再答大家港紙，加息之類問題 (Patreon)

前言—金融嘅嘢，啱定錯，好快見到嘅（趕時間可唔睇）

美國加息，係加乜息先？拆息定債息定存款息定供樓息？唔識。

埃汾話香港冇跟加息，但我見余偉文個「貼現窗利率」加咗喎，乜嚟？

港紙拆息「市場機制」喎，係咪即時加0.75厘？你話呢？

1個月港紙拆息兩年新高—先0.6厘，梗係過低啦！

咁就算唔加prime，供樓負擔咪會大升咯？爆煲未？

咁Prime又係乜春？點解銀行唔跟美國加？有錢唔賺？

咁但，金管局每接100億港紙，銀行體系結餘就少100億喎

得3000億，7月8月咪清零？

「其實乜嘢係銀行體系結餘」—唔呃你，100個人都未必有1個知

到底銀行體系結餘幾多先夠？「其實可以好細」

其實銀行係咪合謀定價坐低一齊加一齊減？

咁即係幾時加prime？「快啦」

加息喎 負擔比率升喎 啲友咪供唔起樓 咪負資產 銀行咪爆煲

講到尾，「其實咩叫走資」？點解走資港股唔跌？時辰未到？

港紙弱勢？你都CLS，港紙不知幾Q強勢。

前言—金融嘅嘢，啱定錯，好快見到嘅（趕時間可唔睇）

1. 星期一晚美國冇市，香港又靜，所以今日專題，再答下大家關於港紙呀，加息之類嘅問題。

2. 但其實，金融嘢有樣嘢好—你會見到結果嘛。即係你吹政治水嗰啲，講一大輪，無從驗證，有啲人話習近平已經死咗，普京都已經死咗，金正恩又死埋，拜登都死咗，全部替身。希拉莉就蜥蜴人。香港已死。呢啲全部都係浪費時間—正如你每一日都可以話大陸會打台灣，咁但你係投資者咁點？日日沽空台股？台灣人又點？日日縮在防空洞？

3. 好多人不停擔心，但有冇睇過自己諗嘅嘢，係咪啱？好簡單，上面個表睇到，金管局第一次入市，5月12日。第二輪，係6月14日。

4. 亦正如我上篇文講，美國加0.75，金管局「接錢」嘅力度會再大啲，我話埋畀你知超過100億—有冇老點你？但股市又點？十分好喎，跑贏晒美股

5. 你睇下個恒指圖，我諗我都唔使再多講。你話咩「走資」嗰啲，同你講理論你又嫌太長睇唔明（香港股市日日成交千幾億……），咁睇實驗結果咯。你見兩次金管局入市後，港股都係升幾日嘅。咁仲唔夠？

6. 定係你想話我知，「影響冇咁快見到？」—咁就仲好笑。即係7.85嗰日，如果跌嘅，就係「走資」影響。唔跌嘅，就係「時辰未到」，然後打後365日只要有一日跌，「拿而家見到影響」—你唔覺得好荒謬？

7. 咁定你話我知，「走資股市都可以升」—如果係咁，咁我仲使乜理乜嘢係走資？我唔明做乜啲人咁鍾意討論呢啲完全冇意義嘅問題。正如我在Facebook都有討論，香港玩唔玩完，又如何？點先叫玩完？未玩完嘅，你見啲友係咪又搵到錢？玩完嘅（實情講咗25年啦），又係咪搵唔到錢？講到尾，係睇你自己。

美國加息，係加乜息先？拆息定債息定存款息定供樓息？唔識。

8. 好啦，正經。美國加息講咗，咁香港有冇「跟住加」？某程度上問錯問題。但既然有讀者問，可以呢度講下。

9. 首先煩氣講多次，美國加息係加聯邦基金利率，Fed Fund Rate就只係呢樣嘢，實際上係佢地會入市控制個利率。咁你話債息升，亦都會係受聯儲局幾直接影響，理論上短期嘅債息最會受影響，我知道三個月後嘅聯邦基金利率會升1厘，咁3個月嘅債息當然都會升，如此類推。

