美股：留意星期四PCE數字．Juul又破產，Nike業績後又大跌。點避免？港股低位升返4000點，你低位打靶嘅，輸咗幾錢？Nasper減持騰訊嘅嘢．大師冇點你：阿里巴巴9988一個月升30%。携程網9961兩日升30%。國泰293三個月新高，之後仲有乜？講埋你知． (Patreon)

美股：留意星期四PCE數字．

Juul又破產，Nike業績後又大跌。點避免？

港股低位升返4000點，你低位打靶嘅，輸咗幾錢？

唔好以為自己識啲乜，特別係短期

Nasper減持騰訊嘅嘢．

大師冇點你：阿里巴巴9988一個月升30%。携程網9961兩日升30%。

國泰293三個月新高，

之後仲有乜？講埋你知．

1. 呼，寫文時星期二晚。原本星期一見冇乜太多嘢寫，市況又相當好，都唔使講太多。然後到今日就多嘢講了。主要講港股，但講少少美股先

美股：留意星期四PCE數字

2. 美股方面，首先留意，萬眾期待今個星期四嘅PCE數字。聯儲局就係睇呢個數。大家都知近期美股炒「通脹見頂」，若果佪數字差就可能令個市又跌過。核心PCE方面，上次按年升4.9%，街估今次係升4.8%，會「回落」。但留意成個PCE（唔扣能源食品），上次按年升6.3%，今次似乎街估去到6.7%，即係可能「反彈」。你可以預計，到時都係睇升定跌，又會有唔同講法。不過總體嚟講，就係睇係咪高過預期。而兩者之中核心數字又比較重要。

Juul又破產，Nike業績後又大跌。點避免？

3. 另一方面，美股我渣住嘅兩隻舊經濟股，都有啲壞消息。先講Nike，實情唔可以話係壞消息，出咗業績，好過預期的，但照跌。高位都跌咗40%以上，今年都跌三成幾，都跑輸大市好多下。又話舊經濟股好？「咁都睇一隻隻」。講到尾亦係估值，Nike向來都被視為「增長股」，你睇啲市盈率從來都貴。

4. 另一隻，係電子煙Juul，美國禁售，分分鐘會破產。公司本身冇上市，但Altria（MO）渣住35%。Altria是甚麼？即係萬寶路美國（其他地方嘅萬寶路就係Philip Morris，PM）．Altria明顯跑輸一大截，原因就係在Juul嘅投資揩晒嘢。最初已經畀人話買得貴，後來亦減值過。而家分分鐘係total loss（話分兩頭，亦即係根本冇得可以再衰）—而煙仔股係suppose穩陣。

5. 你話點避免呢啲情況？都其實好難避免。所以真係要分散啲。

港股低位升返4000點，你低位打靶嘅，輸咗幾錢？

6. 好啦，講返港股，開心啦？四日升咗1400點（詳情：星期一，星期二）。但首先又係講下「心法」，你見，港股低位升返4000點，20%。堅持話咩「熊市反彈」嘅，有幾多餘，我Facebook講咗，呢度之前亦講過，不再重覆呃字數。

7. 換一個角度睇，你當然冇乜可能3月中嗰下低位撈到。但至少你可以做到keep住個個月買，唔係咁難啫？又或者，如果冇乜錢嘅，你唔買，都至低限度唔好走去3月中低位打靶，好傷的。所有讀者問我，我都冇叫過你沽。

8. 3月中走去人踩人沽貨的話，你就錯過咗20%嘅升幅。之後會唔會再升，我唔知。但就當你低位沽咗拎返100萬，咁如果你留到而家沽係拎120萬（如果你多科技股肯定唔止添）。然後你諗下，個心理係咪好奇怪？跌嗰時你就講10%「止蝕」，但之後你「原本」可以拎到嘅20%，又錯過咗，唔係仲蝕咩？只係有啲人沽咗貨套咗現，就「覺得」呢個「賺少咗」唔係真係損失。

9. 你可以細想下。但一句到尾，啲友買股票，就睇（佢以為嘅）upside唔睇downside。沽嗰時，就睇唔到股票可以反彈幾多。

唔好以為自己識啲乜，特別係短期

10. 另一樣，當然畀你見到。「唔好咁自大」。唔好以為自己識乜，特別係短期—記住幾個月甚至一年都係短期！短期走勢，根本你唔知，我都唔知。邊個估到港股今年跑贏美股咁多？應該冇乜邊個估到。我舊年有講過有咁可能，但當然都唔係好有信心—因為啲「故事」講唔通。但又一次畀你見到，升咪自然有故事—雖然我都唔係好知啲人點樣講今次港股低位反彈嘅故事。唔知係「歡迎林鄭下台」，定「走出疫情」（呢個其實算比較合理嘅解釋，但留意，根本港股係大陸股為主），定係堅持話「熊市反彈」

