二戰以後，美股只試過8次一季跌15%，7次之後都升。上季係第9次 (Patreon)

回帶：美股史上上半年跌15%嘅，下半年必然反彈。平均回報24%。

Smart ass會話「sample 太細」「過去表現唔等於將來」

本人唔止畀冧把，掃盲，教睇財報，做預言—最重要係教你思考，提升功力

點解幾句講完要寫幾千字？因為「金句」多數冇用

「填鴨教育」嘅嘢

「Sample Size太細」下話？咁我話你知，「美股係升多過跌嘅」，講完

「坐夠10年，美股必升」—呢度近100個sample size，夠未？

「過去唔等於將來」「而家係大亂世」「計埋通脹呢？」

1990年後，美股最差嘅12季，10季之後都升。平均升8%（計埋輸錢兩次）

二戰以後，美股只試過8次一季跌15%，7次都升。上季係第9次

「半年要跌15%，難過一季跌15%」

美股長線都係升嘅，Time is your friend

本人唔販賣恐懼，只販賣希望，同埋貪念

Making of

回帶：美股史上，上半年跌15%嘅，下半年必然反彈。平均回報24%。

1. 上次篇專題強文應該大受好評，意猶未盡，今次算係續篇。

2. 冇睇過嘅，好快話你知上篇文講乜。就係篇文嘅題目講：美股100年歷史，只試過5上半年跌超過15%。而嗰5次，每一次下半年都升，冇一次例外，平均回報24%（半年喎！）。至於今年？就係第6次，而你見7月美股好好。

3. 上次篇文就話你知，點解會咁，同埋有乜啟示。

「sample 太細」「過去表現唔等於將來」—sounds so smart, but …

4. 順帶一提，在Facebook Page見到會有人話「sample 太細」。咁但，美股真係好少上半年跌15%（今年係跌20%），就只係嗰5次，仲可以點？邊度畀多啲sample你？落街拎？

5. 另外，篇文入面，亦有睇埋對落10次（即係半年跌唔夠15%）嘅半年大跌市，亦都畀你見到，普遍之後下半年都升（但就唔係每一次）。

本人唔止畀冧把，掃盲，教睇財報，做預言—最重要係教你思考，提升功力

6. 都講過一樣嘢：呢類「sample size太細」「過去唔等於將來」，本質冇錯，但你stand alone咁講，意義係冇乜。你係可用嚟reject對立嘅講法（即係「每次都咁咁咁所以下次一定會咁咁咁」「過去係咁將來就係咁」），但，只係講句嘢本身，係同嗰啲「對立嘅講法」，一樣冇內容，甚至更廢—因為，歷史都真係經常重覆

7. 所以呢個Patreon唔止畀冧把，做分析，解讀新聞，教睇財務報表，掃盲，解concept等等hard skill—更重要係教埋大家思考，提升你功力，呢啲嘢先永遠有用，永遠係你自己。就算我唔寫文，就算我死咗，你都唔會有問題。

8. 亦因為咁，所以明明上篇文嘅結論「一句講完」，但要寫幾千字。正係仲要畀你睇埋其他嘢（除咗嗰5次跌市外，對下嗰10次），睇埋詳細嘅數字。仲有更重要係：解埋畀你知，點解會咁。只係理論講到但數字唔支持嘅固然廢話，但只得數字支持而冇一個可信解釋嘅，亦係差不多廢。但上篇文講嗰個現象（5次大跌完下半年都升），就係既有數字支持，又有一個可信解釋，所以要你要睇。但的確，係唔會「包生仔」。投資係冇包生仔，冇嘢必然發生

點解幾句講完要寫幾千字？因為「金句」多數冇用

9. 呢度仲要再告誡大家一樣嘢：戒「金句」，戒「懶人包」。投資金句當然有用，你見我成日都講「別人恐懼時我貪婪」，好到不得了嘅金句。但如果識呢句嘢就會投資好嘅，唔會一街人都輸錢啦—明明大把人都聽過。

10. 你係一定要了解成個內涵，提升自己嘅思考水平，咁你先知乜嘢情況下用到，乜嘢情況下未必重覆。係冇可能有一個hard rule任何情況都實啱用。因為幾樣嘢：投資必定涉及風險，仲有投資係人嘅遊戲（所以人本身又會影響返個遊戲），同埋世界真係不停咁變。

