港股低位升返20%，仲唔係牛市？早早叫你買阿里巴巴．Target 三個星期兩次盈警，但美股照低位回升。人人去拎晒港紙換美金，咁金管局會唔會唔夠美金？外匯基金4600億美金，借問聲出面有幾多港紙？ (Patreon)

港股低位升返20%，仲唔係牛市？

早早叫你買阿里巴巴．

Target 三個星期兩次盈警，但美股照低位回升。

人人去拎晒港紙換美金，咁金管局會唔會唔夠美金？

外匯基金4600億美金，借問聲出面有幾多港紙？

1. 都有讀者話，如果日日講市況未必太有深度，但有時市況比較波動又多啲嘢講。況且日日寫啲咁深度嘅嘢，你都未必消化到，我亦未必有咁多時間。但就呢兩日市況靜啲，咁所以今日就有半篇嘅深度課題了（其實都只係好表面）

2. 寫文時星期三中午，照舊，寫返星期二晚美股同星期二港股先。最尾又寫你最關心嘅港紙。（最後因為Patreon website死咗，遲咗publish）

港股低位升返20%，仲唔係牛市？

3. 首先，港股星期二回返少少，但講真，你見恒指由上次5月12日7.85嗰時，反彈返2500點（13%），足以見到嗰時個個咩「擔心」走資，堅係多餘，我有冇點你？

4. 如果你計3月中低位，直頭彈返3500點，20%，「仲唔係牛市？」—但你又唔信服嘛。但點解跌20%你就話熊市好驚？升20%你又仲係驚？咁幾時圥唔驚？

5. 我知，有人話「熊市反彈」，但，低位彈20%喎。咁掉轉，你話20%嘅熊市，我夠可以話「牛市調整」，根本全部都係廢話—而唔好忘記，股票係升多過跌嘅。

6. 講到尾都只係自己嘅心魔，同埋因為睇得太多其他垃圾文。

7. 近排都幾明顯繼續係啲中資科技股強，中概股亦強，早兩日都寫過，而家我會覺得可以買啲大型嘅，但切記做好你嘅配置，唔好忘記舊年嘅教訓，適度留意你嘅注碼—如果跌10%你又叫救命嘅，即係你一係買得太集中，一係買得太多。

早早叫你買阿里巴巴

8. 另外當然係阿里巴巴，近期相當強勢，早兩日都寫過。不外乎原因都係監管壓力過去，同埋螞蟻似乎真係上得返市。

Target 三個星期兩次盈警，但美股照低位回升

9. 美股方面呢，走勢亦靚，低位掃上嚟，差不多全日高位收市

10. 另外留意，整體都係科技股帶動，雖然唔係隻隻升，但總體不錯，納指近排都跑贏，咁你就唔好不停問我點解個市升但Tesla唔升之類。幾時都講，唔想個市升你隻嘢唔升，解決方法就係「買個市」，買ETF。

11. 順手一提，有啲讀者去大手買SOXX之類，費城半導體指數嘅ETF—我需要講返，呢啲唔係「大市」，你係走去買一個行業。咁當然，似乎總好過你買個股，但我一路講話叫大家核心持股應該係指數ETF，指嘅係大盤指數，SPY VOO QQQ 2800 之類。

12. 美股嘅升勢，唔多唔少話因為債息回落—但實情都貼近3厘，睇你點睇。但你見真係市場開始對啲「壞消息」反應冇乜，應該係好嘅先兆。

13. 同樣情況你亦見到啲美國零售股，Target 3個星期出兩次盈警，都幾驚。但好可能係因為「kitchen sinking」「big bath」．全部衰嘢一鑊過。你見公司下半年嘅指引，又唔係太差。同時間，你見股價都係由低位跌近10%，收窄到微跌。其他零售商嘅情況都差不多（Kohl’s就因為有人收購大升）

14. 最後可以留意下耶倫嘅講話，似乎預示個通脹仲會在高位一段日子？而6月10日出嘅PMI數字真係相當關鍵。

外匯基金4600億美金，借問聲出面有幾多港紙？你話金管局夠唔夠錢呢？

15. 又，上次咪寫過篇101掃盲文，講聯匯。之後仲有答過讀者問題，實情係好事，因為我寫嘅內容，未必完全係你最想問嘅嘢。但如果我未寫文就問你有乜問題，讀者又往往答唔出。好啦，寫完文你再問，就十分好。

