7月加息幅度應冇懸念，但9月先係戲肉．星期五通脹數據，會唔會再破頂？星期四嘅GDP數字，仲有趣。分分鐘見到「衰退」美股業績期：FAAMG齊齊放榜，強美元影響有幾大？微軟之前出盈警添．但其實，「討論同預測匯率，真係嘥時間」 (Patreon)

7月加息幅度應冇懸念，但9月先係戲肉．

星期五通脹數據，會唔會再破頂？

星期四嘅GDP數字，仲有趣。分分鐘見到「衰退」．

美股業績期：FAAMG齊齊放榜，強美元影響有幾大？

微軟之前出盈警添．

但其實，「討論同預測匯率，真係嘥時間」

1. 今個星期嘅重點，當然係聯儲局議息，同埋美股業績高峰期。過埋呢個星期又可以講多啲其他哩嘢。提定你，星期三晚有議息結果，星期四晚GDP，星期五晚PCE，連續三日享受，中途仲有兩百幾間業績

7月加息幅度應冇懸念，但9月先係戲肉

2. 首先講議息，香港時間星期三晚會有結果。照計大家都識睇CEM Fed Watch，而大家都知聯儲局唔會做啲市場完全意外嘅嘢（除咗突發減息，但好多時突發減息都會係「預期內」）

3. 不過些少奇怪嘅係，暫時大多數人係覺得加0.75厘—但呢個「大多數」暫時只係75%—似乎係相對較低，記得之前加息前好似個「共識」會去到八九成。但，照計都真係加0.75厘嘅，唔應該有太大意外。我甚至直覺（只係直覺）覺得，可能個「意外」係surprise from downside—加0.5厘，而唔係加1厘

4. 同樣地，昨日都提過下，7月呢次冇乜懸念，但9月呢？暫時似乎加1厘嘅機會近乎零，一半機會加0.75，一半機會加0.5—如果係加0.5，有機會係對股市幾好嘅消息—應該話，只要有人「聞到」可能加0.5，已經可能有得升。

5. 所以，今次加0.75應冇疑問，但又係留意官員之後講嘅嘢—仲有就係，今個星期出嘅一堆經濟數據。

星期五通脹數據，會唔會再破頂？

6. 我估市場對9月加息幅度嘅預期，在議息後仲會大上大落，甚至係呢個星期已經會，因為都有兩個重磅數據公佈。睇路

7. 第一個係星期五晚出嘅PCE，聯儲局鍾意睇呢個。上次6.3%，街估嘅數…….好似搵唔到（！），但Trading economics 估6.7^，即係反彈。另外留意佢地估嘅數係高過市場嘅。

8. 核心PCE方面，上次係4.7%，街估都係4.7%，即係不變。留意個數字已經連跌3個月，再有得跌的話，聯儲局減慢加息係好合理的。再講一次，聯儲局主要係睇PCE，唔係CPI。

星期四嘅GDP數字，仲有趣。分分鐘見到「衰退」

9. 然後，好似唔多人講，但萬眾期待嘅星期四美國第二季GDO。點解咁期侍？因為，可能你會見到「衰退」。

10. 首先講數字，市場預測係增長0.5%，但上一季係收縮1.6%。另外你細心嘅會留意到，做乜上一季嘅數，出咗三次？四月五月六月尾各一次。答案就係會有初值，修正值，同埋終值。不過一般反應最大係初值，因為之後啲修正唔會好大轉變。雖然你見到，上一季嘅數，係修正再調低，終值再調低。

11. 更有趣嘅係，之前嗰一季，初值修正同終值，都係低過預期嘅。初值出固然係大驚嚇，但之後經濟學家調低個數，點知去修正，仲係低過預期—又再調低，點知去到終值，都再低過預期。

12. 好啦，咁你話，今次明明係話市場估增長0.5%喎—但，呢啲數字，市場可以錯的。上季初值時，你見街估增長1.1%，結果係收縮1.4%—所以今次估增長0.5%，最後出收縮，亦不足為奇。當然最後增長強過預期，也不足為奇—唔係廢話，而係經濟師嘅預期，都十分之分歧。

