ivanliresearch

8月鉅獻：印度經濟，印度股市，印度ETF (Patreon)

Published:

2022-07-31 22:01:29

Edited:

2022-07-31 22:58:12

Imported:

2022-09

Content

又窮又後生又多人又食兩邊茶禮，印度經濟實好，唔使點討論。

印度　vs 越南，有同有不同

不過，邊個話你知經濟好等於股市好？A股勁定美股勁？

亦唔好忘記，印度盧比歷史新低，今年跌7%，五年跌24%

「點管理匯率風險？」—好簡單，搬去印度住。

不過，SENSEX 5年升咗78%，「應該唔係好介意盧比跌咗24%嘅」

點買印度股市？香港有ETF，美國又有，買邊隻好？

仲有「印度股走國企ETF」，「印度新經濟ETF」，得唔得架？

搞咁多嘢，「我就寧願買新興市場走中國」

但，年頭我同你講，買韓國印度台灣，仲衰過買A股，你又信唔信？

1. 又新一個月，歡迎各位新讀者。之前同大家寫過，史上美股上半年跌得15%嘅年份，最後下半年，每一次都正回報，冇一次例外。結果剛剛7月美股亦都做得很好，係兩年以嚟最好嘅一個月，標普指數升9%，納指升12%，但你有冇錯失到？

2. 7月仲有好多好多嘢要講，多到寫唔晒。但升市照計大家少啲擔心，所以今　寫個專題：印度股。

又窮又後生又多人又食兩邊茶禮，印度經濟實好，唔使點討論。

3. 應該從冇寫過印度股市，唔太熟，你平時亦好少聽人講印度股，甚至任何有關印度金融嘅嘢，頂多做IT嘅會識佢地幾間大公司。原因之一因為香港人好少去印度，你見去緬甸老撾嘅分分鐘仲多。但印度雖然仲係相當窮，經濟體系實在好大（因為，真係好多人！好快多過中國）。計nominal GDP世界第五，大過英國，照計好快趕過德國日本。計PPP（你可以理解為計及物價）嘅，直頭係第三，中美之後—冇錯，計PPP中國已經大過美國。不過話說回頭，真係要揀一個嘅，似乎係計nominal比較「有意義」。以前都講過呢個問題，因為例如你買LV買iPhone，唔會在中國或印度平好多的。

4. 非常多人都睇好印度嘅經濟，照計都幾明顯。例如張宗永（佢係我舊同事老公，但我個舊同事都應該唔識我，所以佢係唔識我的）上星期寫咗篇文。睇唔到都唔緊要，觀點唔算好新鮮，但佢行文幾好。

印度　vs 越南，有同有不同

5. 某程度上，同我兩年前寫越南差不多，兩度都係窮，仲有好多增長空間。兩個都係人口大國，啲人都仲生仔（你見兩度啲女人都仲係平均一個生兩個，因為窮！），有人口紅利。而人口整體後生（越南人年紀中位數係32，印度係29，中國係38，台灣42，韓國43，香港46，日本49）

6. 至於印度有幾窮嘛？都好易計，睇人均GDP。計PPP嘅，七八千蚊美金，低過老撾菲律賓，全世界排下半版嘅上半，中國係兩萬，上半版嘅下半，印度兩三倍（越南都有近一萬，冇印度咁窮）。計nominal，中國一萬蚊美金多啲，印度就兩千，五倍（越南就三四千）。所以你話大陸窮嘅，你真係未去過印度（當然，亦因為香港人太有錢）。

7. 仲有更重要嘅係，越南同印度都可以在中美之間左右逢源，搵兩邊著數。例如你見印度狂買俄羅斯石油甚至軍備，美國同盟友當然扮睇唔到。因為要用嚟牽制中國。同樣地，越南一樣一黨專政冇言論自由冇新聞自由，但你唔會見有人制裁，原因同上。

8. 當然細分的話，越南印度都仲有啲唔同。越南就真係似中國（亦都搶咗部份低收入工種），製造業大國，印度就冇乜呢回事。但印度人識英文（當然唔係全部識，但計比例上啦），亦好多人知道搶咗好多call center IT support之類嘅工作。而且好多鄉里在美國巨企做CEO，點都會照顧下啲後輩。

9. 而仲有一樣嘢留意，越南同中國都係一黨專政非民主（但你冇見過美國批評越南），印度就行西方民主。況且越南都夠多人，成億人，但印度係14倍。例如你想像下在軍力上，就爭好遠了。

