內銀危機下集　—　樓盤爛尾，業主遷怒銀行，齊齊斷供迫銀行幫手。點收科？ (Patreon)

N咁多年冇見過有solvent嘅銀行擠提爆煲，點解？

冇鬼唔死得人，你見東亞中銀一樣人人排隊攞錢，點解冇事？

河南係銀行爭存戶錢唔還，斷供黨係佢地唔還錢畀銀行，你話邊樣大鑊啲？

你層樓爛尾，關銀行乜事？係唔關事架，但搞大件事，齊心就有人介入

好啦，其實唔供樓會有乜後果？你話呢？「但人地層樓爛咗尾，怕乜」

個個唔供樓，中小企都唔還錢，就梗係大鑊

但八九成供樓嘅人，住緊在間屋，斷供之後瞓街？

「飛機高鐵都冇得你坐喎」「工都冇得返」

八大行一齊出「風險可控」固然廢話，但你見到係高度重視嘅。

存戶維穩要靜坐要畀人打，但斷供嘅，我乜都唔使做，在屋企涼冷氣

點收科？都不外乎兩個方法。一係復工，一係硬食。

會唔會發酵開去？唔爛尾樓嘅，住緊間屋，點斷供？瞓街咩。

而其實，一路叫你唔好買咁多中資股

1. 好啦，結果上篇一寫，就已經超晒字數。寫埋下半篇畀你。

2. 上篇講過，河南村鎮銀行堆東西，實情係唔會點成為金融危機，係一個社會兼政治嘅問題。問題係你點搞掂班存戶。

N咁多年冇見過有solvent嘅銀行擠提爆煲，點解？

3. 之但係有人問，唔係喎，信心危機。你蔓延開去，大家都唔信銀行，個個去銀行拎錢，都會係一個問題。

4. 於是，又返返去liquidity vs solvency嘅問題。

5. 簡單答你，只要你間銀行係solvent嘅，現代嚟講，好少會真係因為擠提出問題。至於河南村鎮銀行之類，好可能能insolvent，資不抵債的。

冇鬼唔死得人，你見東亞中銀一樣人人排隊攞錢，點解冇事？

6. 冇錯，我提過，世界上差不多所有銀行，都唔會有錢畀所有存戶一齊去提錢的。但掉返轉頭，有冇諗過，根本好難「所有存戶一齊去提錢」？

7. 十幾年前，東亞都試過擠提，但你見都冇事。正如早幾年，都真係唔少人排隊去中銀拎錢，但亦咩事都冇。點解？

8. 原因有幾個。首先，「因為貧富不均」，你N咁多個小存戶，一齊提錢，力度都唔及李嘉誠（之類）一條友，所以銀行只要搞掂佢就得。第二，亦因為有中央銀行之類嘅東西。銀行即使短期流動資金有問題，大可以借短錢，頂多貴啲。

9. 至於在大陸，就更加多不同方法去應付擠提。

10. 講遠咗，上半集講過，河南村鎮銀行嘅問題，實情對金融系統係小事一單，不過政治上惡搞啲。

11. 更加麻煩嘅，係另一單，爛尾樓問題。呢單影響就大好多

12. 存戶拎唔到存款，就係社會問題，對金融系統影響近乎冇，反正啲錢己經消失咗。擠提云云，上面講咗。但爛尾樓斷供呢單，就直接影響銀行。

河南係銀行爭存戶錢唔還，斷供黨係佢地唔還錢畀銀行，你話邊樣大鑊啲？

13. 仲唔明嘅？換個角度講，河南村鎮銀行，就銀行爭你錢唔還。供斷潮，就你爭銀行錢唔還。「咁對銀行嚟講，邊樣大鑊啲？」—明啦？

14. 呢單嘢呢，個導火線就係啲大陸發展商冇錢，冇錢就停工（邊個同你開工？）。

你層樓爛尾，關銀行乜事？係唔關事架，但搞大件事，齊心就有人介入

15. 咁關銀行乜事？原本係唔關事的，但唔知點解，啲友就將啲「憤怒」宣泄在銀行身上，亦都可能係聰明一著，將呢個變成社會問題。咁你知大陸啦，要維穩嘛，「變成社會問題就好辦」。

16. 銀行呢，就夠晒無辜。啲業主嘈話「個盤都未起好銀行就放按揭」—喂，樓花係咁架啦，又真係冇人迫你買下話。你講法律的話，銀行借錢畀你之嘛，你同銀行嘅契約，層樓只係抵押品。你層樓收唔收到，同銀行當然無關，你要嘈去嘈發展商。但當然，而家啲友就講惡啦，人多嘛。

17. 點樣宣泄在銀行度？好簡單，唔！供！樓！

好啦，其實唔供樓會有乜後果？你話呢？「但人地層樓爛咗尾，怕乜」

18. 好啦，畀你諗下先。如果你在香港或外國，你想搞冧銀行，決定唔供斷令銀行壞帳升。先唔好講銀行會唔會真係爆煲（你想啫，我夠想娶李佳芯），請問，你咁做之後，正路會發生乜事呢？

