高盛總裁話經濟衝擊歷嚟最強，聯儲局話9月照會加息，小非農就業數字又差過預期，但美股低位升返700點，持倉Shopify Palantir Paypal Snap Nvidia全部反彈。風險胃納返嚟啦？微軟都盈警呀（算係），咁你點「管理」外匯風險呢又？Lululemon，業績勁。不過股價跌四成再升四成再跌四成，剩返幾多？港股：商湯強勢但不如阿里巴巴。地產股插水但太地1972強 (Patreon)

高盛總裁話經濟衝擊歷嚟最強，聯儲局話9月照會加息，

小非農就業數字又差過預期，但美股低位升返700點，

持倉Shopify Palantir Paypal Snap Nvidia全部反彈。風險胃納返嚟啦？

微軟都盈警呀（算係），咁你點「管理」外匯風險呢又？

Lululemon，業績勁。不過股價跌四成再升四成再跌四成，剩返幾多？

港股：商湯強勢但不如阿里巴巴。地產股插水但太地1972強

1. 端午放假，港股冇市，所以晏少少出，都係講返星期四港股同美股。

高盛總裁話經濟衝擊歷嚟最強，聯儲局話9月照會加息

小非農就業數字又差過預期，但美股低位升返700點

2. 美股昨晚幾值得講，走勢就強嘅，差不多全日高位收市。道指由低位收復成700點。呢個走勢其中一個原因係因為微軟下調咗個業績指引，一度跌4%，但之後倒升收市（下面詳細講）

3. 但至於你睇「消息」，絶不正面。首先係高盛總裁都出嚟唱淡經濟（留意同佢地嘅分析員睇淡係完全唔同嘅事），話衝擊歷來最嚴重，緊接住之前一日JP Morgan嘅Jamie Dimon．

4. 另外，見到ADP（所謂嘅「小非農」）就業數據都相當差，遠遜預期。照計呢啲都係經濟差嘅先兆。

5. 但同時間，聯儲局不同官員繼續口水大會。梅斯特話6月7月各加0.5厘後評估，然後9月決定加息步伐，但唔係暫停（即係，加0.25%？我估的），留意佢講到明影響經濟同股市都要壓通脹。至於布雷納德，直頭差不多講到明9月都仲會再加（留意係副主席）。

6. 兩位嘅言論都係似乎想打散市場呢排預「9月唔加息」嘅期望。但你見債息又冇乜點大升，而美股亦強勢反彈　—　可能係市況強嘅徵兆？

持倉Shopify Palantir Paypal Snap Nvidia全部反彈。風險胃納返嚟啦？

7. 個股嘅，亦都見到我堆美股差不多全部升，就得呢三隻唔升。

8. 另外，一大堆估值都幾貴，之後大跌嘅科技股，Shopify Palantir Paypal Snap Nvidia都有強力反彈。風險胃納回來了？特別留意Nvidia，之前業績展望話「差」，但只係當日盤後跌一跌，打後到而家已升返20%。一個星期咋下，

微軟都盈警呀（算係），咁你點「管理」外匯風險呢又？

9. 微軟，市值第二大嘅公司，不經不覺原來又上返2萬億市值。印象中以為股價一路好堅挺，原來都好似唔係，今年都跌咗18%，仲多過蘋果嘅17%—呢度已經睇到一樣嘢，市況唔得，你隻嘢再勁都未必有用。況且亦之前講過，估值問題，雖然真係相當難去量度咩位平同貴，但相對地睇就睇到嘅。最簡單講，如果盈利只係升咗兩三成，咁你一年股價升咗兩倍，市盈率當然貴咗近兩倍。

10. 同樣地，你見到強如微軟，根本次次業績都咁勁，公司嘅「負面消息」近乎冇。但一樣高位都跌咗30%。並唔係你點樣咩「揀股」就可以避到，市場一跌咪全部一齊跌，但好嘅公司之後可以浮返上去，跌落嚟先係好嘅買入時機。

11. 微軟出嘅消息，近乎係等於「盈警」，都有啲驚。原本公司調低啲收入同盈利指引都夠驚，仲要係微軟咁大間，仲要係非業績嘅時間講，相當少見，亦即係在下次出業績嘅7月前警告定你。

