聯儲局話今個月加息0.5厘或0.75厘，即係冇講過．但美債債息又反彈了，議息紀錄話第二季經濟會增長喎，但GDP Now又話衰退，點解？經濟師齊齊錯，定GDP Now 錯？你話呢？盧志威：衰退臨門 市況掉轉炒．「技術性」衰退，即係乜？—高盛又講，耶倫又講，費城聯儲又講．大師冇點你：國泰，九倉，太古地產，友邦。全部跑贏大市．理文化工746仲有得升．「唔係呀公司個個月燒緊錢呀」「航班有排都未返到以前嘅水平呀」 (Patreon)

聯儲局話今個月加息0.5厘或0.75厘，即係冇講過．

但美債債息又反彈了，

議息紀錄話第二季經濟會增長喎，但GDP Now又話衰退，點解？

經濟師齊齊錯，定GDP Now 錯？你話呢？

盧志威：衰退臨門 市況掉轉炒．

「技術性」衰退，即係乜？—高盛又講，耶倫又講，費城聯儲又講．

大師冇點你：國泰，九倉，太古地產，友邦。全部跑贏大市．

理文化工746仲有得升．

「唔係呀公司個個月燒緊錢呀」「航班有排都未返到以前嘅水平呀」

1. 市況靜啲，而且出去覆診，所以晏咗出文。記住，呢排嘅幾篇文，十分重要。包括昨日，前日，今日，同嚟緊幾篇。唔呃你。因為近排真係覺得市況進入個幾關鍵嘅位，仲有，可能係近來我忽然好似「叮」一聲咁，知道點將啲嘢串起嚟解你知，

聯儲局話今個月加息0.5厘或0.75厘，即係冇講過

2. 見到星期三晚美股低位回升，星期四晚暫時都唔錯。焦點就係講返聯儲局嘅議息會議紀錄（6月嗰次，留意議息決定同埋聲明就即出，但會議紀錄會過一排）。

3. 你見媒體嘅焦點，兩樣嘢。首先係嚟緊7月（月尾，26同27號）嘅加息幅度，第二係聯儲局對第二季（留意，已過去）經濟嘅睇法。第一樣易解啲，講咗先。第二樣之後解。

4. 7月嘅加息幅度，十分簡單。局方話今個月會加0.5或者0.75厘—扯，即係冇講過，鬼唔知咩。冇人覺得會加0.25。但放心，其實市場一早有共識。你可以睇CME Fed Watch，星期三晚已經預九成加0.75，星期四晚係九成半！

5. 以前講過，聯儲局好少做啲市場未有晒預期嘅嘢，上次都冇，今次更唔會。唯一留意係，月尾先議息，而月中（7月13）會出埋個CPI通脹數字，萬眾期待。如果回落嘅，分分鐘又變返估0.5（唔會估0.25咁詼諧掛），如果高過預期？會唔會有人估1厘？買定花生，下星期再講。

但美債債息又反彈了

議息紀錄話第二季經濟會增長喎，但GDP Now又話衰退，點解？

6. 好啦，第二部份，就比較神奇。希望我冇睇錯，但，聯儲局話第二季經濟會反彈。呢個亦係美債債息反彈嘅原因，星期三上返2.92厘，星期四好似見3厘（但留意股市仲企得住）

7. 咪住先，前日篇文先話極大機會衰退。仲要係阿特蘭聯儲嘅GDP Now．咁即係點？

8. 本來，唔同人有唔同預期，唔出奇。對價格（即係，股票升定跌）更加大分歧，而經濟數字應該唔會咁大，但有人認為衰退有人認為唔衰退，都唔係太奇。但聯儲局同GDP Now嘅睇法爭咁遠，都有少少奇。

經濟師齊齊錯，定GDP Now 錯？你話呢？

9. 我個人比較膽嘅演繹：留意下日期。聯儲局議息，係6月14-15號喎！扯，當其時GDP Now都未預衰退的！係最近先下調之嘛。

10. 結論亦即係，我係信GDP Now，似乎真係衰退，又睇下準唔準。

11. 仲有留意多嘢，似乎GDP Now嘅數字，係明顯低過啲經濟師預期嘅。到時又睇下係經濟師齊齊圍爐左抄右抄，定係經濟師啱。我估好大機會係經濟師後知後覺—因為我都做過類似嘅位。

盧志威：衰退臨門 市況掉轉炒

12. 好啦，大家應該feel到我係一個極樂觀嘅人，呢個Patreon差不多兩年（噢耶！），我冇一刻覺得咩「股票玩完」「有排衰」。咁但，我都覺得大多數發達國家嘅經濟，應該好大機會衰退（香港？唔知，但講真更加不重要。港股都唔係香港公司，香港樓亦畀你見到唔係跟經濟周期，唔好想當然）

13. 但，衰退還衰退，買股還買股。我呢個睇法有好多人挑戰，但我一路堅持係有道理嘅。例如吾友盧志威，最新篇文都有寫—呢位仁兄相當叻，極少數我覺得佢叻過我嘅人（你有幾可見到我在呢度讚香港寫嘢嘅人？），仲要後生我好多，我認識佢時佢初入行，我已經覺得必成大器（順手曲線讚自己睇人準）。不過留意：勁人未必得閒寫文教化世人，佢又唔似我咁靠寫文搵食。而且，佢啲嘢寫得短，初哥真係未必明，所以最好我睇完消化畀你

14. 佢篇嘢，呢度。信報嘅文，要訂戶先睇到，我就唔方便成篇貼上嚟。但你睇個題已經夠：衰退臨門 市況掉轉炒。

15. 我貼一段最重要嘅上嚟。見到啦？經濟好反而股市跌，經濟衰反而股市升—關鍵係股市郁得好快，你係「驚衰退」「衰緊退」同「衰到最衰」，呢度可以維持好耐，少則幾個月，多則一兩年—但股市，一個月可以升跌三四成。