19. 正路就係銀行催你還錢，再唔還佢就會收咗你層樓，趕你出街，變咗銀主盤，然後拍賣，收返啲錢，對不？

20. 但一個問題係，今次嗰啲樓根本就爛咗尾，「我都唔係住緊，你咪收」。而你亦大約諗到，銀行收咗啲未起好嘅嘢，可以點做？賣唔到出去架喎。同收咗你間太古城三房就真係兩回事啦。

21. 呢個實在係個「爦炒」嘅……好方法。就真係維權，令啲銀行驚。然後希望銀行迫啲發展商復工，或者政府介入。

個個唔供樓，中小企都唔還錢，就梗係大鑊

22. 雖然，你睇數字，照計就真係唔怕嘅。但呢度就同上面講嘅「蔓延」有啲似。而家規模細，但之後個個都唔供樓，就唔係咁簡單啦。再搞落去，啲中小企都唔還錢畀銀行，就真係可大可小。

但八九成供樓嘅人，住緊在間屋，斷供之後瞓街？「飛機高鐵都冇得你坐喎」「工都冇得返」

23. 理論上，其實就撼動唔到銀行嘅。你個人嘅信貸紀錄，必然花晒，仲要係大陸咁監控嘅社會，分分鐘第時坐飛機買高鐵飛都買唔到，分分鐘搵工都冇人請。然後我見，仲話會畀人告上法庭，雖然我係唔多明嘅。香港唔供樓最多畀人趕出街，照計唔會坐監。大陸呢？唔知喎，可能咁樣當你欺詐，或者萬能key嘅尋釁滋事

八大行一齊出「風險可控」固然廢話，但你見到係高度重視嘅。

24. 於是你見到，大陸政府係相當緊張嘅，即時開緊急會。銀行亦都出晒公告，固然話你知「風險可控」冇乜意思，Facebook page都有講，但至少你見到真係「高度重視」。

25. 政府嘅想法，當然係唔想事件再發大。問題係，呢個比起處理「河南村填銀行」，就難好多。

存戶維穩要靜坐要畀人打，但斷供嘅，我乜都唔使做，在屋企涼冷氣

26. 存戶維權，你見要靜坐，仲要畀人打。「斷供」嗰班主角，唔使出嚟集會架喎，我唔使瞓街，我咩都唔使做，就係唔還錢。

27. 你銀行當然可以收我樓，但都話爛咗尾，我又唔係住緊，你咪收，原本都預total loss。你銀行話要拉要鎖，要搞幾耐？N咁多人。

點收科？都不外乎兩個方法。一係復工，一係硬食。

28. 點收科？我都唔知。但個癥結係乜？係爛尾樓，銀行無能為力架喎，就真係畀人綁架咗。你要班友順返條氣？就只能復工。

29. 事實你見到，內地已經放鬆啲房地產嘅政策。

30. 冇錯，長期讀者一定知，一貫中國嘅定律，真係四十年冇變過：一死就放，一放就亂，一亂就收，一收就死。係咁架啦。

31. 問題係，有啲發展商已經水深火熱，而家先救都可能冇乜用。

32. 比較似樣嘅解決方法？好簡單，由大國企接手食咗呢啲盤。所以真係可能你見啲內房股有一陣大調整了，即使係龍頭嘅中海外688或者華潤置地1109—或者應該話，「特別」係呢兩間。

會唔會發酵開去？唔爛尾樓嘅，住緊間屋，點斷供？瞓街咩。

33. 至於股市方面？我覺得，十分簡單，金融股會有啲壓力，但唔會係暴瀉。其實你睇呢兩日嘅股價都睇到。

34. 即使係再蔓延開去，似乎對銀行嘅影響，都唔係太大。同大家想像唔同，按揭貸款，並唔係佔大陸銀行貨款相當大嘅部份。況且，仲有一大堆係住緊間屋嘅人，呢啲友斷供就瞓街，唔會同你一齊癲。所以只係會有好小部份嘅按揭會斷供。

35. 所以，會唔會影響不良貸款？照計只係影響些少。不過唔好忘記，爆近期兩單嘢前，大陸銀行一路跑贏大市，恒指低位又升咗成4000點，有啲回落就正常

36. 所以諗真啲，都未必真係一個「社會問題」。正如我講，啲唔供樓嘅友，係唔使上街的，你亦拉唔到咁多個（齊心就事成！）。況且唔好忘記，買得樓嘅人，點都唔係最窮最惡嗰班，冇河南啲存款咁難搞。

而其實，一路叫你唔好買咁多中資股

37. 所以問題個關鍵就係，點令到啲樓唔爛尾。當然銀行亦可以選擇硬食呢啲不良貸款，照計唔會搞到有乜系統性風險。諗落，好似係銀行硬食，易過叫啲其他發展商接手？

38. 順帶最後一講，呢個係我一路都少買中資股嘅原因。唔係唔買，但只會買些少，而你見我買啲公司都相對地仲比較正常。大多呢啲麻煩嘢。所以一路都話長線係美股跑贏。但你買咗未？

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。