11. 所以，你可以用「sample size太細」「過去唔等於將來」去反駁任何嘢，我亦唔係話「你批評就一定要有更好提議」。之不過，只係執住「sample size太細」「過去唔等於將來」之類，你係唔會學到任何嘢。Sample點解太細？咁點樣先可以大？咁如果過去唔代表將來，乜先代表將來？咩情況下歷史會重演？乜情況下唔會？全部唔係有clear cut答案嘅問題，靠你自己去feel

「填鴨教育」嘅嘢

12. 講到呢度幾乎想話「批判」港式填鴨教育，可能都有啲關係，但其實都係睇人。我應該過好多次，股市嘅嘢唔係自然科學咁，100度水就會滾，呢個溝嗰個就會爆炸。而股市亦唔係好似你讀歷史之類咁，因為咁加埋咁所以咁嘅narrative，係另一種嘅邏輯—似乎世界好多事都係。

13. 但話說回頭，我認為以上嘅「填鴨」並冇大錯，你乜都未識梗係由基本嘢學，問題係填完你你識得咁上下多嘢，會唔會去諗其他嘢。你當好似人打波踢波咁，最初一定係標準嘅動作，個個都係咁起手射罰球架啦，個個都係用咁嘅姿勢起跑，都係咁樣上欄（因為N咁多人試過咁樣最快嘛！），但到你真係掌握晒，咪會有啲勁人諗啲新嘅嘢。最大鑊係好多人明明係「填鴨」思維，而基本嘢都未識，仲以為自己好醒好有獨立思考。

14. 拿，我講「美股只係試過5年咁跌法，每次下半年都反彈」，咁當然你可以話「得5年sample size太細」，咁但首先，唔係咁，可以點做？另外，我有埋由話你知，點解跌完會升。三來，去到內文我亦唔止係講嗰5年，有埋打後差嘅10次。

「Sample Size太細」下話？咁我話你知，「美股係升多過跌嘅」，講完

15. 好啦，你嫌sample size細嘛，咁我畀兩個例子你。首先，美股係升多過趺嘅，而升嗰時幅度又勁過跌嗰時，亦因為咁美股長升。呢個圖實在不能再好，美股有65%嘅年份，係升嘅

16. 更正嘅係，坐夠10年，美股9成升。呢度嘅sample size夠大啦？大約有近100個10年嘅interval，滿意未？可以反駁到「sample size唔夠大」未？

「坐夠10年，美股必升」—呢度近100個sample size，夠未？

17. 但，你一樣可以反駁， （真係亂世my ass，上面嘅圖，包埋兩次世界大戰，911，大蕭條，金融海嘯，世紀疫情，然後而家台灣射兩粒飛彈話大亂世）。

18. 所以，真係不信者恒不信。

19. OK，你仲可以拗落去架，我同你講10年9成升，你可以話「咁嗰1成有冇輸返晒先」。我同你講25年係一定升，冇輸過，你一樣可以拗，「咁但跑唔跑贏通脹先」

「過去唔等於將來」「而家係大亂世」「計埋通脹呢？」

20. 對於呢啲咁嘅煩膠，我多數只會貼以上圖，就真係「秒殺」「一句收皮」。有機會講下呢個圖，十分偉大。

21. 講遠咗，但以上嗰堆嘢十分重要，甚至畀起啲數字更重要。以上部份會放上去Facebook

1990年後，美股最差嘅12季，10季之後都升。平均升8%（計埋輸錢兩次）

22. 講返一個切實啲嘅問題，你地多數會問：喂，咁但7月升咗咁多（！！）買仲得唔得？當然都係得的。上篇文已經大約講咗，「都話平均升24%，7月只升咗9%，仲有13%」（再講一次，呢個想法好有問題，但即係為易解釋我先咁講，你最好認真諗下呢句嘢有乜問題）

23. 咁但，正經啲，不如睇埋，如果上一季好差，下一季又會差，定會好？

24. 首先睇下，1990年之後，最大嘅季度跌幅。點解係1990？唔知，原本啲數係咁，我都冇辦法。順手一提，今年第二季跌咗16%

25. 好簡單，見到之前12個表現最差嘅季度，10次之後都升返，幾好，八成幾機會。而平均回報有7.9%，中位數回報10.9%。仲想點？留意呢度係計埋輸錢嗰兩次，唔計的話，只計贏錢嗰10次，平均12.4%，中位數回報11.3%。

