話咁快銀行體系結餘已經跌咗1000億．別人恐懼時我貪婪：仲有冇人睇好美股？金句，就必然係「唔實用」嘅．標普指數，坐足3年，80%機會贏錢（仲唔夠？）如無意外，今年上半年美股表現，50年以嚟最蒫．股市跌開繼續跌？定跌得多會升返？QQQ年初至今跌30%，TQQQ「只係」跌70%。「唔足3倍」「好東西」． (Patreon)

話咁快銀行體系結餘已經跌咗1000億．

別人恐懼時我貪婪：仲有冇人睇好美股？

金句，就必然係「唔實用」嘅．

標普指數，坐足3年，80%機會贏錢（仲唔夠？）

如無意外，今年上半年美股表現，50年以嚟最蒫．

股市跌開繼續跌？定跌得多會升返？

冧把幾個（其實平時都有啦）

QQQ年初至今跌30%，TQQQ「只係」跌70%。「唔足3倍」「好東西」．

1. 又係有啲私事，搞到遲咗出（放心，冇乜大問題）。不過近排大市都叫做靜中帶穩，你亦見到我昨日都冇乜講咁多市況嘅嘅，今日都係咁。

話咁快銀行體系結餘已經跌咗1000億

2. 首先，早兩日出咗篇港紙長文，由於小小技術問題，有人話手機睇唔到啲圖，而家更正咗。但照計Desktop版同email冇受影響。同埋，平時我多數最尾會attach晒啲圖（不過嗰篇漏咗）。

3. 實情再上個月都寫過一篇，就真係由零開始講起。然後第二篇算係答讀者問題。三篇有乜分別？第一篇就真係101，最基本開始。第二篇係跟進有啲讀者問嘅問題。

4. 剛剛第三篇，你可以當係「應用」或者「測驗」，了解晒個制度後，咁美國加息0.75厘，照計你大約會估到發生咩事。如果仲係完全唔知嘅，即係仲未了解晒，「又由頭睇多次啦」，或者再問我，我可能整第四篇答問題亦得。固然係長，但照計有用，清楚，你睇完就「一了百了」，明晒成個制度，亦會減少好多錯誤觀念。

5. 好啦，你睇篇文入面，好多「預計」咗嘅嘢，都發生咗。例如乜？例如金管局不停接錢啦（例如呢度，呢度），正如我寫到，個力度會大（加0.75喎！），去到差不多100億。

6. 亦講過，每次咁樣100億，個「銀行體系結餘」就會跌100億—所以你見之前一路寫文我都話3000億—而家？一個星期左右，話咁快跌到2300億（最新數字你可以日日上金管局網頁睇，但傳媒實有報）。

7. 亦因為咁，你會見到個拆息係咁升，升得幾快下，見到港紙１個月拆息，13連升了。我寫文時先係0.6厘，而家0.8厘。

8. 事實上，你見美銀嘅報告話你知，個「銀行體系結餘」應該會跌到近500億，我唔知佢個數點估（點都有啲根據），講真亦冇人知係400定700，但仲會跌好多，跌到1000億樓下，應該係多數人共識。

9. 但你見股市呢排點？冇影響噃，仲幾好添。走咗1000億（差不多30%），你見真係對股市冇影響—反而對供樓嘅人就有影響（我下個月都供多幾百蚊）

別人恐懼時我貪婪：仲有冇人睇好美股？

10. 以上種種，唔係話你知我點咁有先見之明，亦唔係話你知「美銀踢法似我」。而係只要你清楚咗個制度點運作，呢啲嘢真係好易推論出嚟—甚至好似做數學做Proof咁，一步推一步，好能夠預見的

11. 但你同時見到，出面好多人，都真係不甚了了。所以你睇完，己經叻過好多人—「但你有冇能力拗贏佢地係另一回事」（而我早早唔做呢啲嘢，有乜好拗？）

12. 好啦，甚麼拆息呀港匯呀呢啲嘢，有啲人以為好複雜，其實真係唔複雜—我估唔少讀者睇完都會可以「推論」到一樣嘅嘢—相反，股市就另一回事。有啲人以為好簡單，其實好複雜，唔止一次講過，股市（其他投資都係）最難玩嘅地方，就係佢同你讀書學嘅「reasonings」完全唔同—既唔會係數學咁一步推一步，亦唔係你讀歷史咁遠因近因導火線。因為股票係人嘅遊戲，人就係好奇怪嘅動物。

13. 好多人知我理科出身，數學OK叻，「物理化學都A」，我最初接觸股市時，就當佢七分科學三分藝術，後來我覺得一半半，而家我幾肯定，至少係七分藝術。

金句，就必然係「唔實用」嘅

14. 藝術嘅呢部份，都係捉心理。好多市場大智慧，係相當有道理嘅，否則冇可能一路流傳。「別人恐懼時我貪婪」，十分啱，應該冇人可以反對—但點解有人覺得「廢」？因為你發現好難用，幾時先係恐懼？會唔會再變好恐懼，超級恐懼？咁我貪婪，貪幾多？反彈返幾多走？呢啲係金句唔會教到你嘅嘢

