美股：次次加0.5厘加到通脹見2%為止，嘩，都驚驚地，SalesForce（CRM）同聯合利華Unilever。升乜？「都在預計中啦」領展業績：4.3厘息，咁多年年都加，仲有乜好討論？明明又話走資，結果港股5月埋單有得升。仲有強勢股一堆 (Patreon)

美股：次次加0.5厘加到通脹見2%為止，嘩，都驚驚地

SalesForce（CRM）同聯合利華Unilever。升乜？「都在預計中啦」

領展業績：4.3厘息，咁多年年都加，仲有乜好討論？

明明又話走資，結果港股5月埋單有得升。仲有強勢股一堆

呢兩日市況都靜啲，美股又星期一休息，所以你見我昨日出咗篇答讀者問題，答咗你地啲匯率呀，港紙呀，金管局嘅問題。可能其他讀者都有興趣，可以去睇返。

今日未必講好多市況，可能反而講多啲其他嘢。但先講星期二晚美股（星期一冇市）。

美股：次次加0.5厘加到通脹見2%為止，嘩，都驚驚地

1. 星期二美股就回返少少，但當然幾百點波幅可以不理，仲要係道指由跌400幾點變到跌200，而標指納指一度仲要倒升返。情況唔差。但當然你話忽然跌返10%，都梗係「有可能」。但真係唔使咁擔心，要驚嘅都驚咗，而家點都係買嘅時機多過沽嘅時機。

2. 最新嘅講法，又話有啲驚加息，又嚟過。但冇法，而家嘅文化就係聯儲局官員鍾意不停出嚟講嘢，但又其實個個只係「自己」立場（咁，聯儲局都要投票嘅）。最新嘅一個，係沃勒出嚟講返，未來幾次都會加0.5厘，重點係「直到通脹返到2%」，雖然只係佢個人立場，但都係幾「鷹」嘅講法。都有啲奇怪市場都唔算極大反應。

3. 不過值得留意嘅反而係，見到佢講完嘢，債息都抽返高，最新上到近2.9厘，但整體近來都冇乜點升，都仲係幾好。

4. 順帶一提，其實啲友真係專業分析，就真係會睇晒咁多個官員講嘅嘢，然後排下邊個最鷹邊個最鴿，然後再在啲點陣圖（dot plot）估下邊個係邊個，或者睇投票結果，見有3個反對會估邊3個。睇呢啲做乜？重要係可以睇到邊個開始轉軚，你咪睇到成個政策方向。不過大家冇必要玩到咁深，我亦唔會，純係增長大家見識

美股：SalesForce（CRM）同聯合利華Unilever

5. 美股個股方面，只係特別講兩隻，都比較少講。兩隻都輸緊錢嘅。

6. 首先係SalesForce，出咗業績，相當唔錯。你見盤後即時彈返唔少。之前有一期喪炒啲咩SAAS軟件股，呢隻都有，當然都跌回地球。高位插咗一半，唔算太誇張。我買時就唔係極貴，所以我大約輸30%，還好。

7. 然後你睇，即使跌咗一半，估值當然都唔平，但唔係超誇張。公司話全年每股盈利4.74，咁股價160蚊，三十幾位市盈率，當然都貴，但唔係痴線地貴。

8. 又係見到，你間公司啲生意一路正正常常，慢慢個股價都應該會返嚟嘅，要啲時間消化下個估值咯。

9. 至於另一間就聯合利華Unilever。係比較遲買嘅股票，好似舊年年尾。咁當時都唔係太貴。後來呢？當然都係輸錢，但唔算太多。計埋昨日升上嚟呢棍，輸緊5%之嘛，執到啦

10. 升乜？就特別啲。因為有個Activist Investor 入咗董事局。即係乜？中文譯做維權投資者或者激進投資者，都有啲唔適合。可能叫「搞局投資者」較好。好多時啲公司未發揮潛力，呢啲投資者，就會直接入局，可能炒咗啲無能嘅管理層，或者迫公司賣某啲嘢，或者拆某啲嘢上市，或者派特別息，總之釋放返個價值。一般無能管理層（特別係啲家族生意自己做埋CEO嘅）最怕，但對股東應係好事。

11. 呢锢亦係當初我買嘅原因之一，而家見到事情係向嗰個方向發展。

領展業績：4.3厘息，咁多年年都加，仲有乜好討論？

12. 快手講下領展業績，其實都冇乜嘢好講。都係睇個派息。你見全年派息3.06，「咁已經差不多講完」，股價反應不太大。股價71蚊，咁計到4.3厘股息，其實相當不錯。

13. 況且幾時都講，幾多厘息都唔係最重要，最重要係保唔保持到，甚至有冇得加。你派10厘息冇用的，派兩年要減嘅，一樣死得。好似匯控咁都係，隔十幾年又要還原一次，點掂？（雖然都唔係極差）

14. 而你見，領展，同長江基建1038一樣，就真係從來冇減過派息，年年加。長江基建就上市26年，領展都17年，從冇減過。呢啲係好重要嘅訊號，唔係你睇啲公司好景時就加唔好景時就唔派。

15. 然後你睇，個派息上市到而家，升咗5倍。固然早期升得快啲（嗰時唔買真租），但近10年派息都升咗一個開。股價亦差不多升一個開—仲加埋年年收4厘息仲要個息有升（用當年價計，十年後你收緊8厘息），仲想點？

16. 要咩「收息」，就買呢啲，而唔係咩「穩穩陣陣收8厘息」嘅嘢（十居其十有伏,因為世界上係冇呢回事的）。但你見，首先都係要啲時間，最近5年，股價都只係升少少（但你年年收4厘息仲想點）。另外，一樣有起落，高位跌過40%，甚至出過盈警。

17. 當然你捕到低位買嘅，仲爽，但唔易的。我就長期有月供呢隻同埋長江基建，未必賺好多，但穩陣，仲有啲息收。

明明又話走資，結果港股5月埋單有得升。仲有強勢股一堆

18. 至於恒指整體，5月頭時啲友講到點差，又話7.85又話走資，但成個5月，恒指仲要係有得升的，服未？當然係因為上星期五同星期一，兩日已經夾成千點。只要啲配置做得好，實情冇乜好驚，過去一年我買港股安心過美股好多（但當然，兩樣都買）。

19. 呢啲係早兩日嘅市況，我不一一細講（最頂升426點係上星期五，291點係星期一）。但留意在我嘅監察名單，個別公司做得幾好，信「動力」嘅可以留意下（反正在觀察名單嗰啲公司多數都有一定基本因素）。

20. 比較突出嘅，包括啲大陸內需股， 李寧2331安踏2020特步 1368等等，原因不外乎係因為大陸刺激經濟，加上啲大城市嘅封管措施完咗。另外當然就係啲中資科技股，京東9618 阿里巴巴9988網易9999騰訊700，可能因為風險胃納回歸，亦可能因為啲監管告一段落。連帶香港嘅HKTV Mall 1137 都幾強（但高位得返一半咁滯）。

21. 仲有其他我持有嘅，領展823（樓上講咗），同埋國際銀行股渣打2888 匯控 5（不外乎係講加息有利息差之類）。最後就係太古19同太古地產 1972（我都唔知升乜，因為國泰？但太古地產都升。可能只係因為夠殘，或者又係憧憬開關呀，經濟見底呀，寫字樓商場租金見底呀之類）

22. 有興趣嘅可以留意下。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6