美股升到6個星期高位，早早話你知下半年必升（應該係）．係呀，冇「好消息」，咁先好．金管局日日接百億港紙，好快銀行體系結餘就穿1000億．港紙拆息0.9厘，美金拆息2.1厘，你話會乜事？好難明咩？香港通脹，1.2%升到1.8%，仲係好低，但要升可以好快．冇鬼唔死得人：你啲見解同想法，99%冇用。反而「價格」先係最大資訊．股市唔係鬥聲大，唔係鬥人多，唔係鬥把口。而係鬥兩樣嘢．Tesla 業績差，賣咗大半Bitcoin，股價照升．大師冇點你：早叫你買ASML：業績唔得，但5日升咗16%．內銀風暴：花旗又話損失300億喎。幾日前話5000億。點解爭咁多？ (Patreon)

美股升到6個星期高位，早早話你知下半年必升（應該係）．

係呀，冇「好消息」，咁先好．

金管局日日接百億港紙，好快銀行體系結餘就穿1000億．

港紙拆息0.9厘，美金拆息2.1厘，你話會乜事？好難明咩？

香港通脹，1.2%升到1.8%，仲係好低，但要升可以好快．

冇鬼唔死得人：你啲見解同想法，99%冇用。反而「價格」先係最大資訊．

股市唔係鬥聲大，唔係鬥人多，唔係鬥把口。而係鬥兩樣嘢．

Tesla 業績差，賣咗大半Bitcoin，股價照升．

大師冇點你：早叫你買ASML：業績唔得，但5日升咗16%．

內銀風暴：花旗又話損失300億喎。幾日前話5000億。點解爭咁多？

內銀骨牌效應：恒大啲供應商都話唔還錢！反了！

美股升到6個星期高位，早早話你知下半年必升（應該係）

1. 應該見到，美股市況十分明顥地改善咗，不經不覺標普指數升到6個星期新高，（其實日本股，印度股都係），納指更強。

 2. 而標指7月暫時升咗6%，相當唔錯。但你見近乎冇乜咩特別新聞，冇咩「好消息」，除咗話估「通脹回落」「減慢加息」之類—我就信呢啲解釋，但好多人仲係唔信服—咁先係好事

係呀，冇「好消息」，咁先好

3. 或者另一個方法睇，個反彈似乎冇乜「好消息」，所以要作以上嘅「理由」，而因為說服力唔強，就冇乜人信，冇乜人信先有得升。

金管局日日接百億港紙，好快銀行體系結餘就穿1000億

4. 冋時間，見到港股近排明顯轉弱，但當然同甚麼港紙7.85無關。之前咪貼過，上次7.85期間，恒指升咗2300點。冇話有關，但至少可以反駁有人認為「7.85港股就會跌」。

5. 更新少少個情況，你見到近排金管局接錢又密咗，仲要金額都大咗，亦係我早預期中（你可以睇舊文）。點解一早話你知會百億百億咁接？因為香港嘅拆息仲係太低了（有幾低？陣間講）。之前係升咗啲，但美金拆息升得更快。

港紙拆息0.9厘，美金拆息2.1厘，你話會乜事？好難明咩？

6. 因為個息差大，所以一路會有套息活動，金管局一路接，個銀行體系結餘會係咁跌。之前預言過好快跌穿2000億，果然就發生咗。照計跌穿1000億不足為奇。咁到時會點？到時啲拆息咪會抽得更高—但不見得會對股市有任何影響（對供樓就有影響，遲下講。但整體嚟講，樓價唔會太受呢啲嘢影響—唔係話供樓嘅利息冇影響，但除非你升到上10厘啦）

7. 同神化難捉嘅股票走勢並不一樣，拆息呢啲財資市場嘢，真係同做科學實驗差不多，結果大約預測到。你睇，呢排金管局入市又多又大，個結餘跌得急，咪即時見拆息抽得快。一個月拆息上到0.9厘，兩年最高。但照計仲有不少上升空間。好難答到升到幾多，但理論上，可以升到同美國拆息一樣（高過都得，但相當少見）。咁而家，1個月美金拆息係2.2厘，港紙拆息先0.9厘，當然仲有得上

香港通脹，1.2%升到1.8%，仲係好低，但要升可以好快

8. 好啦，另外亦呼應返，以前有人問香港嘅通脹。都寫過，仲使問？梗係升啦。全世界都咁強通脹，你見歐洲美國英國近10%，香港不可能唔受影響。剛見到最近嘅CPI，由1.2%升到去1.8%—當然仲係相當低嘅位，但要上可以上得好快。

9. 不過，同投資之類就無關。香港嘅CPI當然唔會影響港股乜滯，況且香港亦冇自己嘅貨幣政策，冇得加息。

冇鬼唔死得人：你嗰啲見解同想法，99%冇用。反而「價格」先係最大資訊

10. 另外同你講講業績，我覺得幾好，因為繼續之前見到嘅「業績唔得都升」嘅現象。講落有啲玄，我從來唔會跟momentum，覺得升得幾日就會繼續升。但你可以諗下，在好多平時你以為有用嘅「資訊」「分析」之中—往往最有用嘅，就係「價格」本身。

11. 用廣東話講，冇鬼唔死得人，應該大家領略到。例如你見2020年3月尾開始，個個網友仲話點好大鑊，經濟有排衰嘅時間，美股已經係咁升。明顯「市場」就係估經濟V型反彈—結果你見到邊個啱啦？同樣地，舊年第三四季（視乎你買乜），股價已經見頂，但表面似乎咩事都冇—然後之後你就見到通脹，衰退等等真係叫做「壞消息」

