今晚睇聯儲局議息．強美元拖累，Google 微軟盈利同收入都差過預期，但股價照升．點「管理」匯率風險？係冇得管理的．好公司一樣可以高位無事無幹插三成，點解？可樂＋麥當勞：通脹＋衰退受惠股，業績勁，跑羸晒大市．Chipotle：業績又係勁，盤後升10%。但同麥當勞唔同．「重災區」建行今年先跌8%，跑贏晒大市，說好了的爆煲．3000億房地產基金，好事，「但錢從何來？」阿里巴巴應該又有得玩過． (Patreon)

今晚睇聯儲局議息．

強美元拖累，Google 微軟盈利同收入都差過預期，但股價照升．

點「管理」匯率風險？係冇得管理的．

好公司一樣可以高位無事無幹插三成，點解？

可樂＋麥當勞：通脹＋衰退受惠股，業績勁，跑羸晒大市．

Chipotle：業績又係勁，盤後升10%。但同麥當勞唔同．

「重災區」建行今年先跌8%，跑贏晒大市，說好了的爆煲．

3000億房地產基金，好事，「但錢從何來？」

阿里巴巴應該又有得玩過．

今晚睇聯儲局議息

1. 寫文時星期三日頭，星期四可能未必出到文，所以講定聽日嘅嘢。首先講返，今晚會有聯儲局議息，如無意外就必定係加0.75厘，反而睇下對9月嘅指引仲好，但暫時我都係相當睇好下半年嘅股市（事實7月暫時唔錯）。一旦通脹見頂減慢加息，分分鐘升到你唔信。

2. 業績方面，今晚（星期三晚）會有Facebook，公司一早預告咗會「唔掂」，但幾時都係睇預期，況且近來你見唔少業績差過預期嘅公司，出完業績都有得升。至於星期四晚就係蘋果同Amazon。

強美元拖累，Google 微軟盈利同收入都差過預期，但股價照升

3. 順手回顧埋，星期二晚收市後微軟同Google 兩大科企，都出咗業績。兩間都係唔得嘅，但盤後股價照升。之前都講過，呢個係相當好嘅signal。

4. 微軟提到中國封城，結束俄羅斯業務，仲有強美元，呢啲都係比較一次性嘅因素。當然公司都有提強美元會繼續影響埋今季業績，但唔好因為咁就以為一定冇運行，講咗多次，係睇預期。而美金嘅強勢，可能已經差不多。不過撇除呢啲嘢，整體個業績都係麻麻，特別留意公司之前己經出咗「盈警」，照計分析員至少部份計及咗強美元嘅影響，可能係低估咗吧。不過你亦可以話，因為微軟上調咗個展望，所以股價反應好

5. Google嘅情況，亦係強美元拖累。但同樣地，投資者一般唔係太介意呢啲匯率影響，反正公司亦控制唔到。不過你見業務，都差不多每一瓣都低過預期，廣告又好，雲計算又好（但當然呢啲全部都係受強美元影響）

點「管理」匯率風險？係冇得管理的

6. 話時話，連呢啲超級巨企都「管理」唔到個匯率風險，我就建議理無謂嘥時間諗埋啲唔work嘅嘢。

好公司一樣可以高位無事無幹插三成，點解？

7. 仲有你可以留意嘅係，兩間公司，股價都由高位跌咗三成。差不多啦，咪同納指一樣。但明明業務係冇乜大問題的。點解跌？你可以話係跟個市，但，佢地咪係「個市」，所以其實係殺估值。

8. 又係老教訓，估值好重要，你講到間公司點好（或點差）都好，不能忽視估值。但實在相當難去衡量，所以做得到嘅，就當然係人人都好驚嗰時買。做唔到嘅，就分段買，或者鍾意幾時買就幾時買，唔使理市場氣氛。最唔好嘅，就係人人買嗰時你先衝去買　—　雖然大家都知，個個合埋眼都贏錢時，你要「保持冷靜」，係極困難嘅。我懷疑人人沽你去買，易過人人買但你唔參與。

9. 呀仲有，亦即係話你知，你買最好嘅公司（微軟近乎係冇嘢可以挑剔），都係可以無緣無故（當然事後你可以夾硬搵理由）跌三四成嘅。之前都寫過，蘋果2018年第四季亦係咁。呢啲係買股票必定會發生嘅事，你唔去承受，就好難贏到大錢。

可樂＋麥當勞：通脹＋衰退受惠股，業績勁，跑羸晒大市

10. 同時亦可以講下星期二晚出嘅可口可樂同麥當勞，Facebook Page都有略講。呢啲公司，就真係通脹受惠股兼衰退受惠股。留意佢地強嘅業績主要係受收入帶動，一般係好過由成本低帶動。再講白啲，成本當然升，人工又升，材料又升，但公司加到價。（近乎）必需消費品，而似乎啲客仔因為通脹，其他地方開支大咗，唯有食平啲，而貴咗嘅麥當勞仲係平過其他嘢一大截。

