ivanliresearch

美股三大指數上星都升3%，納指低位升23%，標指都就快「牛市」。美股連升4星期，又驚加息又驚通脹又驚衰退又驚業績。美國PPI按月回落，2020年4月嚟首次。市場嘅通脹預期亦都大幅降溫，但通脹之後會點走？「會唔會通脹見頂但照加息？」不過之後嘅PCE應該回落？油價跌入油平咗，但糧價跌食飯冇平到！人工仲，哈哈哈哈。除咗官方CPI，仲有好多其他量度。「香港夠話2%啦」。今星期Walmart業績，實難睇。但整體分析員已冇再調低美股盈利預測。媒體個個都話「熊市反彈」，咁先好。講真，寫嘅有幾醒？市場波幅明顯下降，好事定壞事？睇你點睇。晏啲出多篇文講港股：19，1038，8，6823，941，66。有乜共通點？ (Patreon)

Published:

2022-08-15 00:05:04

Edited:

2022-08-15 01:04:32

Imported:

2022-09

Content

美股三大指數上星都升3%，納指低位升23%，標指都就快「牛市」。

美股連升4星期，又驚加息又驚通脹又驚衰退又驚業績。

美國PPI按月回落，2020年4月嚟首次。

市場嘅通脹預期亦都大幅降溫，但通脹之後會點走？

「會唔會通脹見頂但照加息？」

不過之後嘅PCE應該回落？

油價跌入油平咗，但糧價跌食飯冇平到！人工仲，哈哈哈哈。

除咗官方CPI，仲有好多其他量度。「香港夠話2%啦」。

今星期Walmart業績，實難睇。但整體分析員已冇再調低美股盈利預測。

媒體個個都話「熊市反彈」，咁先好。講真，寫嘅有幾醒？

市場波幅明顯下降，好事定壞事？睇你點睇。

晏啲出多篇文講港股：19，1038，8，6823，941，66。有乜普通點？

1. 我嘅視力已經逐漸好返，亦都睇返更多嘅嘢。變咗非常多嘢寫，應該會分兩篇。呢篇講咗美股先，下一篇講港股。有讀者話我呢排好少講港股，甚至有新讀者以為呢度只係講美股，係美麗嘅誤會。好視乎嗰期市況同埋有冇嘢值得講

美股三大指數上星都升3%，納指低位升23%，標指都就快「牛市」

2. 首先都係講返，美股相當強。就唔好問我「仲有冇得升」之類（點知？），但之前一路叫你買了。納指低位就升咗23%，標指都17%。幾時都要有希望，持續投資，唔使太理啲咩「壞消息」

3. 講返少少市況，星期五都係由納指較強，跌得多彈得勁，同埋債息一路都冇乜大升。美股三大指數上星期都升3%，己經連升4星期，證明之前啲咩驚通脹驚衰退驚加息都係廢話—最初當然係驚，但你不可能無了期咁驚。

美股連升4星期，又驚加息又驚通脹又驚衰退又驚業績

4. 就講加息同通脹，留意返，上星期嘅升勢係由「通脹見頂」帶動。咁就由呢度講起。首先，你見星期五出嘅PPI數字，無論headline數字定係核心PPI 都低過預期。你可以當PPI係「批發通脹」，工廠嘅出口價格，理論上會慢慢傳到去CPI（消費者）。PPI按月跌0.5%嘅，2020年4月後第一次，而市場預期係升。睇按年升幅仲係好高，9.85%，但已經較再上個月嘅11.3%大幅回落，亦低過預期。

美國PPI按月回落，2020年4月嚟首次

5. 另一方面，之前都講過密歇根大學調查嘅「通脹預期」。見到最新對1年通脹嘅預期都係回落咗，亦低過預期（但5年預期升咗）。啲友嘅預期未必一定啱，但都講過通脹係一種相當有「自我預期」嘅現象，你預佢升，就真係會升。

市場嘅通脹預期亦都大幅降溫，但通脹之後會點走？

6. 然後呢個星期三晚，聯儲局會公佈議息紀錄，可能會有啲端倪，但呢刻有乜嘢好猜測。

7. 同時你可以留意下，9月底嗰次議息嘅預期會點郁（仲有唔少時間，同埋仲有數字出）。留意原本上星期估通脹見頂，個加息預期低溫。而家街都仲係估0.5嘅機會大過0.75，不過只係多些少，暫時都係兩樣都有可能，甚至係比上星期更唔唔「明朗」。亦留意近期聯儲局啲官員口風都冇放鬆。

「會唔會通脹見頂但照加息？」

8. 留意，情況可能係「通脹見咗頂但照加0.75」，兩樣嘢冇矛盾的，驚太早收手嘛。況且近來啲就業數字又唔差，聯儲局應該唔會太擔心加得太快搞死經濟。所以即使見到真係會加0.75，亦唔使太驚。上兩次都係加0.75啦，7月咪又照升。

