舊年網友話清倉港股，三個月前話抗疫不力，上個月話港紙爆煲—結果港股升到兩個月高位．滴滴反彈一倍（但高位跌咗九成）．債息升穿3厘，但美股科技股仲有得升．ARKK低位彈返兩成！同期標指只升5%。買得未？「大國博奕」：LME「最壞情況」賠40億，港交所爆煲未？ (Patreon)

舊年網友話清倉港股，三個月前話抗疫不力，上個月話港紙爆煲—結果港股升到兩個月高位．

滴滴反彈一倍（但高位跌咗九成）．

債息升穿3厘，但美股科技股仲有得升．

ARKK低位彈返兩成！同期標指只升5%。買得未？

「大國博奕」：LME「最壞情況」賠40億，港交所爆煲未？

1. 寫文時星期二午飯過後，寫返星期一港股同美股

舊年網友話清倉港股，三個月前話抗疫不力，上個月話港紙爆煲—結果港股升到兩個月高位

滴滴反彈一倍（但高位跌咗九成）

2. 港股方面近排真係幾好，昨日升返近600點，上返兩個月高位。一個月前所謂「港紙爆煲」，3月中時所謂咩「抗疫不力」，舊年年中個個話「清倉美股」，你見到真係越多人講嘅，多數都錯。

3. 值得睇嘅股票，除咗我倉度用嘅東西，仲可以提醒下。例如領展823已上返6個月新高，穩穩陣陣，3月時60蚊真係大平賣，但你又會覺得「零售玩完」。太古19或太古地產1972之類講過啦。另外仲有澳門股，唔知點解我一路都冇買，但近排幾強，估放寬通關。但其實同大陸都早早放寬咗，似乎就真係好難返返去以前咁嘅「盛世」—不代表冇得炒冇得升，但唔係我首選。

4. 另外，當然阿里巴巴9988都講咗幾日，波動大但似乎都係有得諗，螞蟻可能真係上得返市。呢度亦真係拉到去成堆中資科技股，你見都係挫上挫落，但近排係偏強嘅。原因亦好可能係啲監管政策今次真係停了。

5. 你見一大堆中概股都係做得幾好，特別係滴滴同滿幫，亦係話審查完成—不過提提你，係講緊18蚊跌到個幾然後升返去兩個幾。最大輸家，當然係過去兩年買嘅人，差不多任何位都輸錢，而我係寧願揀啲差不多任何位買都贏錢嘅股票—都仲有唔少公司，係過去十年八年你任何位買都贏錢嘅—除咗過去一兩年—所以又係老教訓：點解你只會過去一兩年買股票？之前幾年呢？做緊乜諗緊乜？點解升晒先買？咁然後，而家呢刻，咪可能就係下一次升浪嘅「之前幾年」（希望明我講乜）

6. 另外你見富途業績都不太差，至少仲有錢賺，股價都彈，但當然都係講緊180蚊跌到去20蚊而家40蚊．我就唔會買，但至少啲業務正正常常，亦唔係蝕住錢去貼客。

債息升穿3厘，但美股科技股仲有得升

7. 然後講美股，就真係環環相扣啦。你見債息升到上3厘樓上，股市當然回返，道指蒸發咗300點升幅—但300點，1%都未夠啫。況且更奇怪係，你見到納指仲有得升，而升市亦係由啲科技股帶動，相當奇怪—但記住市場就係咁，唔係永遠都一個定律，唔係每一日你都會見到　債息跌科技股升　債息升科技股跌咁，因為唔係科學定律嚟的。

8. 另外留意，Amazon 已經完成咗1拆20，昨晚都升咗些少，而同時間都有讀者問Shopify，我都冇留意會1拆10。呢類分拆都寫過多次，就梗係同基本因素或股價「應該」零影響，但又真係見到以往多數都係宣佈拆嗰時升一升，到真係拆時又會升。有心短炒嘅可以留意下—但你見Shopify之前就跌到七彩啦，貴到極，我都買咗，都輸咗超過70%—咪慢慢等。