11. 留意兩間公司離高位都只係5%左右，近乎冇跌過，今年亦跑贏大市。你嘅組合係應該多元化嘅，雖然我都冇呢啲公司。即使你話買IWD，入面都冇麥當勞同可樂，因為你睇佢地嘅估值，亦唔算特別平—但就真係一路企得硬。

Chipotle：業績又係勁，盤後升10%。但同麥當勞唔同

12. 呀仲有，星期二晚收市後，Chipotle都出咗業績。以前有睇過，但冇食過，讀都未識讀。住美國嘅讀者可以分享下。

13. 業績同麥當勞一樣，係好過預期。盤後升夠10%。但似乎個情況係唔多同，公司嘅收入低過預期，咁即係個純利高過預期好可能係因為成本冇想像中升咁多。而公司亦都同時話會再加價，不過聲稱「啲客唔係最低收入嘅人」，咁似乎同麥當勞唔同？（而我係唔知賣幾錢的）

14. 不過又諗下，咁多餐廳而家都仲加價，都可能……繼續有個通脹壓力？所以雖然我依然估通脹會回落，但未必落得好快。甚至有機會低位再反彈下？之後再研究

「重災區」建行今年先跌8%，跑贏晒大市，說好了的爆煲

15. 至於港股嘅嘢，首先再講下「內房風暴」（或「內銀風暴」）。一如之前寫，對銀行唔係咩大問題，始終好多係大國企，監管又嚴，做嘢又保守。你睇所謂重災區嘅建行939，今年只係跌8%—直頭跑贏晒大市。真正重災區嘅招行3968，亦只係跌三成—當然都甘，但絶對稱不上係咩災難。

16. 但民企發展商好多都極進取，恒大就有辦你睇。

3000億房地產基金，好事，「但錢從何來？」

17. 玩玩下，最新玩法係「3000億基金」，支持房地產，亦即係變相救市。之前都一路講，大陸政府就一路唔想救啲開發商。亦都好合理，因為都真係「道德風險」，個個平時就周圍買嘢呀，搞波呀咁，有事就阿公埋單。呢啲問題亦唔止係房地產業，你見海航又好，安邦又好，都差不多。但最後又係唔救唔救還是要救，亦即係啲發展商成功騎劫咗銀行，仲有社會問題。係咁架啦，國情獨特嘛。

18. 好啦，但，錢從何來？固然係「阿公」，但都仲有好多種。結果，呢個乜乜基金，就由銀行出資，其中一間就係建行，相信其他都陸續有嚟。咁即係，變相又係內銀再借錢。同之前我地討論「爛尾樓復工，但錢從何來？」嘅邏輯一樣。

19. 咁去到呢個位，就當然係啲內房翻生。呢個圖係講星期一嘅股價，星期二再升咗浸，但星期三又跌返。呢個圖我覺得偉大在：你見到雖然反彈，但今年已經插咗一大截，你買咗嘅，係相當難翻身嘅。

20. 所以？就真係買啲正常啲嘅公司，唔好嫌升得慢（況且都唔慢）。一路以嚟我都只係買兩隻內房，個個月買，而成績不錯嘅。一隻係華潤置地1109，今年唔算升好多但至少有得升，當然大幅跑贏大市，你過去幾年買，大多數都應該係贏錢。

21. 仲有，當然就係中國海外688。好記得應該係2020年尾嗰時推，因為去咗台北隔離14日。嗰時應該係因為所謂美國制裁，推嗰時好似20蚊定18蚊，之後仲一路跌到15蚊的，但我都好老定，打後表現幾好。今年更加升咗超過20%，其中一隻最好嘅藍籌

22. 更重要係，呢啲公司你會坐得安心啲—雖然唔係唔會跌。咪話Microsoft Google都跌三成—但我意思係，三成呢啲都係正常。至少唔係跌八九成。

阿里巴巴應該又有得玩過

23. 最後，都係要講返阿里巴巴。呢兩日好多新聞，主要係因為出咗股東信，但相信佢地背後亦或明或暗做好多公關或政治嘢。

24. 冇咁重要嘅，三大戰略（不太重要），SoftBank過去一年減持咗3億股（舊年嘅事，有何重要？），美國業務未達標（哦）

25. 比較重要嘅，兩樣嘢。第一係申請在香港主要上市。第二係調整合夥人協議，螞蟻嘅管理層唔再做成員。

26. 唔知有乜重要？先講申請在香港主要上市，預備在美國退市都係其他，最重要係：在香港主要上市嘅公司，先可以入到港股通，有北水買。冇錯，而家阿里巴巴係未在港股通名單嘅

27. 至於螞蟻管理層唔再做阿里巴巴合夥人，原因亦好簡單：為咗分返開兩間公司嘅業務。之前寫過，甚至兩間公司會「競爭」，「至少表面上係」。所謂何事？當然都係為咗避免被視為「壟斷」，搞返上市。

28. 照計呢啲東西，都會利好股價嘅。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。