9. 事實上，整體嘅物價水平，都仲係高過聯儲局嘅2%軌蹟。留意呢個圖好好，最初有一排，聯儲局都仲係好老定，話你知雖然嗰刻通脹高，「但之前有一輪好低嘛」，「拉勻計個物價仲係升得唔多」。但後來就升穿咗了。不過，從來2%都係一個參考，亦冇話高過2%就不能容忍，甚至可以搬龍門（雖然暫時似乎冇必要）。

不過之後嘅PCE應該回落？

10. 而呢度嘅讀者應該知，聯儲局係睇PCE嘅，唔係最多人講嘅CPI。而且往往係睇核心嘅PCE。事實上，近期嘅PPI同CPI數字，似乎預示個PCE會跌得幾快。今個月尾就知。

油價跌入油平咗，但糧價跌食飯冇平到！人工仲，哈哈哈哈。

11. 之前亦都提過，汽油價格回落，而家去到每加侖4蚊樓下。同時間，啲租金似乎都跌緊（之前寫過）。

12. 如果信呢張圖嘅講法（但我未必完全信），似乎工資增長已經見晒頂。咁就連「核心」通脹都可能快回落。

13. 不過小心，食品價格仲係在高位。唔係話糧價跌咗咩？係大宗商品價格，同埋零售價嘅分別。美國嘅情況，見到油價跌，入油都平咗（香港就未必）。但食品暫時未見到。

除咗官方CPI，仲有好多其他量度。「香港夠話2%啦」

14. 仲有，其實CPI呢啲咁重要嘅數據，好多人拆到好細研究，你睇一個「另類指標」，例如睇所有項目嘅中位數呀，斬頭斬尾呀（好似奧運體操或跳水計分咁），就會見到「冇乜回落」（但當然油價瀉咗好多，就係個頭尾嘅「極端值」）

15. 甚至乎大家在香港都好感受到嘅，「CPI話冇乜升但啲嘢明明貴咗好多」。美國都有呢啲情況

16. CPI又有「利好」原因，又有「利淡」原因，咁整體嚟講即係點？即係，可能真係「見頂」，唔會再去到近10%嗰啲位，但可能俳佪在5%，甚至7%嘅位？甚至中途反彈咁。咁到時可能又會驚，畀定心理準備你。總唔會一步到位，亦因為咁所以聯儲局應該未咁快停加息（但，減慢速度去到0.5，就係有得搏嘅）

今星期Walmart業績，實難睇。但整體分析員已經冇再調低美股盈利預測

關於美股市況，仲可以留意幾樣嘢。首先，業績期已過，業績只係好壞參半，但結果7月美股做得好好。呢個係好現象，業績普通都升，唔得都唔使大跌。你見早兩季，係業績得都唔升，普通就已經大跌—留意下，呢啲就大約話到畀你知個市場「貴唔貴」。貴嘅嘢就對好消息都冇反應，平時就壞消息都免疫。

17. 今星期仲有啲公司出業績，例如Walmart．但都唔使太多討論。「首先我冇買，亦冇叫過你買」。另外正經，公司已經出咗盈警。業績一定「差」，但股價反應係另一回事—要跌都跌咗啦

18. 事實見到，美股分析員開始冇再下調啲股票嘅盈利預期，呢個應該係好消息，至少你唔使驚你今日睇嘅「估值」，聽日又變得更貴

19. 例如我原本以為15倍PE，點知下星期分析員將個預測斬咗一半，我隻嘢咪變咗30倍。數字亂作，實際上亦好少咁削一半（指數就唔會，但個股真會係），估值亦唔止只係睇一年嘅市盈率（否則蝕錢嘅公司咪一文不值？）。純粹示範。

20. 點解會冇再下調盈利預期？有唔少原因。首先可能因為啲業績整體又唔係太差。另外，亦因為通脹預期降溫。不過仲有一個原因：股價升咗。實情好多分析員都係跌咗就調低預期，升就調高，都係大滯後。「我嗰時都係咁上下」

媒體個個都話「熊市反彈」，咁先好。講真，寫嘅有幾醒？

21. Daily Shot嘅呢個圖相當有趣，見到近期嘅美股升勢，媒體係充滿「懷疑」，冇乜人信係新牛市。

22. 睇得我耐嘅讀者，一定知道，咁先係好事！牛市當然係懷疑中誕生，就係你唔信先有得升。個個都信晒，師奶都入市，就係爆煲先兆。你睇2020同2021年咪知。2020年疫情後人人話好大鑊，但股市壬個不停。2021年小朋友都入市，咪出事（但再講一次，你事後睇就易，身在其中好難咁清醒，因為人係群居嘅動物。所以你想投資好成功，可能真係要好反社會）

23. 你見歷史上都係咁，最多媒體報導懷疑嗰時，就係入市最好時機。絶對係反向指標。

24. 留意我特登講「升勢」，呢啲係比較客觀同中性嘅字眼，我特登唔講「新牛市」或「熊市反彈」。畀你留意下，媒體又好網上又好，好多人特登用呢啲感情色彩重嘅字去影響你。但你要明白，升咗20%就係升咗20%，你點懷疑都唔會變。正如跌市亦一樣，你話係「牛市調整」，唔會輸少啲。