10. 至於長債其實係另一種機制，主要市場主導。

11. 最後，係美國嘅拆息，你見好少人講。但即使你在香港或其他市場，因為度度都有美金交易，所以都會見到美金拆息。好多地方有得睇呢個拆息幾多。咁同短債息嘅情況差不多，聯儲局加息—實情係只要大家覺得佢會加息，拆息當然都會升。下面會再解多次。

埃汾話香港冇跟加息，但我見余偉文個「貼現窗利率」加咗喎，乜嚟？

12. 到香港呢？有讀者提起金管局個「貼現窗利率」—有啲人以為呢舊嘢係類似聯邦基金利率，超錯，都話香港行聯匯，冇自己貨幣政策。金管局唔會有十八區聯儲銀行坐低開會的，差不多每次都只係跟住美國郁。而呢個東西，實際上係銀行「緊急」同金管局借錢嘅利率，你見平時近乎冇人講，同市場各種嘢近乎冇關係。

港紙拆息「市場機制」喎，係咪即時加0.75厘？你話呢？

13. 咁仲有，港紙拆息，HIBOR，H，要睇呢度有。由於係市場機制，所以會大約跟返美金嘅拆息—不過可以偏離，陣間解。

14. 但，有讀者以為係即時加0.75厘，超錯—你可以Google下，或者我貼銀行公會網頁都有舊數字，必定係慢慢上（但又未必要好耐，總之唔係一日）。

15. 點解？因為，美金拆息都唔係一夜跳0.75厘嘛！

16. 拆息唔會一夜間跳0.75%—你估真係個個第朝起身先知加75點咩，大家之前會估，估啱嘅咪可以賺到錢，我覺得市場低估加息力度嘅，咁我係銀行，點都唔拆錢出街，留返遲下拆息升先—冇人借錢出街，拆息咪自然升。相反，我估聯儲局唔會加得咁勁，你班友未醒覺嘅，我咪趁而家個息仲高，不停拆錢出街鎖定晒—咁不停拆錢出街，咪自然壓低個拆息（你見好多活動都係呢種咁嘅feed back loop機制，恒溫器咁 ，港匯個情況都一樣）

17. 況且，港紙拆息未必跟足美金拆息，原因好多。但正如之前提過，偏離得太多，例如港紙拆息太低，就會有銀行去套利。借平息嘅港紙，存貴息嘅美金。咁呢個過程因為將啲港紙轉晒做美金，自然會令港紙匯率受壓，就你見到嘅7.85。然後搞搞下，金管局就會入市，接咗啲友沽嘅港元。咁你見市場上就少咗港紙，港紙少咗自然物以罕為貴，個拆息咪會拉高返，直到個套利誘因消失為止。（記得背熟呢段）

1個月港紙拆息兩年新高—先0.6厘，梗係過低啦！

18. 好啦，去到呢個位，貼圖。上星期嘅，但而家1個月拆息都講緊只係0.65厘，分別不大。

19. 首先見到，而家先0.65厘，何來會一夜間跳0.75厘？

20. 我話你知，呢個拆息，梗係偏低啦！有排升！升到幾多難講，但有排升。

21. 點解咁講？因為你睇返1個月嘅美金拆息，1.6厘咁上下—順手提埋你，美國今年加息三次，25 50 75，夾埋1.5厘，而家聯邦基金利率1.50-1.75厘，見唔見個美金拆息就在呢個區間？大約跟到的。

22. 又再睇埋，3個月美金拆息去到2厘樓上，點解？因為7月仲會再加息嘛（其實仲有9月，但只會踩到幾日，9月議息係20-21號）。如果個預期一路大，例如有人估加1厘，咁呢個拆息咪會再上。

