果然係加0.75，但做乜市場預期忽然變晒？「唔係因為CPI咯」「點解加息0.75美金跌？」「唔係利率息差interest rate differential 咩？」（講英文型啲）下次加息又加幾多？加到幾時停？幾時先衰退？幾時先通脹見頂？通脹升溫？「聯儲局話好快見頂喎」仲炒加息？「識炒梗係炒減息」香港嘅嘢，昨日話咗你知啦。咪銀行體系結餘會跌（跌咗啦），金管局會接貨（接咗啦），銀行會加息（未加，但快了） (Patreon)

果然係加0.75，但做乜市場預期忽然變晒？「唔係因為CPI咯」

「點解加息0.75美金跌？」

「唔係利率息差interest rate differential 咩？」（講英文型啲）

下次加息又加幾多？

加到幾時停？幾時先衰退？幾時先通脹見頂？

通脹升溫？「聯儲局話好快見頂喎」

仲炒加息？「識炒梗係炒減息」

香港嘅嘢，昨日話咗你知啦。

咪銀行體系結餘會跌（跌咗啦），金管局會接貨（接咗啦），銀行會加息（未加，但快了）

1. 寫文時星期四下午，要去強檢所以遲咗出文。寫返星期三港股美股。實情見星期三晚美聯儲議息後，市場唔算太大異動，所以就留到今日下午先寫。

果然係加0.75，但做乜市場預期忽然變晒？「唔係因為CPI咯」

2. 加息0.75厘，對上一次加咁多係1994年，可能有啲讀者都未出世。整體嚟講，你可以話係「正面」嘅，至少議息後股市冇大插，債市匯市都穩定，亦冇乜太多人攻擊聯儲局嘅決定。

3. 第一樣嘢，議息前利率期貨市場已經人人估0.75厘，而我提過一樣好重要嘅嘢：聯儲局極少（我應該廿年未見過）做啲市場意外嘅嘢（除非係緊急減息，「咁叫得緊急梗係意外」），你估佢加咁多，佢就畀咁多，一般係為免市場太波動。咁你話如果佢見到市場估嘅同佢心諗嘅爭好遠咁點？就會不停咁吹風，調整返你嘅期望。

4. 昨日篇文都有講。即使在上星期五CPI數字出嚟之後，其實加0.5厘都仲係「主流」（但唔係99%嗰種），但真係兩三日間，大家就全部估0.75厘。我覺得唔止係巴克萊個分析員行先，令人覺得佢有內幕（事後睇可能真係有），更重要係WSJ之前嘅報導，講聯儲局會加0.75 —就人人跟住了。但WSJ呢個報導嘅來源係乜？冇人知，可能根本係聯儲局放風—因為臨議息前幾日，傳統上係唔會出嚟講嘢的（但，應該唔係犯法，只係一個慣例）

「點解加息0.75美金跌？」「唔係利率息差interest rate differential 咩？」

5. 好啦，市場反應方面，其實不太令人意外。正如我多次講，升有升嘅講法，跌又另一套narrative　—但一般嚟講，你見都係符合投資嘅第一原則：炒預期。所以你咪見到美匯加完息高位回落，美債債息都係高位回落咁咯　—　千萬唔好好似啲人咁低能去問：點解加完息美金反而跌呀？好多時都係 Buy on rum ours sell on fact

6. 美股方面呢，睇下道指，留意香港時間2點出議息結果。少少波動，大約見到係議息前反彈（之前大瀉咗幾日），出議息結果就插到轉跌，但之後低位大幅反彈，最後升幅收窄少少　—BTW，而家睇美期又再回軟返啲

7. 當中一個重點係，出完議息結果，仲會有鮑威爾嘅講話。你事後narrative嘅，大約可以佢嘅講話受市場歡迎。轉頭講下佢講咗乜嘢。

8. 咁你睇個股好，指數又好，都見到舊經濟冇咁好，科技股強啲，納指一路都冇轉跌。原因當然亦因為債息回順返啲。

9. 另外，仲有中概股繼續強勢的。

下次加息又加幾多？加到幾時停？幾時先衰退？幾時先通脹見頂？

10. 好啦，加咗0.75厘，不用重覆。唯一可以留意返，並唔係全數贊成。呢個本身冇乜太奇怪。不過你識問嘅，就會問反對嗰個係投乜。答案係佢投加0.5，唔係0.25或1.0

