ivanliresearch

通脹破頂，點算好？「但核心通脹回落咗」．今個星期議息，加幾多？仲要出經濟預測同點陣圖．會唔會緊急加息？Larry Summers 狂轟聯儲局．美股3日蒸發晒3個星期升幅。全星期表現1月以嚟最差．滴滴嘅嘢，未死喎。「瑞幸咖啡都未死啦」Tesla一拆三嘅嘢．清倉港股　all in 美股丫拿． (Patreon)

Published:

2022-06-12 20:33:32

Edited:

2022-06-13 00:45:08

Imported:

2022-09

Content

通脹破頂，點算好？「但核心通脹回落咗」．

今個星期議息，加幾多？仲要出經濟預測同點陣圖．

會唔會緊急加息？

Larry Summers 狂轟聯儲局．

美股3日蒸發晒3個星期升幅。全星期表現1月以嚟最差．

滴滴嘅嘢，未死喎。「瑞幸咖啡都未死啦」．

Tesla一拆三嘅嘢．

清倉港股　all in 美股丫拿．

呼，星期五嘅美股市況相當慘烈。

通脹破頂，點算好？「但核心通脹回落咗」

1. 首先講當然係星期五晚嘅通脹數據，早兩日已經話有啲燶味，因為白宮提早出嚟講個數據繼續升。結果望下，CPI按年升8.6%，40年新高，預期係8.3%，上次亦係8.3%，而今次嘅數字仲高過3月嘅8.5%了，難怪股市大跌。

2. 而即使係扣除能源同食品價格嘅核心CPI，都升6%，一樣高過預期嘅5.9%，唯一小小安慰係低過上個月嘅6.2%。

3. 點算好？其實冇乜點算。當然你可以選擇等，但選擇等嘅，多數等等下就變咗以後都唔買股票，或者去到升晒先買。我就繼續個個月買，有何問題？

今個星期議息，加幾多？仲要出經濟預測同點陣圖

4. 而當然順手講埋，今個星期焦點，就會係聯儲局議息，星期三晚有結果。由於係6月，仲會有埋啲經濟數據預測，點陣圖之類，我應該會即時同大家寫—雖然呢排都比較忙。

5. 之前都寫過，今次議息嘅時間都比較難搞，剛剛好係出CPI後幾日。結果不幸地個數字難睇，唔知會唔會臨時有嘢改啦。加息，就肯定架啦，甚至係肯定加0.5厘，爭在會唔會加0.75厘？都有人估，但絶對係少數（但，如果佢估中，咁咪可以在行內成名咯，分析員就係咁）。

6. 而我相信，照計今次都唔會加0.75厘，但7月就有咁嘅可能，又睇下會後點講。仲有，之前估9月停加息嘅期望，應該冇晒了—雖然仲有幾個月，如果之後出啲通脹數字受控，呢啲期望要返嚟可以好快。

7. 至於有人估會唔等到星期三就緊急加息，我都覺得係唔會嘅。事實只見過緊急減息，冇見過緊急加息。銀行系統有問題，就要即時減息幫。但通脹呢啲嘢，唔爭在兩日啦。

8. 可以參考下呢個圖，係睇到9月，仲有三次（6月7月9月）。三次夾埋，四成人估加1.5厘，五成估加1.75厘，一成人估加2厘。亦即係，四成估三次各0.5厘，但五成估會有一次加0.75厘，仲有一成人估當中兩次會0.75厘。

Larry Summers 狂轟聯儲局

9. 最後，留意下Larry Summers（此人做過財長，又做過哈佛校長，The Social Network套戲有份出場）出嚟狂轟聯儲局，唔知係咪為咗保拜登（Summers係民主黨人，而聯儲局主席鮑威爾係共和黨）。的確，聯儲局3月嘅預測，似乎都錯得幾離譜—但掉轉頭諗，連聯儲局咁多專家咁多數據在手，都會估到錯晒—大家亦唔好高估自己嘅預測能力。