答讀者問題：點管理匯率風險？如果唔用聯匯會忽然宣佈定有個限期？如果人人輚晒啲港紙做美金係咪金管局會冇錢？ (Patreon)

「如何管理滙率風險？」

「港元同美元掛鉤，買美股基本上升幅全收。但如果我賺其他貨幣，買當地指數ETF升幅有限，買美股就賺市蝕滙。如何處理？」

當金管局真係因為政治壓力痴咗線，改掛其他貨幣，咁會預先公佈幾時開始，定係即時生效？

金管局有既3000億「銀行體系結餘」，係講緊夠接收哂市面上最流通既「現金」（即係m1？）

但「銀行體系存款」（即係m3？）事實上係有15萬億，假如「極端情況下」個個係銀行禁錢、或者定期存款完左唔再續，將呢筆錢全部拎哂去買美金沽港元，金管局的確「有機會」唔夠錢接港元？到時就「有機會」無得玩聯繫匯率？

人人去提錢，就話你知係美國定用盧布，銀行都係會頂唔住的。但而家好多方法應付啦

1. 昨晚美股冇市，咁順手出埋呢篇，答讀者問題。

2. 實情我好少在文入面答，原因好簡單，因為你關心嘅，未必其實人關心。而且有時有啲問題好空泛，「中國經濟點睇」「XXX（冧把一個），OK？」，實在唔知點答。

3. 但今次破例，因為三條問題都同上星期篇驚世大作有關。亦都似乎唔少人關心。聯匯呀，港紙呀之類。咁我由淺入深，問題未必成條貼出嚟，拎個大約意思

仲有，答一條問題我都會千幾字的，所以平時好難在文答。而我唔會求其答你幾隻字算

「如何管理滙率風險？

4. 幾好嘅問題。短答案，冇得管理，你以為有嘅，都只係呃你。之前都寫過，你買咩美金計價嘅土耳其俄羅斯ETF，你「以為」冇匯率風險啫，實情一樣，因為你背後嘅嘢都係土耳其俄羅斯資產。

5. 正如你話買LV買愛馬士股票，若唔計咩交易費用之類，你買歐洲股，同美股，亦係一樣（但可能流通量唔同），因為背後都係嗰間公司。

6. 正如，你在渣打，在香港買定英國買，亦係一樣。你發現英國股價好似跑贏香港，係因為英鎊對港紙同美金跌咗嘛。

7. 亦都根本同樣地，扯，你買大陸股嘅，全部都已經係食緊人民幣風險架啦。只係人民幣波動唔大，你覺得冇風險之嘛。

8. 而我仲想借題發揮：絶大多數人，根本唔係想「管理風險」，只係想輸打贏要。你真係問管理風險，咁我答你，做到的，例如我在香港買日本股，我驚yen跌會賺價蝕匯喎，咁我可以點？得，你可以去做外匯，沽定yen，咁yen跌我咪有得賺返啲—但你應該知問題，如果到啲yen升，咁你明明日本股係賺匯—但外匯嗰邊又輸錢。咪一樣

9. 見到問題未？你冇得咁著數，外幣跌時你就想冇風險，但升嗰時你又想賺的—而正如上面講，如果你真係想冇風險，你係可以沽yen對沖，但十個有九個都唔會做咁。正如你拎住一堆港股，「我驚市跌」，咁有啲人話咩買put或熊證或沽期指對沖，亦係多餘—咁升嗰時你咪又係輸錢。

10. 閣下唔係對沖基金唔係銀行，唔使搞咁多嘢。

11. 而真係要我認真講，基金或大企業嘅做法呢，佢地就會係take一啲自己熟悉嘅risk，其他就去「管理」，例子？例如航空公司，咪會對沖油　—但到輸錢時咪又畀人鬧。

12. 或者有啲好專門嘅對沖基金，我只係賭event，例如收購，咁我唔想有market risk，佢地就會market neutral—例如我買Twitter但沽納指咁，但明顯唔係大家想要做嘅嘢。

