節目預告：週末可能講少少英國股。美股：冇乜好講，留意今晚CPI，可能反高潮。阿里巴巴彈出彈入嘅嘢，但港股點都係強勢。個別幾強嘅港股行業（其中一個係券商股，話埋你知）AMD：年年收入升20%，得唔得架？平定貴？你今日爆咗煲未？—四份之一央行打算增持黃金。對沖基金名宿好睇金價。兼講埋Bitcoin。 (Patreon)

節目預告：週末可能講少少英國股。

美股：冇乜好講，留意今晚CPI，可能反高潮。

阿里巴巴彈出彈入嘅嘢，但港股點都係強勢。

個別幾強嘅港股行業（其中一個係券商股，話埋你知）。

AMD：年年收入升20%，得唔得架？平定貴？

你今日爆咗煲未？—四份之一央行打算增持黃金。對沖基金名宿好睇金價。

兼講埋Bitcoin。

節目預告：週末可能講少少英國股

1. 昨日嗰篇就寫咗好多嘢。今日好似冇乜嘢寫，但又其實好多嘢寫。照舊，講返星期四嘅港股同美股，港股麻麻地但相對已經幾好，特別留意星期三美股已經跌。美股星期四就當然更差了。所以索性唔講咁多大市，講啲個股同其他嘢。

2. 另外週末或星期一可能講少少英國股，反正聽聞唔少讀者都在英國，咁我係十分市場導向嘅。其實之前都講過。

美股：冇乜好講，留意今晚CPI，可能反高潮

3. 美股方面，道指跌成600點，講嘅都冇乜新嘢，都仲係債息升驚加息之類，咁其實會「驚」到幾時？一般都係任你講，升返晒你咪唔驚。正如港股一個月升返10%，咪冇人「驚」7.85．

4. 但比較認真嘅，再提一次，今晚美國會出個CPI數據，市場預期乜昨日都寫咗，之前白宮就放晒風話仲會升，亦可能係星期四跌市嘅原因。似乎個數字就會差嘅—但市場反應永遠係另一回事，反正未出都跌定先。

5. 個別股票方面亦冇乜好講，不過介紹返，我都仲係每個月買緊指數ETF嘅。實情連上個月嘅都未講（冇乜好講，都係嗰啲，但志在貼出嚟有圖有真相），而今個月係未做嘅，比較忙，但都會買。

阿里巴巴彈出彈入嘅嘢，但港股點都係強勢。

6. 港股呢？近期明顯係好過美股。當然最值得講係阿里巴巴彈出彈入，都唔知會點。我月頭己經講螞蟻會上返市（實情媒體都有講，只係好多人根本唔識分邊啲嘢應該睇邊啲嘢係垃圾），之後升咗兩成。

7. 咁最新嘅進展，星期四收市就傳話中證監會啟動程序了，夜期即升400點。然後呢？然後就係中證監否認。再之後就係螞蟻自己都否認。去到美股時段大瀉，但到星期五朝，又話會出招股書。

8. 搞乜？答案係，完全唔知。你大可以發揮你嘅想像力，又估下咩中南海權鬥。幾肯定嘅係，最初外媒傳得呢啲消息，應該唔會完全生安白做。咁會有人估有人刻意放風，「製造既成事實」，去「夾」到放行—但你可以諗下，2020年，招埋股臨上市前煞停你都仲得呀，邊到你「夾」

9. 咁十分合理地，啲中概股星期四晚又死晒。但你見星期五嘅港股，又唔係咁差喎。咁但呢啲一向都係中資股，特別係科技股，特別係中概股嘅問題。你買得就唔好怨唔好驚了，因為必定係好多古怪政策風險，而你肯定係最後知嘅人。所以我一向少買中資股，科技股更少，買嘅都只會買最大。

10. 所以搞乜？都真係唔知。但我相信大方向冇變，上市有機會，而成個行業嘅監管係放鬆咗嘅。亦好符合中國一向嘅國情：一死就放，一放就亂，一亂就收，一收就死

11. 另一個教訓，好簡單，就梗係未有消息，甚至係壞消息先買落去。到出咗好消息先追入去，你就往往會中伏。所以買股票唔係睇「有好消息」先買。你一定要行在「好消息」前。

個別幾強嘅港股行業（其中一個係券商股，話埋你知）

12. 而都講返港股，都仲有啲個別行業可以留意下。例如內房昨日表現不錯，原因不明。又或者，可以睇下啲券商股，原因亦係A股近期成交幾旺，日日過萬億。

AMD：年年收入升20%，得唔得架？平定貴？

13. 昨日寫過SPOTIFY 目標10年收入升10倍，但個Price to sales只係2倍。實情睇估值當然重要，但亦好多人有疑問唔知點先係貴，事實真係好難衡量。但十分粗略地，如果你年年純利有20%增長，咪大約20倍市盈率都OK。如果年年純利都跌但50倍市盈率，咪好易死。