23. 美金拆息1.6厘，港紙拆息先0.6厘多啲，港紙拆息梗係過低啦！未必會衝到同美金一樣1.60，但好大機會有得升—唔好忘記美金拆息本身亦好可能仲有得升（仲有得加息嘛）。

24. 咁港紙拆息低咁多會點呀？解過好多次啦，啲友咪會借港紙，存美金，而呢個過程咪會不停將港紙轉咗美金，所以不停有人沽港紙，咪會7.85，金管局咪接錢，然後市場港紙少咗，供應少價格咪升，拆息咪會升，直到接返近啲　—　全部一早預料到啦，我唔明做乜個個好似發現新大陸咁？

咁就算唔加prime，供樓負擔咪會大升咯？爆煲未？

25. 而留意，只要你個拆息一路升，如果你係用H按（H for HIBOR， 港元拆息）銀行收你嘅供樓錢，已經多咗，根本唔使做任何嘢。你咪會供多咗，我都已經係啦，銀行根本唔使「加息」。

咁Prime又係乜春？點解銀行唔跟美國加？有錢唔賺？

26. 之但係，仲有個prime．因為有啲貸款用prime定價，亦唔只係樓按，例如你銀行借孖展炒股票抽新股，往往都有關。樓按呢？過去N年都好少人用prime相關嘅按—但留意H按都會有封頂位，同prime相關—所以其實加prime，銀行都可以收多啲錢。

27. 咁但，你見美國加咗3次息，1.5厘，香港嘅prime，完全冇郁，今次都冇。點解唔加？有錢唔賺？因為，呢個係一個有競爭嘅社會。你加價，可能隔離行唔加，就搶晒你生意。

28. 再講白啲，市場實在太多錢。同你嘅認知完全相反，你見個銀行體系結餘，仲高過上次加 prime嗰陣。仲有，公海我費事講，但你見到，2020年，反修例呀國安法呀爆疫之下，個銀行體系結餘，係咁升　—　當然係因為美國減息！咁但咪證明，根本唔關咩政治走資唔走資事。

咁但，金管局每接100億港紙，銀行體系結餘就少100億喎。得3000億，7月8月咪清零？

29. 不過，正如上面解，港紙拆息低嘛，咪會不停有套息，咪不停7.85，金管局咪不停接錢。但而家往往係100億100億咁接，明顯多過之前。

30. 而事實係，每接100億，其他嘢不變的話，個銀行體系結餘就會少100億。咁而家結餘先3000億（其實冇了），日日走100億，咪7月8月冇晒？咪爆煲？

31. 你見我在Facebook 成日講個比喻。我一年減咗20磅（是真的），而家200磅（唔怕畀你地知），咁係咪10年後我會變人乾？梗係唔係啦！減到140磅（我幻想下啫）仲邊可能一年減到20磅？

32. 同樣地，你個銀行體系結餘，跌到咁上下，一路縮落去，你會見到啲拆息開始升了。如果升到同美金拆息差不多，上面嗰啲套利機制，就冇人玩，就唔會再7.85，就唔再走資。留意，實際上唔使升到真係一樣，往往係有啲水位，啲人都未必會去套利，原因好多，不再解（但例如，如果只係爭少少，套利者唔會去搏啫—陣間你真脫勾我咪輸到趴街？又或者，你唔係放棄聯匯，但re peg去7，或者9．套利者都會輸好多錢。所以佢地唔會不停咁堆土機前執銀仔，怕輸間廠）

