ivanliresearch

道指升800點，又話通脹預期降溫啦喎。有讀者覺得「好夾硬」，問我信唔信服，就問錯問題。市場從來唔欠任何人「解釋」，亦理得你信唔信服。留意上星期流出股市嘅資金，9星期最多 :O）JP Morgan策略師話今個星期美股升多7%，「冇乜特別」銀行股又強勢。「又話唔加息？」阿里巴巴3個月新高，上個月已經叫你買。港股低位升咗3300點，要乜「理由」？溫書時間：銀行體系結餘跌3成，一個月拆息升到0.9厘，唔再7.85。節目預告：有人話不如講下樓市。炒防疫酒店，冧巴一個。 (Patreon)

Published:

2022-06-26 18:51:19

Edited:

2022-06-27 00:44:37

Imported:

2022-09

Content

道指升800點，又話通脹預期降溫啦喎。

有讀者覺得「好夾硬」，問我信唔信服，就問錯問題。

市場從來唔欠任何人「解釋」，亦理得你信唔信服。

留意上星期流出股市嘅資金，9星期最多 :O）。

JP Morgan策略師話今個星期美股升多7%，「冇乜特別」

銀行股又強勢。「又話唔加息？」

阿里巴巴3個月新高，上個月已經叫你買。

港股低位升咗3300點，要乜「理由」？

溫書時間：銀行體系結餘跌3成，一個月拆息升到0.9厘，唔再7.85。

節目預告：有人話不如講下樓市。

炒防疫酒店，冧巴一個。

1. 又到新一個星期，唔知大家覺得點？我就覺得相當好。上一篇同大家講過，唔使太灰心，人人都睇淡美股，標普指數上半年表現可能會50年最差—話咁快，星期五港股美股就有個幾好嘅反彈。

道指升800點，又話通脹預期降溫啦喎

2. 原因？其實近乎冇。你見都真係有啲夾硬，話通脹預期降溫，對經濟冇信心所以估好快停加息，真係相當夾硬。呢啲，咪就係narrative

3. 難怪有讀者覺得「唔信服」，但切戒呢種想法。市場根本唔會理會你或者我同唔同意，升就係升，跌就係跌，你覺得個解釋好勉強都好—實情市場從不欠你任何「解釋」。有時媒體故事fit得好聽啲，有時點fit都fit唔到。

有讀者覺得「好夾硬」，問我信唔信服，就問錯問題。

市場從來唔欠任何人「解釋」，亦理得你信唔信服

4. 真係睇嘅，反而你係睇估值，盈利表現等等，量化嘢唔係萬能，但總好過睇故事。唔要量化嘅，就睇市場情緒（但有點難，唔量化當然就係主觀，靠你經驗）。

5. 恒指低位彈咗3300點（18%！），有乜好「解釋」？理得你信唔信，同唔同意—到人人都信時，就冇水位啦。牛市梗係在懷疑下誕生。

6. 好啦，心法嘢雖然重要，但唔講太多，重覆太多怕你悶。講啲實際嘢。美股星期五相當好，三大指數都升3%。成個星期呢？一樣幾好。標指升7%，納指升8%—留意標普指數之前星期四再「熊市」（高位4819，跌20%即係3855），星期五又再走返出嚟，再講一次，執著於呢啲嘢，無聊之極。

留意上星期流出股市嘅資金，9星期最多 :O）

7. 仲有留意一樣嘢，截至6月22日嘅一個星期，流出股市嘅資金，9個星期最多。雖然我成日覺得呢啲數字唔準，但真係要講嘅，就多數係滯後指標—你見，之後美股就彈足兩日。

8. 所以第時睇到呢啲咩「資金流出」，記住，就算真係有意義，都係同你諗嘅相反—人地賣完你先見到，所以到你見到時，唔應該當係沽壓—一早沽咗啦。你見報導入面都有解，明顯啲機構投資者嘅配置好低—但呢啲先係買入訊號。個個買晒，咁邊個仲有錢買上去？

