美股跌成咁，可以講乜？「但冇理由而家沽」升晒嗰時買，多數中伏，人人都知。咁而家唔買，幾時先買得？壞消息大跌又唔敢買，冇消息大跌亦唔敢買，咁幾時買？港股大股又跑贏，發夢股升幾倍，做乜一定要買美股？歐央行緊急會議；其實講咗乜？橋水大手沽空歐洲股，最大嗰隻係沽空ASML (Patreon)

美股跌成咁，可以講乜？「但冇理由而家沽」

升晒嗰時買，多數中伏，人人都知。咁而家唔買，幾時先買得？

壞消息大跌又唔敢買，冇消息大跌亦唔敢買，咁幾時買？

港股大股又跑贏，發夢股升幾倍，做乜一定要買美股？

歐央行緊急會議；其實講咗乜？

橋水大手沽空歐洲股，最大嗰隻係沽空ASML

1. 今日又係有少少意外，所以晏咗出，講返星期四大跌嘅港股美股。另外，週末或星期一會出一篇，講返港紙啲加息壓力，港匯受壓之類

美股跌成咁，可以講乜？「但冇理由而家沽」

2. 先講美股，就真係全部散晒嘅。實情呢啲情況都好做到啲乜，但大家都知我一向睇法。你而家先去清倉，肯定太遲．點會貴嗰時買，平嗰時先沽畀人？如果你啲公司夠好，即使買貴咗，夠長嘅時間，怕且都係返到家鄉嘅。

3. 況且，而家沽完，又點？咁幾時買返？我當你而家100蚊沽，之後佢再跌80蚊（都唔好講你沽完佢即彈咁慘先），咁幾好啦。如果升返去90蚊，你可能都仲敢買，但又可能諗不如跌返平啲先—但如果佢升返去100，110，就十個有十個都唔肯再買了，呢個係好正常嘅心理，之前100蚊沽過，點會肯110買返？然後可能隻股票可以升幾倍。

4. 即使你係一早沽咗，都會面對呢個問題的。避過咗大跌，咁但，幾時買返？可能你避過咗三成嘅下跌，已經好叻啦？但之後係錯過幾倍嘅升幅。

5. 不過，講呢啲實情你都未必入耳，現實係美股星期四晚又大插。極之難玩，我亦都唔知可以點捉。你見星期三晚議息聲明後，都係掉頭轉升，頂多升幅由高位冇咁啲。點知星期四先嚟大跌。我就唔知可以點樣預先估到了。而星期四晚仲要係債息回返落嚟—當然你可以話，係市場Risk off，沽走股票，泊晒去債券。

6. 照舊，亦係啲舊經濟防守股跌得少啲，當然今年你美股要賺錢極難，除非你買中啲石油股—但即使有人買中，亦可能只係好彩，你可以睇下之後係咪長玩長有。

升晒嗰時買，多數中伏，人人都知。咁而家唔買，幾時先買得？

7. 你見跌市嘅原因，依然都係講通脹講衰退，咁但好肯定嘅係，經濟總有周期，呢啲嘢總會過去。但嚟緊每一日你都可以不停講呢啲嘢，咁係咪日日會跌？又好似唔係。所以你問我，能夠去做嘅，都只有閒錢就買入去。

8. 見標普指數同納指，分別跌3同4%，高位已經跌咗24%同34%—好難答到你咩位見底，但照計而家都係值得買，多過沽。

9. 其實最簡單嘅做法，唔係乜都唔買。輸錢係冇問題的，只係唔好輸得太多，輸得比別人少。

10. 又或者，好似我啲N年前嘅股票咁，有啲仲升緊幾倍—可能我100蚊買，由400蚊變咗300蚊，都係跌咗33%—但我係冇乜感覺的。但個關鍵係我冇早早震走咗。你夠早買，渣得夠長，自然坐得安心。

11. 照計講咗好多次，大家都應該身同感受，唔好貴一貴，升晒時買落去。過去一年幾買嘅，就中晒招啦，不能倖免。我都有過去一年幾買股票—但我唔係「只係」呢啲時間買嘛。

12. 咁既然大家都知道，升晒上去嗰時唔應該買（應該好易明）．咁跌嗰時唔買？幾時買？而家唔買？又係幾時？

13. 當然實際上，個個都係驚「買完再跌」—但亦講過，呢啲想法自欺欺人啫，實情你任何時間買都可能「買完再跌」，只係你有時「唔覺」—而嗰啲時間係最危襝嘅

14. 同樣地，我相信好多人都明白唔應該貴一貴時追。但而家買又驚。「咁幾時先買？」，咁講法，你即係想見底嗰一下買啦—但你稍為有經驗嘅都知，有冇可能？

壞消息大跌又唔敢買，冇消息大跌亦唔敢買，咁幾時買？

15. 好講2020年3月咁誇張，講到世界末日咁（事實亦真係好大件事，過去幾年經歷嘅嘢，真係百年一遇）。但就算係港股，今年3月見咗底，呢排相當強勢。當時3月你又敢唔敢買？當時跌乜？其實都冇人知（就唔係因為「抗疫不力」啦），然後你睇到的，「無緣無故咁呹」，搵唔到理由，啲人仲驚。