「其實乜嘢係銀行體系結餘」—唔呃你，100個人都未必有1個知

33. 好啦，其實好似從來冇認真解過咩叫「銀行體系結餘」—都真係有啲難解，因為，咩係「錢」？好多人概念都唔同。但好簡單講，「銀行體系結餘」就係銀行每日收工嘅「現錢」—咁你諗到，銀行係好唔願意持有呢啲嘢嘅，因為冇息收。我以前在蕉行返工，實情任何一間銀行，都會臨收工將啲錢拆晒出去。留低做乜？冇息喎！例如1億港紙，而家隔夜拆息0.22厘嘛，咁一晚都600蚊息喎。聽落婆乸數，但一個月就兩皮嘢，「我嗰時12000人工咋」，即係夠出我份糧有突。況且，當年啲拆息冇咁低啦。（我做過呢啲嘢，咪有資格講）。

34. 至於有人問，「咁你銀行夜晚會有人在ATM提款架喎，唔使留錢？」—冇錯係丫，但嗰啲係另一舊嘢，你搞清楚「銀行嘅現金」同「機入面嘅銀紙」，兩樣嘢。況且，你提款嘅銀碼亦都唔會大（你估你好多錢咩），況且，亦有人存錢。同埋，咁你咪見，有時啲ATM提晒錢，咪冇錢提咯！第朝請早。

35. 記住，銀行係好唔願意有「現金」的，當我稍為多啲錢，我拎去買美債收3.5厘息唔好？做乜要留「現金」？

36. 所以你見，銀行體系結餘，個數真係細得可憐，3000億。我咪寫過咯，每人五皮嘢左右。唔好將呢個同「存款」或「銀行資產」搞亂，香港銀行存款，寫過啦，15萬億，港紙都7.5萬億。你睇呢個數，同「銀行體系結餘」，爭好多好多。

37. 所以，唔好再望住個「銀行體系結餘」，以為「爆煲」。一來日日100億，都唔會代表30日後冇晒3000億。二來，就算一落跌，其實都冇乜咁奇怪—你望下2019年？800億咋！

到底銀行體系結餘幾多先夠？「其實可以好細」

到底銀行體系結餘幾多先「夠」？其實好少，幾百億都可以，甚至再少都得，但去到太細個拆息會拆到好高，都會有啲市場波動。好極端嘅，甚麼98金融風暴嗰時，你見拆息上到300厘，銀行體系結餘差不多零，咁你借錢咪貴到趴，咪冇人再玩。但當然有人話亦都一定打擊咗樓市同股市（但我覺得未必關事）

其實銀行係咪合謀定價坐低一齊加一齊減？

38. 講返，正路地，一路100億100億咁去，就會見到拆息升。上面解過啦

39. 然後去到咁上下，就會見到prime升咯—幾時加prime？就極難答。真係正如官方所講，「銀行會依照自己資金成本去決定」，即係乜？即係，銀行都有資金成本，可以係拆借返嚟（咁成本肯定升啦，拆息不停升），可以係啲活期存款（最平嘅東西），可以係定期存款（你見加緊息）。去到咁上下，咪會加prime，但太早加又唔得，有競爭嘛，你啲客咪全部轉按去第間銀行。

40. 順手講，有人問，到底銀行係咪打籠通，合謀定價？成班坐低一齊加一齊減？

41. 官方答案，香港一早取消咗利率協議，大家有競爭。順手又講，都唔係取消咗好多年，2001年取消，冇錯，英殖年代就合謀定價。亦話埋你知，正因為取消利率協議，當時銀行當然死都唔制，討價還價嘅後果，就係變咗銀行可以賣保險賣基金做股票交易—你見外國唔係好多地方可以咁的。大陸都唔會，以我所知日本美國歐洲都冇。

42. 好啦，唔要官方答案，埃汾嘅答案呢？佢地係咪打籠通？答案係……yes and no，但我傾向no．你應該聽過，香港有一期係有三個prime的（N年前寫過）（https://lkdin.io/3kTX），如果合謀定價，就冇呢回事。佢地會傾，或者打招呼，但各為其主，唔會永遠跟晒對手，亦想搶大家生意（否則邊得嚟咁多轉按優惠？）。但當然，細銀行，就只係price taker，人地加佢咪加，例如我以前做蕉行都係。

