ivanliresearch

港紙又7.85了。上次7.85期間，恒指升咗2300點．3400億銀行體系結餘走咗1400億，你樓下間銀行爆煲未？6月30日時1個月拆息0.9厘。估下而家幾多？點解？通脹應該真係見項！核心非核心都係．通脹預期真係跌咗，救你點睇．仲加1厘息？唔加了．預告定：識炒，梗係炒減息．美股下半年開局幾好。而標指又再走出「熊市」．業績：大摩，細摩，花旗，富國，BlackRock，United Health (Patreon)

Published:

2022-07-17 23:28:24

Edited:

2022-07-18 00:31:43

Imported:

2022-09

Content

港紙又7.85了。上次7.85期間，恒指升咗2300點．

3400億銀行體系結餘走咗1400億，你樓下間銀行爆煲未？

6月30日時1個月拆息0.9厘。估下而家幾多？點解？

通脹應該真係見項！核心非核心都係．

通脹預期真係跌咗，救你點睇．

仲加1厘息？唔加了．

預告定：識炒，梗係炒減息．

美股下半年開局幾好。而標指又再走出「熊市」．

業績：大摩，細摩，花旗，富國，BlackRock，United Health

1. 結果寫港股都內銀都整咗一篇，再寫埋呢篇美股，明益你。照計就星期二晚先再有文。

港紙又7.85了。上次7.85期間，恒指升咗2300點

2. 但都仲要講多句港股先，港紙不經不覺又7.85，見到金管局又要入市。我就不再重覆了。當然你發現，呢排港股係5連跌嘅。

3. 明報個圖幾好，雖然未計最新嗰三次（呢度有晒紀錄）。

3400億銀行體系結餘走咗1400億，你樓下間銀行爆煲未？

4. 想你留意嘅，兩樣嘢。首先，又係睇圖，最新嘅銀行體系結餘，會跌到2000億樓下。由高位3400億，冇咗1400億。但你見有冇咩不穩？冇噃。亦係我一早預測到嘅嘢，你都好易預測到，好可能仲有得跌，跌到1000億樓下都唔奇

5. 但同樣地，如果你話上星期港股5連跌嘅。咁又真係計下數了。你睇圖睇表睇到，上一輪第一次話「走資」，金管局第一次入市，係5月12日。金管局一路入市，直到6月23日（然後冇再7.85，直到7月14）。你可以睇下，5月12日至6月23日呢段時間，反而港股係好強嘅，升咗2300點。反而就係冇再7.85後，就開始跌了。

6月30日時1個月拆息0.9厘。估下而家幾多？點解？

6. 更好玩嘅係，可以留意下1個月拆息，6月30日時曾經見過0.9厘。你估下而家幾多？而家反而係0.76厘。夠晒奇怪，又話加息預期高？

7. 點解會咁？都真係有啲難答。勉強搵答案，大約可以話畀你知，半年結嗰時，因為種種原因，可能啲友想半年結有舊錢在Balance Sheet上面，啲拆息往往會扯高。但，中長期睇，一個月港紙拆息0.76厘，當然係偏低，有排升。一個月嘅美金拆息，已經去到2.1厘。所以你咪會見到港紙一路弱，銀行體系結餘一路跌，但呢啲東西同股市應該冇乜關係。

通脹應該真係見項！核心非核心都係

8. 再講美股之前，一定要講多次早兩日講過嘅一樣嘢：通脹，點都應該見頂了。回落得有幾快唔敢答你，你到時亦可以話5%仲係好高，但幾明顯下半年會回落。你亦可以準備定聽到拜登下半年會講控制通脹成功（剛剛先飛咗去沙地阿拉伯，見大魔頭，當然係為咗傾石油增產。）

9. 原因十分簡單。油價高位回落咗兩三成起碼，返返去俄羅斯打仗之前。各類糧價亦都一路跌，高位跌三四成。咁你啲食物同能源通脹，照計好快返落去。

10. 至於唔計能源食品嘅核心通脹？實情之前已經回落緊。有數你睇，3月6.5%，4月6.2%，5月6.0%，6月5.9%。唔怪得拜登咁有信心話剛剛出嗰次嘅通脹數字過時。

