ivanliresearch

美股：SalesForce大升項住道指．Jamie Dimon上星期先話美國經濟強勁，而家又話「颶風」．聯儲局官員人人講嘢，越講越亂．聯儲局今個星期開始縮表，15號議息兼出經濟預測—但10號有CPI數字．港股：螞蟻又上市啦？太古19太古地產1972渣打2888強勢In KS We Trust：長實回購。FWD叫停上市．抽新股多數搵笨，美股市盈率返返去30年平均水平 (Patreon)

Published:

2022-06-02 07:28:48

Edited:

2022-06-02 07:44:21

Imported:

2022-09

Content

美股：SalesForce大升項住道指

Jamie Dimon上星期先話美國經濟強勁，而家又話「颶風」

聯儲局官員人人講嘢，越講越亂

聯儲局今個星期開始縮表，15號議息兼出經濟預測—但10號有CPI數字

港股：螞蟻又上市啦？太古19太古地產1972渣打2888強勢

In KS We Trust：長實回購。FWD叫停上市

抽新股多數搵笨

美股市盈率返返去30年平均水平

美股：SalesForce大升項住道指

1. 美股方面，今個星期連跌兩日，但跌幅唔算好大。星期二晚就係一度跌400點但收市跌幅都收窄到200點以內。

2. 個股方面冇乜特別，唯獨係SalesForce大升，昨日已經講咗，業績幾好，而估值唔係神經地貴，就股價頂得住的。呢個亦應該係道指企得硬嘅原因。

Jamie Dimon上星期先話美國經濟強勁，而家又話「颶風」

3. 比較奇怪嘅係JP Morgan嘅Jamie Dimon出嚟講話「美國將面臨經濟颶風」，夠晒驚嚇，最奇怪係冇耐前佢先話經濟強勁，唔知想點。

聯儲局官員人人講嘢，越講越亂

4. 另外當然亦有係不同嘅聯儲局官員繼續人人講嘢，實情都係……越講越亂。布拉德講嘅係話今年應該加到3.5厘，好似好鷹，但睇埋落去，佢話有需要就下年底或者後年減息。亦都講明支持未來兩次（6月7月）會加半厘，但9月就……睇情況。似乎6月7月每次半厘已成定局，變數就真係9月啦 —但又其實仲有好多時間，要轉口風都仲得。

5. 至於巴爾金講嘅，更加係講咗好似冇講，亦只係講返未來兩次加0.5厘合理，9月就等下。但你細心睇，應該見到佢嘅tone係比較溫和嘅。

6. 不過最緊要留意：布拉德今年就有票，巴爾金就冇嘅。

聯儲局今個星期縮表，15號議息兼出經濟預測—但10號有CPI數字

7. 仲有，留意今個星期三就叫做正式啟動縮表，不過應該要到15號先有美債到期，到時又睇下咩情況。但可能因為咁，你見債息已經彈咗上嚟，呢個對股市未必太好。

8. 另外嚟緊亦可以留意，話咁快又到聯儲局議息。6月15日。加息0.5厘應該人人預咗，但留意埋今次又係一年四次會出經濟預測嘅會，應該人人睇住。亦都會睇佢地會後講乜。

9. 不過更加重要嘅，係留意6月10號已經會出5月個CPI數字。上次係8.3%，再上次8.5%，所以之前先有「通脹見頂」嘅憧憬—咁又睇下到時出嘅數點。但我都係傾向樂觀嘅

港股：螞蟻又上市啦？太古19太古地產2888渣打2888強勢

10. 港股方面，留意呢啲圖係星期三市況。回返些少，亦冇乜太特別。之前嗰日都提過，繼續比較強勢嘅，太古19啦，太古地產1972啦，渣打2888等等

11. 仲有留意近期啲中資科技股有啲異動，雖然都幾難捉。一路有人問阿里巴巴，我估而家似乎係OK嘅。因為你見近期螞蟻都唔少動作，又派息，又搞咩ESG四大重點，又委任咗史美倫做非執董　—　似乎真係有得上返市。搞得成嘅，對股價都好大幫助。

In KS We Trust：長實回購。FWD叫停上市

12. 之前有講過「長和系」同埋佢個仔堆嘢，首先當然可以留意長實又再回購（舊嘅紀錄呢度），實情唔算做得好密，上次已經係5月頭。而唔好忘記到業績前（7月）又唔做得回購。不過整體回購都係好事

13. 另一方面，李澤楷隻富衞FWD，又話推遲上市。當然仲有人好多政治解讀。當年好似話想在美國上，但最後返香港上，呢個就可能有啲政治原因。但今次在香港都唔上住，原因只得一個：未啱價。熟悉李嘉誠父子嘅都應該知道。

14. 實情好簡單，市況唔好，點解要推去上市？又唔係缺錢。另外，我唔清楚佢地有幾多大陸客嘅單，但點睇都知，到真係通返關時，啲生意同條數會靚返好多，當然等埋先。

抽新股多數搵笨

15. 呢度亦引申到另一個問題：新股嘅嘢，多數都搵笨。呢隻，就可能抽得過。但十居其九都未必抽得過。點解？因為新股定價一定貴。同上咗市嘅公司唔同，上咗市嘅公司，大跌落嚟，你可以買平貨。但新股呢？一定係市況最旺時拎最貴估值畀你，市況唔好佢咪唔會上市，你冇得「平買」的

美股市盈率返返去30年平均水平

16. 趁市況靜，又同大家講下啲基木嘢。之前講開量化指標，當然亦都成日講篇舊文（好重要的），Earnings Yield Gap（有時又叫Equity Risk Premium），但普通讀者好難去計。不過講簡單啲，「市盈率」（PE，Price to Earnings）就多啲人識，即係市值除盈利，或者股價除以每股盈利。咁Earnings Yield Gap，就即係「考慮埋債息嘅市盈率」咁解。

17. 債息就成日講啦，因為隨時睇到。「市盈率」就有啲麻煩，要多啲時間先搵到，同埋記住係睇「預期」（2022，甚至2023），或者最起碼，你見我有時寫個股時，都睇T12（過去12個月）。