雖然都冇動用過。睇下業績，畀你玩下Excel。6隻今年都係升嘅。中移動，股息升35%。下年派息率70%。9%股息率。 好多人連「股息率」同「派息比率」都未識分！甚至唔少人連股息率都未識睇！當然睇派息不能睇一兩年。太古今年升17%，但差不多全部都係之前兩日。 3個盈利：「報表盈利」「基本盈利」「經常性基本盈利」。睇邊個？有乜分別？點解唔睇「收入」？因為冇可比性。「盈利」就有可比性啦。太古地產1972嘅市值，只係國泰293嘅一倍。咁少？國泰疫情前都只係一年幾十億盈利，太古地產年年都過百億喎。 (Patreon)

太古19，中移動941，長江基建1038，地鐵66，電盈8，香港電訊6823

有乜共通點？

呢啲就係我戶口嘅「現錢」，雖然都冇動用過

睇下業績，畀你玩下Excel

6隻今年都係升嘅

中移動，股息升35%。下年派息率70%。9%股息率

好多人連「股息率」同「派息比率」都未識分！

甚至唔少人連股息率都未識睇！

當然睇派息不能睇一兩年

太古今年升17%，但差不多全部都係之前兩日

3個盈利：「報表盈利」「基本盈利」「經常性基本盈利」。睇邊個？有乜分別？

點解唔睇「收入」？因為冇可比性。「盈利」就有可比性啦

太古地產1972嘅市值，只係國泰293嘅一倍。咁少？

國泰疫情前都只係一年幾十億盈利，太古地產年年都過百億喎

太古19，中移動941，長江基建1038，地鐵66，電盈8，香港電訊6823

1. 上回預告咗，會寫6隻港股。就係太古19，中移動941，長江基建1038，地鐵66，電盈8同埋香港電訊6823．嚴格嚟講係5隻，因為電盈係香港電訊阿媽，而且重叠好多。

有乜共通點？

2. 知唔知有乜共通點？首先，全部係我有買嘅嘢（除咗香港電訊），係個個月供嘅股票，雖然唔係好多錢。另外，全部呢排都出咗業績，業績都唔錯。仲有，普遍都係有啲息派，而且股息率幾高（除咗地鐵）。

3. 重有，除咗中移動，其他都算係「香港公司」，雖然長江基建都好多業務在海外，地鐵都唔少（估唔到呢）。你亦會對佢地嘅業務比較有興趣，或者比較易理解。

4. 而呢堆公司，都係啲比較「防守性」嘅行業（太古可能唔算），你見股價波動亦普遍較低。就真係防守股

5. 最重要嘅係，呢6隻嘢，今年股價都有得升。都真係有啲啟示，亦證明我揀港股都有啲眼光（當然都有啲跌嘅）。

呢啲就係我戶口嘅「現錢」，雖然都冇動用過

6. 順手答埋啲讀者，好多人都知我戶口長期冇現錢，啲「現錢」就係呢啲，一般嚟講波動性唔會太大，長線亦未必會升得多（但長建之前幾年都升唔少）。真係有「必要」，就可以沽呢啲股票。雖然仲有好多其他方法（遲下分享），都話之前我做手術，幾十萬，我都一股冇沽過。

7. 理論上領展823都係呢類（之前股價升幅都幾驚人），但3月年結，9月中期業業，11月先出，到時先講。（而呢隻今年係跌嘅，但都跑贏大市）

睇下業績，畀你玩下Excel

8. 呢兩篇就約略講下佢地嘅業績，同埋看點。兩篇講5隻，當然只能水過鴨背。但我更新咗幾個Excel File，你鍾意可以返去慢慢玩（亦證明我嘅視力好返好多，雖然搞呢堆嘢都係比以前慢）。中移動同長建係冇嘅，中移動就唔會整亦唔需要，長建遲下得閒先整。

9. 通過呢堆Excel，你可以得到好多嘢。首先係知道公司到底點賺錢，到底乜嘢收入先係主要。另外亦可以增進你嘅一般知識，睇到啲公司有乜唔同，睇到佢地在唔同時間嘅表現（例如疫情或社運，對電盈嘅影響，同對地鐵嘅影響就爭好遠）。當然深少少亦可以增加你嘅金融知識，知道點樣睇財務報表之類。

10. 有機會我可能先再每間公司分開講。

6隻嘢今年都係升嘅

11. 首先睇股價。美股標指今年跌11%，納指跌18%，恒指今年跌13%．但呢堆嘢全部係升嘅。最誇係太古，升咗17%，但差不多全部都係業績後嗰兩日，所以股票係要坐的。（留意上面個圖我剛剛先整，但文字入面數字就早兩日的，會有少少出入）

12. 中移動都不錯，今年升12%。其他幾隻都有低單位數升幅，算係咁。仲要有息收，計埋都OK。

中移動，股息升35%。下年派息率70%。9%股息率

13. 好啦，逐隻講下，最唔需要討論嘅係中移動，所以我會拎嚟示範其他概念。後生讀者未必知，以前隻嘢炒到飛起。但都講過，國情不同，在大陸你就不能好似香港3台數碼通咁，話加價就加價，絶對係國家管制。有一排仲要係降價提速（唔使解係乜啦？）。你諗起乜？冇錯，就係公用股。但公用股又有公用股嘅玩法。你100蚊買嘅梗係慘，但呢兩年買嘅，表現不知好過多少中資股。因為穩定，有息派！

14. 業務，業績等等，都冇乜好討論。但要留意嘅係，純利升咗19%（估唔到），更重要係派息加35%，十分誇張。公司講到明今年派息比率會去到60%，下年會去到70%。留意下，公司之前嘅派息比率，大約係50-60%。點解會加到70%？主要因為上咗A股，亦都係「國策」

