［專題強文］美股上半年跌得15%嘅年份，下半年必升，無一次例外。平均回報24% (Patreon)

美股上半年跌15%，百年來只有5次，每一次下半年都升！

都有啲讀者7月頭入咗市，很好。當然更好係幾時都入市。

7月買好，而家買都好。切忌儲埋2000萬然後摸頂

上半年美股跌20%，100年嚟第3差。

實情金融海嘯以後，冇一年美股上半年跌多過8%

上半年大升又唔敢買，大跌又唔敢買，咁幾時先買？

2008年上半年點解跌？2002年上半年又點解？2022年上半年呢？

升就「聯儲局放水威力勝過疫情」，跌就「疫情好大鑊放水都冇用」

「因為科網爆」「因為次按」「因為通脹」就易記過「因為貴」「冇乜點解」

14次最差嘅頭半年，9次下半年都反彈。64%

如果上半年跌得15%嘅，下半年必升，平均升幅24%

低層次嘅啟示：今年7月升咗9%，「即係仲有15%升」

「嗰5次下半年升市，得一次唔夠9%」「即係而家買都8成贏錢」

高層次嘅啟示：點解會有呢啲現象？係巧合定有原因？原因係乜？

點知道邊啲歷史會重覆？邊啲唔會？就考功力。但我畀個方法你

單數冧把股票跑贏 vs 細冧把跑贏。

隊名長嘅球會表現好啲 vs 著紅衫表現好啲

咁到底，股票係升開繼續升，定升得咁上下就跌？

100年嚟，美股只試過一次4連跌，但N次4連升。點解？

1. 兩日冇寫文，主要有其他事忙，同埋覆診。呢排亦都少咗寫市況，可能都係好事，盡量希望畀啲「專題」類型嘅文，或者時間性冇咁重嘅。你見呢排好多文都係咁，新讀者可以睇返7月嘅文。當然就會用我多啲時間，所以有時未必日日有文。

2. 今次呢篇原本應該7月寫，搞到而家先得閒，但都寫埋先。不過入面最主要嘅內容，我都在其他文提過多次

美股上半年跌15%，百年來只有5次，每一次下半年都升！

3. 美股上半年跌15%或以上嘅年份之中，每一次，下半年都反彈。冇一次例外。呢個係幾強勁嘅signal，而且背後有原因。所以你見我多次提呢樣嘢。

4. 呢篇文就會詳細講。但留意，次次下半年都升，不等於每次下半年都可以「收復失地」，上半年跌40%下半年升1%，都係符合以上「定律」，即係咁講。不過上半年已經發生嘅嘢，其實同你無關。未買嘅固然冇影響你，但買咗嘅亦已經輸咗，同你而家做嘅決定無關。你呢刻買唔買，上半年都係輸咗錢架啦。

都有啲讀者7月頭入咗市，很好。當然更好係幾時都入市。

5. 亦都有啲讀者7月初跟咗入市，很好，雖然我一路嘅主張都係幾時都應該入市，幾時都有錢買晒股票。但我明白唔係每個人都信服我呢套—咁例如呢啲讀者，都係有錢但之前未買，睇完就決定7月初買，亦係一件好事。但再強調，即使你錯過咗，而家都仲係適合嘅時機。

7月買好，而家買都好。切忌儲埋2000萬然後摸頂

6. 千萬唔好一路等等等，最後積住一大舊錢—到時你2000萬（真係有個讀者係咁）在手，你一下買落去，萬一摸咗頂即時唔見三成，都有排瞓唔著。

7. 唔好因為咩「壞消息」而驚，就係因為「壞消息」先更加要買，迎接下一個「好消息」

8. 實情只要你時間上夠分散，真係任何時間都係良機。唯一要避開就係人人都最興奮嗰時—例如舊年。但大家親歷其境都知，好難眾人皆醉你獨醒。

9. 而只要你時間上分散，在嗰啲時間都買，都唔係致命嘅，因為你只係少部份錢摸頂。你見我都仲好地地—但如果你「全部」都係嗰啲時間買，就會出事。真的，多錢有多錢嘅煩惱。你買1萬蚊股票，一星期輸三成你唔會好肉赤—都肉亦，但未會令你晚晚失眠。試下你有2000萬，一個星期輸咗三成？你唔跳樓或者斬人都好叻了—即使你有嘅錢都仲多過好多人。

上半年美股跌20%，100年嚟第3差。

10. 好啦，以上呢啲，長期讀者耳熟能詳。入正題，首先講返上半年嘅美股。真係好差，跌咗兩成。金融海嘯之後冇試過咁差。實情金融海嘯後，2009-2020呢12年，美股絶大多數時間，半年都係升嘅。冇一次半年跌幅超過8%，除咗今年上半年

實情金融海嘯以後，冇一年美股上半年跌多過8%

11. 之前升嘅上半年，你又有冇買？定因為升咗唔敢買？咁如果係嘅（相信點都有啲人係），升咗又唔敢買，人之常情。咁但，上半年升又唔敢買，上半年趺嘅又唔敢買，咁幾時先買？又等到慶合合啲嘢貴到離奇先買？

