Metaverse，「仲有冇人記得」？ Facebook同微軟就一齊set standard，騰訊就開新部門 另一方面，NetFlix同 Google合作，推廣告了 為甚麼我不買TQQQ 寧願你30萬買QQQ，好過10萬去買TQQQ (Patreon)

Metaverse，「仲有冇人記得」？

Facebook同微軟就一齊set standard，騰訊就開新部門

另一方面，NetFlix同 Google合作，推廣告了

為甚麼我不買TQQQ

寧願你30萬買QQQ，好過10萬去買TQQQ

1. 昨日整咗篇長文，答你地啲港紙問題，照計寫得相當好。不過有人話睇唔到啲圖（ Desktop應該睇到，但我自己iPhone都睇唔到），遲少少搞。但反正唔係太多圖。

2. 寫完呢篇文，又係元氣大傷，所以今日簡短啲。照舊，講返星期二港股同美股。雖然大市都唔係太多嘢講，港股同美股星期二都彈得好，但星期三港股都跌返唔少，美股期貨亦跌，所以唔講太多星期二啲情況了。反而可能寫啲冇咁「貼市」嘅嘢。就真係又講…..Big Tech

Metaverse，「仲有冇人記得」？

Facebook同微軟就一齊set standard，騰訊就開新部門

3. 首先，Metaverse，「仲有冇人記得呢個字」？又係嗰句，你可以諗返當時你啲啲Metaverse概念股嘅心態，買啲Roblox（RBLX），Unity（U）之類。兩隻今年都跌咗超過70%，高位就唔止添。而特別留意，呢啲已經唔係完全垃圾發夢嘅公司，我都有諗過買，好彩冇。

4. 重要嘅係，你回想返當時嘅心態，記得警惕自己。教訓當然都係以前嗰啲，分散，最如痴如醉時往往好危險，估值都係重要。

5. 咁但，我當然唔係忽然翻炒呢啲故事。實情係，呢啲股票半死，Big Tech好多都跌一截，但「Metaverse」呢樣嘢，都真係未死，至少啲公司仲搞緊

6. 首先望下，係騰訊，搞個extended reality 嘅部門，擺明繼續投資或押注Metaverse．

7. 但更震憾嘅係，Facebook同微軟，搞咗個Metaverse 標準嘅組織。相信好多比我熟悉科技嘅讀者都知道，邊個set咗個standard，往往就係王者。呢兩間公司聯手，諗緊乜，十分清楚。

8. 我在舊文提過，或者你可以睇返我在《信報月刊》寫嘅文（好嘢嚟的，呢度attach畀你）。講嘅嘢都大約準。

9. 首先，Metaverse，「咪又係Big Tech」，而家越睇越明顯。你唔係靠一兩個idea，而係長期戰，有人才有錢燒，Big Tech要搞嘅，細公司好難玩。特別而家市差，Big Tech股價跌一回事，但都仲有大把錢燒，本業仲要相當賺錢（你畀個估值低一大截係另一回事）。但細公司，錢都唔賺嘅，點玩？

10. 第二，點解Big Tech要搞？亦係舊文寫過嘅。你今日見到嘅絶大多數東西，全部都係圍繞「智能電話＋流動上網」呢個「革命」衍生出嚟嘅東西，social network又好，手機遊戲又好，mobile payment都係。但大家知道，人人都已經有手機，咁之後點玩？下一個增長點係乜？

11. 就係呢樣東西啦。

另一方面，NetFlix同 Google合作，推廣告了

12. 順手講埋，另一單。大家知Netflix股價插咗水，表面係因為上客量見頂—但其實人人都知有呢日，更大嘅元兇當然係估值，加上市況唔就。留意，公司係賺錢的。

13. 我本身都有買，輸錢就冇計，但值得思考下。以前寫文都講過，我覺得成件事係有啲奇怪。好似人人都係輸家，NetFlix作為龍頭，固然唔多掂，有錢賺但唔係太好，其他嘅，直頭輸錢—你唔覺得有問題？

14. 既然消費者嘅習慣（特別係後生嘅）變晒，我覺得冇可能長期會咁，點都會有啲方法賺到你錢。正如我上網嘅年代，廿幾年前，上網所有嘢係免費嘅，老奉的，冇人夠膽可以收錢，甚至有人覺得根本冇可能收到錢—但你見打後，隨住你個個都上，個量夠大，又變咗你生活一部份，自然有方法賺錢。

15. 串流呢個行業又點？量就冇得加架啦，要訂嘅都訂晒咁滯啦。但，我一路認為可以加價。NetFlix好似一百幾十蚊任睇，啲友仲要幾個分享一個。但入場睇套戲都百幾蚊，一家大細食埋爆谷六七舊水都唔出奇—成件事係有啲問題。

