美股又跌過，就業好定差？通脹見頂冇？9月加幾多息？Tesla又話炒人又唔炒，蘋果嚟緊業績會唔會出事？非農數字就遠好過預期，但一日前嘅ADP小非農又遠遜預期，即係點？領展：上市渣10年，只收息都回本，都未計股價升咗幾倍，「長江基建又點呢？」 (Patreon)

美股又跌過，就業好定差？通脹見頂冇？9月加幾多息？

Tesla又話炒人又唔炒，蘋果嚟緊業績會唔會出事？

非農數字就遠好過預期，但一日前嘅ADP小非農又遠遜預期，即係點？

領展：上市渣10年，只收息都回本，都未計股價升咗幾倍

「長江基建又點呢？」

1. 首先同大家講一講，星期一朝早9:45分我會在Tasty Money直播節目出現，講港股（留意啲中概股星期五晚都大跌），冇乜特別，等你有個知字。

美股又跌過，就業好定差？通脹見頂冇？9月加幾多息？

2. 星期五港股冇市，齋講美股星期五晚。結果見到一嘢就逆轉返星期四嘅反彈，成個星期都仲要跌少少。

3. 睇得到嘅係，跌勢相當全面，我堆嘢就得一隻升，當然整體啲舊經濟股唔係跌太多。

4. 而星期四一啲反彈好強嘅科技股又再掉頭，的確有啲難玩。但又掉轉頭，呢啲先係好嘅時機，你以為易玩時，應該就最易中伏。

Tesla又話炒人又唔炒，蘋果嚟緊業績會唔會出事？

5. 仲有留意，Tesla同蘋果，都有啲「壞消息」，Tesla又話要炒一成人（然後又話唔係）。至於蘋果，就有投行話AppStore收入放慢，業績可能難達標，都驚驚地，因為蘋果絶少會做唔到業績。

6. 先講個跌市原因，主要係因為聯儲局官員繼續輪流噴口水，梅斯特講嘅嘢，都傾向強硬，講明局方覺得通脹未見頂，而且9月會再加息。再睇深入啲，其實佢係講未見到受控就9月再加0.5，似受控就加0.25 —而唔會唔加。留意佢係有投票權嘅。

7. 客觀地，近排不同官員嘅講話，成功打散咗之前市場估通脹見頂，或者估9月停加息嘅期望。亦令到債息升咗，難怪大市回調，科技股又有啲壓力—但我當然幾時都係樂觀，你見咁樣打晒咗啲期望，跌幅都唔係太誇張，好事嚟的。仲有而家利率期貨已經顯示市場估85%機會9月會再加0.5厘—即係已經準備好晒，若果過一排發現可能只會0.25甚至暫時，又有得再炒上添。

非農數字就遠好過預期，但一日前嘅ADP小非農又遠遜預期，即係點？

8. 另一樣值得留意嘅，當然係星期五晚出嘅非農就業數據，相當強勁，亦都令債息升，加息預期升—市場只係預期32.5萬，結果真實數字係39萬個—雖然低過上個月好多，亦其實係舊年4月以嚟最少，但遠超過預期。

9. 另外可以留意，失業率係跌到疫情後嘅新低。好似幾好？

10. 好啦，去到呢度你不禁要諗，到底經濟係好定唔好？答案係：我都唔知

11. 你可以睇我明報嘅文（Attachment 有），但我都真係完全摸不著頭腦。你見就係早兩日出嘅ADP就業數據呢？就係相當差，遠遜預期，亦係2020年2月之後最少。（而當然嗰晚美股就急升，雖然呢度嘅讀者應該對於呢啲「經濟壞消息但股市升」嘅現象見怪不怪，唔好好似出面啲友咁膚淺）

12. 咁講到尾，經濟好定差？難估，但真係叫我估，我都估係差。

13. 先唔好講之前一大堆銀行家出嚟唱淡，以及之前提到Tesla或蘋果嘅新聞，同埋之前都有唔少公司下調盈利預測（但亦唔係全部）。你就算齋睇上面啲經濟數據，細心都會見到偏淡的。失業率雖然係疫情後新低，但高過預期，市場原本係再再跌的，而家似乎失業率已見咗底準備升。至於話個非農職位數字，係高過預期好多，但只係唔知因乜個預期幾低下，你睇返數字，都已經係舊年4月以嚟最低。

