「加息0.75厘嘅機會降溫」—因為，而家估加1厘！相信呢個亦係港股美股弱嘅原因。而唔係澳門　內房　或科企監管。但做乜個加息預期升得咁快？都話唔使「驚衰退」，好可能已經衰咗啦。萬眾期待星期三嘅美國通脹數據。有人叫講下香港嘅通脹。「仲使講？」美股業績期，睇乜？ (Patreon)

「加息0.75厘嘅機會降溫」—因為，而家估加1厘！

相信呢個亦係港股美股弱嘅原因。而唔係澳門　內房　或科企監管。

但做乜個加息預期升得咁快？

都話唔使「驚衰退」，好可能已經衰咗啦。

萬眾期待星期三嘅美國通脹數據。

有人叫講下香港嘅通脹。「仲使講？」

美股業績期，睇乜？

1. 因為有啲突發事，昨日冇出文，之後補返個小專題。但照舊，呢幾日嘅文繼續都係相當關鍵。

2. 另外，你見呢排開始我啲link會有啲信報嘅文（唔止係即時新聞），但非訂戶係睇唔到嘅。問題不大，你睇標題得了，我會講內容你知，但話定你知費事你投訴。

「加息0.75厘嘅機會降溫」—因為，而家估加1厘！

3. 首先講講，月尾聯儲局議息（26至27號），當然唔使咁早講定。但可以留意下暫時嘅「市場預期」。你見媒體講，加息1厘嘅機會去到4.6%。但當然一路會變。

4. 最新嘅你可以自己日日上CME睇。而家講緊91%加0.75，9%加1厘。

5. 順手提你，有時你睇標題就會誤會，以為「市場預加0.75嘅機會下降」—原則上冇錯，但實情係由原本肯定加0.75，變成「肯定0.75而仲有機會加1厘」。

相信呢個亦係港股美股弱嘅原因。而唔係澳門　內房　或科企監管

但做乜個加息預期升得咁快？

6. 呢個我相信亦係近期港股美股都回返啲嘅原因。港股方面，我不太詳細講，但你見有講話澳門封城，當然有影響，但照計只係影響澳門股。內房啲債務問題亦有啲影響。但你見拖低大市主要係啲科企，而個講法話監管又殺到。但我認為唔係嗰回事，你見啲咩罰錢係好小事嘅嘢，同以前嗰啲打壓不能相比。我依然相信個大方向都係監管已經放鬆。大家亦要留意有時唔好畀啲小噪音混淆咗大旋律。

7. 咁跌乜？其實亦都係同美股有關，就係加息嘅壓力。不過最新見到美債債息回返啲，會係好事。

8. 然後話說回頭，點解個加息預期升溫？就因為上星期美國出嘅非農就業數據，相當強勁，遠勝預期。死未。但當然長期讀者應該習慣，有時就真係「經濟好消息係股市壞消息」。

9. 但係你都會問，咁即係點？經濟好定壞？早排唔係話會衰退？

都話唔使「驚衰退」，好可能已經衰咗啦

10. 答案嘛，當然都係唔肯定。但我傾向都覺得經濟係差，點都係放慢，至於衰唔退衰亦唔使不停拗，總之肯定會放慢。亦有評論有解個「強勁」非農只係假象。呢啲固然信不信由你，但我對於「經濟放慢甚至衰退」呢個估計，就相當有信心。

11. 之前嘅文都寫過，都未必要驚衰退，甚至根本已經係衰退咗。Wells Fargo嘅最新講法都係咁。「不需要再猜測美國經濟衰退的時間了，因為美國已經陷入了衰退。」—「完全好似我寫咁」

萬眾期待星期三嘅美國通脹數據

12. 不過你可以留意返，7月尾先議息，而仲有一個十分關鍵嘅時刻，就係今個星期三，萬眾期待嘅CPI數字。不過講落去之前，話定你知，無論個數字係點，我都相信個通脹壓力會慢慢消去。到時你再拗話「5%都仲係好高」，隨你。但數字上，照計好快見頂。原因？太長，應該聽日先解。呢度講埋星期三嘅數字先