ARKK低位彈返兩成！同期標指只升5%。買得未？

9. 然後講開科技股，呢壇嘢就仲有趣。就係講Cathie Wood隻ARK，低位已經彈返17%，而同時間標指只係彈4%，夠晒吸睛。雖然公平啲，似乎應該計納指，咁同期都彈大約8%

10. 而當然，我係唔會買ARKK的。不過拍埋一睇，ARKK彈返17%，納指彈返8%，標普指數就彈4%—咁你幾明顯見到，呢一排雖然指數又唔算升得好多，但唔少啲大跌嘅科技股都低位升返啲，亦都見到係風險胃納大返嘅，所以後市我唔會太過悲觀。

11. 至於ArKK做乜強？渣住乜？自己搵啦，其實全部公開晒。主要係Zoom 同埋Coinbase，Block（SQ）同Roku都幫到啲，但波幅都真係好大下，你亦可以睇晒成個full holdings，有公開的

LME「最壞情況」賠40億，港交所爆煲未？

12. 港交所388方面，Facebook Page都快寫咗兩句。故事大約係3月時鎳價大波動，LME（倫敦金屬交易所，2012年賣咗畀港交所）取消啲交易，江湖傳聞話疑似因為有中資輸錢（我都傾向信嘅）—咁而家就畀人告了，民事啫，講緊索償40億港紙左右。

13. 告唔告得入？但凡呢啲新聞，我都差不多可以話你知：唔知。法律嘅嘢，你估普通網友自己「覺得」就得咩。當然LMF取消得交易，必定評估過背後會唔會畀人告，而對沖基金告得，亦點都評估過有冇勝算—但最後都係大家唔知，唔使專家上身。但我「直覺」係傾向覺得告唔入嘅，亦未必會迫到LME庭外和解，就算有得賠都未必賠咁多

14. 呢度又去到要「量化」個打擊，但留意你咩「最壞情況」亦係多餘，嗰時都話國泰咩最壞情況畀人罰幾十億，結果多餘。而你見港交所股價全無影響，已經話畀你知冇乜人擔心。

15. 但就真係睇下「最壞情況」，40億港紙—公司一年百幾億純利，當然賠得起，況且上面都講咗，要賠足40億嘅機會，我估相當細。而再好啲嘅，你應該睇book value，唔係一年純利，因為任何公司估值都唔係根據「一年」嘅錢—你間公司就算一年蝕錢都唔會股價變零啦下話？而港交所嘅book value，470億（其實好少），40億嘢當然食得起—但當然，亦係一定嘅打擊—雖然我依然唔信會賠到咁多錢，甚至根本冇得賠。

16. 但講遠少少，政治青最鍾意講嘅「大國博奕」，都有啲可以講下。固然拎賠錢嘅係對沖基金，「唯利是圖」，不見得有咩政府背後推動。但上面都提咗，港交所買LME，係2012年—「雖然當年香港都冇民主」，但你大約想像下，換著係2022年先買，你估買唔買到？難好多了。唔好忘記港交所的確係類國企，香港政府有好大權力，而任何人未經財政司司長批准，都唔可以渣到5%以上。

17. 我不相信英國政府會點「搞」LME，問題係，買股票就幾有地域性同政治性，公司去邊度上市好受政府影響，當地亦可以唔批你，加上唔少地方證券交易所都獨市生意（包括香港）—但買賣金屬嘅嘢，實情人地整多間去撼你，冇話唔得的。

18. 即係點？當年港交所買LME都唔平（有一舊好大嘅「商譽」），值唔值真係好難講，計盈利似乎唔多值—但若果真係「救」咗中資，又好似變咗「好值」。

19. Anyway，以上呢啲嘢，係唔多影響股價嘅。始終佔港交所嘅生意都仲係少。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6