ivanliresearch

話咗會出事架啦，結果歐央行緊急會議．埃汾轉軚了，今晚應該加0.75厘。「有人估加2厘添呀」．債息上到3.5厘，納指都升喎，點算？．美國PPI雙位數，點算？招聘意慾急跌，點算？對沖基金快速撤離美股，點算？取消關稅買乜好？港紙又7.85啦，訓咗冇睇，恒指升定跌？強勢行業幾個 (Patreon)

Published:

2022-06-15 12:22:21

Edited:

2022-06-15 12:40:33

Imported:

2022-09

Content

話咗會出事架啦，結果歐央行緊急會議．

埃汾轉軚了，今晚應該加0.75厘。「有人估加2厘添呀」．

債息上到3.5厘，納指都升喎，點算？．

美國PPI雙位數，點算？招聘意慾急跌，點算？

對沖基金快速撤離美股，點算？

取消關稅買乜好？

港紙又7.85啦，訓咗冇睇，恒指升定跌？

強勢行業幾個

1. 星期三下午先寫，講返星期二美股同港股。都多嘢講，但主要係宏觀嘢。同埋今晚議息前（半夜兩三點會出結果）講定啲嘢。議息後希望即時有時間寫，但亦未必寫包單，始終近期我開始返正常作息，應該大家戥我開心？

話咗會出事架啦，結果歐央行緊急會議

2. 首先半認下叻，昨日同你講歐債危機2.0，你見都唔係太多人講。今日就見到歐洲央行要緊急開會，我在Facebook Page有講。都幾奇怪，暫時我都未見到佢地到底做乜。會議重點當然係同意大利國債抽升有關，亦可能係諗定美國聯儲局加息後，佢地點應對。暫時未見消息，有嘅下一篇話你知，但我估佢地未必會做啲好激進嘅嘢，可能只係兩手準備，如果美國加完息市場再亂（例如歐洲國債息口再急升），佢地會點。

3. 不過更深層次，你可以諗下，佢地可以做啲乜？唔通真係又停加息？甚至減息？甚至又玩返買債？你都唔好笑，未必唔得

4. 呢個亦係昨日篇文講嘅重點，唔少發達國家，債務咁重，可以加得幾多息？固然有通脹，但可能真係求其壓下就算。又或者，用各種嘅行政手段，夾硬嚟

5. 唔好笑，美國都做類似嘅嘢，油企附加稅，其實就係千方百計迫啲友唔好加價。咁經濟上更左翼，冇美國咁親商嘅歐洲政府，當然可以做一樣嘅嘢。到時大家可以睇下。

6. 另外，其實日本都有唔少問題，但仲複雜啲，遲少少細講。

埃汾轉軚了，今晚應該加0.75厘。「有人估加2厘添呀」

7. 至於今晚嘅議息，我都打倒昨日之我先，昨日我原本覺得加0.50，但我開始覺得，會加0.75厘。其實亦好簡單，因為我都被個市場牽住走—我知道自己知得有限，咁市場個個都估0.75厘，應該係有啲原因。個比喻好似開車咁，前面個個都減速，咁你應該估到係影快相。雖然我好多時話群眾係愚眛，但留意金融市場計嘅唔係人頭多，係錢多同埋決心大。一萬個只講唔做嘅淡友，鬥唔過一個真金白銀買嘅富豪。

8. 咪住，埃汾轉軚你明，但唔係昨日先話市場主流係預加0.5咩？冇錯，呢個就係「市場」惡搞嘅地方，期望話變就變。最新嘅期望，已經係超過95%嘅機會加0.75厘。

9. 「市場期望」在邊搵？你可以在芝商所CME嘅Fed Watch搵，照計唔使解，相當易明。不過留意，CME嘅產品唔係唯一一樣同利率有關嘅產品（亦即係「賭加息」），仲有其他工具。好複雜？係架。

10. 更搞笑嘅係，最初巴克萊分析員第一個話估加0.75（叻仔），然後人人跟，甚至有人話要加1厘。而家？你估到了，新債王岡拉克，直頭話應該加夠2厘。不過佢講下啫，我就唔多信。況且佢只係話「應該」加2厘，冇話「會」加到2厘。

債息上到3.5厘，納指都升喎，點算？

11. 美股之後走勢會點？其實完全唔知。昨日都講過，大跌嘅，加得少又可以話聯儲局離地躺平，加得多又可以話震散經濟，任你講。同樣地，如果升嘅，加得多你可以話聯儲局重建權威，市場有信心。加得少嘅可以話聯儲局並唔擔心。

12. 所以narrative不宜睇太多，反而市場格價走勢仲值得睇。例如你見美股星期二晚，都算OK企得硬，暫時止咗瀉，納指仲要係逆市升。

13. 更難得嘅係，仲要係債息升到上3.5厘嘅情況下（尾段回返啲）—你諗下，好似幾日前先在3厘樓上，要上真係上得好快。

14. 當然，問到底會唔會再跌嘅，都有啲難答你，但美股似乎都唔係叫做好平，頂多係合理返啲。雖然往年你又唔會睇呢啲嘢，就不停話貴得有道理。

美國PPI雙位數，點算？招聘意慾急跌，點算？對沖基金快速撤離美股，點算？

15. 講多少少美國嘅各種濕星嘢。首先見到出咗個PPI（工廠價格指數，你可以當係wholesale inflation），上個月都有講過，以為見到個PPI數字好啲就CPI都落，結果冇。今次出嘅數字呢，雙位數。但其實係低過預期，你見市場反應都唔太大。

16. 另外留意嘅係，商界圓桌會議（類似啲商會咁嘅嘢），每季做個調查咁，見到啲企業樂觀情緒大跌，招聘意慾急跌。當然有啲人認為呢啲調查只係用嚟壓低人工（但，老細幾時都係想壓低人工架啦），但至少你問呢啲人，好過問打份工嘅經濟師同分析員。相信經濟呢，都係相當麻麻。但其實知咗又點？又如何？而家沽晒啲股票佢？遲唔遲啲？咁你話你一早沽咗嘅，就叻。但幾時又買返？

17. 至於最後一個數據，係高盛做嘅。講話對沖基金快速撤離美股，市場沽空增。有啲人聽落覺得好大件事，但你諗真啲，唔係十分明顯？美股跌成咁，梗係基金撤離啦，唔通係因為人人爭住買咩。