11. 幾時都係睇預期同前瞻，所以既然加咗0.75同市場預期完全一致，你應該問幾個問題：下次加幾多，加到幾時停，幾時先衰退，幾時先通脹見頂。至少你會想知聯儲局嘅想法（頭兩者佢地決定到，後兩者佢地都決定唔到，但至少睇下佢地點估）

12. 呢啲問題，實情睇一睇聯儲局嘅經濟預測（呢度係link），就有。

13. 但先答第一個問題，下次加幾多，係比較易答嘅。我在Facebook Page昨晚寫咗，下次（7月）都應該會加0.75，有少少畀標暊黨誤導咗。所以呢度唔再貼link

14. 鮑威爾講嘅係，下次會加0.5厘，或者0.75厘。留意，即係基本上排除咗加0.25（應該冇人咁估），亦排除埋加1.0（有人咁估咁叫）。咁到底0.5定0.75？佢都冇講明，亦係合理，只係話如果通脹仲係好失控咪0.75—有媒體捉住呢句，所以我就第一下當咗係下次都會0.75—但你細心啲睇，我認為鮑威爾都係傾向0.5多過0.75，因為佢有提到0.75唔會係常態—但當然，數字真係高嘅，亦唔到佢唔去跟。

通脹升溫？「聯儲局話好快見頂喎」

15. 好啦，最後睇返，聯儲局嘅經濟預測。就係一個咁嘅圖。

16. 懶嘅，其實有人解埋畀你知。我呢度再講一次，只睇上面個圖都得。最緊要係留意係同3月嗰次會嘅改變—留意都改變咗好多。我冇心機慢慢計，但我懷疑史上好少可3個月就轉咁多。

17. 經濟增長嘅，明顯今年預測大幅下調，下年都調低啲，再下年再少啲。失業率嘅，實情同佢講經濟增長嘅講法一樣啫，你總冇可能話個經濟差但失業率一落跌，好難的。不過你可以留意，佢調高失業率估計，係之後兩年先調高得多。原因？好簡單，失業率係滯後嘅。

18. 戲肉嘅通脹，聯儲局係睇PCE（而家係6.3%，回落緊）

19. 同核心PCE（而家係4.9%，其實冇你想像中咁高，仲要回落緊）。

20. 咁聯儲局當然亦調高晒預測（上次3月嘅數而家聽落都畀人笑）。但PCE嘅，只係今年調高，之後兩年仲要調低！即係估通脹出年肯定受控咁話。今年年尾其實估PCE跌到去5.2%（而家6.3%），下年見2字頭

21. 核心PCE呢（扣除食物同能源），今年同出年都只係調高少少。估今年年尾係4.3%（而家4.9%），下年會見2字頭。

仲炒加息？「識炒梗係炒減息」

22. 咁所以，更重要嘅係，睇埋加息路線。個預期Fed Fund聯邦基金利率水平（即係你平時聽「加息」加幾多嗰個東西），當然大幅調高，因為5月加咗0.5，剛剛又加0.75

23. 但你見到嘅係—而家係1.75%，去到今年年尾3.4%（即係，加多1.65厘），下年3.8%—已經加少好多，2024年去到3.4%。即係，2023年甚至更早，就會減息了。咁所以，「照計可以諗定炒減息」

香港嘅嘢，昨日話咗你知啦。

咪銀行體系結餘會跌（跌咗啦），金管局會接貨（接咗啦），銀行會加息（未加，但快了）

24. 好啦，已經夠晒長，香港嗰啲留返下一篇講。但大體同我昨日篇文講嘅差不多。你會見到金管局更加大手要接港紙（最新已經要過100億），銀行體系結餘會跌（剛穿咗3000億），拆息會升（升緊啦）

25. 但因為銀行資金暫時仲充裕，今日見匯豐同一眾銀行都冇加prime—不過正如好多人講，九成幾日都係H按啦，你加唔加prime冇乜大分別（但對個封頂有分別的）—而上面講咗，銀行體系結餘一路跌，拆息一路升，好可能唔使好耐，銀行會加prime．

26. 等唔切我下篇再講嘅，聽金管局余偉文講，或者渣打嘅評論，我都覺得比較合適同易明，亦同我講嘅差不多。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。