好多人連「股息率」同「派息比率」都未識分！

15. 呢度要講，好多人連「股息率」dividend yield同「派息比率」dividend payout ratio都搞亂。「派息比率」就係睇你賺100蚊派幾多股息畀股東，70%咪賺100蚊派70蚊。留意一般你睇全年先有意思，因為好多公司中期派得少，末期息先多。至於「股息率」就係「每股派息/股價」，例如中移動一年派2.2+2.43=4.63港紙，股價52.5，股息咪率4.63/52.5=8.8%。

甚至唔少人連股息率都未識睇！

16. 仲有，你睇aastock，搵「詳細報價」，先會見到有兩個股息率，一個就咁叫「收益率」，一個寫住TTM。TTM係Trailing Twelve Months，最近12個月。一般睇呢個（所以記得睇詳細報價，唔好咁懶）。例如上面例子，係今次中期息加上一次末期息。否則你用舊年末期息同舊年中期息，就太脫節了。

17. 聰明嘅讀者知道股票炒預期，所以其實應該睇「預期」股息率，即係2022。甚庄應該睇2023（而家都8月中啦）。但普通散戶，一般情況你睇TTM都夠。

當然睇派息不能睇一兩年

18. 8.8厘息喎！當然，以前都講過，你不能睇一年或兩年嘅股息，開部機甚至用啲咩「揀股工具」見邊隻15厘息就買落去。一兩年你要派多多都得，但最後都係要盈利支持。亦係呢樣嘢決定你維唔維持到派息。咁中移動嘅情況，增長可能冇乜（都話公用股），但你見盈利係有一定保證，之前幾年都係冇乜上落。

19. 咁你話會唔會大陸政府痴起條根又會整啲嘢打擊佢盈利？會架！其實任何股票都冇得保證，要保證嘅去買美債（不過保唔保證唔會外星人侵略？）。咁但，所以咪話你知點解會有8.8%股息率咁高咯。至於你擔心話人民幣變廢紙之類嘅，咪睇下剩返嗰幾隻。

太古今年升17%，但差不多全部都係之前兩日

20. 第二隻講嘅係，太古。留意係中午出業績，宣佈40億回購，股價下午就升10%，之後嗰日好似再升多5%。咁但，無啦啦何來有錢回購？就當然係因為業績好，由虧轉盈。

21. 唔少人大約都知太古有邊幾味業務。首先係國泰293嘅母公司，另外係太古地產1972嘅母公司（收租），仲有可口可樂，以及一大堆其他東西（方糖都有！）。但到底邊瓣佔多？你睇個Excel就知。不過留意個Excel仲好簡陋，遲下再整多啲嘢。

太古 3個盈利：「報表盈利」「基本盈利」「經常性基本盈利」。睇邊個？有乜分別？

22. 留意嘅係，太古盤數，非常之咁複雜。你見佢列嘅盈利都三個。一個報表盈利（as reported），一個基本盈利，最後一個經常性基本盈利。

23. 即係點？又唔係太難分，入面第37頁有寫。但我解你知，基本盈利就係扣咗「投資物業公允值變動」—即係啲商場估值嘅變動，同埋一啲類似嘅，「非基本」（並非「營運」）嘅東西。

24. 至於經常性基本盈利？就再扣埋「唔係經常性」嘅嘢，例如賣嘢賺蝕咁咯。留意，「投資物業公允值變動」係「非基本」，但「經常性」—因為每半年都要做。

點解唔睇「收入」？因為冇可比性。「盈利」就有可比性啦

25. 亦都留意，我冇去睇唔同業務嘅「收入」，一來未得閒，但二來留意唔同業務嘅性質爭好遠，例如航空往往係收入好高但利錢低嘅行業（呢兩年更唔好講），你同收租放埋比較好似唔多合理。

26. 但睇盈利，就合理啲，畢竟航空賺嘅一蚊同收租嘅一蚊都一樣。咁我地睇經常性基本盈利（留意2019年冇拆開分部）

27. 咁你見到，地產方面（主要係收租），其實幾穩定。而國泰係蝕少咗。至於海洋服務云云，已經賣咗。

28. 如果睇「基本盈利」嘅，就可以睇到2019。咁你見到即使疫情前，都係地產貢獻絶大多數盈利。另外就係航空同飲料（可樂）。航空好景時可能好過飲料多啲，但呢兩年當然唔好提。同時你亦見到，太古地產1972嘅市值，係國泰一個double

太古地產1972嘅市值，只係國泰293嘅一倍。咁少？

29. 實情，太古地產嘅市值「只係」國泰嘅double，我都有啲意外。大家可以搵啲公司年報（例如呢個），一般實有啲「十年數據」之類。你睇疫情前國泰有錢賺時，一年都多數係幾十億，最叻嗰年（好似2010）先百幾億。但太古地產，疫情前差不多年年都百億純利起碼

國泰疫情前都只係一年幾十億盈利，太古地產年年都過百億喎

30. 點解太古地產市值只係國泰嘅double？都真係幾有趣嘅問題，你可以諗下先睇下一段我嘅答案（我都唔肯定）

31. 但我估其中一個原因係：太古地產都有啲息派下，國泰就極少。你計埋歷年太古地產股東袋咗入袋嘅股息回報，都唔少嘢。我就咁目測，10年好似派咗7.2嘅息—而家股價都只係20蚊咋

32. 好，寫得太長了，下篇先再講埋　電盈，香港電訊，地鐵同埋長建。呢兩個Excel都下篇先放上嚟

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。