15. 甚至哲學啲諗：金句必然係「唔實用」的—呢個亦係股市嘅特質—如果個rule好實用，人人都會用到—自然self defeating，有用都變冇用。好簡單嘅例子，如果有人發現年年都係6月股票最勁，咁個個都會5月就買—結果原本6月升，就變咗5月就升—於是人人就4月去買—最後到呢啲效應消失晒為止。（個情況好似一個好似完全唔關事嘅課題：意想不到的老虎）（亦令我諗起，細個嗰時，壹週刊星期五出，東週想打佢飲頭啖湯就星期四出，之後一仔又星期四出，東週又星期三出……..）

16. 好啦，咁玄，即係點？又畀啲實質嘢你。

17. 呢一刻你再講咩加息同衰退，實情都已經相當多餘。大家唔好只係睇我，記住睇埋其他人講—你應該發現，好難搵到啲仲係「樂觀」嘅人，照計十個有九個都灰心。

18. 「閃跌」反而冇事，一日跌2000點嘅，大把人敢買。同樣地，2020年3月，雖然好多人都覺得世界末日（相當合理），美股一個月跌咗三成（納指唔止）—但依然係有啲勇士飛入去的—否則唔會有3月尾嘅大反彈。

19. 過去呢大半年嘅情況，就真係似「熊市」—唔係你只睇20%，或者有幾急。而係你見到，係相當磨蝕鬥志嘅。未必跌好多，但個個月咁跌，你月頭買嘅，月尾就跌。下個月頭買嘅，又係跌，好似倒水落海咁。呢啲情況，最折磨心理，我完全明白。

標普指數，坐足3年，80%機會贏錢（仲唔夠？）

20. 但，唔好放棄，股市就好少衰足幾年嘅。標普指數，你坐3年都仲回唔到家嘅，史上只有20%情況會咁。況且，加埋你定期買拉低個成本，勝算再高啲。況且，輸嘅情況得20%—但升嗰時，可以升好多。

21. 而家真係見到，一街都係講衰退啦，滯脹啦，覺得美股會跌啦（例如呢度，呢度）。照計，呢個就係幾好嘅買入機會。

如無意外，今年上半年美股表現，50年以嚟最蒫

22. 好啦，講完藝術，講少少「科學」（其實係偽科學）。

23. 標普指數，年初至今，跌21%—差唔差？好差。有幾差？自尼克遜年代都冇咁差。後生讀者唔知，尼克遜，即係1970年—應該多數讀者未出世。

股市跌開繼續跌？定跌得多會升返？

24. 咁係好事定壞事？跌開會繼續跌，定否極泰來之後升？應該講過，實際情況，跌得多後，多數係升（technically 叫做negative sequential correlation）—原因不難理解：首先，股市就係升多過跌。另外，估值平咗當然易反彈，炒到癲晒當然易爆煲。

25. 當然有人可以反駁，唔係喎，「個通脹40年最高，咁你股市表現50年最差唔奇」 —不過你可以留意嘅係，美國通脹最勁，係1979-1981年—而嗰幾年，美股並不特別差

冧把幾個（其實平時都有啦）

26. 好啦，最後，冧把。買乜好？其實，都唔使問啦，「都係嗰啲嘢」。同埋，寫得太長，應該聽日先講。但畀咗冧把你先，早排有提過嘅，中資科企啦（特別係大嘅，特別係阿里巴巴9988），香港銀行啦（中銀恒生匯控渣打，加息嘛），汽車股啦（之前都有提過）。美股呢？FAAMG啦（或者QQQ），家樂氏Kellogg啦（呢排幾勁，分拆）。

27. 日本股呢？「卡樂B啦，加價」。其實我年頭都買咗日清食品，合味道杯麵加價，股價表現都好，但你見啲yen係咁跌，就輸返晒的，所以都不能買太多，同埋要睇長線啲。

28. 不過最後提醒你：記住都係指數ETF為主，個股玩下好啦—我指嘅係大盤指數，大佬你唔好走去買電動車指數ETF 元宇宙指數ETF，然後話「聽我講」。買槓杆ETF嗰啲更加輸得仲慘。昨日都講咗。

QQQ年初至今跌30%，TQQQ「只係」跌70%。「唔足3倍」「好東西」

29. 最後講埋，有人同我講，唔係喎，QQQ今年輸三成，TQQQ今年「只係」輸七成咋喎，兩倍多啲，有so喎—呢啲就只係假象。前者我100蚊輸剩70蚊，升43%回家。後者，我100蚊輸剩30蚊，要升返233%—睇下幾多倍？

30. 另一個角度睇，100蚊輸剩20蚊，你再跌50%，會變10蚊。但由最初１100蚊嘅base計，你「只係」由輸80%變成輸90%。好似輸多咗10%，其實唔係。問題係個本已經大幅減少，要碌返上去，難過登天。

31. 有人話如果升嗰時唔止放大3倍下話？咁你睇5年，QQQ剛好升100%，升市啦。TQQQ呢？升176%

32. 亦所以，點解啲急嘅人，就多數都永冇發達。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。