JP Morgan策略師話今個星期美股升多7%，「冇乜特別」

9. 同樣地，JP Morgan嘅策略師，話今個星期美股可以升多7%。當然聽下算，但夠晒出位，可以睇下講乜。而我傾向同意的。實情升7%好出奇咩？剛剛呢個星期咪升咗7%！

10. 佢嘅理據，都係講半年結，啲機構投資者配置，啲友手頭現金水平係高位，好多人沽空—細心諗下都知，呢啲先係正面訊號。阿豬阿狗都話買股票，就真係見頂訊號。

11. 個股方面，不用講太多。當然啲科技股反彈，昨日篇文叫咗你買QQQ了，而唔好買TQQQ—有機會再詳細解下。但真係切忌貪快—我真係唔明啲讀者趕住做乜，個個以為「唔搏就窮一世」—但你唔係真係一年內贏唔到錢就畀人捉去斬嘅人，唔好代入漫畫小說情節。急乜？我見啲人話想1年儲夠錢移民—咁輸晒的話你點？

銀行股又強勢。「又話唔加息？」

12. 但特別留意，銀行股都相當強，原因唔係好清楚，可能因為覺得加息對息差有利—但，唔係上面先講估加息步伐放慢咩？冇錯，啲narrative就係會矛盾的，亦唔好當係自然科學咁解。真係要估，可能美資銀行嚟緊半年業績都會幾好。

阿里巴巴3個月新高，上個月已經叫你買。

13. 當然，仲有係中概股，都講咗一排了。中概股本身風險都係太大。但，阿里巴巴，就真係講咗成個月都有，早早叫你買。於是可以扯到去港股。

港股低位升咗3300點，要乜「理由」？

14. 港股方面，亦都係幾好，甚至呢期一路都好過美股。都話，低位彈咗3300點（18%）—你可以睇下，你啲回報一年有冇18%？當然冇可能低位捉到，但呢個例子用嚟說明，股市要升，根本唔使咩「理由」，夠殘就係一個理由。當然你可以話疫情消退嘅，但，全世界度度都係架啦，又唔見度度都升？

15. 真係要講嘅，一個好大關鍵，就真係大陸對科技企業嘅打壓，應該告一段落。係相當難捉的，但你可以一路睇啲事態發展，我都由月頭講而家。

16. 例如最近排嘅，你見到螞蟻拎金控牌（但好似又有人否認，十分難搞，係咁架啦）。但比較有新意嘅，見到螞蟻同阿里減少合作，各自發展新業務。你要留意嘅係，所謂「好消息」定「壞消息」，都只係睇特定時空，或者估值—如果係3年前發生呢單新聞，或者假設螞蟻當年上到市而爆呢單，當然係好壞嘅消息。但而家掉返轉：絶大多數人都當螞蟻死咗咁滯，計阿里估值時唔再計呢舊嘢。只要上得返市之類，點都有舊股權喺度，到時理得佢係咪真係唔合作，係咪真係競爭啦。另一個層面睇，有咁嘅安排，照計都係同政府傾咗出嚟。

17. 然後咁啱得咁橋，馬雲又再出現在大家視線了。雖然仲係在國外，仲未「被認可」，但最緊要人無事，求財啫，唔係求氣。

18. 螞蟻亦唔係個別例子，你見滴滴嘅App，一樣話可以上返架。退市就另一回事，但即係見到，對行業嘅打壓，應該真係轉向了

19. 港股強勢，我都唔一一細講，都係啲科技股比較強勢，原因上面講咗。科指明顯跑贏，你鍾意嘅可以買南方東英嘅3033，但我就從來都冇買，主要都係得騰訊700。事後睇到，我係唔多中資科技股嘅exposure，就係一隻騰訊（雖然呢隻渣唔少），冇啦，除非你計2800同2828啦。因為exposure細，所以之前一路咪跑羸大市，但近期就可能跑輸啲了。諗下使唔使加返大？遲下話你知。