14. 再簡單啲，咁你個純利升幅高過市盈率嘅，聽落比較好，因為個市盈率唔會越標越高，我股價年年升都仲得。相反我40倍市盈率，但年年純只係升少少，咁我個股價點不停升？不停升個市盈率就會升到極高，總有一日會跌落嚟。大約係咁

15. 咁理論上，你拎去用落市銷率Price to sales都OK嘅，但當然冇咁好。因為你公司最後都係靠盈利，唔係銷售—特別係好多銷售係用貼錢谷出嚟嘅，再多都可能係廢話。

16. （但Spotify年年 25%增長而得2倍Price to sales點睇都唔貴　—如果真係做到25%的話）

17. 咁然後，睇睇今日嘅主角，AMD．我就AMC同AMD都未識分嘅，但，睇睇公司講，話「長期」嘅收入增長，百份之二十– 都相當進取下，雖然我唔知呢個長期係幾長期，但段估都五至七年啩？

18. 然後望下，AMD過去12個月收入，190億美金左右。市值呢？高位跌咗四成，但都仲有1600億。都8.4倍 price to sales，平就肯定唔平，但如果做到收入一年升20%，又好似OK。

19. 同Spotify一樣，我有錢我會買，不過我冇錢

20. 又，至少AMD一路都係賺錢嘅。過去12個月純利33億，都即係…..超過50倍市盈率，又好似唔平。所以望落都係Spotify好啲？「但又冇錢賺」。所以差不多永總係好股就貴，平嘢未必有好—而偶然大減價時你必然係驚。搵大錢冇咁易。

你今日爆咗煲未？—四份之一央行打算增持黃金。對沖基金名宿好睇金價

兼講埋Bitcoin

21. 另外，講少少金價。實情早兩個月我在信報月刊寫過（自己搵吧，又，信報月刊我寫嘅文比較認真，因為有稿費）。而呢個Patreon第一篇文就係講黃金，我亦買咗啲ETF，唔太多，到而家都係打個和咁，自己都有啲金幣，但亦唔太多，肯定你都唔使買太多，但少量係可以的。

22. 嗰篇信報嘅文寫過，黃金同Bitcoin相當相似，就真係都係「本身冇乜價值」，差不多真係純供求（留意「法幣」唔係「只係講個信字」，政府有收稅嘅權力有執法嘅權力，點會「只係講個信字」？）。

23. 不過，當然都有啲分別。對黃金「不利」嘅，係似乎啲後生係唔會買嘅，到我等廢老死晒後可能就冇人買錯（但其實金融市場唔係鬥多人，係鬥多錢）。

24. 不過對黃金「有利」嘅，兩樣嘢。第一，你可以有比特幣狗狗幣魷魚幣勞蘇幣，好聽啲就係「完善」，但呢個真係我一早講中嘅問題：既然係咁，你點知聽日唔會興第二隻？而反而黃金嘅地位，在佢嘅同類中，真係連白銀都好難「挑戰」

25. 而第二樣嘢，央行都仲係買黃金，唔係啲乜幣物幣。至於啲人話大家「唔信央行」，唔好意思，得啖笑，「亂世」下，美金N年新高，Bitcoin插咗一半，你話大家信邊個？而成堆乜幣物幣，就真係只能作為「保值」「投機」「投資」嘅功能—你話拎嚟交易或咩取代貨幣，得啖笑。

26. 好啦，講返黃金。「對沖基金名宿」David Einhorn睇好。我係同意佢嘅原因嘅，佢話睇死聯儲局唔會敢大手加息，加都唔維持得耐，因為美國債務重。我都相信係。

27. 不過，如果係咁，係咪應該買金？定應該買股票？我嘅答案，就都係買股票，少量金

28. 況且報導冇話你知，呀「對沖基金名宿」，2018年都輸咗34%，眼光都…..麻麻。回報仲差過我。

29. 但又另一樣嘢，留意到話「約四分之一全球央行計劃未來12個月添加黃金儲備」—雖然由世界黃金協會做調查，啲問題有幾引導性就唔知。況且，人人都話計劃未來12個月減肥啦。而留意，係冇央行去增持Bitcoin嘅。

30. 但睇下個原因，亦係有趣，提到「對美元作為全球儲備貨幣地位的信心下降」—呢個當然唔多唔少亦同美國制裁俄羅斯，凍結俄羅斯美元資產之類有關。

31. 你大約諗到，一啲同美國關係唔好嘅國家，大約都會小心啲。俄羅斯大約都頂得住經濟同匯價，亦唔多唔少因為有唔少黃金同其他資源。與其日日諗埋啲咩港紙爆煲，不如諗下買些少金—雖然記住，些少好啦，世界仲係好和平嘅，你見美金都係多年新高。

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。