12. 所以開頭見到個頭條我都幾驚，但之後見到個原因就冇咁驚。點解出？因為匯率原因。咁呢啲實情係非戰之罪，公司好難控制嘅嘢，投資者一般唔會太在意。況且之前答讀者問題篇文，講「管理匯率風險」時都提過，你拉長嘅，匯率都係上上落落，有時對你有利有時對你不利啫，專心做好你嘅本業算啦。

13. 所以你見個股價最初跌4%，收市直頭倒升。而因為微軟都係重磅股，仲拖低埋指數，然後又係帶動埋指數跌轉升。

14. 然後你認真睇，見到不過係將季度收入同盈利下調2%左右啫。亦都同時見到，公司對呢啲嘢好著緊，爭2%都要預早話你知，費事到時做唔到預期。你亦可以反過嚟諗，既然公司咁樣做得呢個公佈，亦即係背後（扣除匯率影響）條數，係會達到預期的—只要啲分析員而家去減返個匯率影響。

15. 最後你又可以諗下，大到好似微軟咁嘅公司，都會受匯率影響，都似乎冇乜點去「管理」個外匯風險（呢度都幾億美金，雖然公司一季收入500億美金），你又何德何能，又或使乜費心機去做？好難的。掉轉講，微軟亦不可能因為有匯率風險，就唔做其他地方生意嘛。

Lululemon，業績勁。不過股價跌四成再升四成再跌四成，剩返幾多？

16. 另一隻相映成趣嘅，係LuluLemon，業績好，仲調高埋預測，記唔記得之前有啲公司出業績你又好驚經濟死晒？但至少都仲有啲公司有信心上調。留意盤後先出業績，盤後股價仲升。

17. 就咁睇，Lululemon今年只係跌咗20%，唔算太差。但實情舊年已經暴瀉，高位到低位一樣插一半。我甚至覺得跌得少，公司當時超貴，但亦當然冇微軟咁大，照計增長空間仲應該有啲。而家股價300蚊，全年盈利預9.5，32倍市盈率，貴但未去到搵笨地貴。

18. 同樣地你可以睇下個股價圖，怇呢插五成之路，好曲折，舊年11月插到今年3月，跌四成。之後反彈得幾好，彈返四成。四成喎，你點都以為「確認」見底啦？不過留意返，一隻股票跌四成後再升四成，都仲係跌緊16%—點知之後又跌四成！（又介紹返，一隻股票升四成再跌四成，又係跌咗16% ）

19. 如是者，跌四成，升四成，再跌四成—咪冇咗一半。你可以拎個圖玩下。

20. 啟示？除咗一路講嘅，再好嘅公司都有個價之外，仲留意一樣新嘅嘢：你咩「確認」見底，根本不可能。低位彈返40%喎！大把人已經話升咗好多唔敢追啦，仲唔「確認」見底？點知之後一樣可以插穿原本嘅位。

21. 再奉勸大家，你怕「買完會再跌」，想「確認」見底，根本係冇可能。你見好多好嘅公司都插六七成，亦即係話你升咗一兩倍後，都仲有機會插穿之前嘅位。唔通你要升到10倍先肯「確認」？即係斷估納指都唔會返返1000點，太古城都唔會變返1000蚊尺租—咁你錯失咗幾多嘢？

港股：商湯強勢但不如阿里巴巴。地產股插水但太地1972強

22. 港股嘅，回返少少，亦都幾靜。只講幾隻近排有講嘅。你見太古地產1972繼續強勢（我冇呢隻，只有太古19，好似之前講錯咗）。另外，商湯20呢期都好強，我都算跌眼鏡，睇死佢唔掂，結果而家同招股價比仲升咗50% —不過好戲在後頭，上市差不多半年（7月頭就夠），之後點都散啦啩？唔好而家飛入去咯。

23. 同時你見啲中概股呢排都好返唔少，亦可能我跌眼鏡。真係睇嘅，咪睇阿里巴巴，早兩日寫過，可能螞蟻上返市，你見ADR都升返唔少。

24. 最後，有堆香港地產股，恒基恒隆新世界之類，忽然星期四急跌，實情係被剔出富時FTSE嘅某啲指數，照計對業務影響等於零，金額亦唔大（好細嘅指數），但因為平時成交都唔算好多，所以股價有啲反應。照計有興趣嘅可以係機會買。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6