二戰以後，美股只試過8次一季跌15%，7次都升。上季係第9次

26. 好啦，如果你嫌以上呢啲數字太近代，「sample size太細」。咁我地睇下，一次大戰以後嘅數字。拿，唔好又話「年代太遠冇可比性」呀下！近又話唔夠sample size，遠又話個世界變咗冇可比性，咁想點？

27. 睇返，一戰以後，美股跌多過15%嘅季度，就只得8次。今次係第9次（今年第二季跌咗16%）

「半年要跌15%，難過一季跌15%」

28. 話時話，recall返，記唔記得我話美股半年跌15%，史上都只係得5次？亦畀你見到，「半年要跌15%，難過一季跌15%」。因為往往一季趺完下一季升返

29. 證據？呢度咪睇到。8次一季跌15%，7次下一季都反彈。只有一次例外，冇錯就係2008年金融海嘯。

30. 仲有你可以留意，一季跌得15%，之後半年，8次都升。一年亦都係。

31. 點解會有呢啲現象？係咪巧合？就上篇文已解過，不再解。但好廢話我都再話話你知，三樣嘢。首先，股票（至少美股）長線係升嘅。咁所以，跌咗落嚟往往更吸引。亦因為估值平咗，同埋啲「壞消息」反映晒。三個月乜都反映晒啦？「除非金融海嘯」。但你見即使金融海嘯，你坐半年都回家。

美股長線都係升嘅，Time is your friend

32. 亦都講咗N次，time is your friend．渣得短嘅，輸錢機會一定大。況且心理上亦唔易過，又貼多次呢個圖。你日日睇股票嘅，48%嘅機會見到自己輸錢。但一年睇一次嘅，得返33%機會見到輸錢。

33. 所以，真係唔好以為要「成日睇住」，或者成日做決定。做金融嘅冇計，KOL為咗販賣恐懼亦冇計。我就兩樣都係，又要寫文，更加冇計

本人唔販賣恐懼，只販賣希望，同埋貪念

34. 不過留意我唔係販賣恐懼，我係販賣希望。冇錯販賣恐懼易搵食，因為易打中人心，但我偏偏反其道而行。呢啲正係niche market，contrarian．

35. 撇除道唔道德，我本身係咪咁嘅人外，仲有一個好重要嘅原因：人人都做，自然多競爭。販賣希望嘅人少好多，自然我容易stand out．世紀疫情個個都話死啦爆煲啦要減持股票，係得我一個叫你買股票，你自然記得我。同時亦畀你見到，世界上一個二個話特立獨行，但絶大多數人都係圍爐的。大家亦可以思考下呢樣嘢

36. 話畀大家知，呢個系列周末仲會有第三篇。仲勁。會多啲數字，少啲心法。

Making of

37. 最後畀個Making of你：

38. 「實情呢篇文嘅由來，因為我睇到呢段嘢：美股半年結，最具代表性的標普500指數半年跌21.22%，是1962年來最差的表現！單看第二季度，標指跌17.02%，是二戰後第九差的季度。有分析指出，二戰後頭8個表現最差的季度，之後的一季普遍錄得升幅，只有2008年第四季度例外（當季下跌22.56%，2009年第一季再跌11.67%，其後全球股市因聯儲局展開QE見底回升，升足12年，標普在2009年3月9日低見666點，今年1月4日曾高見4818點，升逾7倍！此乃後話）。經歷了第二季度的大跌，美股在第三季能否扭轉頹勢，出現正回報？」

39. 但，我就搵得返佢原文嘅source 出嚟（原本冇圖的），仲可以再搵埋其他嘢，再整埋啲原本同source都冇嘅嘢。

40. 有乜啟示？首先，睇多啲唔同嘅嘢。另外，揀啲好嘅嘢睇。三來，尋根究底。四來，識英文好重要。我引嗰段當然係中文，但佢睇嘅source都係英文。而本地啲友寫嘅嘢，實在好多好多垃圾。

41. 但如果唔係做金融嘅，咁你真係應該將呢啲時間集中做好你本行嘅嘢，呢啲粗重嘢就交畀我咯。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。