13. 咁你話，我用港紙買非美股嘅外國股咪好大風險？都係架，幾時都係多咗一樣嘢。但首先，扯，你買大陸股都已經係有呢個問題架啦！你冇留意之嘛。聽日人民幣跌30%丫，你堆中資股唔散？

14. 而我呢呢個講法，可能好多讀者未必同意：但，根本冇乜人可以睇匯價睇得好準（可能索羅斯例外啦下），睇股票我都仲覺得有啲人識，但匯價嘅，個個都係亂講架啦。我冇見人可以賭外匯長期贏大錢。

15. 不過好嘅地方係，匯價嘅嘢，拉長嚟講（我講十年，甚至廿年），一般都係zero sum game啫，大貨幣嘅，你好少見到真係升足跌足廿年的。而同股市嘅回報比，呢啲匯率波動，一般唔係大影響　—　但你買一年，就梗係會大影響。

16. 送呢個圖畀你，1993年至2002年嘅美匯指數，實情都係：上上落落。當然你真係高位同低位都可以爭一截，但，你開個恒指或標指圖，就知道乜乜嘢增長，乜嘢係zero sum game（恒指1993年10000點，標指1993年500點）

「港元同美元掛鉤，買美股基本上升幅全收。但如果我賺其他貨幣，買當地指數ETF升幅有限，買美股就賺市蝕滙。如何處理？」

17. 呢度係延續上一個問題。個問題問得幾好。首先港紙嗰部份，大家同意啦。因為我在香港，亦搵港紙，亦多數（但唔係全部）讀者係咁，所以你見我多數都係港紙本位思考

18. 但如果你係在其他國家生活，賺當地貨幣嘅，咁點呢？

19. 讀者講嘅嘢，我係唔同意的。

20. 首先，你點知買當地股票，升幅一定不及美股？雖然我相信應該係，長線美股應該跑贏，但，如果我錯呢？況且，你係咪可以睇長線？十幾廿年嘅長線喎。你見我都有信心美股長線跑贏兵世界，但我都冇100%美股。

21. 第二，當你在澳洲或日本咁，搵當地錢，但你點知買美股會蝕匯？今年係啫，但下年呢？美金呢排好強，但之前弱勢又點計？呢個月美匯都弱返晒啦。上面都貼咗個圖，咁多年，咪又係升升跌跌

22. 結論，我覺得係唔使花心機去諗呢啲嘢—因為你根本冇法避開（除非你走去做外匯對沖，但樓上講咗，到升嗰時你咪又賺少咗，除非你睇外匯好準—而我冇乜見過有人睇外匯長期都準）。

23. 個秘訣係，睇長線，咬大啖。你見股票指數，有得十幾廿年，升幾倍唔難，唔止美股可以。咁我升得300%，我仲使唔使理我澳紙或日元對美金輸咗20%？好似就冇咁大關係了。例如上面都提過，標普指數1993年係500點，而家4000，我仲會唔會理乜當中我係用乜貨幣買？

當金管局真係因為政治壓力痴咗線，改掛其他貨幣，咁會預先公佈幾時開始，定係即時生效？

24. 呢個係第二個讀者。首先，個假設我係唔同意嘅，你即係問我如果聽日核爆咁今日買乜股，我都有啲難答。上次都解過，你掛美金有機會畀人制裁，咁掛ERUO就唔會？香港既然係中華人民共和國特別行政區，「咁日日都有機會畀人空襲架啦」，台灣人日日都可以話大陸打過嚟添，但人地係咪日日縮在防空洞？台股有冇日日跌？

25. 就算係，都只會係因為迫不得己（例如聽日美國宣佈香港邊個拎住美金就槍斃啦下，你話假設痴咗線嘛），而唔係「政治壓力」。要有政治壓力的話，大陸要做，幾時到金管局可以反對？