不過，邊個話你知經濟好等於股市好？A股勁定美股勁？

10. 所以，照計印度經濟前景好，應該十分肯定。但當然找地嘅讀者唔會只係咁簡單覺得，「印度經濟好，咁買印度股市啦！」—你可以諗下，呢個想法有乜問題。

11. 首先，講過無數次，股市同經濟就唔係同一回事。中國N咁多年嘅經濟增長都高過美國（唔使拗，唔好學埋啲傻仔咁話啲數字假，點假都肯定增長高過美國好多，好多嘢睇到）。但，美股跑贏A股九條街，係咪？

12. 咁但，中國有佢獨特嘅問題，部份同政體都有關。雖然「冇民主」同「股市好」未必直接衝突，以前你見中國都仲畀企業（民企又好外資又好）搵大錢，股市咪好，但而家明顯唔係呢回事。咁而理論上，照計民主選舉嘅地方，對企業比較友善，暫時都仲係。咁所以，照計印度應該冇咁易出現中國呢種「經濟好勁股市好唔掂」嘅情況。

亦唔好忘記，印度盧比歷史新低，今年跌7%，五年跌24%

13. 但，呢個只係指長線而言。你睇短線嘅，更加嘥氣，同咩經濟增長可以全無關係。印度今年經濟增長肯定好，好過美國中國香港。但印度股市（SENSEX）今年點？近排已經好返好多，低位彈返12%．但年初至今仲要跌3%。好似都唔太差？但，你係外國人，蝕盧比匯價蝕死你。今年印度盧比對美金跌7%。計埋之後，唔會好過你買A股幾多．5年間，盧比都跌24%，都係一個問題。

14. 另外，上面都提咗，新興市場常見嘅，匯率風險（其實而家成熟市場一樣係咁，你睇啲Yen！）。印度盧比早前跌到歷史新低，又肯定唔係你以為嘅「經濟好匯價會強」咁簡單。

「點管理匯率風險？」—好簡單，搬去印度住。

15. 以前都不停有讀者問，點避免呢啲匯率風險。答案好簡單：係冇得避。某程度上，你應該多謝聯匯添，至少你買美股冇呢種風險。

不過，SENSEX 5年升咗78%，「應該唔係好介意盧比跌咗24%嘅」

16. 但，之前嘅文都有寫，點可以減低呢啲問題？好簡單，你贏得多。你贏到幾倍嘅，就唔會再太介意匯價輸一兩成。而你要贏得多，一定要渣得長。你睇SENSEX指數，5年升78%，你又唔會點在意盧比跌咗24%了。我知你當然想賺到盡，但係冇可能的，你扣埋匯價，都仲係好過好多股市。不過提提你，指數升78%，匯價蝕24%，你唔係賺78-24=54%，而係賺(1+78%) X (1-24%)-1＝35%．

17. 況且，之前講嘅「股市唔跟經濟」，都主要係短期。去到好長期嘅，照計就都大機會跟—雖然都冇得包生仔，咪話美國之前都「迷失十年」，股市2000-2010原地踏步，但中途經濟一樣勁。所以，我講嘅長期，係三五七年，甚至十幾年。而上面講咗，你見印度股市今年雖然麻麻，但你幾年前買，一樣贏到笑，肯定夠你蝕匯價。

18. 所以呢，好心同讀者講，但好多人都聽唔入耳，個個想下星期發達。但對投資嚟講，好多嘢都真係time is your friend

點買印度股市？香港有ETF，美國又有，買邊隻好？

19. 想買印度股市，點買好？首先再講一次，你唔使諗點去「避免匯價風險」，冇得避的，除非你搬去印度住（「但唔好諗住一年去幾次日本或買iPhone」）．想買印度個股嘅，甚至唔使搞到上IB咁刁鑽，啲大公司唔少在英國美國上市。

20. 買大市嘅，仲簡單，同你睇幾隻ETF。香港都有印度ETF，2836，5年升40%，還好，留意已經扣除匯價。主要持股在呢度有，都係大名嘢，Reliance，HDFC Bank，ICICI Bank，Infosys，Housing Development Finance，Tata consultancy．管理費0.64%，入面資產8600萬美金，都幾細，係一個小問題，因為即係唔會減價，同埋啲買賣差價可能差啲。你見一日都只係幾十萬港紙成交。

21. 美國上市嘅？原來都唔太多，奇怪。留意美國上市嘅用美金買賣，你見到嘅回報係扣除咗匯率了。