上星期港股又升，美股又升，但你心情靚嗎？失業救濟人數8個月新高，PMI就年幾兩年最差，跌到收縮．又話加息又話通脹，債息跌到2.75厘，4月嘅水平．7月加幾多息都唔係重點，9月加幾多先係戲肉。俄油封頂，「40蚊我先買」，得唔得架？應該唔得架？業績：Snap勁蝕，插40%，Twitter又蝕，但有得升，美國運通就好啲 (Patreon)

上星期港股又升，美股又升，但你心情靚嗎？

失業救濟人數8個月新高，PMI就年幾兩年最差，跌到收縮

又話加息又話通脹，債息跌到2.75厘，4月嘅水平

7月加幾多息都唔係重點，9月加幾多先係戲肉

俄油封頂，「40蚊我先買」，得唔得架？應該唔得架？

業績：Snap勁蝕，插40%，Twitter又蝕，但有得升，美國運通就好啲

上星期港股又升，美股又升，但你心情靚嗎？

1. 上星期唔知你投資心情點？但上星期，港股就固然升，說好了的7.85 內銀爆煲。又，費事成日寫，但留意個銀行體系結餘仲會跌，香港拆息仲會升，而分分鐘好快會加　Prime，遲下寫文講

2. 唔止港股，就連美股都係升的，三大指數上星期升咗2-3%。你有時間嘅，睇下呢段now（其實係信報）嘅星期五美股收市總結，好多值得講嘅地方。呢度我略講下。

失業救濟人數8個月新高，PMI就年幾兩年最差，跌到收縮

3. 好啦，第一樣你要留意嘅嘢，係美國出嘅首次申領失業救濟數字，相當難睇。係今年內嘅新高，亦預高於預期。

4. 你亦可以留意嘅係，歐元區嘅PMI，跌到落50以下，即係收縮水平，2021年初以嚟第一次，龍頭德國嘅情況亦一樣，即係唔止係啲其他國家拖累。美國方面，服務業PMI亦係跌到低過50，兩年幾嘅新低。

5. 順手解埋，呢啲PMI乜乜，個個國家都有做，實情就只係一個問卷統計咁，但往往都幾領先，好過你睇GDP之類大滯後嘅數。留意美國同歐元區嘅PMI，唔止係跌穿50，仲要係跌得好快下。

6. 所以，都唔使多講，經濟前景梗係唔好。但呢個都唔係重點。

又話加息又話通脹，債息跌到2.75厘，4月嘅水平

7. 好啦，首先，10年債息，跌得極之急，跌到2.75厘。留意，一路話加息，亦一路真係加息，又話通脹。但你見而家嘅債息，返返去4月咁嘅水平了。而都講過呢個應該對股市會好，但當然唔係日日都跟足。幾肯定嘅係，以為話加息或通脹債息會一路衝上去，並冇發生，或者你可以話年頭至4月已經完成晒。衝到上6月中嘅3.5厘後，過去一個月都跌返落嚟，好可能係擔心衰退。

7月加幾多息都唔係重點，9月加幾多先係戲肉

8. 但呢個都未係最有趣，最有趣應該係：7月嘅加息預期。提返你，呢個星期二二就議息。回返帶，早兩星期出嘅CPI數字又破頂又高過預期，一度市場估加1厘息，但好快就變成估0.75先係主流。除咗聯儲局出口術，亦因為估通脹會回落。至於點解估回落？亦因為近排油價糧價都跌（驚衰退嘛）。

9. 出埋最新嘅呢堆失業數據同PMI後，你可以又睇CME，8成機會加0.75，即係基本上必定開呢瓣。

10. 但更重要係，下一次呢？9月又點？你可以再睇CME，留意可以睇埋9月（甚至之後幾次）。相當相當有趣，開夠三飛。一半機會加0.5厘，四成加0.75，加1厘嘅機會，10%唔夠。即係，好大機會係加0.5！

11. 咁，就開始有趣啦，當然都係narrative，加0.5仲係加，甚至仲係快過以前加0.25嘅慣例。但，由7月0.75，變到9月0.5，就已經可以係一個「加息減慢就快停」嘅narrative —而記住，梗係炒預期。

12. 當然，離9月仲有兩個月，好多嘢可以發生，以上呢啲機會率，要變嘅幾日可以大變。仲有，如果你好細心嘅，會諗到，CME嘅數，只係話你知去到9月嘅水平去到幾多。而我上面計數，係假設咗7月實加0.75厘嘅。但如果唔係呢？就世界大亂。實情呢啲計法本身就係有呢類問題，因為你諗下，你計數計到係到9月會兩次累加1.25厘咁講先算—但你點知背後嘅人，係估75-50，定50-75？