16. 例如都係有讀者問，如果真係人人拎晒啲港紙去換美金，金管局會唔會唔夠「錢」去保聯匯？

17. 呢個問題上次篇文都答咗，有兩個層面。首先你人人同時去銀行拎錢呢，就真係銀行會冧，但呢個同聯匯無關，你在英國法國美國，齊齊去拎晒啲錢，銀行都冇咁多錢畀你拎—但銀行自然有方法防止你地「同時去拎錢」—而記住，呢個過程中，由頭到尾你拎嘅係「銀行」嘅錢，亦即係「你自己」嘅錢，同金管局特區政府以及大陸都無任何關係—亦同你拎走啲錢到底係換晒美金定係掉晒落海冇關

18. 順手一提，可能遲少少我會再寫篇短文，講下咩叫「銀行體系結餘」—上次都好似寫得唔係幾清楚，只係話你知「唔係」乜，但好似都冇解你知「即係乜」。嚟緊試下解。

19. 但第二個層面，就真係去到「匯率」嗰度。因為你見金管局「入市」，點解要入呢？就係如果港紙一路多人沽，而市面啲友（銀行，或者套利嘅人）冇接晒，一路壓到去7.85，就會發生金管局「入市」啦，係咪？否則一路沽咪會偏離7.85，去到7.9嘛，咁你金管局有「兌換保證」嘛。呢度應易明？

20. 好啦，咁有人沽港紙拎美金，咁金管局「入市」，作為對家就掉轉，買港紙沽美金畀人啦。咁於是讀者嘅問題係，「金管局有冇咁多美金？會唔會乾塘？」—記住問清楚問題，呢個機制同上面講咩人人去銀行拎錢，係兩樣嘢。

21. 咁金管局夠唔夠美金？之前答過，市面上有幾多港紙，背後就會有同等量嘅美金支持。因為銀行要發港紙時，就要畀返美金金管局的，不能無中生有。技術上嗰堆嘢叫做「負債證明書」

22. 但於是乎，又諗下啦喎，「啲美金去到金管局度會唔會洗晒」？呢個問題都可以睇下。

23. 但實際上，你係見到有幾多「港元貨幣基礎」的，舊文貼過，好似每日定每個月金管局有更新。當中就包括呢個負債證明書。咁你話會唔會做假？咁要做audit架嘛！鬼佬核數師同你一齊做假咩！

24. 況且，如果係做假，偷雞嘅，咁就現咗型啦，就唔會頂得住個匯率，「入市」時就唔會有美金畀對家啦—當然你真係要質疑嘅，其實無止境的，你可以話幾十億就有，但幾百億可能冇，咁就無從討論啦。正如你可以話有個茶壺在地球同火星間飛的，你點證明冇？

25. 又或者，另一個角度你亦可以睇下呢啲新聞，平時應冇乜人理。話說香港嘅外匯儲備，上個月跌咗7億美金，但呢個都唔係重點。重點係而家係4650億美金，即係36000億港紙—再講一次，個「銀行體系結餘」，只係3000億，兩回事。

26. 然後你見有講到，呢個外匯儲備，係香港流通貨幣嘅6倍—咁你話夠唔夠美金？上面提過，所有港紙都有等量美金—而實際上係有6倍—請問你去邊度變啲新港紙出嚟沽？（至於呢個「香港流通貨幣」有幾多，點計，邊度睇，可能都係新文講）

27. 最後一提，你見文中都有提到，呢個外匯儲備，係M3嘅45%—亦係上次答讀者問題講過，M3 16萬億，大約等於香港嘅「存款」。好啦，計下條數，我懶搵，但唔好忘記，16萬億M3，應該大約一半係港紙，所以大約8萬億。所以，上面36000億嘅外匯儲備，咪差不多45%咯，啱數。

28. 咁但你話，得45%，唔夠喎—的確M3係大過外匯儲備的。問題係，外匯儲備係M3 45%，但外匯儲備又係「流通港元」6倍。即係大約M3係「流通港元」12倍—咁有冇諗過，個M3點解大過「流通港元」咁多？答案當然係因為Fractional banking—簡單嚟講，即係你存入銀行嘅錢，銀行又會借出去，借咗出去又會成為另一個人嘅存款，如是者，個M3就會碌到大過「流通港元」好多。所以同時地，真係「提港紙」時，你計都係計個「流通港元」。

29. 可能再寫篇長文解下。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6