［101文］講除息 ，同盈富基金。點解恒指跌1.9%，盈富基金跌1.4%？ (Patreon)

點解恒指跌1.9%，盈富基金跌1.4%？

係因為除息，但其實乜嘢係除息？好多人都一知半解

本雜誌有印花可以拎錢。但我買嗰本畀人撕走咗個印花。咁梗係平啲啦

「咁如果我拎起咗個印花但後來拎唔到錢咁點？」。當然貴客自理—即係，匯控

其實呢，除息係好arbitrary的，唔除都得，但會世界大亂

買本雜誌返屋企，先發現啲印花畀人撕晒。

「你唔check清楚架咩？」「一日咁多本雜誌鬼記得咩」

其實盈富基係乜？點解會跟足恒指？

明明「供求定律」，多人買騰訊就會升，多人買狗狗幣又會升。點解資金流入買盈富基金又唔會升？

點解建行特別煩？

恒指69隻成份股，一年派百幾次息，盈富基金次次畀你咪好忙？

盈富嘅NAV就咁多啫，但佢之後有舊大錢收嘛。好似啲富二代咁

8% * 5% 大約就係1.9% - 1.4%

「明明十個字講完做乜寫3000字？」

1. 好啦，港股又跌，美股又跌。雖然唔係太多—老細，港股升咗4000點回返400點你又話玩完？但，反正唔係太多好必要嘅嘢要急講。今日又變咗個小專題咁。講些少金融知識。講明先，未必100%啱，但照計大約個框唔會點大錯。

點解恒指跌1.9%，盈富基金跌1.4%？

2. 今日有個小小異象，都拎嚟解解下。話說今日恒指跌420點，1.9%。但盈富基金「只係」跌0.34，1.5%。係咪有啲奇怪？固然未必完全跟足，但而家盈富基金買賣差價咁窄（22.38 -22.40），似乎唔應該咁？

3. 元兇，就係同建行939除息有關

因為除息，但其實乜嘢係除息？好多人都一知半解

4. 首先好多人連咩叫除息都唔多知，「然後仲以為自己估到指數走勢可以反手造淡」。例如小企鵝實業派特別息3蚊。咁成日啲友都問，我幾時買先可以收到股息？正常答法，係「除息日」之前（留意不包括嗰日，一定係之前）。

5. 諗深一層，答案係，「其實冇乜分別」。點會有咁著數嘅事？「除息」，就係令到你「唔會有咁著數嘅事」咯

6. 即係點？即係宣佈完派息，實有個cut off，分開邊啲人可以收息，邊啲人唔可以。實務上畫條界，睇一個日期。例如6月29日除息，咁我6月28日買嘅，就可以收到嗰3蚊息（可能過幾個月先派！）。6月29號買嘅，就冇息收。

本雜誌有印花可以拎錢。但我買嗰本畀人撕走咗個印花。咁梗係平啲啦

7. 咁但你諗下，我當6月28日，小企鵝實業股價10蚊。第二朝，6月29日，我買嘅係同一間公司但冇咗嗰3蚊。其他嘢不變，我係咪應該畀少3蚊？因為個落閘前後分別，係我收少3蚊，即係X+3 ＝10。我冇咗個收息權喎，應該件貨平啲喎。昨日買嗰個有多3蚊喎，當然平啲。個分別，咪3蚊。

8. 你亦可以諗下本雜誌可能有印花，你拎住就有錢收，咁你買本畀撕走咗印花嘅雜誌，肯定應該平啲啦

「咁如果我拎起咗個印花但後來拎唔到錢咁點？」。當然係貴客自理—即係，匯控

9. 或者你用沽嗰個角度諗，可能仲易明，我6月28日沽畀你嘅，我收10蚊。6月29號沽畀你？我收7蚊得啦—因為之後我仲有得收返3蚊息嘛。當然呢度涉及時間值，同埋，「如果公司彈弓手呢？」（冇錯，即係匯控），「到時拎住張印花拎唔到錢，就……」（答案，係貴客自理的）

