ivanliresearch

連寫幾日Big Picture，轉下口味，寫經濟。亦講返呢排發生嘅事．業績好壞參半，通脹破頂，又加息，又衰退，做乜7月仲升咁多？今次真係「不明朗」，有時又話驚衰退，有時又話驚加息．又話衰退？但失業率新低，人工係咁加，即係加息？但剛剛個通脹預期又大幅回落喎，即係唔加息？今晚出嘅CPI數字，又係十分重要。因為影響到9月加息．就業數字有幾勁？畀啲例子你．但其實呢……經濟還經濟，股票還股票。「你睇7月？」 (Patreon)

Published:

2022-08-09 22:36:18

Edited:

2022-08-10 08:44:37

Imported:

2022-09

Content

連寫幾日Big Picture，轉下口味，寫經濟。亦講返呢排發生嘅事．

業績好壞參半，通脹破頂，又加息，又衰退，做乜7月仲升咁多？

今次真係「不明朗」，有時又話驚衰退，有時又話驚加息．

又話衰退？但失業率新低，人工係咁加，即係加息？

但剛剛個通脹預期又大幅回落喎，即係唔加息？

今晚出嘅CPI數字，又係十分重要。因為影響到9月加息．

就業數字有幾勁？畀啲例子你．

樂觀啲嘅睇法亦係有嘅．

但其實呢……經濟還經濟，股票還股票。「你睇7月？」

連寫幾日Big Picture，轉下口味，寫經濟，亦講返呢排發生嘅事

1. 連續寫咗幾篇Big Picture嘅嘢，轉一轉口味。唔係直接寫市況，係寫經濟，但都算「貼市」，因為星期三晚又有萬眾期待嘅CPI

2. 之後可能講返多啲市況，或者講返多啲個股。不變嘅係我每個月仲買緊股票，冇畀以前少到。當然主要買ETF。

業績好壞參半，通脹破頂，又加息，又衰退，做乜7月仲升咁多？

3. 講CPI前，好快話你知呢排發生乜事：就係冇乜事。即使啲公司業績好壞參半，即使通脹繼續破頂，即使加咗0.75厘息，即使出咗個連跌兩季嘅GDP（即係「衰退」）—但7月美股十分好，標指升9%，納指升12%。

4. 呢個好簡單嘅例子，再次畀你見到，股市嘅邏輯，同好多人直線思維嘅唔同。

5. 但，雖然係事後narrative，不過唔多唔少7月嘅升勢，係因為估「經濟唔好」，而通脹就快回落，仲有聯儲局會減慢加息—即係，9月唔會再加0.75，可能只加0.5。

6. 仲有留意，9月又係「大會」，聯儲局會出經濟預測，到時再直擊。留意月尾先開，即係會有多一次CPI數字（9月10日左右）

今次真係「不明朗」，有時又話驚衰退，有時又話驚加息

7. 好啦，呢排嘅市況，真係比較悶嘅。又或者話，個前景真係十分「不明朗」—留意我少用呢個字，對我嚟講幾時都「不明朗」，而我認為「不明朗」係中性嘅。個個都知好大鑊嘅（例如金融海嘯）就唔係「不明朗」，雖然你可以話，知好大鑊，但唔知「有幾大鑊」都係一種「不明朗」—其實都係。人人都知大鑊，但有人以為地球玩完資本主義末日，但有人覺得最後又解決到，正係呢啲睇法唔同，先見到股市大波動，先有人搵大錢（或輸大錢）。

8. 想講嘅係：而家真係唔知，到底美國經濟點。甚至乎你見市場呢排都「好難理解」，作narrative都好難作。唔係咩？有時經濟數據好，股市又跌，「驚加息」。有時經濟差，又跌，「驚衰退」。

9. 事後narrative嘅問題，講過多次。但更有趣嘅問題係：到底美國經濟好定差？到底係仲係好強所以仲會加息，定係肯定衰退就快停加息？

10. 留意我想警告你一樣嘢：雖然我嘅睇法，係傾向覺得經濟差，會停加息，股市會反彈。但首先我可能錯。另外，即使真係經濟差，亦不等於真係減息，減息亦不等於實升—正如經濟唔衰退要加息，亦唔等於實跌。

11. 而家呢刻好似係「數字越好股市越驚」嘅情況主導—但未必一路都會係咁。再用另一方法講：呢個星期你可能見到數字好股市跌，下個星期你可能見到數字差但股市又跌。亦有可能係數字好又升，數字差又升。