ivanliresearch

上半年港股我贏錢！其實唔難。冇錯三大指數係跌得多嘅彈得快—但埋單都仲係要跑輸。上半年69隻藍籌，得24隻升。最好嘅中海外688我有，第四嘅中銀香港2388我又有。最差嘅4隻就全冇．第三季就睇港交所388同騰訊700大師冇點你：月頭提咗你商湯20實散水架啦！美圖1357炒幣炒到出盈警。「幾時到Tesla？」中銀航空租賃2588 —　17架機total loss ！ (Patreon)

Published:

2022-07-03 20:05:44

Edited:

2022-07-04 01:02:28

Imported:

2022-09

Content

上半年港股我贏錢！其實唔難。

冇錯三大指數係跌得多嘅彈得快—但埋單都仲係要跑輸。

上半年69隻藍籌，得24隻升。

最好嘅中海外688我有，第四嘅中銀香港2388我又有。最差嘅4隻就全冇

第三季就睇港交所388同騰訊700

大師冇點你：月頭提咗你商湯20實散水架啦！

美圖1357炒幣炒到出盈警。「幾時到Tesla？」

中銀航空租賃2588 —　17架機total loss ！

因為埃汾生日，港股又放假，所以而家先出文。留意星期一晚美股冇市，所以呢篇只講港股。星期一晚或星期二日頭會有篇講美股。

上半年港股我贏錢！其實唔難

1. 首先，回顧下上半年嘅情況。同好多人想像中唔同，港股完全唔差，好過美股好多，甚至我啲港股係贏錢嘅。你話，唔係喎，恒指跌7%—咁但，只要你揀股好少少（唔係太難），同埋分段，買港股今年贏錢唔難。實情你甚至唔使揀股叻，齋分段都己經夠（過兩日解）

冇錯三大指數係跌得多嘅彈得快—但埋單都仲係要跑輸。

2. 睇下硬數字：恒指話就話連跌4季，但第二季差不多平收（最尾兩日先跌返出嚟）。第一季跌6%，第二季只係跌0.6%。國企指數呢？第一季跌8.6%，第二季轉升1.9%。科指呢？第一季跌19.6%，第二季升6.9％

3. 見到咩現象？就真係跌得多嘅彈得快。但亦見到，跌得多嘅科指，埋單兩季都仲係大幅跑輸。

上半年69隻藍籌，得24隻升。

最好嘅中海外688我有，第四嘅中銀香港2388我又有。最差嘅4隻就全冇

4. 另外可以睇埋成份股。幾有趣，之前有寫，第一季最好嘅係中海油883 中海外688 同中石油857。如果計上半年呢？就係中海外，中海油，萬洲288。

5. 除咗中海油你知道係「因為」油價升外，其他幾隻都幾難估，你未睇我寫之前都未必估到。同樣地，第一季最差嘅係舜宇2382，吉利175，瑞聲2018。半年呢？舜宇一樣有份，仲有創科669，同埋申洲2313—共通點？都冇乜。你可以話係出口股（但創科其實唔係），同埋，貴咯。

6. 順手講埋，我月供嘅港股倉大約20隻—而你見到中海外係其中一隻。第一季表現頭三，半年直頭第一。仲有講埋，上半年表現第四嘅，中銀香港2388，一樣係我港股倉入面嘅嘢，如果計埋收息回報分分鐘係第三　—而你諗下，個Q個又話咩經濟唔掂呀銀行唔掂啦，係咪事實？

7. 記住，唔好以為自己有點醒。「不過你見我揀嘅股票的確不錯」—仲有，上半年包尾嗰五隻，我一隻都冇。

8. 最後，都可以留意埋，恒指埋單，上半年跌6.6%。而69隻恒指成份股，得24隻有得升—我揀20隻（都唔係全部成份股添），都有2隻入頭四，算係咁啦？

第三季就睇港交所388同騰訊700

9. 如果第三季我會留意嘅，應該係騰訊同港交所。但留意我本身都有每個月買。

10. 港交所嘅，留意今日會開始有ETF通：北水可以買香港嘅ETF（而掉轉，你買大陸嘅ETF都得，但不在呢度討論）。不過開頭嘅規模唔算太大，只係4隻—但亦已經係比較出名同大成交嘅幾隻。盈富基金2800，恒指國企指數ETF 2828。比較令人期待係科指嗰兩隻，南方嘅3033同安碩嘅3067。暫時未有咩反向呀，納指呀，槓杆呀之類

