美股：保持樂觀。我仲樂觀過之前。因為市場夠晒悲觀．羅素3000指數入面，167間公司市值低過手持現金，史上最高．「早早叫你買港股」。螞蟻變金融控股公司，彈出彈入，玩乜？5間央企會轉為「國有資本投資公司」，玩乜？油價大瀉，OPEC+ 增產，美國出埋行政手段，通脹見頂啦啩？歐洲民意開始動搖，烏克蘭又話埋枱傾和談，停戰啦啩？ (Patreon)

美股：保持樂觀。我仲樂觀過之前。因為市場夠晒悲觀．

羅素3000指數入面，167間公司市值低過手持現金，史上最高．

「早早叫你買港股」。

螞蟻變金融控股公司，彈出彈入，玩乜？

5間央企會轉為「國有資本投資公司」，玩乜？

油價大瀉，OPEC+ 增產，美國出埋行政手段，通脹見頂啦啩？

歐洲民意開始動搖，烏克蘭又話埋枱傾和談，停戰啦啩？

1. 週末寫返星期五嘅港股同美股，雖然市況算靜，但諗到好多嘢寫。留意星期一晚美股冇市，可能寫返篇港紙update．冇耐性嘅，可以睇我星期一在明報篇文，attachment 有

美股：保持樂觀。我仲樂觀過之前。因為市場夠晒悲觀

2. 簡單講，我係相當樂觀嘅，甚至樂觀過之前幾個月。

3. 我當然係指投資。大家明顯發現呢幾個月我都少咗講個股，事實亦冇乜買。但主要原因係因為我冇乜閒錢，同埋自己都一路想將個組合tune返去多啲接近指數。所以呢期少買少講，但唔等於你唔可以買。況且，我都一路keep住每個月買指數ETF，一路加大倉位，一路只買不沽—雖然今個月仲未買，而上個月買咗嘅都仲未貼。但冇呃你。

4. 另一角度講，我唔買個股係因為我已經買落好多！但你唔係的話，當然可以照買。呢樣嘢都講過多次，係要睇你成個組合，所以點解好難就咁畀個冧把你，你就咁問我邊隻邊隻買唔買得，亦好難答到你。你好多港股嘅，而家當然應該買美股。你好多美股嘅，而家當然應該買港股。

5. 美股星期五晚卒之回穩。

6. 留意債息回返些少（同上面篇文內文寫嘅嘢唔同），去返3.2厘左右，自然見到納指做得好過道指。但上個星期呢，美股都好差下，標指跌6%，道指同納指跌5%，2020年爆疫之後最差嘅一個星期。過去12個星期，跌足11個星期。

羅素3000指數入面，167間公司市值低過手持現金，史上最高

7. 但，跌夠未？固然有啲人會不停講衰退通脹，但亦有唔少讀者知道呢啲嘢總會完，總有啲位係應該買。咁到未？一如以往，好難準確咁答你。但呢刻我覺得係似樣嘅。

8. Fear and Greed Index已經去到「極度恐慌」，呢啲之前解過。

9. VIX去到30，亦解過係個幾好嘅指標

10. 咁但，仲有冇其他嘢？係有嘅。可以睇返個信報美股round up，入面有提到幾有趣嘅嘢（所以，唔好只係睇標題）。

11. 羅素3000指數（你當係3000隻啦）入面，有167隻，市值低過手持嘅現金　—留意我唔知佢係講gross cash（只計手頭現金同埋marketable securities．定義你可以自己搵，就係啲可以好易賣得出嘅證券，留意可以係股票可以係債券），定net cash（減埋負債）—但我估似乎係gross cash

12. 但，本身167個數字都唔重要，重要係—呢個數字，係史上最高了！冇錯，仲高過2020年3月（都未夠90間），或者2008金融海嘯時（當時係165間）

13. 而我搵返原文，有圖你睇，見到呢個幾次呢個數字高嗰時，都係入市良機。當然包括2009年2月，同埋2020年3月。

14. 點解？好合理啫，因為出現咁情況，代表市場相當恐慌，有啲公司嘅價值被嚴重低估。所以，往往係見底嘅訊號。

15. 但留意返，呢個數字係數公司數目—甚有可能只係啲細公司係咁，不代表成個指數。

16. 但如果數市值呢，2009年，呢堆「市值細過現金」嘅公司，總值430億。而家係550億—但亦唔好忘記，指數同當年比都升咗好多，公司嘅規模都大咗。

17. 又，你想買羅素3000指數，都係有ETF的，但照計不必要，反正佢都係大盤指數，同標普指數分別不太大。

「早早叫你買港股」。螞蟻變金融控股公司，彈出彈入，玩乜？5間央企會轉為「國有資本投資公司」，玩乜？

18. 好啦，港股方面，不重覆太多，星期五在美股大插後都仲有得升，上星期都要跌，但只係700點，好過美股好多。早早叫你買，你見今年跑贏晒美股，近期更明顯，最好笑就係咩7.85之後明顯更加跑贏。老早叫你分散，講到口乾，唔聽嘅我都冇計。