其實呢，除息係好arbitrary的，唔除都得，但會世界大亂

10. 要講嘅係，除息係一個相當「人為」嘅安排。理論上可以唔做的，但你咪會好亂，6月30日原來明明已經唔會有息收，你仲盲中中咁照樣10蚊買，然後覺得人地昆你。亦即係，你買本雜誌返屋企，先發現啲印花畀人撕晒。「你唔check清楚架咩？」「一日咁多本雜誌鬼記得咩」

11. 為咗避免呢啲混亂，差不多所有交易所都會自動幫你除息。但，再講一次，理論上冇呢個動作都得，照計市場力量照樣會將佢落去7蚊。你唔知嗰啲，10蚊去買嘅，咪做傻仔，人地係咁沽畀你，8蚊都沽畀你，到落返7蚊為止。大約係咁

12. 了解呢個機制嘅，你就會明白當年匯控嘅鬧劇。係喎，除咗息，但最後冇派息。但，其實根本唔應該影響個股價的。如果小企鵝除息後先話唔派，其他嘢不變的話，個股價應該返返去10蚊—　但現實生活冇呢個「其他嘢不變」

其實盈富基係乜？點解會跟足恒指？

13. 好啦，明咗後。再解下盈富基金係乜。十分簡單講，佢就跟住恒指照單執藥，恒指有8%騰訊，佢咪照執8%騰訊。你買一隻盈富基金，咪等於買晒恒指69隻，然後佢收你管理費咁。

14. 咁首先搞清楚一樣嘢：盈富基金啲咩流入流出資金，係完！全！唔！影！響！佢！升！跌！的！之前有一輪咪話又制裁中移動呀，又話換管理人呀乜，好多完全唔識嘅人都誤解。

明明「供求定律」，多人買騰訊就會升，多人買狗狗幣又會升。點解資金流入買盈富基金又唔會升？

15. 點解？你心諗，「供求定律」嘛，人人去買中移動，咪掃起隻嘢咯（是）。人人去買Bitcoin，咪升咯（也是）。咁人人去買盈富基金，點解唔係升？

16. 答案，同之前講港紙拆息入面講嗰個feedback機制，原則上有啲相似。都係因為會有人套利。

17. 好簡單，如果我當恒指今日跌10%，但有班唔知咩傻仔，不停買盈富基金，令到佢冇升跌嘅。咁會點？我係「大戶」，我咪買狂買恒指堆正股（或期指），然後沽空你隻盈富基金咯。對個「大戶」嚟講，net zero嘛，我渣咁多股中移動又沽返咁多，零風險，淨執你。相反亦係，如果盈富基金畀人狂質，明明恒指冇升跌佢都跌5%，「大戶」老死都狂買盈富基金沽期指啦。

18. 就係通過呢個機制，盈富基金嘅升跌會跟恒指。因為一偏離得多，就會有人套利。當然啲套利有成本，所以唔會偏離少少就做。但太多就會。同咩港美息差，有啲相似。

19. 上面堆嘢我估你大約都明。但解完你可能就更加唔明，咁點解星期三會恒指跌1.9%，但盈富基金只跌1.4%？係咪0.5%嘅套利空間唔夠？我唔肯定，但相信係夠嘅。之所以有呢個偏離，正係因為建行939除息。

點解建行特別煩？

20. 呢隻嘢比較麻煩，因為佢係一隻佔得重，而又派息多嘅股票。例如騰訊阿里巴巴嗰啲，丁屎咁多息，唔大影響。匯控以前都高，但一年四次。建行呢？比重又高，派息又多，仲要係一年一鑊過！

21. 然後啲人其實一路有個問題，咁盈富基金，點派息架呢？喂69間公司，派69次（仲未計中期，甚至季度）。咁係咪啲股份每派一次，佢又派一次？咁咪好唔得閒？

22. 答案係唔會嘅，盈富基金，都只係一年派兩次息。

恒指69隻成份股，一年派百幾次息，盈富基金次次畀你咪好忙？

23. 咁即係點？將啲錢儲起佢，然後一年畀兩次你？又唔完全係喎！我唔100%肯定，但例如恒指而家股息率都大約3%，咁盈富基金好似係唔會拎住咁多現金的。好似係派息時，咪在佢成堆嘢中，按比例咁沽返出街再畀錢你。例如佢有1000億規模，我當佢中期派一半，1.5厘左右，咁佢會減持15億股票套現，呢15億咪跟返恒指比例咁去沽，15億嘅8%係沽騰訊，類似咁。再講一次，呢段我都唔係完全肯定，有機會再查下。