上半年大升又唔敢買，大跌又唔敢買，咁幾時先買？

12. 順帶補充：嚴格嚟講，升咗唔敢買，係「正常」「合理」過跌咗唔敢買。因為升咗往往係貴咗，跌咗就往往平咗，雖然股票嘅「平貴」係大家窮一生都好難完全觸摸到，特別係嗰一刻—但往往事後你會睇到—例如而家你應該知道舊年買埋啲發夢股真係傻的。正如金融海嘯啲非金融公司跌到好似執笠價，唔買就笨—事後睇返的話

2008年上半年點解跌？2002年上半年又點解？2022年上半年呢？

14. 好啦貼多次個圖（一樣的），講返小小嘅歷史，2008年上半年，「點解跌」？好多人會答到，雷曼爆煲前已經有啲燶味，次按開始出事。可見有時啲「價格」係幾好嘅訊息，未有「壞消息」已經跌定先（順帶一提，Bear Stearns貝爾斯登就2008年3月爆煲，但當時已經以為係「好大件事」，「壞消息盡出」，點知下半年嘅好戲在後頭。所以「別人恐懼時我貪婪」都唔係真係咁易，因為你事後先知幾時係最恐懼）

15. 再睇遠少少，就要數2002年，上半年都係好差嘅，咁個解釋大約係「科網爆破」。

16. 今次呢？你可以話因為加息，因為通脹，因為驚衰退。乜都好。

17. 至於去到七八十年代嘅，就不一一解了。唔多唔少因為「通脹」，但當時同而家都幾唔同，有機會再講點解冇乜可比性。

升就「聯儲局放水威力勝過疫情」，跌就「疫情好大鑊放水都冇用」

18. 但以上種種，長期讀者會知道，都只係narrative講故事。唔係話「冇用」，你要知，但唔好太執迷。記住，呢啲解釋係事後先走出嚟嘅。例如2020年，上半年升得好好係咪？咁所以咪唔會有人話「因為疫情」，而係「因為放水」。但如果2020年上半年係跌，就係「因為疫情拖累全球經濟」。見到未？故事一樣，如果升就係「聯儲局放水穩住經濟蓋過疫情影響」，如果跌就係「疫情好大鑊聯儲局救市都冇用」—任你講。

「因為科網爆」「因為次按」「因為通脹」就易記過「因為貴」「冇乜點解」

19. 正如你話今次係「因為加息」，2017一樣加息。所以都唔係咁易睇到。你問我，講到尾，貴咪會跌。但人就係鍾意聽故事嘅。你講「因為貴所以跌」，係唔合符人性的，最好每次都有個唔同嘅故事。2002就因為科網泡沫爆，2008就因為次按，2022又因為通脹，就好似好記啲咁。

14次最差嘅頭半年，9次下半年都反彈。64%

20. 好啦，睇下以上呢個表（第三次重貼）。14次最差嘅頭半年（未計今次），有9次係反彈嘅。呢個64%嘅比率，都幾高。固然我講過，股票，特別係美股，係升多過跌，至少近N年都係咁。但64%，都係個幾高嘅比例。

21. 另外如果計埋數，呢14次，計中位數回報，就8.5%，平均數係5.8%，都相當不錯。半年咋喎

22. 不過如果你睇全年埋單，就得4次可以收復全年失地，機會不大。

如果上半年跌得15%嘅，下半年必升，平均升幅24%

23. 好啦，如果縮細個sample size（留意，唔好濫用呢啲技巧，但呢度我覺得適合）。你只睇跌得最甘嘅年份，即係最杰嘅5次（未計今次），亦即係史上5次上半年跌15%或以上嘅，就會變咗呢個圖（留意啲數字兩個圖有啲唔同，小問題，計trading day 同calendar day，或者計唔計埋派息）

24. 順帶一提，美股上半年跌15%嘅，之前成100年，就只係試過5次。差過今次嘅，只有3次。可以證明今年都真係幾差，你都捱過咗，畀啲掌聲自己。

25. 咁你見到了，在跌得15%呢5次，每一次，下半年都升。每一次都係。

26. 好啦，呢5次下半年，平均係23.7%，中位數係15.3%（如果你用第一個圖仲勁，平均24.3%，中位數20%）

27. 美股上半年跌得15%嘅年份，下半年必升，仲要平均下半年升23.7%，呢一個回報，明顯係遠高過「一般」嘅半年平均。

低層次嘅啟示：今年7月升咗9%，「即係仲有15%升」

28. 啟示係乜？當然最表面嘅啟示，就係買啦。7月頭我已經講以上嘅嘢，咁你見美股7月做得好好。標指升9%，納指升12.3%。而你話驚唔驚升晒？「都應該唔驚」，因為你見「平均」係有24%，「即係仲有15%升」（但當然咁樣計係錯的，即係咁講）。

