ivanliresearch

傳說中嘅減中國關稅，應該真係減了。有冇用？實情美國嘅通脹已經回落緊，雖然未「確認」（點「確認？」）亦因為咁，10年債息都回落緊，去返3厘樓下。「好消息」「唔係喎，債息落係因為驚衰退」唔使「驚衰退」喎，已經衰退咗啦！是真的。但冇人話過衰退唔應該買股票喎。邊個咁教你？Micron大削全年預測。台積電就畀人cut單。Tesla就出車量大跌。你話呢？ (Patreon)

Published:

2022-07-05 07:09:23

Edited:

2022-07-05 09:54:03

Imported:

2022-09

Content

傳說中嘅減中國關稅，應該真係減了。有冇用？

實情美國嘅通脹已經回落緊，雖然未「確認」（點「確認？」）

亦因為咁，10年債息都回落緊，去返3厘樓下。「好消息」

「唔係喎，債息落係因為驚衰退」

唔使「驚衰退」喎，已經衰退咗啦！是真的。

但冇人話過衰退唔應該買股票喎。邊個咁教你？

Micron大削全年預測。台積電就畀人cut單。Tesla就出車量大跌。你話呢？

1. 今日就只講美股，唔講港股。因為美股星期一休市，一講已經會係上星期四五半年結嘅事。甚至下一篇我先會講半年結。

傳說中嘅減中國關稅，應該真係減了。有冇用？

2. 首先講講，傳說中嘅美國減關稅，講足至少半年，應該真係會公佈。見港股呢邊嘅反應唔係太大。會唔會幫到美股？可能吧。不過一如預期，為免畀人覺得係「對中國軟弱」，當然係要包裝到「為幫助壓通脹」。此外，亦都同時間傳話「會對科技產品收新關稅」—聽落好似平衡啲，但有少少常識都知，根本美國就冇乜進口呢啲東西。呢啲就narrative啦

3. 咁話說回頭，做乜無啦啦冒住畀人話「對中國軟弱」（肯定共和黨會狂鬧）嘅風險，都要減關稅？當然政客嘅目的係為選情為連任，未必係佢本人，但指成個黨。民主黨嘅民望當然差，呢個亦唔使講，其中一個原因亦因為係通脹。咁將呢隻鑊歸因於上手侵侵嘅關稅，或者俄羅斯，十分方便。但當然隻字不提自己任期嘅派錢印錢之類。係咁架啦。

4. 至於減關稅係咪幫到降通脹？理論上就應該係。最初開徵關稅時（呢個Patreon都未開），好多人以為關稅係「中國公司畀」，完全冇常識。最後當然係入口嘅美國公司，轉嫁落去消費者身上。講到尾係睇邊個有議價能力啫。

5. 咁但，而家先減關稅，照計唔會咁快見效，亦未必幫到好多。不過雖然話今年中期選舉，但離「真正」大選仲有兩年，有排玩。況且，亦都真係可能見到通脹會回落。到時大可以聲稱「係因為」減咗關稅。都係narrative啫

實情美國嘅通脹已經回落緊，雖然未「確認」（點「確認？」）

6. 好啦，唔講啲咁虛嘅嘢。上星期四晚，美國其實出咗個「通脹」數據，留意係PCE唔係CPI，但聯儲局一向睇PCE。之前嘅文都提咗你。當晚美股都係跌嘅，但個數字本身幾好的。

7. 咁睇返出嘅數，就真係低過預期嘅。核心（扣除食品同能源）PCE，按年升4.7%，街估係4.8%，上次係4.9%，低過預期的，仲要回落中．成個大數，按年升6.3%，街估係6.7%，上次係6.3%，都真係低過預期唔少。

8. 當然，得一個月嘅數，未必即時「確認」，之前CPI都試過有false alarm，一個月回落之後再破頂。但首先，點都係炒預期。況且，一個月先出一次，你要「確認」得嚟，蚊都瞓，乜都升晒。而睇落去，係真係似回落嘅，至少冇點再大升。

9. 因為，個經濟都放慢緊！某程度上，要「滯脹」唔係咁易。好多人拎嚟同咩七八十年代石油危機相比，但忽略咗兩樣嘢：第一，而家石油對經濟嘅重要性低咗好多。第二，而家「人」亦係唔值錢的。兩者都係因為科技，咁你見到人工嘅升幅，同咩石油危機時相比，完全冇得比。慢慢地你啲友冇工開，又消費唔到（加埋人工都唔夠物價升得快），通脹應該就回落。