咁即係幾時加prime？「快啦」

43. 之前都冇講過，實情你可以睇一樣嘢，可以睇個prime HIBOR spread，prime同拆息之間嘅差別。因為拆息唔多唔少係啲銀行（特別係細銀行—大銀行好多平價活期存款）嘅成本，拆息一路升，佢地就會想加prime—以往經驗，可能個spread3厘以下就加。

44. 香港有所謂大P細P，唔同銀行有唔同（咪話有一期係3P），但講緊5厘幾，咁即係，你見個拆息升到上2厘樓上，就可以估會唔會加prime

45. 不過最後留意，未必真係日日100億咁走嘅，你見最新都慢咗啦—唯然我估今次個速度會幾快，因為美國加息加得急嘛。

加息喎 負擔比率升喎 啲友咪供唔起樓 咪負資產 銀行咪爆煲

46. 最後講埋，對樓市嘅影響，我覺得係冇乜。因為香港人真係好有錢！同埋金管局咁多年嘅做法，都係令到買到樓嘅人好有實力，或者抬好大舊錢，或者老豆好有錢，乜都好。而因為個首期大，即係，你死你事，你供唔到樓，銀行收返你，都仲有好大水位。

47. 你問我，當然移民潮嘅影響大啲，雖然好似冇乜人統計過，有幾多人係賣咗層樓，有幾多係在香港放租拎收入，亦可能有啲睇定啲先，分分鐘再返嚟。但我目測我識嘅人，就似乎都唔少係賣咗層樓，包括我老母。

48. 咁呢個當然有影響，但，「仲有大陸佬嘛」。所以我真係冇乜點擔心過香港樓市會大跌，仲有咁多辣招喎，大把工具可以放鬆。

49. 但搞清楚，唔會大跌係一回事，會升係另一回事，你應該去投資又係另一回事。

講到尾，「其實咩叫走資」？點解走資港股唔跌？時辰未到？

50. 有人問，咩係「走資」。答案係，我都唔知。亦都唔care，我唔明做乜有人care

51. 如果你講嘅係「沽股票」，咁，日日千幾億成交，有千幾億買，就有千幾億沽架啦！有乜特別？如果你講係金管局堆嘢，咁我寫咗啦。況且，一百幾十億—咪話一日股市成交都千幾億。

52. 而講到尾，有人不停話「走資」，但港股一路升，咁，即係點？如果「走資」都升，咁我理得佢走唔走資？相反，如果一路跌，你話冇走資，又如何？

53. 我係個好實際嘅人。只會同你講應唔應該買，而似乎咩「走資」，根本完全唔影響。

港紙弱勢？你都CLS，港紙不知幾Q強勢。

54. 最最最後，一次講埋。其實，港紙由7.75跌到7.85，講緊對美金係跌……1%。有人話港紙弱勢，我心諗，傻的嗎？

55. 你諗住去日本旅行嘅，你睇下yen對港紙跌幾多？你去英國移民嘅，你睇下英鎊對港紙跌幾多？你買歐洲股嘅（我都有），你睇下歐羅又跌幾多？

56. 然後有人話，港紙好弱，不停畀人沽。下？傻的嗎？

57. 計我話呢，港紙直頭「過強」。認真的，日圓韓圜係咁跌，香港就真係唔方唔冇競爭力啦！好現實架，我當你係台仔坡仔，去旅行，係咪去日本韓國抵好多？唔好忘記香港啲嘢本身都貴。

58. 不過，以上呢啲又只係好膚淺嘅睇法啫。你要明白，香港由頭到尾都唔係做咩製造業，「貶值」振出口，唔make sense（其實第啲國家都未必得，雖然日本電器就快平過大陸）。至於旅遊，「你估真係咁多台仔嚟香港咩」，大家都知，大陸佬嘛。

59. 原本唔想篇文寫得極長，而家都7000字，有機會再細講。但唔該你睇多幾次。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。