16. 但當然，另一個玩法，係落廣告，亦係我之前有提過嘅。而家就見到NetFlix真係同Google合作啦。

17. 想講嘅係，呢啲就係新嘅商機，唔知最後Netflix贏家定Google贏家，但照計雙贏。你睇牌面當然Netflix細好多情況又嚴峻啲，但亦唔係得Google一間做到數碼廣告，你太辣嘅，我可以part第間（不過Google其實都好惡了）

18. 想講嘅係，困境下，啲公司搵商機，開源節流—其實亦真係Big Tec嘅機遇。估值當然受壓，但生意似乎一路有得做，股價正路都係之後會上返嚟。

19. 一向都講，通脹對股市最大嘅影響，唔係嚟自打擊盈利，係個估值。不幸言中，而個估值嘅打擊亦大過我預期。但，而家點都係值得買，多過值得沽。

為甚麼我不買TQQQ

20. 好，講一大輪，「咁即係點？」。即係，買Big Tech，但而家叫你單獨買一隻你都未必敢，咁簡單啲，買QQQ吧。我個個月都買緊，如果係大公司嘅，根本好多唔係有咩大問題（可能個別幾間會），只係估值問題，遲早都係會上返去。但邊個跑出，真係極難估。你只睇FAAMG都好，你要剔缺點，講死穴嘅，差不多間間有，「平嘢冇好　好嘢冇平」，過去幾年，都好似係各有上落咁（但又不過，你睇市值都見到，似乎蘋果同微軟係略為秤先，Facebook係略為不及嘅）

21. 所以，唔使搞咁多，買晒佢吧。事實個股我都5隻有齊，你唔想咁玩嘅，咪QQQ

22. 但順手講埋，就唔好走去買TQQQ，趕住投胎咩。煩都講多次，之前有啲讀者話咩諗住供一年TQQQ，好似話搵錢移民。切忌咁諗。真係畀你好彩贏到，最後都會輸返。

23. 記住一樣嘢，市場不可測，長期（但我講緊十年八年）都仲可以大約估到。但你估一年嘅，真係冇可能「諗住」發生乜，甚至可能你估嘅嘢啱，但個市場忽忽地唔理性，都係會出現。時間係你嘅朋友，越急就越難。10年贏10倍，應該易過1年贏1倍

24. 而另一種問題，都提過，所有槓杆ETF都有嘅數學問題。我買QQQ嘅，今日納指跌10%，聽日升返10%，當然輸錢，但我只係輸1%—但我買TQQQ呢？放大，我今日輸30%，聽日贏30%，我輸9%—留意輸錢唔係放大咗3倍，係9倍。

25. 好啦，「如果贏錢呢？」，今日納指跌5%，聽日升10%，我買QQQ，贏4.5%。我買TQQQ，今日輸15%，聽日升30%—我贏10.5% —但，唔足3倍架喎！

26. 見到冇？輸，你就可以輸多個3倍，贏，就往往冇3倍　—而我仲要未同你計，TQQQ嘅fee高過QQQ一截

27. 當然以上例子數字有啲誇張，你亦可以用其他數字去試下。但原則不變。你急，想放大，其實係一埋枱已經蝕畀人。

28. 點解會有呢種現象？其實只係一個數學遊戲。而不存在人地「昆你」，至少在香港，我同啲ETF發行商講talk，佢地都主動講呢個問題　—　就係費事你之後鬧佢告佢。咁願者上釣。

29. 因為人地講到明，所謂3倍，係daily咁計。但你一路每日碌落去，就唔係嗰回事。你可以搵啲再極端啲嘅例子，例如跌25% 升33%又跌25%又升33%，理論上返返原位，但如果你每個3倍，就變咗跌75%升99%又跌75%又升99%—輸咗75%！

寧願你30萬買QQQ，好過10萬去買TQQQ

30. 再講白啲，我唔知你地係咪好似我咁stay 100% invested。唔係嘅話，我寧願你30萬買QQQ，好過10萬蚊買TQQQ。

31. （如果你兩年前問我，我甚至覺得你做槓杆去買QQQ，都好過你買TQQQ—雖然兩樣我都反對，但你真係做賭仔嘅，寧願你孖展放大，好過用產品入面嘅槓杆。又，點解兩年前問我先咁答？你夠聰明嘅應該估到—嗰時利息平。而家就唔好了）

32. 而仲有最後一個問題：你嘅心理。計死數都仲容易，但實戰呢？你個倉一個星期跌10%，好多人都叫救命，但都仲有唔少人頂得住。但跌30%呢？包你訓唔著覺，胡思亂想。如果你另外仲有做槓杆呀，冇收入呀，養住成堆仔女老婆四大長老呀，仲驚，包你嚇到止蝕打靶—然後就算之後反彈你都冇仇報。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。