24. 但，肯定嘅係，盈富就一年除兩次息，入面堆嘢就各有不同日子，當中必定有差異。

25. 我地睇睇星期二嘅事。再諗下，如果有一隻股票大大力除息，會發生乜事？

盈富嘅NAV就咁多啫，但佢之後有舊大錢收嘛。好似啲富二代咁

26. 我做個假想實驗，當勞蘇指數，只有兩間公司，各佔50%。一間係灰熊貿易，一間雪人科技。昨日兩間股價都係100蚊，當冇任何消息，今日灰熊除息，派30蚊。雪人科技冇升跌。咁灰熊就跌30%啦，變70蚊，雪人就都係100蚊。勞蘇指數就會跌15%。明啦？

27. 咁但，假設追蹤勞蘇指數嘅馬蘭頭基金，就係拎1股灰熊，1股雪人。咁會點？之前嗰日，馬蘭頭基金NAV（淨資產值）就200蚊，照計買賣價格都係咁上下。今日，佢嘅NAV，就得返70 + 100（灰熊除息跌咗嘛）＝170蚊。咁你咪話，同昨日200蚊價格心，咪跌15%

28. 咪住，真係咁？諗真啲？事實上，呢個NAV值170蚊嘅馬蘭頭基金，我係會用超過170蚊買咯！

29. 點解？因為如果我今日175蚊買，應該都有SO—我買咗170蚊嘅股票—同埋之後馬蘭頭會有舊錢（30蚊）收到嘛！！！

30. 你見到了，就係因為兩者除息嘅日子唔同，就會有呢啲問題。唔計數地講，我175蚊買佢，應該都有著數，係咪？190就唔知了，就要又睇盈富基金幾時除息，但每年都係咁上下日子，大約可以估到。

8% * 5% 大約就係1.9% - 1.4%

31. 當然實際上，恒指69間公司，就唔會咁誇張嘅。我大約計下數，建行派0.426蚊息（計港紙呀下），股價5.22，8厘咁。而建行在恒指佔5%，在盈富基金都應該係佔咁上下。你大約預，一股盈富，22.72（用星期二收市值），入面就有22.72 *5%，即係1.136係建行，嗰舊錢，一股盈富入面，就1.136*0.08=0.0909，都差不多一毫子。或者你計返，即係佔一股盈富嘅0.4%（其實，即係5% X 8%咯！）

32. Bingo，呢0.4%，就大約係恒指（跌1.9%）同盈富（跌1.4%）嘅分別了

「明明十個字講完做乜寫3000字？」

33. 後記：首先，其實你投資呢，就真係唔使識以上呢啲嘢的。不過幾個作用，首先你可以知多啲，二來分分鐘你返工有用，三來：就唔好諗埋啲異想天開嘅發財大計，以為個市場有咁著數嘅嘢畀你賺錢。

34. 仲有，實情呢，上面呢堆嘢，要講，我可100字講完，甚至10個字都唔使：「因為建行除息！」（個感嘆號計埋，再加埋939剛好十個字）。你可以想像，在Facebook 可能有啲人就係會咁回。甚至覺得我笨，要花咁大篇解。

35. 但應該好多人知，我最初係教書嘅。我唔係長氣，而係要確保每一個人都識。你本身好熟股票，甚至做金融，轉數又快，快過轉數快嘅，咪可以十個字解完。講真，你一個字都唔使解畀我知，我都知點解

36. 但，我在呢度唔係要晒命講我自己點醒嘛。我花100字解，然後你仲係唔明，有乜意思？我寧願花3000字，務求絶大多數唔係做金融嘅讀者都明。

37. 否則，你使乜訂我Patreon呢？就係你有啲嘢諗唔明嘛，人地只係畀十個字你，你又唔知佢啱定錯。你問佢，佢又未必理你，甚至嫌你無聊，咁都唔明。又或者佢都唔係好明。

38. 而記住，我呢度唔係按字收稿費的，我冇任何誘因去呃字數—除咗係令你明多啲。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。