股市唔係鬥聲大，唔係鬥人多，唔係鬥把口。而係鬥兩樣嘢

12. 冇錯，往往價格出現在消息前。除咗係炒預期外，仲有一個哲學上嘅原因，大家睇我啲文（唔止金融文）會知：股市唔係一個辯論會，亦唔係鬥人多，而係鬥錢多，同埋鬥conviction．

13. 想像下一佪天平咁，好似有人睇淡有人睇好，但咩叫「睇淡」？你日日都可以話台灣打仗的，你每一日都可以話大陸爆煲，每一日都可以話外星人侵略地球。一萬個覺得爆煲嘅網友，但冇一個夠膽瞓身沽空—結果到頭嚟根本敵唔過一個夠膽而又有少少錢嘅人。一萬個口不對心，又冇錢，或者有錢唔敢買嘅人，作用等於零。股市唔係反映有幾多人啱，而係啱嘅人有幾大信心（同埋幾多子彈）。

Tesla 業績差，照升

14. 講遠咗，講返業績，萬眾期待嘅Tesla，業績係唔得嘅。但股價照升。

15. 你睇盈利就高過預期（但冇再創季度新高，之前連續四季歷史新高的。不過收入就低過預期。比較難睇嘅，係個profit margin，按年按季都跌，但公司明明已經加價。明顥係有啲成本壓力。

16. 呀順手留意埋，公司將75% Bitcoin變返晒現金，你可以慢慢諗下有乜啟示同教訓。你可以諗下嗰時佢不停吹捧，係真係相信，定係昆其他人入局然後高位散貨。你可以諗下，如果真係改變世界，做乜要沽咁大半？公司又唔見得好等錢使（賺緊錢的）

大師冇點你：早叫你買ASML：業績唔得，但5日升咗16%

17. 然後你睇另一隻，ASML，業績一樣係唔得。但股價照升。留意佢星期三晚美股開市前已出，在荷蘭同美國都連升兩日。

18. 收入就還好，高過市場預期，但個純利低過市場預期。最大問題當然係大幅調低咗全年嘅銷售預測，由20%下調到10%，都幾驚。雖然公司有講係因為啲收入要下年先入帳。

19. 股價近排相當強勢，5日升咗17%。

20. 正如之前寫過，叫你可以呢排留意台積電同ASML，股價就跌咗一大截，但公司嘅競爭力冇乜減過。之前嫌貴嘅，而家跌落嚟唔買，唔通等升晒先去買？

內銀風暴：花旗又話損失300億喎。幾日前話5000億。點解爭咁多？

21. 最後亦同大家更新下啲內銀嘅情況。結論都係同之前差不多：上市堆大銀行，唔會爆煲，甚至蝕錢都唔會，但有可能對盈利有啲影響，至於加派息應該唔使諗

22. 亦都真係畀你見到，同我預期係差不多的，冇點你。一早同你講，河南村鎮銀行呢啲小事一單，當然係賠咗啲細存戶先。之前賠左存款5萬以下嘅，而家到賠10萬以下嘅。好似派啤牌咁，亦即係抽iBond。「但照計唔會有好多輪」

23. 至於斷供風波嘅，就話咗你知會麻煩好多。都話咯，對銀行體系嚟講，銀行爭你錢大鑊，定你爭銀行錢大鑊？

24. 之前講5000億壞帳嘅花旗，而家估個影響係300億。咁300億就真係好濕碎（你以為好多錢？）。點解爭咁遠？好簡單，最初嗰個只係一個「最壞情況」（但幾時我都話呢個又係哲學問題：最壞情況當然係全人類死晒，或者原子彈炸咗中國之類）。

25. 仲有，而家似乎係會畀個緩衝期，即係類似今年唔使你還咁。咁變咗對內銀嘅影響，就唔係壞帳，而係減少咗利息收入，所以係300億，明冇？

26. 當然你可以話，只係將個問題推遲咗。亦有可能係。但，Buy time嘛。況且之前我亦有在明報提到，見到真係復工，但啲發展商本身就係冇錢先要停工，咁錢從來何？當然咪又係銀行借。咁即係，都係有機會變壞帳的。但，拖得就拖啦。

內銀骨牌效應：恒大啲供應商都話唔還錢！反了！

27. 咁但，就當然係一波未平一波又起啦。有啲人擔心嘅「骨牌效應」，亦真係發生咗。唔少比較客觀啲嘅分析都知，爛尾樓嗰堆壞帳，根本唔多。但至怕啲友有樣學嘢。喂，原來唔還錢銀行都得架喎！我又唔還

28. 之前分析過，你住緊層樓嘅，冇得唔還，除非你瞓街（咁在大陸你都可以選擇返農村嘅）。但嗰時都有提，如果係其他中小企呢？

29. 果然就真係發生咗，就係恒大啲供應商，話唔還錢畀銀行。咁都得？

30. 你諗下成件事係完全唔make sense的。業主斷供已經夠神化，我係銀行我借錢畀你之嘛，你層樓爛尾關我乜事？咁去到供應商，仲好笑，我借錢畀你間公司，你嘅來往對象有事，關我乜事？銀行借錢畀你，你拎去炒Bitcoin，然後輸咗錢，係咪唔使還畀銀行？

31. 咁但，係咁架啦，This is China．供應商似乎都係又迫攻府出手，希望恒大可以復工，咪有錢找數。

32. 咁但，唔好乜都以為理所當然。我就覺得，呢啲供應商令銀行「跪低」嘅可能唔大。業主唔同，一大班人，樓都爛咗尾，爛命一條。但你啲供應商，個個要做生意（雖然可能執咗笠），數目又冇業主咁多，銀行要告你清你盤，都易好多。

33. 咁，擔心嘅，咪唔好買港股咯。上半年港股一路都跑贏，呢排就開始跑輸的。但幾時都保持住個平衡，唔好自己以為自己有幾叻。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。