ivanliresearch

5月強積金港股賺錢美股蝕錢拉勻有賺，我個倉都係，你呢？港股1800億成交，低位升20%。科指升40%。仲未「確認」見底？但有人又話「升咗咁多唔敢買等回下先」—實情都係多餘，買得細贏得多，就不如買得大贏得少，維他奶1個月高位，比亞迪　快手 10連升。仲有心法幾個　冧把一堆，美股冇乜新意，不過星期五通脹數據…….有啲燶味，債息3厘，但美股嘅垃圾股低位升返唔少，卒之話取消關稅了，Spotify 10年收入升10倍，得唔得架？道富State Street 買瑞信Credit Suisse，得唔得架？ (Patreon)

Published:

2022-06-09 08:01:38

Edited:

2022-06-09 08:50:44

Imported:

2022-09

Content

5月強積金港股賺錢美股蝕錢拉勻有賺，我個倉都係，你呢？

港股1800億成交，低位升20%。科指升40%。

仲未「確認」見底？但有人又話「升咗咁多唔敢買等回下先」—實情都係多餘，

買得細贏得多，就不如買得大贏得少，

維他奶1個月高位，比亞迪　快手 10連升。仲有心法幾個　冧把一堆，

美股冇乜新意，不過星期五通脹數據…….有啲燶味，

債息3厘，但美股嘅垃圾股低位升返唔少，

卒之話取消關稅了，

Spotify 10年收入升10倍，得唔得架？

道富State Street 買瑞信Credit Suisse，得唔得架？

1. 近排似乎搵到一個比較「正常」嘅作息規律，多數我都會中午後寫Patreon了，寫返昨日嘅美股同港股。當然如果夠早起身就會係午餐前，但都唔會太早，食得早餐諗得嚟寫得嚟點都中午。

5月強積金港股賺錢美股蝕錢拉勻有賺，我個倉都係，你呢？

2. 今日講返星期三嘅港股同美股。近期明顯係港股走勢較好，你見強積金（5月轉賺！）港股賺錢美股蝕錢，有機會再寫多啲呢個課題。

3. By the way，個舊文Index整返好了，之前做手術冇update。有用的，可以搵返之前嘅文。

港股1800億成交，低位升20%。科指升40%。

仲未「確認」見底？但有人又話「升咗咁多唔敢買等回下先」—實情都係多餘

4. 但講返，呢排嘅港股當然強，昨日大升就不用講。留意返成交成1800億，相當誇張。然後之前嗰啲咩「外資幾十億沽貨」實在係大笑話一個。

5. 順帶一提，明報呢個圖相當好。恒指低位就升返20%，科指直頭升40%。拿你唔好同我講「熊市反彈」之類嘅廢話，20%就係20%，40%就係40%—掉轉，高位跌20%你咪又係話熊市，跌40%你個個叫救命添啦，唔好雙重標準喎。我夠可以話你高位跌20% 40%係「牛市調整」啦。

6. 但，點捉個底？當然係近乎捉唔到的。你睇VIX（港股都有）或者成交呀，網友啲情緒呀，可能幫到少少，估到3月中見底不太難，但你亦唔敢買得太大—而買得細贏得多，就不如買得大贏得少，「至少夜晚瞓得好啲」。