19. 值得講嘅嘢，兩單。第一單係5間央企會轉為「國有資本投資公司」。咩回事？我都唔係好知。你可以睇下百度，但我睇完都係唔多明。好啦，聽落好似係好事嚟嘅，況且港股估值低迷，有得炒啩。

20. 邊5間？國投、華潤，招商局，中國建材同中國寶武。咁你大約可以睇下有乜公司，中國建材就梗係3323。華潤嘅，可能係華潤電力836華潤水泥1313華潤啤291好炒過華潤置地1109。招商局呢？仲難估。但照計唔會係招行3968，你可以望招商局港口144，或者招商局置地978，甚至隻房託1503。

21. 第二單，更加神奇。又係阿里巴巴，又係螞蟻。上次話上市，彈出彈入，但最怪係而家都未知即係有得上，定冇得上。然後而家又話可以畀佢轉做金融控股公司，但話咁快又否認

22. 我就唔知搞乜了，但幾肯定嘅係，呢啲嘢一路有得炒。但你就唔好有好消息先飛入去。

23. 事實見到，原本阿里巴巴美股抽升成10%，但出咗消息話食詐糊後，又再跌返落嚟。幸好成堆中概股整體都不錯。

24. 拿，我真係舊年已經叫大家分散港股。

油價大瀉，OPEC+ 增產，美國出埋行政手段，通脹見頂啦啩？

25. 最後，講一講政治，都算係。而我估個結論係：通脹見頂，應該都樂觀嘅，好快又可以有咁嘅期望。

26. 首先見到嘅，當然係油價跌。而個故事係OPEC+（石油出口國組織及盟友）肯增產。但點解中東佬之前唔肯？又真係政治了。事關沙地阿拉伯，冇民主就梗，而早排啲人權紀錄真係麻麻（實情，咁耐以嚟有好過？），走去肢解咗個美國記者（是真的），拜登一路都唔多肯見嗰位仁兄，以免畀人覺得支持暴政云云。

27. 咁但，真係，政客嘅嘢，最緊要係選舉。而家擺明係放軟咗，講到尾，為壓低油價，想人增產，乜都有得傾。之前十惡不赦嘅委內瑞拉都有得傾。

28. 而同時間，甚至出埋行政手段，唔畀出口—留意呢個我都早早講過，好可能你在歐洲都會見到。歐洲情況仲難搞，唔知點壓倒通脹，我相信根本冇乜可能大手加息或縮表，咁當然最簡單係行政手段，唔畀加價。

歐洲民意開始動搖，烏克蘭又話埋枱傾和談，停戰啦啩？

29. 而另一邊廂呢，烏克蘭嘅情況仲有趣。歐洲在情在理，當然企烏克蘭一邊，既為公義，亦要擔心自己安全，更希望削弱俄羅斯。選民民意亦係咁，之前都算真係相當支持烏克蘭。但慢慢落去，可以支持幾耐？

30. 由於歐洲國家多數都係民主選舉，咁講到尾，都係選民嘅意願。但你見到啲選民，心態似乎開始有啲唔同。一方面，當然俄羅斯係侵略者，當然支持被侵略嘅烏克蘭—但，即係難聽啲講，「打還打，唔好搞到我」

31. 見到俄烏戰爭對歐洲嘅一個副作用，就係物價飛升（早幾日講嘅債息大升亦係同一原因），咁，殺到埋身，民眾又有幾支持？

32. 你可以話「人人都自私」，亦可以話「人地先冇咁短視」，任你講。但，調查應該唔呃人。你可以睇下ECFR嘅調查—當然歐洲選民都仲係認為俄羅斯係禍首。但，希望「停戰」嘅人，多過希望烏克蘭得到「正義」嘅人（但，其實仲有一大堆係一半半嘅）。留意，支持「停戰」嘅，係認為即使咁樣代表烏克蘭會失去領土，都應該停戰。詳情，你可以睇Guardian嘅報導（呢檔係一檔比較中立嘅媒體）

33. 亦都同意地，你見雖然法國嘅馬克龍，見烏克蘭總統澤連斯基時，冇話「迫」佢和談。但明明早幾日，先講明話「烏克蘭必須與俄談判以結束戰爭」。

34. 咁到底邊樣先真？都幾簡單，你唔使睇啲人講乜，睇佢地做乜就知—最新消息，烏克蘭又話8月埋枱傾了。雖然仲話有啲底線，但近來似乎俄羅斯進展OK，烏克蘭有幾多議價實力？仲有，留意下，個底線係要俄羅斯撤軍，返返2月24號之前嘅位—但，「即係唔堅持克里米亞半島了」—即係，都係「冇咗」領土。所以再講一次，唔好只係睇啲人講乜。

35. 好啦，呢度唔係政治分析。我最關心嘅就係，似乎停戰有得傾，再加埋上面講咗美國亦用盡其他方法壓油價　—咁，通脹係咪似乎壓得住落嚟？拜登政府己經不停出招，唔希望今年中期選舉輸得太難睇。怕且，點都有得用啩

36. 所以，應該通脹就快見頂，股市見底啦啩？

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。