「嗰5次下半年升市，得一次唔夠9%」「即係而家買都8成贏錢」

29. 另一角度睇，呢5次之中，得一次係下半年嘅升幅唔夠9%。「即係八成機會你而家飛入去去到年尾都仲有得升」。同上，只係咁比喻，唔好當真理。

30. 但，更聰明吒你應該問：點解？係巧合定點？

31. 呢個亦係我啲文成日想帶出嘅嘢。乜都唔睇嘅人，知識水平就太低（但可能反而投資表現好，投資就係咁奇怪）。但大家睇我Patreon，相信都有投資，或者有興趣，咁你成日會在坊間見到好多講法。「歷史見到，咁咁咁，就會點點點」。但又會有人話你知，「過去唔代表將來」。

高層次嘅啟示：點解會有呢啲現象？係巧合定有原因？原因係乜？

32. 兩種講法，根本都可以係啱嘅。問題係，邊啲嘢有機會重覆？邊啲嘢冇乜機會重覆？就係判斷呢樣樣嘢先考你功力。

點知道邊啲歷史會重覆？邊啲唔會？就考功力。但我畀個方法你

33. 有時係靠經驗，有時係靠直覺，但我可以畀多一個方法你：留意下，背後有冇一個言之成理嘅「理由」。

34. 你要記住，你要data mining，夾硬搵啲「規律」出嚟，實搵到的。例如我可能搵到，單數號碼嘅股票，跑贏雙數號碼嘅—你實搵到架喎，因為梗有一組係跑贏架嘛。

單數冧把股票跑贏 vs 細冧把跑贏。隊名長嘅球會表現好啲 vs 著紅衫表現好啲

35. 問題當然係，跑贏幾多？會唔會只係巧合？如果你有強嘅數學底，就即係問，呢啲分別，係咪「統計上顯著」（statistically significant）．如果人地真係做研究，就要計呢啲嘢

36. 但我地普通layman（雖然我係讀精算嘅，「但我係讀屎片的」），唔搞咁複雜嘅。咁好簡單，你睇下背後個「解釋」，係咪令你信服（當然，呢個亦因人而異，亦係考你嘅經驗同判斷力）

37. 上面嘅例子，你話單數號碼跑贏雙數，即使真係都好，都唔令人信服。點會同單雙有關？

38. 但，如果我話細冧把跑贏大冧把，就可能解釋到。因為在香港，你見細冧把多數係歷史耐嘅香港大公司。「應該跑贏啲創業板垃圾」。個重點係：背後個解釋係乜？你覺得make唔make sense？如果只係講冧把大細，我都唔信服。但如果你知道原來有堆8xxx嘅垃圾，咁個解釋咪合理啲。如果你知埋1-20嗰堆公司歷史耐，又多數港資，又係好啲嘅解釋，

39. 同樣道理，我用足球嘅比喻。如果你發現，球會名短嘅，成績好過球會名長嘅，咁照計冇乜說服力（除非話啲球迷打氣易啲叫，或者易啲吸引球員，「可能有啲球員文盲唔識太長嘅字」）。但，如果你話紅色衫嘅成績好過灰色衫嘅，就可能有人解釋，可能係嚇到對手之類（亦有人研究過守門員著咩色衫守十二碼勁啲）。而如果去到我話主場嘅，成績好過作客嘅，咁大家都知點解亦信服（但，到底係因為球迷打氣？定其他嘢？又係一個研究。在逆情閉門作賽下十分有趣）。如果到我話，人工高嘅球會，成績好過人工低嘅，咁更加唔使講點解。

咁到底，股票係升開繼續升，定升得咁上下就跌？

40. 講返股市，今次我地嘅主題，見到上半年跌得好甘嘅年份，下半年就好似實升，仲要表現好好。有冇原因？

41. 當然有。正係因為估值。

42. 一個股市，高位跌咗15%，幾肯定估值都會平咗—固然唔係一定，好睇你用乜去估值。但大意係咁。特別係我講成個市，唔係一兩隻股票。一兩隻股票可以越蝕越多，由100蚊跌到落10蚊可能「貴咗」，但成個股市一般唔會咁。

43. 另一樣，亦係炒預期。股市可以上半年跌得15%，好多時都係啲人驚某啲嘢。咁已經反映晒。

44. 況且跌得15%嘅，往往代表要沽嘅都好多沽晒，啲人手上有現金，咁咪可以買返上去。

100年嚟，美股只試過一次4連跌，但N次4連升。點解？

45. 以前都做過比喻，股市唔係銀仔擲公字或賭場開大細。開大細或擲公字，今次開大唔會令下次更傾向開細，今次出字唔代表下次出公嘅機會大啲。

46. 但股市唔係咁回事，如果你半年半年，或一季一季咁睇，應該大約見到有一個負相關，應該強過個momentum．即係，升得多就會跌，跌得多就會升。

47. 況且唔好忘記，股市多數係升嘅。

48. 證據嗎？可能真係搵讀Stat嘅計下（有得計，但我已忘記了點做），但，你見到股市好少連跌3年，但成日可以連升3年。你計4年嘅，仲明顯，100年只試過一次4連跌，但4連升相當多。5連跌冇見過，但5連升就有。

49. 係有得解的。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。