W5000指數（「咪即係標普500」），最差嘅6個月後買落去，多數贏錢兼跑贏大市 (Patreon)

Wilshire 5000指數係乜？咪全餐指數，「即係標普500」

但留意，W 5000，得3000幾隻成份股

W5000指數，最差嘅6個月後買落去，多數贏錢兼跑贏大市

啟示一大堆

最差嘅6個月，嚟嚟去去集中嗰幾年

今年W5000 跌21%，最差嘅20次中，排11。最差試過6個月跌四成

最勁跌幅後買，絶大多數機會都贏錢，回報仲係好過平時

渣得越耐，越大機會贏。坐得3年，必定贏錢，20次入面每次都係

又係嗰幾味：Time is your friend，跌更加要買，要長坐。股票多數係升嘅

你日日炒出炒入梗係高風險，坐得耐自然低風險

唔止睇upside，睇埋upside：最差情況，咪10年執44%。好差咩？

1. 今次呢篇，本質上同之前嘅兩篇（第一篇呢度，第二篇呢度）都幾類似，都係睇下「大跌之後買，會點？」。似乎係會幾好。

2. 但今次試下用另一個角度寫，會比較多用數字，同埋睇下有乜「投資啟示」。就唔會再重覆「點解跌咗後多數會升」，或者一啲心法嘢了，呢啲舊嗰兩篇講咗。

3. 呢個系列仲有多一篇，好快會出埋。留意個Excel我都放埋上嚟，Attachment有。

Wilshire 5000指數係乜？咪全餐指數，「即係標普500」

4. 入正題。個主旨都係睇，跌咗好多之後，會點？多數升定跌？升幾多？又有幾大機會係贏錢？話「跌咗好多」。幾多先算多？

5. 個圖，冇錯係Charlie Bilello嘅，好嘢嚟，我從來都唔會掩飾個source．但你會發現，冇我嘅演繹，你自己去睇，有時都係唔明，或者get唔到背後嘅訊息，呢個咪我嘅作用。仲有，我都唔係完全偷圖，都仲會有啲重要嘅後期加工。

6. 先睇呢一個圖，Wilshire 5000指數。讀者可能未聽過呢個指數，聽過咗之後又可以扮嘢，識多啲。但講到尾，W5000就係一個大盤指數，類似標普500咁。

但留意，Wilshire 5000，得3000幾隻成份股

7. 咁有乜分別？其實冇乜。但，你見5000，佢就成份股多啲咁（不過，其實得三千幾隻）。你可以當佢係一個「全餐」，覆蓋更多股票，差不多係所有股票咁。

8. 而佢亦都係market cap weighted 嘅（標普指數同納指都係，但道指唔係），所以你亦可以話，佢同標指分別，主要係多咗啲細公司。咁既然只係多咗細公司，最後同標指嘅表現，都唔應該爭太遠

9. 唯獨係留意：有一期Tesla去到好大，但標指都未納入。咁W5000就一早有，就會有capture埋Tesla嘅升幅貢獻，標指就冇。但呢啲好個別嘅例子。

10. 呢個圖，畀你睇到，實情同標指係好貼嘅。講咁多，無非想話你知，就同標指差不多

W5000指數，最差嘅6個月後買落去，多數贏錢兼跑贏大市

11. 然後戲肉啦，我地貼多次個圖。呢度係史上W5000最差嘅六個月表現，頭20次。留意係任何6個月嘅間距，冇話一定要頭半年。

12. 不過留意下，W5000係由1974年先開始嘅，所以歷史短好多。

13. 無論如何，呢個表就話你知，最差嗰20次6個月表現。之後會點。你可以諗一諗先，下面我會話你知點演繹，有乜啟示。

啟示一大堆

14. 我呢一個圖，同原圖差不多一樣，但我從新入一次啲數。可以計多啲其他嘢。我已double check，應該冇入錯。有錯嘅你自己在個Excel改。

最差嘅6個月，嚟嚟去去集中嗰幾年

15. 啟示一。最差嘅20次6個月表現，你會見到，都係在嗰幾年，好合理。你嗰年有一個大跌市，咪會數到好多個6個月區間都係差。例如你見，好多都係74年（W5000面世嗰年！），87（87股災），00同02（科網爆破），08（金融海嘯，唔使link啦？）。