16. 所以雖然講過多次，但再講一次：股市係一回事，經濟係另一回事。唔好咁低層次

17. 亦都記住：冇人話經濟衰退唔應該買股票。係好多人想當然。而大家應該同意：投資上，就真係群眾多數係錯的。

技術性衰退，即係乜？—高盛又講，耶倫又講，費城聯儲又講

18. 仲要同你補充一樣嘢：之前篇文，同你講開技術性衰退—其實諗真啲人都癲的。大家睇媒體報導，有時都完全唔明。「熊市」同「技術性熊市」有乜分別？「衰退」同「技術性衰退」有乜分別？「擊倒」同「技術性擊倒」有乜分別？

19. 呢度就可以玩語意分析：你可以理解做，技術性XX—即係，都真係XX，但又唔係十分之XX—即係點？即係，都係XX，但唔係好嚴重嘅XX

20. 「技術性」熊市嘅，即係例如掂一掂，升足幾倍，然後回一回20.01%，然後又再升幾倍。

21. 所以，其實都有得解你知，「技術性衰退」，即係，都真係連續兩季GDP收縮—但唔係話咩去到2008金融海嘯呀，或者2020疫情爆發嗰種股票大瀉金融體系不穩大批人失業嘅情況。

22. 之前篇文，講過話「之前聯儲局已經有暗示過嚟緊可能兩季GDP收縮，「但唔一定代表衰退」之類」，當時我搵唔返紀錄，而家搵到。

23. 就係之前財長耶倫嘅講話（咁佢做過聯儲局嘛，我咪記錯咗），你見佢嘅講話，都係大約意思係：「一般人都當連續兩季GDP收縮係衰退，咁但又唔係次次都一樣嘅」—即係，同我講嘅嘢差不多，你會見到「衰退」。但相當輕微。

24. 而再早之前，費城聯儲嘅哈克（今次係儲聯局啦！）都講到明，話會幾季GDP負增長不出奇—但呢個唔代表係衰退—又冇錯喎。Day one 我已經話你知，呢個「連續兩季收縮」，只係一個方便嘅量度

25. 從而又帶到去一個心法同哲學嘅課題：所以，你見啲人不停拗「係咪衰退」，「係咪熊市」，甚至「香港係咪玩完」，真係浪費時間的。你個熊市係19%定90%圥分別大嘛！而最後我當「真係熊市」，但跌20.1%後反彈幾倍，咁你拗贏係熊市又點？分分鐘你因為咁早早沽晒啲股票。同樣地，經濟衰退又點？2009夠衰退啦，2020夠衰退啦！我當我「估錯」，太樂觀，但又有何問題—只要我有買票。相反，你買大陸股嘅，近N年都原地踏步—係冇衰退呀，但又點？

26. 我係個好務實嘅人，唔鍾意做呢啲無聊嘢。

大師冇點你：國泰293，九倉1997，太古地產1972，友邦1229。全部跑贏大市

理文化工746仲有得升

最後快手講一講港股，升又升唔多跌又跌唔多咁，實情呢啲市況圥好。理文化工746仲有得升，超出晒我嘅預期。你買咗嘅，都係嗰句，可以沽一半。照計好大機會你係賺咗一個開。

27. 但焦點其實係國泰293，差不多升到52星期新高。因乜？當然係因為暫緩熔斷機制。不過今次好似保密得幾好，冇再見星島香港01 或經濟日報早早爆定。

28. 國泰今年升咗34%—我敢講，九成甚至九成半嘅讀者，都冇呢個回報（我當然都冇）。

29. 又係老教訓：謙卑啲，唔好以為自己有乜咁醒。你舊年年尾，有冇可能估到國泰會咁勁—話說回頭，都未必真係咁難估，我日夜洗腦都同你講炒預期。但你咁諗都好，總會有幾十萬人話你知，「唔係呀公司個個月燒緊錢呀」（事實），「航班有排都未返到以前嘅水平呀」（事實），「等開關唔知等到幾時呀」（事實）

30. 但又係呢個好簡單嘅例子，畀你睇到：股票升，根本唔使理你以上嗰啲咩「負面消息」，隻嘢夠晒殘，一有咩好消息，甚至只係期望有嘢開返，即升。

31. 當然中間嘅過程都會係好多阻滯（講通關講咗幾耐？），但你見到，個大方向係睇到嘅，肯定係慢慢回復正常嘅。唯一就係你要坐得穩，同埋搵啲真係幾殘嘅股票—否則開關落空股價又大瀉，你又好難坐。

「唔係呀公司個個月燒緊錢呀」「航班有排都未返到以前嘅水平呀」

32. 至於其他開關受惠股，之前都同大家講過，不再重覆。大陸嘅，之前推介啲航空股或者餐廳股都不錯，自己去睇返，不過小心餐廳多古惑嘢，我比較信隻百勝中國9987（KFC + Pizza Hut）．香港嘅，除咗國泰，就係商場，特別係高端嘅太古地產1972，或者海港城嘅九倉1997。當然亦有係友邦1299—呢堆嘢全部今年都跑贏大市的。

33. 而你唔好同我講「啲租金人流有排都返唔到以前水平」之類嘅廢話—你講嘅，甚至諗過嘅，請罰抄28-31段一次，貼在你個mon前面。

===

君子馬蘭頭 Patreon．就只係貼返Facebook Page嘅文，包你唔會miss post，同埋畀唔睇金融文嘅你支持我。月費港紙30，一日一蚊。（bityl.co/D2eW）