11. 所以？亦真係唔係認叻，你見到即使上星期三出咗個好驚嚇嘅通脹數據（呢度有講），大市反應都唔算太大。星期四到堆銀行業績走樣，先跌得多啲，但亦都低位收復唔少失地。去到星期五直頭大升。

通脹預期真係跌咗，救你點睇

12. 點解會咁？因為，通脹預期係真係降溫。咁都得？係喎，但唔係任我講，都要有啲證據。平時我好少貼，但近期興講通脹，你可以睇埋密歇根大學嘅呢個東西，每個月出，有統計啲友嘅通脹預期。一年嘅預期，由5.3%跌到5.2%，2月以嚟最低。五年嘅預期，由3.1%跌到2.8%，一年以嚟最低。固然，其實我好懷疑答嗰啲人都係好隨口，但通脹又往往係預言自我實現的。

13. 實情，之前有啲其他調查都見到。

14. 又或者，唔信啲人聽電話填問卷，信市場嘅，亦都有其他嘢量度。呢個叫做5年通脹break even rate．乜東東？因為美國有TIPS，類似iBond嘅東西，跟CPI派息。咁你由呢啲東西嘅市場價，咪推得返市場上預個通脹幾多。

15. 呢啲東西以前都冇乜講，幾時都大把嘢學。難在係你點樣在海量嘅資訊之中整理到個大圖畫，同埋點樣避開啲唔關事嘅嘢。呢個亦係我幫你做嘅嘢。

仲加1厘息？唔加了

16. 既然通脹預期回落，咁你見到乜？勁咯，個加1厘嘅預期，即時縮晒。記得上星期出完個CPI，一度講到8成會加1厘。而家？又變咗係加0.75厘變主流，七成機會，相信到月底都會係咁。唔多唔少亦因為聯儲局嘅官員有出下口術。

17. 於是乎同時間你亦都見到，10年嘅債息，一路都係唔係好再上。呢三個月好似都係咁上下位。順帶提你，聯儲局第一次加息，係3月17日，第二次係5月5。見到真係炒預期，都未加到第二次，10年債息已經冇乜反應。仲有，10年嘅債息，就真係唔應該咁受聯儲局啲決定影響嘅（當然由1厘樓下升上嚟嗰下就係加息預期），畢竟係睇10年嘅嘢。你睇2年債息，走勢就好唔同的。

預告定：識炒，梗係炒減息

18. 係喎，真係仲未得閒寫，但預早話埋你知。下一步係點？炒減息！已經唔止一間行講。（呢度，呢度，呢度），之後再詳細講。當然減息係下年嘅時，但，炒得嚟差不多。

19. 於是乎，通脹預期又開始跌，又唔再驚加1厘息，然後仲要話個零售銷售幾好。美股星期五咪勁升。但講到尾，都係同預期以及估值有關。

美股下半年開局幾好。而標指又再走出「熊市」

20. 順帶一提，七月去到一半，好似幾難捉，之前就5連升，之後又5連跌。但，亦留意係升嘅幅度大過跌，下半年（即係呢兩個星期），暫時道指標指都升2%，納指直頭升4%。都係老教訓，stay invested，唔好畀人震走。

21. 而不經不覺，標普指數又再「走出」熊市—標指高位係4819點，而家係3863點，跌19.8%—又再一次由熊市彈返上嚟，記憶中今年都兩三次。所以啲咩熊市唔熊市，無聊之極。

業績：大摩，細摩，花旗，富國，BlackRock，United Health

22. 好啦，仲有另一重點，業績。瞻前顧後，首先同你講咗嚟緊嘅。星期一再有銀行，美銀高盛。星期二Johnson and Johnson，Netflix，軍工股洛歇馬丁。星期三有Tesla，ASML同聯合航空，星期四Travelers同Snap，星期五American Express同Twitter。然後再下個星期就重頭戲，大科企

23. 提定你，之前台積電業績相當好，ASML照計都唔會點差。兩間都高位回落唔少，之前又唔敢買嘅，而家係機會。

24. 但上星期呢？都出咗一堆。先係回帶講，星期四出嘅大摩，細摩，兩間都唔得。銀行股其實普遍都唔得，星期五出嘅Wells Fargo亦唔得，唯獨係花旗一間得。但你咪理，花旗固然勁升，但Wells Fargo都大升，就連星期四大跌嘅大細摩都反彈返，兩間都高過出業績前