11. 你睇呢堆嘢嘅成交，似乎對港交所嘅幫助，未必太大。況且一路有個講法（唔知真定假），話大陸佬係唔鍾意買ETF的，嫌悶喎。但又即管睇下開通後咩情況？你見隻3033之前都試過一日40億成交。況且，一路玩落去，開放埋反向或者槓杆ETF，亦係相當可能嘅事。

12. 至於騰訊嘛，之前已經講過，大家都知呢排弱勢因為個南非股東反口減持。但始終，總不會下半年日日係咁跌，去到某個位都係消化咗。

13. 留意，南非股東話每次賣嘅股數，唔會多過每日成交嘅5%—有人計咗數，咁即係應該沽足8年都未沽完。咁但係咪即係個沽壓會持續8年？梗係唔係，實情都係嗰句，每一日都有人沽有人買架啦！

14. 但，正路地，南非股東真係冇乜可能8年日日坐定定咁沽，好得閒咩。咁即係會點？照計兩個可能，甚至可能同時發生。一係，咪唔在市場沽，大手貨批畀人。又或者，再簡單啲，照在市場沽—都話呢啲承諾冇乜法律效力，就算係有，都只係對騰訊，唔係對你。

15. 無論如何，去到某個位，就唔會有人再擔心呢啲嘢。始終佢減持同公司嘅價值，係冇任何關係嘅。

大師冇點你：月頭提咗你商湯20實散水架啦！

16. 講開「承諾」，講埋隻商湯20，好多人都知星期四插水一半。固然管理層話唔減持，「讓領導走先」，但都講過，呢啲承諾冇乜效力，聽下好。況且，其他股東可以沽貨嘛。實情呢，我月頭已經提咗大家唔好追入去，講明你知禁售期會過。

美圖1357炒幣炒到出盈警

17. 然後講多兩單，第一單，炒幣輸錢出盈警。照計唔難估，正係美圖1357（唔係美團3690）．個故事都好易明，自己可以去睇。咪公司舊年走去買乜幣物幣，最後當然輸錢。留意2021年3月先去買，「同我差不多，摸晒頂」。而記住，係唔存在「一日未沽一日唔當蝕」，會計上不能咁。更好笑係，之後升返又唔會自動有盈利—除非你真係沽咗

18. 公司話，半年會蝕3.5億—濕碎啦，間公司根本年年輸錢，之前一年幾千萬，甚至一年幾億都試過，今次半年就3.5億，再勁啲。不過話說回頭，公司35億book value，都仲有排可以輸。其實最初買幣都只係買咗1億美金，輸晒都唔會爆煲嘅

19. 留意公司上市後，股價炒過上十幾蚊。但到舊年買幣時，已經得返個幾—都曾經炒到上近4蚊。但整體嚟講，呢啲公司，買嚟做乜？你不如直接買幣算啦。（唔係叫你買，係指，「兩樣一定要揀一樣的話」）

20. 仲有個搞笑位，公司話，「今次對所持加密貨幣的減值虧損不會對集團現金流、營運及經調整利潤淨額造成任何重大影響」

21. 知唔知點解？因為佢個「營運及經調整利潤淨額」—就係撇除咗呢啲炒幣輸嘅錢嘛！所以你輸10億都唔會有影響的！但間公司咪輸到入肉咁解之嘛。至於「現金流」呢個仲好笑，真係語言偽術—係架，而家堆嘢變廢紙都對現金流冇影響—但因為當時你已經畀晒錢出去嘛！

22. 順手講埋，都唔少涉及加密幣嘅公司，近期又清盤又乜咁，但當然我係唔會買的。美圖呢啲，就唔係「嗰個行業」，只係手痕拎錢（股東嘅錢）去買。

23. 你仲諗起邊間公司會有事？就梗係Tesla！有人計過，公司會蝕5億美金—不過對Tesla嘅影響，當然細好多—首先，間公司大好多。二來，Tesla係有錢賺的,呢度嘅錢，等於佢舊年純利嘅10%—都有啲影響，但絶對唔入肉。你亦見到佢買都買得好克制，志在製造下話題。好多人就當人地超睇級睇好—係超級睇好就買多啲啦。行動證明一切。