Nasper減持騰訊嘅嘢

11. 然後，當然要講騰訊股東減持呢單嘢。首先，你見大贏家當然係南非上市嘅Naspers，或者荷蘭上市嘅Prosus。之前都寫過下，前者唔知易唔易買，後者你用IB之類應該實買到。一路都係嗰樣嘢：個股價折讓大，佢地嘅股東，或者佢地自己，一定會想沽走啲騰訊然後做回購的，釋放個價值，呢啲好基本嘅金融嘢

12. 然後你仲會發現，唔係喎，之前「答應」過3年唔沽喎—就真係要講句，大家投資，就唔好好似啲少男少女拍拖咁天真。好簡單，「犯法呀？」。公司做得嘅，當然係合法。咁既然合法，你亦奈佢唔何。Naspers股價即時狂升，先唔會有人因為公司「信唔過」而跌。我之前亦寫過，呢啲咩「承諾」，一路都唔係同「你」做，頂多只係同公司（騰訊）做—而只要騰訊同意，根本冇任何法律效力。順手講埋，你見好多咩禁售期，亦係咁。法律效力近乎冇，有嘅都頂多係同間公司，唔係同散戶或機構投資者。

13. 咁你明顯見到，騰訊股價受壓。呢兩日都跌，大約5%。留意呢度都拖低咗恒指成百點。咁你話，之後會點影響？我答你，近乎冇影響。你諗下都知，一間公司嘅價值，同有冇人減持，有乜關係？但當然你只係睇幾日嘅，我就好難答到你。

14. 事實Naspers唔係未沽過，有人覺得公司「眼光好準」，我就唔知了。不過，作為咁大個股東，佢一沽就已經必然會郁到股價。而你睇返個圖，亦不見得沽完唔會再升。

15. 同一時間，Naspers亦都減持咗京東。冇錯就係騰訊派息派出去嗰啲京東股票，實情已經沽晒。咁你見京股價表現，完全唔差喎。當然個沽壓冇咁大嘅。

大師冇點你：阿里巴巴9988一個月升30%。携程網9961兩日升30%。國泰293三個月新高，

16. 最後，大師冇點你時間。真係同你講返，搵埋紀錄都得

17. 阿里巴巴，唔使多講啦。月頭叫你買，講埋係螞蟻上市，中到應一應。而家升到3個月新高。當時92蚊，而家118。一個月28%。

18. 仲嫌慢？咁簡單啲，就對上一篇。週末寫過隻Trip.com ，携程網．固然星期一已經升，但你星期一飛入去，星期二都再升近20%。固然係因為大陸放鬆咗隔離措拖，但嗰時都提過呢隻嘢，就係大陸一日都未開關，一日仲有得玩。所以記住啦，等啲消息發生之前去買，而唔係公佈咗先去搶

19. 關於「開關」，我仲想講多兩樣嘢。第一，你見唔止携程網，成堆大陸航空公司，仲有澳門股都升埋。固然係已經出咗消息，但你見南航東航股價離高位都仲有啲距離。而照計更加值搏係澳門股。

20. 第二，國泰。都講咗一輪，但實情從冇點力推，我自己都冇買。所以純討論。股價都升到52星期新高。又示範兩樣好簡單嘅嘢：首先，炒預期，你不停講咩仲燒緊好多錢，仲蝕緊錢，完全廢話。第二，個預期好消息，就係香港縮短防疫。固然呢個不難估到，但一如以往，你見當然係啲「建制傳媒」最早報。今次係星島，照計應該中午先報（所以你見下午咪抽升），但以往記得見過係朝早報，下午先有正式公佈，股價先有反應。所以想短炒嘅，記住睇。

21. 最後，你見啲餐飲股之前都升咗。故事當然都講得通，解封，復常。但大陸嘢，都係難玩。我會揀當中最正常嘅百勝中國（9987），Yum China，即係Pizza Hut KFC Taco Bell，可能升得少啲，但冇咁多古惑嘢。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。