ivanliresearch

美股大升，多咗讀者想入市，反而我又同你講法心法嘢。揀股重唔重要？重要架！但點揀？Timing 重唔重要？當然重要！至於成日睇資訊睇評論呢，就係唔重要的。因為太多垃圾。NetFlix：「又走多」100萬客，定「只係」走100萬客？ (Patreon)

Published:

2022-07-20 07:22:59

Edited:

2022-07-20 11:18:24

Imported:

2022-09

Content

美股大升，多咗讀者想入市，反而我又同你講法心法嘢。

揀股重唔重要？重要架！但點揀？

Timing 重唔重要？當然重要！

至於成日睇資訊睇評論呢，就係唔重要的。因為太多垃圾。

NetFlix：「又走多」100萬客，定「只係」走100萬客？

其他業績：Johnson and Jonson，洛歇馬丁，高盛，美銀

美股大升，多咗讀者想入市，反而我又同你講法心法嘢

1. 美股大反彈，港股亦都唔錯。反而令我唔係好知寫乜好。不過係見到多咗讀者問我買乜好，而我唔係好肯定呢個係咪好事。我指嘅係，梗係你地個個投晒降冇心機買股票，先係最好嘅機會。

2. 但實際上好難判斷，讀者問亦唔代表佢會買，買又唔代表佢會講，買少少同大大手買又唔同。最好搵啲客觀啲嘅指標，亦係下一篇會講嘅嘢。

揀股重唔重要？重要架！但點揀？

3. 應該咁講：個重點唔係你買乜股票，而係你嘅心態。

4. 再詳細解，唔係話揀股唔重要，你可以話好重要，問題係太難太難。你事後睇嘅梗係易，你對住恒指又好標指又好，一般都係80/20，甚至更極端，幾個%嘅股票，貢獻咗成個股市嘅增長。以前寫過呢個現象，徐立言之前篇文都有提過—「追溯到1926年的數據，可以發現，股市中所有的財富創造都可以歸功於股市中前4％的贏家，而其餘 96％的股票則與一個月期國庫券（或現金）的回報相若」。

5. 咁你話，我買中嗰啲股票咪得咯！理論上係，但實際上太難，事後睇就易。況且，你亦未必敢買得多。仲有，即使好股票，都肯定需要時間。要坐穩都極之難。N咁多人十幾年前買過騰訊，N咁多人之前買過Tesla（包括我），但買中都好，往往都會中途落咗車。

6. 即係，就算你揀啱股，都要買得多，渣得長，仲要坐得穩。而呢幾樣嘢易過揀股本身

7. 所以退而求其次，你不如買多啲指數算—未必令你好快發達（但時間夠長，升10倍唔係發夢），但至少有令你滿意嘅回報。

Timing 重唔重要？當然重要！

8. 同樣嘅類比，可以用在「Timing」。Timing 重唔重要？睇你點睇。你可以話重要的，都唔好話Tesla Netflix呢啲咁極端嘅例子，低位買同高位買，天堂與地獄。我就當悶到死嘅恒指都好，一年高低波幅，平均都30%以上—亦即係話，你如果年年可以低位買高位沽嘅。你已經勁過畢菲特九條街

9. 但呢個「如果」當然係廢話，即係如果你知道六合彩開乜就好快發達，甚至你知道幾場波幾場馬乜結果，都應該好快發達。問題就係唔知嘛！

10. Timing當然好重要，但一樣難捉。所以也是退而求其次，不如唔好捉。因為你明明捉唔到但夾硬去捉，係衰過你唔捉的（相比之下，實情你亂買股票都好，只要啲公司正正常常，又渣得耐坐得穩嘅，隻隻都出事嘅機會唔太大）

至於成日睇資訊睇評論呢，就係唔重要的。因為太多垃圾

11. 仲有，自問冇時間，冇定力，又唔係特別叻嘅，你可以諗下減低接收資訊—特別係劣質嘅資訊。偏偏呢個時代，資訊多，垃圾更多。你唔去睇，佢地都會搵上門。除非你冇朋友，否則總有一大堆朋友每日send啲垃圾畀你，我都收好多。

12. 有個迷思係以為資訊越多越好，知得越快越好。絶對係錯嘅。如東你係insider（犯法的）當然最好，又或者你有預知能力就最好。但現實係，啲所謂資訊所謂新聞，去到你啲垃圾朋友再send畀你，仲有幾多價值？

13. 例如上星期寫嘅村鎮銀行存戶拎唔到存款，或者爛尾樓故事。到啲友個個都講，就已經沒戲唱。話咁快啲內銀行就反彈—但留意，唔係呢樣嘢對啲銀行冇影響。只係有嘅，都反晒咗大半。

14. 呢個圖應該貼過唔止一次，我係相當鍾意。冇錯係歷史，你鍾意話聽日太陽會西邊升起嘅都得，冇得拗。但至少在歷史上，你諗下，你日日睇股票，你見到你個倉輸錢嘅機會，都唔細，都差不多有一半。但你睇得越少，就反而見到升嘅機會更大。自然心情就好啲，亦都少啲做錯決定。

NetFlix：「又走多」100萬客，定「只係」走100萬客？

15. 好啦，唔講心法，講返啲實在嘢，美股業績，先講NetFlix。7舊水跌到2舊水，一年間嘅事，絶對輸死人。我都有買，就唔係7舊水買，但都輸一半。而呢間唔係啲發夢細股，係大企業。唔係得個講字嘅初創，2億畀錢嘅用戶，有巨額嘅收入，甚至係賺錢嘅。但都咁瀨嘢，

16. 值得你反思下教訓—不過真係唔同人都會得到唔同教訓，你可以得到好多「結論」，甚至係互相矛盾嘅結論：例如有人可以因為咁話股票好大風險，搵笨。但一樣有人可以話股票可以令你發達。

17. 教訓固然係Timing，但都再講一次，Timing重要，但真係難捉。最惡搞就真係，你發現真係「覺得」最唔應該買時，就最應該買。你「覺得」最應該買時，就最唔應該買。真的，早年公司幾乎破產，不停燒錢，大家覺得不能持續（但一路唔加息都幫到佢），結果嗰時就升到你唔信，因為公司冇死到。但到咩疫情後上咗好多客，魷魚遊戲大收上晒頭條（其實唔關事），公司名成利就打埋入奧斯卡拎獎，就見晒頂。問題係，事後解都仲易，你身處嗰個時空，好難咁去諗嘢。

18. 所以我理解嘅教訓：真係唔好買太多個股。拎嚟過下癮學下嘢試下眼光感受下市場就可以，但唔好成副身家買晒落去。