俄油封頂，「40蚊我先買」，得唔得架？應該唔得架？

13. 無論如何，加息預期降咗，就好肯定。亦因為通脹講咗，之前啲文寫過，不再完全重覆。但你見油價同糧食價呢排都似乎反彈乏力。糧食嘅情況簡單啲，除咗驚衰退，仲因為俄羅斯放行烏克蘭嘅食物出口（雖然有話又炸過，唔知搞邊科了）

14. 至於油價方面，更加神化。我嚟緊可能在Facebook寫，但都未必寫，因為我都唔係好識寫！想大家都可以自己諗一諗，呢一單嘢。就係美國同盟友希望將俄羅斯石油嘅價封頂。

15. 油價一路升，美國同盟友當然唔高興。首先佢地普遍唔產油，多數都係用家多過賣家。另外，美國同歐洲嘅通脹，亦都令政客受壓力。而油價係咁升，變咗俄羅斯嘅石油收入仲高過開戰前，更加係不能忍受。所以佢地當然希望俄羅斯唔會從高油價中得益，再用嗰啲錢去打仗。

16. 問題係，呢個「只會用40蚊50蚊買俄油」嘅做法，得唔得架呢？諗落都仲有相當多細節，但我直覺覺得，係唔work嘅。

17. 講白啲，即係美國及盟友，做一個cartel，聯手壓價。高過50蚊我就唔買，大約係咁。但，成件事係極奇怪的。既然講得50蚊，即係佢地仲會買，否則完全冇買嘅，你點影響個價？即係我同你只會出3000蚊買梵高嘅畫，會唔會令佢冧價？況且啲歐洲國家仲係需要俄油。

18. 咁即係，佢地會照買，亦需要買，但只肯畀50蚊—於是又諗下，唔係好make sense喎，貝沙灣買幾萬蚊尺，「但我只願意出5000」—咁你咪唔好買咯。

19. 你可以話，好似啲僱主聯手壓大學生價咁，但都仲係有啲唔同。冇人肯返工嘅，我大不了唔請，或者搵個大學未畢業嘅。但你冇油用，可以頂幾耐？

20. 況且，都有好多人指出，中國會買，印度會買，你唔畀市價，俄羅斯咪唔賣畀你咯，有何問題？實情由Day one你都可以「封頂」，齊齊話10蚊我先買，甚至免費我先買—但你話有冇咁嘅事成功過？有冇咁樣可以壓到10蚊甚至免費？

21. 大家可以諗下。但俄羅斯就講到明，你唔畀足錢嘅，咪唔賣畀你，好簡單啫。

22. 所以我真係唔明，做乜有人諗出咁嘅主意。定只係拜登自己閉門造車諗出嚟，下面啲友循例做下樣探討下，實情心中個個都知根本唔work？

業績：Snap勁蝕，Twitter又蝕，美國運通就好啲

23. 好啦，最後，早幾日一堆都唔係太重要嘅業績。留意埋今個星期戲肉，眾多Big Tech都會星期二三四出，加埋議息，夠晒忙。

24. 我之前見有啲媒體講，話暫時美股啲業績都普遍勝預期，但我嘅印象唔係咁，你見我寫都似乎唔係咁。留意返，我唔會因為出完個業績升，就夾硬唔好都話好。但，可能個分別係，媒體可能望收入，我可能望盈利。仲有，我見好多都係調低之後嘅展望，咁媒體可能都當呢啲都仲係好過預期。唔知，但整體啲業績，照計好難話好，但反而股價就不錯。

25. 上星期嘅兩隻重災區，係Twitter同Snap，唔多唔少都拖低咗埋部份科技股。Facebook都然首當其衝，因為業務一向同Twitter Snap有啲似，都係免費社媒，靠廣告收入。咁唔知係經濟差，定係Digital marketing放慢。Google亦本質上係間廣告公司，所以一樣大跌。

26. Snap就不用講，一跌跌40%，都幾驚。收入增長呢，就係上市以嚟最慢。蝕錢呢，就多過預期好多。老早話過，呢啲高估值又賺唔到錢嘅公司，逆境時就好難守的。但我都有買，輸到趴，幸好唔係買好多，只能咁樣去「控制風險」。

27.  Twitter情況亦差不多，又係蝕錢，收入亦低過預期好多，仲要按年跌。公司就怪罪於Elon Musk，因為佢又買又唔買，搞到啲客都唔知第時邊個話事，公司乜方向，索性抽起啲廣告唔賣住。但你見股價唔使跌仲可以逆市升。原因？因為始終估係會畀人收購，可能係告到Elon Musk一定要完成，更可能係還價少少，平少少買搞掂佢。

28. 唯一比較好嘅，係美國運通，雖然壞帳升，但整體業績都係好。股價就逆市升。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。