ivanliresearch

大師冇點你：早早話咗通脹見頂。但更靚仔係個核心通脹。點解7月核心通脹5.9%，6月又係5.9%，但話按月升0.3%？唔係持平咩？點解通脹見頂？由乜推動？聯儲局會唔會再加息？當然會。但加幾多？幾時停？納指重新進入「牛市」！標普指數3個月新高。你買咗未？埃文斯話加到4厘，卡什卡利話加到4.4厘．即係點？迪士尼收入盈利上客都遠超預期，股價盤後升8%。會再加價40%！迪士尼訂戶超過NetFlix！以前大家市值差不多，而家迪士尼係佢兩倍 (Patreon)

Published:

2022-08-11 10:58:55

Edited:

2022-08-11 11:26:27

Imported:

2022-09

Content

大師冇點你：早早話咗通脹見頂。但更靚仔係個核心通脹。

點解7月核心通脹5.9%，6月又係5.9%，但話按月升0.3%？唔係持平咩？

點解通脹見頂？由乜推動？

聯儲局會唔會再加息？當然會。但加幾多？幾時停？

埃文斯話加到4厘，卡什卡利話加到4.4厘．即係點？

納指重新進入「牛市」！標普指數3個月新高。你買咗未？

迪士尼收入盈利上客都遠超預期，股價盤後升8%。會再加價40%！

迪士尼訂戶超過NetFlix！以前大家市值差不多，而家迪士尼係佢兩倍

1. 開始寫文時係香港時間星期四下午三點

大師冇點你：早早話咗通脹見頂。但更靚仔係個核心通脹

2. 全城焦點，當然係星期三晚出嘅美國CPI數據。不枉我之前一日趕出一篇話定你知，一如所料，通脹回落。更重要嘅係回落得多過預期，個數字非常之咁靚。

3. 好快講返，8月嘅CPI，按年升8.5%。上次係9.1%，市場預期係8.7%。換言之唔止係回落（本身都預咗），仲有回落嘅速度都大過預期。你睇按月嘅情況更加靚，原本預按月升0.2%，結果係持平，而上次係按月升1.3%。呢個亦係好好嘅勢頭

4. 更令人鼓舞嘅係核心CPI（扣除能源同食品）。出嘅數係按年升5.9%，上次都係5.9%，街估係6.1%。即係街估會再升，結果冇再升。呢個係更驚喜嘅，因為能源同食品價格大家都睇到回落，所以包埋能源食品嘅CPI會跌大家都預咗（最後跌幅大過預期）。但之前見啲人工仲加緊，都驚核心通脹會再升，結果冇。

點解7月核心通脹5.9%，6月又係5.9%，但話按月升0.3%？唔係持平咩？

5. 不過留意返，個核心CPI按月仲升緊0.3%，不過低過預期嘅0.5%，而上次係按月升0.7%。

6. 又，會唔會有人好亂？唔係上次又5.9%今次又5.9%咩？做乜又話按月升0.3%？唔係持平咩？答案係：上次個5.9%係今年6月核心物價同舊年6月比，今次嘅5.9%係今年7月核心物價同舊年嘅7月比—所以雖然兩個都係5.9%，但今年7月核心物價仲係高過6月。

7. 平時我地講嘅「CPI」多數係指個升幅。一般睇按年，但亦可以按月。所以你見我好少就咁寫CPI5.9%，我會寫按年升5.9%，十分清楚。

8. 如果你想睇真正個CPI嘅數字，亦都係有的。呢度。你拎啲數字嚟篤下就明晒了。

點解通脹見頂？由乜推動？

9. 睇分類嘅，你都估到，汽油價按月跌7.7%，2020年4月後最大單月跌幅，再上個月係按月升11%，背後當然同油價急瀉有關。至於其他「核心」嘅東西，見到機票價按月跌7.8%，一年最大單月跌幅。但當然仲有啲嘢係繼續升嘅，所以你見個數字仲係相當高。

10. 以上汽油同機票等等，昨日嘅文已經提過。

聯儲局會唔會再加息？當然會。但加幾多？幾時停？

11. 數字出嚟後，拜登十分興奮，當然出嚟講通脹有受控跡象，又講埋上星期嘅就業數字好好。另外，有冇留意今次白宮冇再在出數據前一日出嚟講嘢？照計當時你都估到個數字係靚。

12. 出個咁靚嘅數，當然市場十分歡喜。可以幾肯定嘅係，咁嘅數字絶對唔會咁快令聯儲局停加息。但，市場而家嘅估算，就估9月加0.5厘嘅機會大，但未係好一面倒。而家市場估9月加0.5厘嘅機會六成左右，甚至低過上星期。無論如何，仲有多一次PCE數字（今個月尾），同埋多一次CPI數字（下個月10號左右）出，照計到下個月中就好明朗（月尾先議息）

埃文斯話加到4厘，卡什卡利話加到4.4厘．即係點？

13. 另外可以留意下聯儲局官員嘅講話，埃文斯話加息持續到明年，應該係廢話，大家都知。另外佢講話，今年底有機會加到3.25—3.5厘，下年可能加到3.75—4厘。大家可以對下CME Fed watch嘅圖，睇今年年底，似乎市場估得仲取進過佢。當然下年市場好似冇佢估到咁進取，但下年嘅事，下年先算。咁遠實在講嚟冇乜意思。

14. 至於卡什卡利就話　今年底應該加到去3.9厘，出年年底要加到去4.4厘，明顯取進過埃文斯。但留意，兩位今年都係冇投票權嘅。