亦因為咁，10年債息都回落緊，去返3厘樓下。「好消息」

10. 好啦，然後又可以再講到，一個十分利好嘅消息（但未知可以維持幾耐）：你見美債嘅債息，都回落得幾快，而家已經係2.9%水平，一度見過2.8%．三個月最大嘅單周跌幅了。呢個對股市估值，就當然係好事。

11. 但當然有人話，唔係喎，個債息跌係「因為」驚衰退。當然呢啲「因為」十分難驗證，但似乎都真係—但有何問題？經濟好時，又話驚過熱又話驚加息，咁債息升點都影響估值。到經濟差，唔驚通脹啦，債息落返，本身應該係好事。

12. 咁但，的確，之前一路爭辯經濟仲係好定快衰退。雖然我有時唔係好明爭論嚟有乜意思—經濟好你買股票咪一樣輸錢！例如2021年。相反，衰退嘅2009同2020，股票都做得十分好。記住兩者真係唔係同一回事。

「唔係喎，債息落係因為驚衰退」

13. 但，純討論嘅，就真係似係會衰退的。

14. 原因都十分簡單，你見差不多有數字貼埋出嚟。話說美國阿特蘭大聯儲，有個東西叫做GDP Now。當然亦只係一個估算，但傳統嘅GDP，三個月先出一次，仲要搞一輪，例如第一季嘅數，4月尾先見到。（留意佢月初值，修正同終值）。咁呢個GDP Now，都係估算，但時間上update好多，一個星期做一次，往績亦都算係OK

15. 好啦，講咗咁多，戲肉來了。最新嘅估計，美國第二季嘅GDP，按季跌2.1%。留意上一次（一星期前），都仲講緊估算第二季係輕微擴張0.3%，一下就大幅下調咗。

16. 咁即點？即係，已經衰退咯！固然呢個唔係官方數字，但估得跌2.1%，照計你官方出嚟嘅數唔會爭好好遠，畀你係縮0.5%好未？都會係「衰退」

17. 點解？因為美國第一季嘅GDP，已經收縮咗1.6%。連續兩季負增長，就係「衰退」

18. 然後呢度返返去經濟101，咩叫「經濟衰退」？實情，都係好難答嘅！你查維基，查字典，搵教科書，大約會話你知，「一個經濟活動普遍萎縮嘅周期」—咁即係點呀，大佬？有冇客觀量度？其實係冇嘅！

唔使「驚衰退」喎，已經衰退咗啦！是真的。

19. 美國係有專門嘅東西，去「宣佈」美國經濟衰退，就係NBER（留意，唔係政府機構）。至於之前嘅衰退歷史，呢度你可以慢慢睇。對上一次當然係疫情爆發時，2020年2月至4月，維持兩個月！下？係，就只係維持兩個月。而成件事最好笑嘅係，佢地去到6月先「宣佈」個經濟衰退。

20. 於是你見到問題了：等你講得嚟都蚊瞓。股市行得快過「經濟」，而呢啲咩宣佈衰退仲要滯後一大輪。完全大落後，甚至係反向指標。

21. 講遠咗，既然NBER嘅「宣佈」完全冇用（但人地做經濟研究之嘛，唔係幫你炒股）。咁實際上，我點量度乜嘢係「一個經濟活動普遍萎縮嘅周期」？

22. 咁其實好簡單，唔好咁學究，一般嚟講，咪就係用「連續兩季GDP負增長」，大家都會接受。亦即係，而家己經「衰退」咗，好可能只係等7月尾嘅官方第二季GDP數字出嚟。至於NBER？「慢慢等」

23. 實情我記得之前聯儲局已經有暗示過嚟緊可能兩季GDP收縮，「但唔一定代表衰退」之類，未搵得返，搵到再貼。

但冇人話過衰退唔應該買股票喎。邊個咁教你？

24. 但講咗咁多，記住一樣嘢：從來冇人話你知衰退唔應該買股票。實情如果GDP Now嘅數字準（都應該相當準），亦即係根本美國經濟第二季已經「衰退」—咁你諗返，舊年下半年同今年上半年嘅跌勢，唔係好合理咩？股市走在經濟之前嘛，你未見有數字出，股票跌定先啦。相反，到你見到差嘅數字，其實經濟好可能已經復蘇緊。