買得細贏得多，就不如買得大贏得少

7. 然後你更加唔好同我講，「升咗40%又唔敢買」—希望唔好咁混吉，如果你有咁嘅心態，真係永世都冇法買股票贏到大錢。

8. 比較簡單嘅方法，都係分段入市，平均啲，唔使睇咁多廢話。咩好消息壞消息，去到你同我都知嘅，多數反映晒。未知嘅，你亦擔心都冇用。

9. 比較強嘅行業或股票，有啲之前都講過。得意之作當然阿里巴巴。今個月頭講明話監管放鬆同埋螞蟻有機會上得返市，升咗兩成幾了。

10. 中概股亦都繼續強，快手直頭10連升，但我依然都係覺得買大公司已經夠，中小型嘅嗰啲波幅，唔係一般讀者可以忍受。

11. 另外仲有係澳門股，早兩日先寫過。近期亦係繼續炒呢個通關—其實講到尾，只係太殘。

維他奶1個月高位，比亞迪　快手 10連升。仲有心法幾個　冧把一堆

12. 你睇舊年根本冇人同你講會買港股，所有人覺得美股必定長升長有。你可以講幾千個理由，但永遠啲友係忽視咗估值。

13. 但不過，當然長線都應該係美股跑贏的，原因之前講過多次。不過，有幾多人真係可以睇「長線」？可能講十年八年喎。

14. 同樣地，維他奶345低位亦升返唔少，1個月高了。今年只係跌6%，跑贏晒指數—當然由高位都仲係跌咗一半。咁亦畀你見到，機會幾時都有，但一般都係壞消息先係最好機會。好簡單嘅例子，值得你思考下。

15. 最後，亦可以留意比亞迪1211。N連升了，直頭供貨畀Tesla，你見啲網友係咁話大陸嘢會爆炸，當中有冇學到任何嘢？不過股價離高位都唔太遠，實情低位升返一個開，似乎而家係相當貴的。我就唔會買的，不過有人問。

美股冇乜新意，不過星期五通脹數據…….有啲燶味

16. 至於美股方面，回返啲，但幅度唔大，而「評論」講嘅嘢亦全無新意。驚經濟增長放慢啦，驚通脹啦，驚債息高啦。當然三樣之中，後兩樣係比較值得討論嘅（因為，經濟差股市都可以升，掉轉都係，兩者實在冇乜關係）

17. 先講債息，大家都知我隔一兩日就講，而家上返3厘樓上，當然唔係太好嘅事，但你見納指並非特別差。早兩日都寫過，ARKK直頭跑出添。

18. 仲有你見久違了嘅垃圾倉，居然係逆市升。同樣地，呢堆垃圾先輸35%咁少，都令我有啲意外。當然我唔係市況最癲時買，詳情自己搵舊文。

19. 而同時間，非垃圾倉嘅一啲垃圾股，都係跑出嘅，雖然已經跌到升幾多都嘥藥費。留意平時我貼開嗰個list（CNBC嗰個界面）已經踢走咗呢幾隻嘢，因為成日都係升得最多跌得最多，會阻住你睇其他股票。

債息3厘，但美股嘅垃圾股低位升返唔少

20. 即係見到，都係物極必反嘅，不能好似科學定律咁係咁話債息升科技股跌。都係要啲主觀判斷，正係咁所以投資先難。

21. 至於通脹呢個，都值得講下。留意星期五晚就會出個CPI，全城期待，我可能週末甚至下星期一先寫。所以話定你知，上次出嘅數係8.3%，今次出嘅數市場預期亦係8.3%。

22. 早排講過我係傾向樂觀嘅，但事實係聞到些少燶味—咁未必一定要自己嚇自己，但都留意下。係乜？就係白宮早兩日已經出嚟話定你知，個通脹數字都仲係幾高，好可能仲有得升　—當然可能只係管理期望，但，值得留意下。

卒之話取消關稅了

23. 最後可以補充下，講嚟講去話取消中國關稅，似乎真係會了，但當然只係部份。事實亦不可能畀人覺得對中國軟弱。咁樣去包裝件事，話只係取消「美國人」畀嗰啲，就好聽啲。呢個東西可以過兩日再寫（其實之前寫過有乜受惠股），但今日想你留意另一個重點，就係耶倫講明「未必係降通脹嘅靈藥」—咁合理嘅，今日減聽日見效咩，但亦見到佢都戴定頭盔，「之後通脹仲高都唔好意外呀」

24. 順帶一提，可能同市場冇乜關，但見耶倫似乎食咗唔少「死貓」，近期好多嘢都攬晒上身，承認錯判通脹呀之類。相信都係幫拜登護航，睇怕政途有機會再上一層樓。不過其實以財金管員，做過聯儲局主席又做過財長，仲可以做乜？真係副總統？