13. 星期三嘅CPI，上次係8.6%，今次街估係8.8%，即係仲會再升。但如果計核心CPI（撇除能源同食品），上次係6.0%，街估係5.8%，低過上次。

14. 即係話，如果一切符合預期，你會見到個故事係「通脹破頂但核心通脹回落」。但正如之前所講，到時股市乜反應，係唔知嘅。隨住升定跌，評論又會作唔同嘅故事。所以要睇長遠啲。

15. 更加有意義嘅，應該係下出完數字，睇埋個加息預期點變。正路地如果啲數字高過預期，個加息預期會更加傾向1厘。相反亦係。

16. 但，無論聽晚嘅數字點都好，我都係睇個通脹會回落嘅。篇幅關係，聽日先再講點解。但其實好簡單，你睇啲咩油價小麥價，全部高位都跌咗一大截的。並唔係你想像中嘅咩「俄烏開戰油價勁升　全球糧價勁升」。

有人叫講下香港嘅通脹。「仲使講？」

17. 好啦，然後之前有人問我，講下香港嘅通脹。首先，好煩都強調多次，「CPI就唔係即係通脹」，樓價升咗幾多，或者股票升幾多，甚至你讀國際學校貴咗幾多，就唔會點反映嘅。但冇問題，就講CPI，反正雖然唔反映樓偠，但反映租金。另外，亦有人話香港有「地產稅」，租貴所以啲嘢都貴，我不完全同意，實情係互為因果，租貴亦因為有人交得起，有人交得起亦因為有咁嘅人流有咁嘅消費力。

18. 但無論如何，「其實我都唔知有乜好討論」，通脹就梗係會升啦，全球現象，香港仲要差不多乜都入口，點會唔跟外圍？

19. 不過你見到，最新嘅官方通脹數字1.2%，都係相當低嘅。就唔好陰謀論話造假（實情都唔易）。原因有兩個，或者三個。第一，應該之後會升。第二，因為港紙強勢（所以之前話咩港紙貶值嗰啲真係腦殘的），跟足美金咁滯，咁你諗下其他貨幣跌咗幾多？至少你買外國嘢冇貨幣壓力。第三，亦係明報呢個報導嘅重點：租金跌咗，而部份因為樓價跌，部份因為有人移民，又部份因為啲大陸人嚟唔到香港（包埋啲學生），仲有亦部份因為酒店冇人住—於是你發現有啲月租酒店，仲平過你租屋。而租金，都佔CPI好重嘅。

20. 之後？當然會有啲壓力。留意埋大陸嘅CPI都上緊，2年新高，超過預期。咁大家都知香港好多嘢食係大陸入口。啲嘢食就貴咗好多嘅，去超市買嘢嘅就一定知。例如埃汾太。

21. 但當然，「其實我唔係好明問嚟做乜」，你話對股市嘅影響，係零。美國通脹就會影響港股，大陸通脹都仲可能會。香港嘅通脹，就冇影響嘅。至於有乜受惠股嘛？似乎都係領展823，一路都係「最低工資受惠股」，公司自己講的

美股業績期，睇乜？

22. 最後，留意美股亦開始業績期，重頭戲幾時都係月尾啲科企。但開首嘅有百事（今晚），仲有幾間大銀行今個星期都會出。照舊，如果啲業績唔得，就有機會下調預測乜乜乜。但唔好以為咁就一定跌。

23. 我反而想你留意，睇下會唔會業績好照插，或者業績差但唔插甚至升。呢啲先係有趣嘅訊號，如果業績好照插嘅，好可能反映仲係貴，之前兩季都有呢啲情況。相反，如果業績差都唔大插嘅，可能代表夠殘。

24. 詳細嘅時間表，睇呢度。今晚百事，星期三Delta Airline，星期四就「大摩」「細摩」一齊。星期五就勁，除咗有Wells Fargo同花旗，仲有Black Rock，同埋一路講但一路冇買又一路強勢嘅United Health UNH。

25. 正路地，啲銀行業績應該唔錯嘅，因為息差會升，而照計啲撥備呀壞帳呀未到。但首先啲友會留意下人工嘅壓力，仲有當然係之後嘅展望。幾時都係睇預期。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。