13. 萬一星期四出個數，係收縮嘅。咁，咪話第一季已經收縮咯。連續兩季收縮，咪就係一般講「衰退」

14. 當然，以前都講過呢個問題，「衰退」並冇一個好清晰嘅定義，但一般都係用「連續兩季收縮」嚟量度。亦可能到時有人話係「技術性衰退」—你可以話，即係「雖然係兩季收縮但經濟依然幾好，只係放慢，唔係真衰退」。之前聯儲局官員有咁暗示過，財長耶倫又講過，其他經濟師都有講。

15. 咁都得？但我係信服呢個講法嘅。又或者另一角度講，你可以當係一個好溫和嘅衰退。

16. 仲有，唔好太過執著。咁冇理由話兩季各收縮0.1%就衰退，一季收縮2%然後第二季增長0.1%就唔係衰退。都係大約講法，唔好太執著。正如之前講「熊市」都係，跌20.1%就計，跌19.9%就唔計？（而以前就係試過有一次係咁）

17. 仲有，點解唔好咁執著？因為提返你，上季出嗰個意外收縮嘅數據—令條街大跌眼鏡。咪話街估增長1.1%，結果係收縮1.4%—但你估下嗰日美股係點？當然係升。

18. 原因？好多原因。「首先可以係冇原因」。但亦記住，股市對呢啲經濟數據，唔會好似個股對業績咁敏感，原因好可能係呢啲經濟數據都係滯後嘢。此外，亦都因為經濟數據滯後，GDP往往大落後，而往往會係「數據好驚加息股市跌」，「數據差估減息股市升」—係好夾硬，但真係咁的。慢慢去感受下個市場

19. 咁點解我要特別提？主要係因為：唔好你到時見到新聞報「衰退」兩個字又嚇死。

20. 又或者，睇下呢個圖。衰退時，當然應該買股票。

美股業績期：強美元影響有幾大？

21. 最後，當然又係業績，自己睇時間表。我主力睇Big Tech，星期二有微軟同Google，星期三Facebook，星期四就蘋果同Amazon。另外仲有一大抽公司出，麥當勞，可口可樂（之前百事幾好），Visa，MasterCard（之前美國運通幾好），兩大藥廠輝瑞同默克，Intel，P&G（之前Johnson麻麻地）

22. 留意暫時都仲係見到，普遍業績唔係太好，好多都下調預測，但暫時由業績期開始，美股都仲係升，似乎係幾好現象。

微軟之前出盈警添

23. 嚟緊業績，除咗例牌會關心通脹嘅影響，以及經濟放慢嘅蹟象：仲有一樣嘢，就係強美元。強美元正路對美股業績不利，特別係做全球生意嘅科企。好簡單啫，微軟在日本就收Yen，啲Yen咁跌法，當然收入縮水（而事實微軟之前變相發咗盈警，亦真係因為匯率）

24. 不過，正如微軟呢個case，公司唔多唔少會引導咗分析員，分析員亦唔係今日先知美金強。仲有，一般公司都會分返開兩部份，話你知「撇除匯率」又會點，大家多數都聚焦在呢一個嘅。

但其實，「討論同預測匯率，真係嘥時間」

25. 更有趣嘅，建議你睇下林少陽篇文（唔知使唔使訂戶）。美金，可以強幾耐呢？唔知，但相信下跌空間多過上升空間。而最重要係，林少陽篇文有提到一啲我之前都講嘅嘢：「匯率嘅嘢，冇乜好討論」，「長遠嚟講，都係zero sum game」—事實你睇美匯指數，半個世紀以嚟，都係70-120上上落落，但股市升咗幾多倍？

26. 我亦想你留意佢講，貨幣本身，係創造唔到任何價值嘅，所以我甚至覺得「外匯」根本唔係投貟，咪話zero sum game—但你見公司可以創造價值，升幾百幾千倍。

27. 所以，真係唔使花咁多時間去估，「想買歐洲股但又驚歐元跌」之類。講真，好多好簡單嘅嘢大家都估錯晒啦，何況估匯率？唔好當自己乜都識，你亦唔需要任何嘢都有個睇法—除非你打金融工