26. 但好，「當聽日核爆」—咁以往嘅經驗話你知，梗係一次過。人民幣匯改一次性升值，當年亦係即時生效，事前冇漏半點風聲。金管局2005年「優化」聯匯，即係開始咗7.75-7.85，亦係即時生效，冇任何風聲。近少少，2015瑞士法郎同歐元算係脫勾，當然都係即時生效，冇任何風聲。

27. 答到你問題未？但如果你堅持，「今次唔一樣」，咁我唔知你想要咩答案了。但的確，未必次次一樣，我可以話你知嘅就只係「正路」嘅情況。

如果極端情況人人同時去拎晒啲存款，走去買美金，金管局會唔會唔夠港紙

28. 第三個問題，再易答啲。有人問如果極端情況人人同時去拎晒啲存款，走去買美金，金管局會唔會唔夠港紙。

29. 咁，實情你可以睇多次篇文。香港有幾多港紙，就有幾多嘅等值美金，你邊度變多啲港紙出嚟？仲有，你提嘅錢，係銀行嘅錢，唔係金管局嘅錢嘛老細！你提幾多錢，都係由銀行拎，同金管局係冇關的。

30. 你應該睇嘅，係「負債證明書」，銀行嘅所有港紙，背後都係有同等美金支持的。實情係more than that。

金管局有既3000億「銀行體系結餘」，係講緊夠接收哂市面上最流通既「現金」（即係m1？）

31. 仲有，讀者搞亂咗好多嘢。銀行體系結餘，唔係「市面上流通嘅現金」，亦唔係M1。銀行體系結餘係3000億，M1係超過35000億，明顯唔係同一回事。M1係流通貨幣加埋活期存款。可以睇多次篇文，銀行體系結餘，就只係成堆銀行入面keep住嘅嘢，係好細的。都話一人5萬蚊，唔好忘記早兩年一度可以去到近700億，一人一皮嘢。

但「銀行體系存款」（即係m3？）事實上係有15萬億，假如「極端情況下」個個係銀行禁錢、或者定期存款完左唔再續，將呢筆錢全部拎哂去買美金沽港元，金管局的確「有機會」唔夠錢接港元？到時就「有機會」無得玩聯繫匯率？

32. 同樣地。銀行體系存款15萬億，亦唔完全等於係M3，不過兩者都相當似。M3係16萬億，你見銀碼同銀行體系存款差不多。M3就大約係流通貨幣 + 活期存款 + 定期存款 再加埋啲存款證。咁所以，就同銀行體系存款差不多的。

33. 呢啲M乜M物係乜？你可以慢慢睇定義，係有啲深。但你唔知佢地「係乜」都好，你要知佢地「唔係乜」。

人人去提錢，就話你知係美國定用盧布，銀行都係會頂唔住的。但而家好多方法應付啦

34. 仲有，最後補多句，個「銀行體系結餘」唔係「金管局」「有」嘅，金管局只係一個監管機構，唔會拎走咗你啲存款，呢啲嘢，咪就係在「銀行體系」，由不同嘅銀行擁有（嚴格上，係存款者擁有，放在銀行度啫，所以在銀行資產負債表上，存款係「負債」）

35. 不過話說回頭，如果人人同時去拎晒啲存款，銀行當然有問題—但呢個係流動性嘅問題，同咩匯率呀，金管局無關。亦因為差不多全世界嘅銀行都會將啲錢一路碌上碌，係冇時同時應付「所有人」一齊去拎錢嘅。美國嘅銀行唔得，英國亦唔得，同你行咩匯率完全無關。

36. 但當然，銀行有好多方法限制你提款，要你慢慢排隊又得　—　而講咗咁耐，你堅持話「有風險」嘅，咁你落咗去樓下排隊未？你估下啲錢放在曲奇餅罐唔見咗或唔記得咗嘅風險大，定銀行爆煲機會大？況且，仲有存款保障計劃嘛。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6