14. 仲有一點，見到個工資增幅，係放慢咗—但呢個對通脹可能係好消息。

15. 即係點？都即係，好不明朗的。但幾時都係不明朗架啦，搵日詳細講，或者睇住呢篇文先—幾時都係不確定架啦，只係有時啲人「以為」自己睇得清。

領展：上市渣10年，只收息都回本，都未計股價升咗幾倍

16. 既然仲有篇幅，港股方面，可以講返多啲領展，業績速評早兩日已講。早幾日有得同管理層食飯，有啲第一手嘅資料。立立雜雜咁在呢度講下。

17. 首先，公司當然都相當自豪咁多年都冇減過派息。亦都真係有提到，叻過佢地嘅，只有長江基建1038（其實兩間都冇減過，但長江基建1996年上市，領展就2005年）

18. 另外，公司有提過一樣幾有趣嘅嘢。公司上市係2005年，如果你招股價買，你渣10年，只係收息已經拎返當年嘅招股價—未計中途股價升咗4倍。當年招股價只係10蚊（仲要有折），而家一年派息都3蚊，如果你早買嘅，真係極之爽

19. 當然你會覺得，呢啲係倒後鏡。而家買可能你就要好多年先做到「只收息就拎返成本」呢樣嘢，但呢個例子值得你去細諗—只要間公司一路成長，派息慢慢加，根本你中途乜都唔使理。（不過當然而家好多公司唔興派息，特別係美股，呢個係另一個故事了）

「長江基建又點呢？」

20. 然後我同時快手計過下，你估下長江基建嘅情況又點？

21. 招股價12.65，派息紀錄呢度，太舊嘅懶搵，「回本」冇領展咁快，但大約都係15年左右—齋收息喎！

22. 我覺得呢啲例子，好好咁示範咗，投資係乜嘢一回事。你最需要嘅係時間，仲有耐性，留意兩樣嘢唔係完全一樣。可以時間係必要條件，你要有大回報點都要有啲時間—但就算有時間都好，都好易中途自己亂做決定。你諗下，由1996年或2005年到而家，發生過幾多事？但你根本唔使去研究咩邊個特首，咩經濟衰退，只需要搵到好嘅公司。

23. 問題係，即使係最好嘅公司，股價一樣都會上上落落。之前咪寫過，領展高位都跌過四成啦。長江基建仲勁，高位跌過近五成。你不能因為咁樣就沽走佢。而呢啲例子畀你睇到，即使係呢啲咁「穩陣」咁優質嘅股票（咁多年唔減派息喎），都可以高位跌四五成，證明畀你睇呢啲係市場嘅一部份。你根本冇得避免。因為你嘅回報就係嚟自你肯受風險。

24. 咁你話，但而家啲公司好少派息。咁兩樣嘢。第一，其實唔派息嘅公司，原理都一樣，成功嘅公司生意越做越大，可以做到一年嘅純利大過當年嘅市值。第二，美國都仲有啲收息嘅ETF—但你就唔好諗埋啲咩「穩穩陣陣收8厘息」嘅嘢—因為係冇咁嘅嘢的。

25. 仲有，之前篇文都有寫，你都好明顯見到，公司嘅增長，係冇最初上市嗰幾年咁快嘅。原因亦好簡單：因為當時政府啲公屋商場極殘，租金又極低，係有好高嘅改菩空間，加租可以倍倍聲。但而家你就只係穩定咁每年加了，所以股價回報亦冇之前咁正。

26. 另外，公司亦都有講回購，1.5億。實情以前都有做，但2021年停咗，當然因為資金唔係太充裕。我覺得呢樣幾正面，首先公司都有講覺得股價被低估。另外，做回購總好過亂咁去買啲唔夠吸引嘅項目（公司亦有講好項目唔係咁易）。加上你可以留意，公司而家嘅股價，係低過每股資產值嘅（76蚊左右）—呢種折讓唔係奇怪，但就令到公司做回購有著數。

27. 仲有，近年你見到公司衝出香港，去咗好多唔同地方，仲有唔同類型嘅物業。公司嘅出發點兩個，第一當然係香港嘅項目未必太吸引，香港嘅地產商唔缺錢，點會平賣畀你？（係當年政府先咁筍）。第二亦係因為分散，地理上分散，類型上亦都分散。正如公司講，有啲地方封城時，啲商場之類死晒，但公司有物流中心貨倉之類頂住。呢啲道理，你投資都應該學習下。

28. 而公司亦都有講，甚至有機會分拆上市—但當然只係好好好初步嘅諗法，可能或不可能發生，亦都冇任何時間表。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6