今年W5000 跌21%，最差嘅20次中，排11。最差試過6個月跌四成

16. 啟示二。仲有就係今次。今年6個月，W5000趺咗21%，正係同標指差不多。而呢個跌幅，在榜上排中間，11位。見到在最差嘅呢20次，最差可以6個月跌4成。今次嘅6個月21%，就在中間，亦同平均唔差太多。

最勁跌幅後買，絶大多數機會都贏錢，回報仲係好過平時

17. 但更有趣，當然係之後嘅嘢。首先你見到，右邊大多數都係綠色，好美好。股票多數係升嘅，跌完後買都冇問題，甚至更好。

18. 貼多次。另外你都可以留意到，左邊嘅格都仲有紅色，最左有幾格，移右啲少啲，去到最右邊三楝，全部綠色。即係，你渣得3年，必定贏錢（當然，「過去唔保證將來」，要包生仔買美債，不過諗下會唔會亡國，或者外星人侵略）

渣得越耐，越大機會贏。坐得3年，必定贏錢，20次入面每次都係

19. 另一角度睇，你睇我最低嘅幾行。最差嘅6個月後買，你坐3個月，7成贏錢。平均大約係6-7%，呢個好肯定係高過「所有情況下嘅3個月」（即係，unconditioned on 「6個月好差」）。但都有幾次，你係要輸10%以上。

20. 但怕乜？越坐得耐，你見個回報就越好，輸錢機會越細。坐半年嘅，八成機會贏錢，平均回報15%，最衰嗰次都只係輸10%．半年執15%（留意扣除咗輸嗰幾次），肯定高過歷史平均

21. 坐夠1年嘅，就只得一次輸錢（但冇人保證今次唔係第二次，再講一次，要保證嘅研究完外星人後去買美債），平均回報26%—呢個亦明顯地高過美股正常嘅一年回報。

又係嗰幾味：Time is your friend，跌咗更加買，要長坐。股票多數係升嘅

22. 喂，好明顯啦下話。首先，要有耐性，time is your friend．另外，股票多數係升嘅。仲有，你啲咩「風險」，坐耐咗自然低風險。你日日炒出炒入，當然係高風險。

23. 事實上，去到3年或以上，冇一次要輸錢。更重要嘅係，你見越耐，回報越大。

你日日炒出炒入梗係高風險，坐得耐自然低風險

24. 當然，正如我Facebook 文寫「狀元讀醫」，睇埋最差情況。最差情況嘅，10年升44%，5年升22%，3年升2%．（留意呢「三次」係同一次！就係排第13嗰次，2001年2月去買）。

25. 係喎，最差嗰次，都仲有錢贏。你會話，喂，升咁少，得個桔。分分鐘跑輸通脹—好可能扣除通脹後真係冇乜回報。實有人咁反駁。

唔止睇upside，睇埋upside：最差情況，咪10年執44%。好差咩？

26. 但我嘅回應：至少你大約跟得上通脹，保持到購買力，大把人連呢樣都做唔到。仲有，總好過你輸錢！仲有，嗰次嘅10年44%之後，就係2010年，之後美股升到你唔信。仲仲仲有，呢個已經講緊最差嗰一次（其實之前啲文都有提，正係2000-2010美股嘅迷失十年）。你又不如睇下最好嗰次，或者平均，或者中位數。大盤指數升三四倍，係做到的，但要時間咯。

27. 所以，呢個圖真係講晒我平時成日同你地講嘅幾個核心價值。幾時都應該買股票，要長渣，跌完唔怕買，甚至更加要買，time is your friend．但好多人都係唔信，咁你可以睇下歷史係點。除非你堅持「過往唔代表未來」（你用呢句反駁我所有嘢嘅，咁唔該你同我討論時唔好用任何過去嘅嘢呀下）

28. 仲會有下一篇，講Nasdaq

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。