16. 好啦，壞消息大跌又唔買得，冇消息跌又唔買得，升晒又唔買得。咁幾時買？

17. 可以話你知嘅係，上個月我依然有繼續買股票。今個月都會繼續（遲咗啲，冇乜錢，但結果跌咗，平啲買，仲好）。呢啲就係最好嘅證明，講幾多都係假。「輸就兩份」

港股大股又跑贏，發夢股升幾倍，做乜一定要買美股？

18. 講開港股，近期表現真係相當唔錯。星期四就固然要跟美股跌，但跌 幅唔算太大。近排亦試過美股大跌下港股都照升

19. 甚至連啲中概股回調，港股都仲頂得住

20. 早早叫你分散，呢啲我都費事再重覆。不過今日嚟個新角度：睇下啲教育股

21. 話說啲教育股，升到癲。我當然冇叫過你買，亦唔會叫你買。

22. 但諗下，之前叫你地買港股，好多人鬧返我轉頭添。點解？美股升港股唔升咯（的確唔多爭氣）。即使我推美股，叫人買FAAMG，甚至QQQ，都仲係有人唔滿意，覺得升得唔夠快—事後見到，絶大多數人都係只睇（佢以為嘅）upside，而唔會理downside的。有啲買QQQ都唔夠，仲要TQQQ，明顯係趕住投胎。你睇，一兩個星期，你可以輸幾多錢？

23. 不過更奇怪嘅係，而家你見到美股啲發夢股死晒，教育股變咗香港嘅發夢股嘛—　唔少人最初買美股咪又係買呢啲嘢！就係貪升得快之嘛

24. 當然有人話，大陸啲政策難捉。咁呢個肯定係嘅。美股啲公司透明度高，又多資料搵到—之但係，呢個亦係一個好大嘅盲點。你有嘅資枓，人地都有。記住市場上，你知道嘅嘢，如果人人都知，係近乎冇用嘅。

25. 好啦，有分散作用，你聽唔入耳。今年港股跌得少過美股好多，又聽唔入耳。其實計高位，港股跌幅都同美股唔爭好遠，你都聽唔入耳。有埋發夢股買（我冇叫你買呀下），都仲係聽唔入耳。堅持只係買美股嘅，又唔知乜心態呢？

26. 當然，其實你問我，我都好相信長期多數係美股跑贏。但，各位嘅心態有幾「長期」？

歐央行緊急會議；其實講咗乜？

27. 講咗一輪心法嘢，講啲實際啲嘅嘢。之前講過歐洲嘅火頭，歐洲央行緊急會議。緣起係乜？大家都知美國債息升，咁其實全世界都係，歐洲都係，亦面對通脹同加息壓力。有啲財政同經濟較差嘅（以前有個名叫「歐豬」，但比較正經嘅傳媒係唔會用嘅），例如意大利，啲債息就升得好快。意大利債息一度升到上4厘，留意唔係好耐之前都只係1厘多啲。

28. 更值得留意嘅係，啲人會睇個yield spread，即係意大利同德國嘅息差。因為大家都係用歐元，呢個息差就已經減去咗歐元本身嘅息口，匯率風險等等，而只係代表「意大利差過德國幾多」（全部人都係用德國，因為係歐元區最大經濟體，亦係債息其中一最低嘅）

29. 咁見到呢個息差，之前都係不停升的。即係德國債息固然升，但意大利升得仲快。

30. 呢個現象，歐債危機時咪出現過。不過而家歐央行嘅拉加德畀咗個好聽啲嘅名佢，叫做fragmentation ，碎片化，

31. 不過，歐央行開完個緊急會，我都唔知佢地即係講咗乜。你地可以去睇下。

32. 一方面，話會限制債券息差。即係點？唔准升？升咁點？入市買？即係變相QE？

33. 但另一方面，佢又同時話，係令個債息正常化，唔係收窄息差。即係點？我理解係，即係如果拉得太闊，就會「做嘢」。但點做嘢？債息高，因為唔夠高冇人肯買嘛，咁點質人買？「除非你自己買」

34. 成件事非常之語言偽術，唔知我有冇理解錯，但真係見到，歐洲完全冇條件去去縮表。你加息縮表就會有可能好似美國咁，債息升架啦。

35. 即係點？感覺呢壇嘢，仲會再發酵，照計啲「歐豬」債息仲有得升。與其擔心美國或香港，我覺得似乎歐洲情況嚴重啲。

橋水大手沽空歐洲股，最大嗰隻係沽空ASML

36. 同場加映，就係Ray Dalio嘅橋水BridgeWater，大手沽空歐洲股票。其中大嗰隻，就係我持有嘅ASML

37. 首先講返，Ray Dalio寫書好睇，但近年佢檔嘢戰績認真麻麻，跑輸指數好多下。當然可能市好佢唔識玩，要災難時佢先一次過贏返晒，亦有可能。第二，呢啲沽空數字，當然都係滯後數據—而最大問題係，佢沽空10億ASML—但另外可以有好大嘅長倉，所以呢啲數字未必好有意思。而第三，之所以沽空最大係ASML—其實好合理，因為，ASML就係歐洲市值最大嘅公司之一

38. 點解會沽空歐洲股票？當然係睇跌，可能同樓上講嘅嘢有關，亦可能睇死歐洲經濟會重創。不過話說回頭，ASML做全世生意，而收入亦唔止係歐羅。所以好可能純粹係因為貴。而你見公司即使高位跌左一半（唔算太誇張啦），而家都仲係30倍市盈率樓上

39. 咁可以點？其實又係嗰句，冇乜點。唔通跌咗一半然後聽到有人沽空先低位沽咗佢？況且，我買得好平，我唔係900蚊買的—呢個先重要嘛。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。